Tebetembwa 25

Tera Tabera n te Mwakuri ni Kamaiu ao te Karietataaki?

Itaia 40–49

Te Uaia ni Marooro

E kairaki irouia kaain te beretitentii n te kooram ke te kiraati; 10–20 te miniti

Ni moan waakin te bootaki, ikotaki n taekina Aia Botoniango Ataeinnaine ke Aia Botoniango Kaain te Kooram n te Nakoanibonga ae te Aaron. Ngkanne kaira te marooro iaon te mwakuri ni kamaiu ao ni karietataaki ni kabongana teuana ke e raka riki titiraki aika inano ke aika bon am kario (taraa Aeniboki ni Kabuta, 10.2, 11.2, ChurchofJesusChrist.org). Bairei kawai aika ko na karaoi n te bwai ae ko maroroakinna.

• Maiuakina te euangkerio. Tera ae ti maroroakinna n te tai ae nako, ao tera kakao ke mwakuri ake a karaoaki? Tera ae ti a tia ni karaoia iaon kakao ao mwakuri aikanne?

• Tararuakiia naake iai kainnanoia. Tera ae ti kona ni karaoia ke n taekinna ni karoko irouia naake a namakina te maroa ke te raroa mairoun Tamara are i Karawa?

• Kaoia ni kabane bwa ana karekea te euangkerio. Tera kawai tabeua aika ti kona iai ni buokiia tabeman bwa a na namakina ana tangira Iesu Kristo?

• Katiteuanakiia utu ibukin te maiu ae akea tokina. Tera iango aika ti kona n tibwauaia ma ngaira n tatabemaniira bwa e na kakorakoraia ara utu?

N tokin te reirei, ngkana e riai, karaoi waaki aikai:

• Kaota am koaua n reirei ake ko anga.

• Kauringiia kaain te kiraati ke te kooram iaon babaire ao kakao ake a karaoi n tain te bootaki.

Reirei te Reirei

Kairaki iroun te tia kairiiri ae ikawai ke te kairake; 25–35 te miniti

Katauraoiko n te Maiu n Tamnei

E mataata man booki aika tabu ae te ibuobuoki n ana mwakuri te Uea tiaki ti ibukiia ikawai. Tamuera bon te ataeinimwaane ngke e moan taetae te Uea nakoina. Maria bon te ataeinnaine ngke e roko irouna te anera, ni katanoata ae e na riki bwa tinan te Tia Kamaiu. Ao Iotebwa Timiti bon 14 ana ririki ngke e weteaki iroun te Uea bwa e na kaoka te euangkerio. E aki maan n nako, ngke Beretitenti Russell M. Nelson e kaoia kairake ni kabane bwa a na “karinaki n ana taanga ni buaka te Uea bwa a na buoka ikotakiia Iteraera (“Hope of Israel” [aia taromauri kairake ni kabuta te aonaaba, Tuun 3, 2018], ChurchofJesusChrist.org). Ni koauana, ngke e taekinna te Uea, “Ba, au toro, tibun Iteraera” (Itaia 41:8), aio e raonaki ma Ana aomata ni berita, n raonaki ma naake n ami kiraati ke n ami kooram.

E ngae ngke ti berita bwa ti na beku ibukin te Atua ngke ti bwabetitoaki, tiaki ni kabane aomata aika kairake ae a taraia bwa ana toro te Teuea. A bae n aki kinai kawai aika onoti ae a kona ni buoka iai Ana mwakuri. Ukeri kibu n taeka inanon Itaia 41–44 ao mwakoro 1.2 n te Aeniboki ni Kabuta: Te Beku n Ana Ekaretia Iesu Kristo Ibukiia Aika Itiaki ni Boong Aika Kaitira are e na kona ni buokiia kairake n ata nanon te riki bwa a na toro te Uea.

Kairake n aomata n tatabemaniia nako a kona n ibuobuoki n te mwakuri ni kamaiu ao te karietataaki.

Te Uaia n Reirei

Itaia 41–44 a kona ni buokiia kairake n ata nanon te riki bwa a na toro te Uea. Ni moanakin te marooro, ko kona ni koroi kiibu n aron aikai iaon te boote: Itaia 41:8–10; 42:6–7; 43:9–12; 44:21. A kona aomata n tatabemaniia nako n rinea te kibu n taeka, warekia, ao n tibwaua te bwai ae e reiakinna teuanne ke neienne n nanon te riki bwa a na toro te Uea. N te kawai ra ae ngaira bon ana toro te Uea? Tera kakabwaia aika roko ngkana ti karaoa Ana mwakuri? Aikai kawai riki tabeua ni buokiia naake ko reireiniia ni uotia aomata nakon Kristo bwa taan ibuobuoki aika kakaonimaki n Ana mwakuri.

• Naake ko reireiniia a ataia bwa tera “te mwakuri ni kamaiu ao te karietataaki”? Ni buokiia, ko kona n anganiia bwa a na kamatebwaia (bon tii iroua ke n te kurubu ae uareeke) teuana mai ibuakon tiabutiekition ake aua n n te mwakoro 1.2 n te Aeniboki ni Kabuta. Tiabutiekition n tatabeua nako a kabwarabara aron te mwakuri. Tuangiia kairake bwa a na iangoi titiraki n aron aikai: Tera bwaai aika onoti ae kona te aomata ae au roro ni karaoi ibuobuoki n te mwakuri ni kamaiu aei? Tera ae a kona ara kiraati ao te kooram ni karaoia? A kona aomata n tatabemania nako ke te kurubu n tibwaua te bwai ae a reiakinna, n raonaki ma kaeka nakon titiraki.

• Naake ko reireiniia a kona ni buokaki man kabatiaan reaiakinan mwakoron te mwakuri ni kamaiu ao te karietataaki ake aua—maiuakinan ana euangkerio Iesu Kristo, tabeakiniia naake a kainnano, kaoakiia ni kabane bwa a na karekea te euangkerio, ao katiteuanaakiia utu ibukin akea tokina. A kona n rinea iterana are iai nanoia iai ao ni ukoukori tabeua bwaai aika a irekereke mangaai iaan “Reitan Bwaai n Mwakuri.” Kariaia kairake bwa a na tibwaua te bwai ae a kunea are e kaungaia ni kona n rairaki riki nakon te Uea ao ni buokiia ake tabeman bwa a na karaoa naba anne. A kona ngkanne ni karaoi babaire ni karaoa te bwai teuana are e na buoka kakoroan nanon te mwakuri aei. E kona te beretitenti n te kiraati ke te kooram ni kaira te marooro.

• Ni buoka te kairake n iangoia bwa a na kanga ni kabongana aia tarena ni uoti tamnei nakon Kristo, ko kona n tuangiia n tatabemaniia nako bwa a na kamatebwaia te mwakuri n ana rongorongo Unimwaane John C. Pingree Jr. “I Have a Work for Thee (Iai te Mwakuri ae I Katauraoia Ibukim)” (Liahona, Nobembwa 2017, 32–35). A kona n tibwauaia bwa e kanga te bwai are a reiakinna ni buoka temanna are e aki koaua bwa e kona teuanne ke neienne n ibuobuoki n ana mwakuri te Uea. Kam kona naba ni botaki n rinanon te mwakoro “Discover and Develop Spiritual Gifts (Ukorii ao Karikirakei Bwai n Tangira n Tamnei)” n ana marooro Unimwaane Pingree. E kanga te Uea ni buokiira ni ukoukori ao ni karikirakei ara tarena?

Karaoia inanon te Onimaki

Kaungaiia kaain te kiraati ke te kooram ni iangoi ao ni korea mwiin te bwai are a na karaoia ni karaoi namakin aika a karekei n te bong aei. Ngkana a tangiria, a kona n tibwauai aia iango. Kaoia bwa a na iangoia bwa e kanga mwakurian aia namakin ni kakorakorai aia reitaki ma Tamara are i Karawa ao Iesu Kristo.

Reitan Bwaai n Mwakuri

• Maiuakina ana euangkerio Iesu Kristo: 2 Nibwaai 31:17–21; 3 Nibwaai 27:13–21; “Following God” (witeo), ChurchofJesusChrist.org

• Tabeakiniia naake a kainnano: Mataio 25:34–40; Motiaea 18:8–9; “You Are the Gift” (witeo), ChurchofJesusChrist.org

• Kaoia ni kabane bwa a na karekea te euangkerio: Mataio 5:14–16; 1 Betero 3:15; “Sharing Your Beliefs” (witeo), ChurchofJesusChrist.org

• Katiteuanakiia utu ibukin te maiu ae akea Tokina: Reirei ao Berita aika Tabu 2; 128:18; “Because of James” (witeo), ChurchofJesusChrist.org

Reirei n ana Kawai te Tia Kamaiu

“Ngkana ataia kairake ae ko onimakiniia, aia koaua n aia konabwai ae mairoun te Atua e na rikirake” (Reirei n Ana Kawai te Tia Kamaiu, 28).