Okitobwa 9

Bukin Tera E Riai Bwa E na Rangi ni Kakawaki ao Ni Moanibwai Iesu Kristo Inanon Maiu?

Itaia 58–66

Te Uaia ni Marooro

E kairaki irouia kaain te beretitentii n te kooram ke te kiraati; 10–20 te miniti

Ni moan waakin te bootaki, ikotaki n taekina Aia Botoniango Ataeinnaine ke Aia Botoniango Kaain te Kooram n te Nakoanibonga ae te Aaron. Ngkanne, irarikin are kam na marooro imarenami iaon te kainano ae e onoti n te kiraati ke te kooram, ko na tangiria ni maroroakin bwaai ake a taekinaki ao botoniango man te maungatabu ni kabuta. Titiraki aika imwina a kona n ibuobuoki.

• Tera botoniango ke rongorongo aika a kakaawaki nakoira? Tera ae kakorakora ara onimaki iroun Iesu Kristo?

• Tera ae kakorakora ara koaua irouia burabeti aika maiu? Tera ae ti namakinna bwa ti na riai ni karaoia ibukin te bwai ae ti reiakinna ke n namakinna?

• Tera ae ti kainnanoia ni karaoia n te kiraati ke n te kooram n uring ao ni karaoi nanon reirei ake ti ongo n te maungatabu ni kabuta?

N tokin te reirei, ngkana e riai, karaoi waaki aikai:

• Kaota am koaua n reirei ake ko anga.

• Kauringiia kaain te kiraati ke te kooram iaon babaire ao kakao ake a karaoi n tain te bootaki.

Reirei te Reirei

Kairaki iroun te tia kairiiri ae ikawai ke te kairake; 25–35 te miniti

Katauraoiko n te Maiu n Tamnei

“N na bati ni kimareirei iroun te Uea, e na kakatonga tamneiu iroun Atuau,” e taku Itaia, “bukina bwa E kunnikaiai ni kunnikai aika bwain te maiu, E rabunai n te rabuna ae te raoiroi” (Itaia 61:10). Bukin tera ko “kakatonga i nanon te Uea”? N aron Itaia, ngkana ti ata te bwai ae e a tia te Uea ni karaoia ibukira, ti kimwareirei, ao ti taetaekin ana “atataiaomata te Uea, ma kamoamoan Uea” (Itaia 63:7).

E kanga aia namakin aika ko reireiniia iaon te Tia Kamaiu? Tera ae kona ni buokiia n namakina te tangira ae korakora riki ao te rau Ibukina? Tera ae na kona ni buokiia n namakina Ana tangira? Ngkai ko iangoi titiraki aikai ao ni wareki Itaia 58–66, ko na rinanon naba ana rongorongo Unimwaane Mathew S. Holland “Ana Bwaintituaraoi te Nati ae Rianako” (Riaona, Nobembwa. 2020, 45–47) ao ana rongorongo Titita Cristina B. Franco “Mwakan Iesu Kristo ni Kamaiu” (Riaona, Nobembwa 2020, 60–62).

Ngkai ti reiakina riki taekan te Tia Kamaiu, ti kaungaaki bwa ti na Karaoia bwa boton ara taratara ni maiura.

Te Uaia n Reirei

Ngkai kaain te kiraati ke te kooram a reirei taekan ana mition Iesu Kristo ae kanakoaki bwa e na kakoroa bukina, a na rangi ni kaungaaki riki ni karika te Tia Kamaiu bwa boton aia taratara ni maiuia. A kona n ukoukora Itaia 61:1–3 ao ni korei iaon te boote te bwai ae rineaki iai te Tia Kamaiu bwa e na karaoia (taraa naba Ruka 4:16–20). E kanga te Tia Kamaiu ni kakoroi nanon mwakoron ni kabane Ana mition? E kanga ni kakoroi nanoia ni maiura ngkai? Iango aika inano a kona ni buoka am kiraati ke am kooram n reitanako te marooro bwa bukin tera Iesu Kristo e riai n riki bwa boton ara taratara ni maiura.

• N te maungatabu n tainako ao e na iai rongorongo aika a kakoaua Iesu Kristo. Ko kona ni kaoia tabeman kaain te kiraati ke te kooram bwa a na tibwaua te bwai ae a reiakinna ibukin te Tia Kamaiu n tain te maungatabu ni kabuta. Kaungaia bwa a na tibwauaia bwa e kanga aia namakin iroun te Tia Kamaiu ibukin te bwai ae a reiakinna.

• A kona booki aika tabu ni buokiia kairake ni kaotaia bwa bukin tera ngaki e riai te Tia Kamaiu n rangi ni kakawaki ao ni moanibwai ni maiuia. Ko kona ni koreia iaon te boote Bukin tera Iesu Kristo e riai bwa e na rangi ni kakawaki ao ni moanibwai inanon maiu? Tuangia kairake bwa a na tibwauai aia iango. Ngkanne ko kona n tuangiia (n tatabemaniia ke inanon kurubu) bwa a na ukoukori booki aika tabu iaan “Reitan Bwaai n Mwakuri” ni kakaei rekeia riki tabeua. Kaoia kairake bwa a na tibwaua te bwai ae a reiakinna ao bukin tera e uaana nakoia.

• Iangoia n titirakiniia naake ko reireiniia bwa a na kabwarabwara te bong ae moan te kakawaki ni maiuia. Tera te bong ae moan te kakawaki n te rongorongo? Kaoia bwa a na kakaea te bwai ae taekinna Unimwaane Dieter F. Uchtdorf bwa te bong ae moan te kakawaki man rinanoan ana rongorongo “Nooria te Aomata!” (Riaona, Meei 2018, 107–10). Kaungaia kairake bwa a na kakaei kakabwaia are e beritan Unimwaane Uchtdorf nakoia naake a “noora” Iesu Kristo. A kona naba n tibwaua te bwai ae a karaoia ni karika te Tia Kamaiu bwa boton aia taratara ni maiuia ni katoa bong. Ko kona ni kaungaia n iangoa te bwai ae a na kona ni karaoia ae na kaniia riki nakon Iesu Kristo ao ni katea te kouru ibukin karaoana.

• Ngkana iai ae titirakiniira bukin tera ngkai ti onimaki iroun Iesu Kristo, tera ae ti na taekinna? Kaungaia kairake bwa a na tibwauai aia iango ao ni koroi iaon te boote. Ko kona naba ni kaoia bwa a na rinanon “The Living Christ: The Testimony of the Apostles” (ChurchofJesusChrist.org) ke “The Divine Mission of Jesus Christ” inanon te mwakoro 3 n Preach My Gospel ([2019], 60–61). Kaungaia bwa a na tarai koaua aika bebete ae a na tibwauaia ni kabwarabwara bwa bukin tera e kakawaki te Tia Kamaiu nakoia. A kona ni karin koaua aika a kunei nakon ake a koreaki iaon te boote ao maroroakinna bwa a na kanga n tibwauai koaua aikai ma aomata aika a kinaia.

Karaoia inanon te Onimaki

Kaungaiia kaain te kiraati ke te kooram ni iangoi ao ni korea mwiin te bwai are a na karaoia ni karaoi namakin aika a karekei n te bong aei. Ngkana a tangiria, a kona n tibwauai aia iango. Kaoia bwa a na iangoia bwa e kanga mwakurian aia namakin ni kakorakorai aia reitaki ma Tamara are i Karawa ao Iesu Kristo.

Reitan Bwaai n Mwakuri

• Ioane 8:12; 14:6; I-Rom 8:35–39; 2 Nibwaai 2:3–9; 9:5–10; Aramwa 36:3, 27; 3 Nibwaai 27:14–16, 27; Ita 12:27 (Bukin tera bwa e riai Iesu Kristo ni kakawaki ao ni moanibwai nakon maiura)

• Becky Craven, “Kawakina te Nikira” (Riaona, Nobembwa. 2020, 58–60)

• “I Believe in Christ,” “I Stand All Amazed” (Boki n Anene, nambwa 134, 193)

• “Why We Need a Savior—A Christmas Message about Our Savior Jesus Christ,” “Because of Him” (witeo), ChurchofJesusChrist.org

Reirei n ana Kawai te Tia Kamaiu

“Aomata nako inanon am kiraati bon bwaai ni kakoaua aika bongana, n aia atatai aika nano, ao n aia taneiai ni maiuakinan te euangkerio. Kaoiia bwa a na tibwatibwa ao ni boutokaiia imarenaia” (Teaching in the Savior’s Way, 5).