Nobembwa 13

N na kanga ni Karekea Nurakinan Tamnein te Uea?

Otea 1–6; 10–14; Ioera

Te Uaia ni Marooro

E kairaki irouia kaain te beretitentii n te kooram ke te kiraati; e na kabanea 10–20 te miniti

Ni moan waakin te bootaki, ikotaki kaokioka n atonga Ana Botoniango te Bootaki n Ataeinnaine ke ana Botoniango Te Nakoanibonga ae te Aaron. Ngkanne kaira te marooro iaon te mwakuri ni kamaiu ao karietataaki kabongana teuana ke raka man taian titiraki inano ke oin am titiraki (taraa Aeniboki ni Kabuta, 10.2, 11.2, ChurchofJesusChrist.org). Babaire ao mwakuria te bwai ae maroroakinaki.

• Maiuakina te euangkerio. Tera te bwai ae ti a tia n rinanona mai mwaina ae e a tia ni kakorakora ara koaua?

• Tararuakiia naake iai kainnanoia. Antai ae e kainnanoa ara ibuobuoki ao ara tataro? Tera ae ti namakina iai te kukurei ni kan buokiia?

• Kaoakiia ni kabane bwa a na karekea te euangkerio. Ti na kanga n riki bwa te oota nakoia kaain ara utu ke raoraora ake aki onimakina ara koaua?

• Katiteuanakiia utu in akea tokina. Ti na kanga ni kaota riki te tangira ao boutoka ibukiia ara utu ni karaoa te tamaroa ae kaokoro inanon mweengara?

N tokin te reirei, ngkana e riai, karaoi waaki aikai:

• Kaota koauan te reirei are e reiakinaki.

• Kauringa te kiraati ao membwa n te kooram iaon babaire ao kakao ake a karaoaki n tain te bootaki.

Reirei te Reirei

Kairaki iroun te tia kairiiri ae ikawai ke te kairake; 25–35 te miniti

Katauraoiko n te Maiu n Tamnei

Bon akea te titraki bwa ti maiu inanon te tai ae kakamaaku ao ni mangaongao. Te burabeti ae Ioera n te O Tetemanti e kabwarabwara ara tai—ana “bong te Uea”—bwa kanga aron “te bong n te rootongitong ao te kananoanga” ao “e bati ni kakamaaku” (Ioera 2:1–2, 11). Ma tiaki nanona ae ara bong ea kabwara nano. Iangoa te berita aei iroun Unimwaane Dieter F. Uchtdorf: Tao iangon taai tabetai ti na namakina ae ti rabunaki ma kakatai n te maiu aei ke ti otabwaniniaki man namakinan te rootongtong, a na tangira te Atua ao taian kakabwaia man ana euangkerio Iesu Kristo ae e a tia ni kaokaki e na karokoi bwaai aika a kangaanga iangoaia bwa a na riki.” (“Te Atua E na Karaoa te Bwai Teuana ae Kangaanga Iangoana,” Riaona, Nob. 2020, 52).

Ngaia are ngkana kam noora te rotongitong ao te kananoanga man ara tai, uringa bwa te Uea e a tia naba ni beritani—kakabwaia aika korakora—ae a kangaanga iangoakiia: “N na nurakina Tamneiu i aoia aomata ni kabane; ao natimi mane ma natimi aine a na mi ni burabeti” (Ioera 2:28; taraa naba Iotebwa Timiti—Rongorongo 1:41). Taraa te berita ae onoti are Tamnein te Atua e na nurakinna iaoia kairake n ataeinimwaane ao kairake n ataeinaine. Bukin tera ko namakina kakawakina ibukiiia koraki ake ko reireiniia n oota n anne? Iangoia raoi ngkai ko wareka Ioera 2 ao ana marooro Unimwaane Uchtdorf inanon am katauraoi n angareirei.

Te Uea e berita bwa inanon te kabanea ni bong, E na nurakina Tamneina ao “natimi mane ao natimi aine a na mi ni burabeti” (Ioera 2:28).

Te Uaia n Reirei

Ni buokiia koraki ake ko reireiniia n oota raoi iaon Ioera 2:28–29, ko kona ni katuka te bwai inanon te boora ao tuanga temanna nurakina te ran iaona. E kanga aei ni buokiira n oota bwa tera ae e nanonaki ibukin te Uea n “nurakina [Tamneina] i aoia aomata”? E kanga taetae ni burabeti n Ioera 2:28–29 ni kakoroaki nanoia? Aikai tabeua iango are e na kona ni buokiia kairake n oota raoi bwa e kanga te Uea nurakina Tamneina n te bong aei.

• Koroboki aika tabu e rekootin mwaitin bwaai aika ana riki ngkana te Uea e nurakina Tamneina iaon Ana aomata. Rinanoan tabeua man bwaai aikai e kona ni buokiia kairake n oota bwa a na kanga ni karekea Tamnein te Atua nurakinaki inanon maiuia. Iangoia ni korea tamnei nnen te ran iaon te burakibooti ae baro mai iai te ran ao tuangiia tatabeman ke kurubu aika uarereke ni wareka teuana ke raka man mwakoron koroboki aika tabu inanon “Reitan Bwaai ni Mwakuri.” A kona ni koroboki iaon te burakibooti n raaunia nnen te ran bwa tera ae a karaoia aomata inanon mwakoro inanon koroboki aika tabu are te Uea e kona nurakina Tamneina ao tera naba kakabwaia n rimwiina. Nningai ae ti a tia n namakina te Tamnei ni kabebeteira, kairiira, ke kaitiakiira?

• Ko riai ni korei taeka aika mairoun Unimwaane Dieter F. Uchtddorf iaon te burakibooti: “Te Atua iai te bwai teuana ae kangaanga iangona n ana iango i bon ibukim ao te Ekaretia ni bwanin—te mwakuri ae tamaroa ao kamiimi” (“Te Atua E na Karaoa te Bwai Teuana ae Kangaanga Iangoana,” 53). Iangoia n tuangiia kairake n taraa ana marooro Unimwaane Uchtdorf ibukin kangaangan iangoan kakabwaia are e anga te Atua nakoia aomata inanon koroboki aika tabu imwiin taai ni kangaanga. Tera ae e reireiniira Unimwaane Uchtdorf bwa ti na karoia n te aro are ti na kona ni karaoa ara babaire aika tamaroa ngkana ti kaaitarai kangaanga? Kaoia kairake ni karoa te riiti ni karinanii bwaai ake a “kangaanga iangoaia” are te Atua iai n ana iango ibukira. Kaoiia koraki ake ko reireiniia n iango bwa tera are a tangiria ni karaoia ni karekei kakabwaia aikai.

• Iangoia ni kaota te witeo “President Nelson: Hear Him—Personal Revelation” (ChurchofJesusChrist.org). Tuangiia kairake n ongora ibukin atatai aika nano bwa e kanga te Tamnei n taetae nakoira ao E kanga ni kakabwaiai maiura. A kona naba n rinanoa ana marooro Beretitenti Russell M. Nelson“Te Kaotioti ibukin te Ekaretia, Te Kaotioti ibukin Maiura” (Riaona, Meei 2018, 93–96). Tuangiia n tarai kaeka nakon titiraki n aron aikai: E kanga Beretitenti Nelson ni ukora ao ni karekea ana kairi te Tamnei? Tera ae ti reiakinna mairoun Iotebwa Timiti n taekan kukurein te Atua n taetae nakoia Natina? Tera ae karaoia Beretitenti Nelson ni kaumakiira bwa ti na karaoia? Tuangiia kairake taekan te tai ngke ko namakina te Uea n nurakina Tamneina. Kaoiia n iangoi raoi taneiai are a tia ni karekea ao, ngkana a namakina te mweengaraoi n tibwauaia.

Karaoia inanon te Onimaki

Kaunga te kiraati ke membwa n te kooram bwa a na iangoi man korei baike a na karaoi n mwakurii namakin ake a karekei n te bong aei. Ngkana a tangiria, a kona n tibwauai aia iango. Kaoiia n iangoa taekana bwa e kanga mwakurian aia namakinan are e na kakorakorai reitakiia ma Tamara are i Karawa ao Iesu Kristo.

Reitan Bwaai n Mwakuri

• Mwakuri 2:1–6, 14–21; Iakobwa 7:1–8; Motiaea 4:1–3, 19–20; 18:7–11; Aramwa 19:14, 28–36; Ereman 6:34–36; Tua ma Berita aika Tabu 19:37–41

Reirei n ana Kawai te Tia Kamaiu

“N raona buokakiia taan reiakinaki n namakina ao ni kinaa te Tamnei, buokiia ni mwakuri iaon wirikiriki ake a karekei” (Teaching in the Savior’s Way,10).