Okitobwa 23

E Koreaki Te Euangkerio Inanou?

Ieremia 30–33; 36; Baebaeti 1; 3

Te Uaia ni Marooro

E kairaki irouia kaain te beretitentii n te kooram ke te kiraati; 10–20 te miniti

Ni moan waakin te bootaki, ikotaki n taekina Aia Botoniango Ataeinnaine ke Aia Botoniango Kaain te Kooram n te Nakoanibonga ae te Aaron. Ngkanne kaira te marooro iaon te mwakuri ni kamaiu ao ni karietataaki ni kabongana teuana ke e raka riki titiraki aika inano ke aika bon am kario (taraa Aeniboki ni Kabuta, 10.2, 11.2, ChurchofJesusChrist.org). Bairei kawai aika ko na karaoi n te bwai ae ko maroroakinna.

• Maiuakina te euangkerio. Tera ae ti maroroakinna n te tai ae nako, ao tera kakao ke mwakuri ake a karaoaki? Tera ae ti a tia ni karaoia iaon kakao ao mwakuri aikanne?

• Tararuakiia naake iai kainnanoia. Tera ae ti kona ni karaoia ke n taekinna ni karoko irouia naake a namakina te maroa ke te raroa mairoun Tamara are i Karawa?

• Kaoia ni kabane bwa ana karekea te euangkerio. Tera kawai tabeua aika ti kona iai ni buokiia tabeman bwa a na namakina ana tangira Iesu Kristo?

• Katiteuanakiia utu ibukin te maiu ae akea tokina. Tera iango aika ti kona n tibwauaia ma ngaira n tatabemaniira bwa e na kakorakoraia ara utu?

N tokin te reirei, ngkana e riai, karaoi waaki aikai:

• Kaota am koaua n reirei ake ko anga.

• Kauringiia kaain te kiraati ke te kooram iaon babaire ao kakao ake a karaoi n tain te bootaki.

Reirei te Reirei

Kairaki iroun te tia kairiiri ae ikawai ke te kairake; 25–35 te miniti

Katauraoiko n te Maiu n Tamnei

Te Uea e tuanga te burabeti Ieremia bwa a na roko boong, E na ikota Iteraera ao e na karaoa te “berita naba ngkai” ma Ana aomata. E katanoata, “N na karina au tua i nanoia, ao n na riki bwa Atuaia, ao ngaia a na riki bwa au aomata” (taraa Ieremia 31:31–34). Boong aikanne bon te bong aei, ao ngaira bon ana aomata te Atua. Reirei aikai a kona ni wirikiriki nakoim—ao naake ko reireiniia—n titiraki, Tera ae nanonaki ibukin te euangkerio bwa e na koreaki inanou? E koreaki te euangkerio inanou? Ngkana e aki, tera ae I kona ni karaoia ibukina?

Iangoia bwa ko na kanga ni buokiia kaain am kiraati ke te kooram n iangoi titiraki aikai bon ibukiia. Ni katauraoi n reirei, ko kona ni kunei rongorongo man Ieremia 30–33; 36; man ana rongorongo Beretitenti Russell M. Nelson “Kariaia te Atua Bwa Boton Ara Iango Inanon Maiura” (Liahona, Nobembwa 2020, 92–95); ao man ana rongorongo Unimwaane D. Todd Christofferson “When Thou Art Converted (Ngkana Ko a Tia n Rairaki)” (Riaona, Meei 2004, 11–13).

Ngkana ti tangira te Uea ao n ukoukoria n reirei Irouna, te euangkerio e na koreaki i nanora.

Te Uaia n Reirei

Kaungaia kairake bwa a na maroroakina Ieremia 31:31–34. Karaoan aei, ko kona n anganiia te beeba ae taian aati ma tabeua titiraki aika koreaki iaoia bwa tera ae nanonaki ni karekea te euangkerio inanora, n aron ake a kuneaki iaan “Katauraoiko n te Maiu n Tamnei.” Te mwakuri n tatabemaniia, ni kakauoman, ke inanon kurubu aika uarereke, a kona kairake ni wareki kiibu aikai man Ieremia ao n iangoi bwa a na kanga ni kaekaa te titiraki aei. Kariaia bwa a na tibwauai aia titiraki ao kaekaaia aika a reke n aia iango. Aika oti inano bon iango riki tabeua aika a kona ni buokiko n reireiniia kairake aron korean te euangkerio i nanoia.

• Ngke e anga riki ana kabanea n reirei Mote nakoia tibun Iteraera, e kaumakiia bwa a na karekei ana taeka te Atua inanoia. E reireiniia naba tabeua kawai aika a na kona iai ni karaoa te bwai aei, n aron ae kuneaki inanon Te Tua-Kaua 6:3–9. N te kiraati ke te kooram, botaki ni wareki kiibu aikai ao maroroakin kawai aika ti kona ni karaoi n aron are e reirei Mote. Ibukin iango tabeua, e kona am kiraati ni mataku n te witeo “Come, Follow Me: These Words” (ChurchofJesusChrist.org). Am kiraati ke am kooram a kona naba ni kamatebwaia Aramwa 5:14, 26–35 ni kakaea te bwai ae reiakinna Aramwa bwa ti na kanga ni kawakina te euangkerio inanora.

• N ana rongorongo “When Thou Art Converted (Ngkana Ko a Tia n Rairaki),” Unimwaane D. Todd Christofferson e kabwarabwara te bwai ae ti kona ni karaoia ni korea te euangkerio inanora. Tera ae ti reiakinna man moan barakarabe ake aua ibukin nanon karekean korean te euangkerio inanora? Ko kona ni kaoia kairake n tatabemaniia nako bwa a na wareka teuana ke e raka riki nikiran barakarabe ao kakaei bwaai aika ti kainnanoi ni karaoi bwa e aonga n riki te bwai aei. Tera oin raoi taben te Tia Kamaiu? Tera tabera ae ti karaoia? Kaungaia kairake bwa a na tibwauai aia reke, n raonaki ma otaia aika a karekei. Tera taneiai aika a tia ni buokira ni karekea te euangkerio ni koreaki inanora? Tera kawai aika ti na karaoi bwa ti aonga ni kawakin ara berita aika tabu?

• Beretitenti Russell M. Nelson e kabwarabwara te taeka ae Iteraera “e kaineti nakon te aomata are iai nanona ni kariaia te Atua bwa boton ana iango teuanne ke neienne inanon maiuia” (“Kariaia te Atua Bwa Boton Ara Iango Inanon Maiura,” 92). Ko kona ni kaoia kairake bwa a na ukoukori moan barakarabe ake onoua n ana rongorongo Beretitenti Nelson ao kabanean mwakoron te rongorongo ae moanaki ma “Te titiraki ibukira n tatabemaniira nako.” Tuangiia bwa a na kakaea te bwai ae e na buokiia n ataia bwa tera nanon “kariaia te Atua bwa boton ara iango” inanon maiuia. E kanga ara namakin ao ara mwakuri ngkana ti kariaia te Atua bwa e na riki bwa boton ara iango inanon maiura? Tera ae reirei Beretitenti Nelson ibukin karekean te euangkerio ni koreaki inanora n roota ara kekeiaki n ikotakiia Iteraera?

Karaoia inanon te Onimaki

Kaungaiia kaain te kiraati ke te kooram ni iangoi ao ni korea mwiin te bwai are a na karaoia ni karaoi nanon namakin aika a karekei n te bong aei. Ngkana a tangiria, a kona n tibwauai aia iango. Kaoia bwa a na iangoia bwa e kanga mwakurian aia namakin ni kakorakorai aia reitaki ma Tamara are i Karawa ao Iesu Kristo.

Reitan Bwaai n Mwakuri

• Henry B. Eyring, “Write upon My Heart (Ni Koreaki Inanou)” (Riaona, Nobembwa 2000, 85–87)

• Linda K. Burton, “Is Faith in the Atonement of Jesus Christ Written in Our Hearts? (E Koreaki te Onimaki n Ana Mwakuri ni Kamaiu Iesu Kristo Inanora?)” (Riaona, Nob. 2012, 111–15)

Reirei n ana Kawai te Tia Kamaiu

“Te reirei are e kuneaki inanon booki aika tabu ao n aia taeka burabeti ni boong aika kaitira iai mwaakana ni bitii naano ao ni kakorakora te onimaki. Ngkai ngkoe ao naake ko reireiniia ‘a na kata tamaroan ana taeka te Atua,’ ko na kunea bwa iai ‘a na konabwai ni kairia aomata bwa a na karaoa ae e [eti] ’ (Aramwa 31:5)” (Teaching in the Savior’s Way, 5).