aiga i fafo o le malumalu

11 Tesema

O O’u Faamuamuaina ea Mea a le Atua i Lo’u Olaga?

Hakai; Sakaria 1–3; 7–14

aikona o le fefautuaai faatasi

Fefautuaai Faatasi

E taitai e se uso o le au peresitene o le korama po o le vasega; 10–20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitai lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni au lava fesili (tagai i le Tusitaulima Aoao, 10.2, 11.2, ChurchofJesusChrist.org). Fuafua ni auala e faatino ai mea tou te talanoaina.

• Ola i le talalelei. O a mea na talanoaina e le au epikopo i le fono a le aufono a le autalavou a le tatou uarota? O a faatinoga e mafai ona tatou faia e faatatau i lena talanoaga?

• Tausia o i latou e lē tagolima. E faapefea ona tatou aapa atu i tagata i auala faaKeriso pe a tatou vaaia se manaoga ma ua tatou le iloa le tala e fai atu?

• Valaaulia tagata uma ia talia le talalelei. O le a se mea ua tatou maua i le talalelei a Iesu Keriso ua aumaia ia i tatou le olioli? E mafai faapefea ona tatou faasoa atu lena olioli i isi?

• Tuufaatasia o aiga mo le faavavau. O a mea o loo tatou faia e saili ai igoa o o tatou tuaa o e o loo manaomia sauniga o le malumalu? O le a se mea e mafai ona tatou faia e fesoasoani ai i isi i le sailia o igoa o o latou tuaa?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

Aoao Atu le Aoaoga Faavae

Ia taitai e se taitai matua po o se talavou; 25–35 minute

Saunia Oe Lava Faaleagaga

Ua tumu le olaga i mea taua e fai. Afai tatou te le faaeteete, o le pisi o le olaga e ono mafua ai ona galo ia i tatou le faamoemoega o le olaga. Ua tatou iloa o le Faaola ma Lana talalelei e tatau ona avea ma a tatou faamuamua maualuga, ae o isi mea e faigofie ona faalavelaveina ai i tatou. Atonu o le mafuaaga lena ua fautuaina ai i tatou e tusitusiga paia “ia mafaufau i le ala o ou vae” (Faataoto 4:26), “mafaufau i o outou ala” (Hakai 1:5), ma “ina tofotofo ia outou ia te outou, po ua outou i le faatuatua” (2 Korinito 13:5).

O tagata Isaraelu na soifua i le taimi o le perofeta o Hakai, na manaomia lenei ituaiga valaaulia. I a latou taumafaiga aoga e toe fausia Ierusalema, na latou tolopoina ai le toe fausiaina o le maota o le Alii. Mafaufau pe faapefea ona aoga lapataiga a le Alii i le Hakai 1 ia i tatou i aso nei. E faapefea ona e musuia i latou e te aoaoina e iloilo a latou tautinoga i le faamuamua o mea a le Atua i o latou olaga? E mafai ona e suesue i le savali a Elder Dale G. Renlund “Tautinoga Mausali ia Iesu Keriso” (Liahona, Nov. 2019, 22–25) poo le aoaoga a Peresitene Ezra Taft Benson i le “O le Poloaiga Sili-Alofa i le Alii” (i le Aoaoga a Peresitene o le Ekalesia: Ezra Taft Benson [2014], 37–45).

vasega a tamaitai talavou

E mafai ona tatou faamuamua mea a le Atua.

Aoao Faatasi

E mafai ona e amataina se talanoaga i le tusiaina o fuaitau mai i le Hakai 1:6 i luga o le laupapa. O le a se mea e mafai ona tatou aoao mai nei manatu—lūlūina fatu ae le seleseleina lava, aai ae le maoona lava, pe o le mauaina o tupe ae teuina i totonu o se ato pūpū—e uiga i le faaaluina o taimi i mea e le o finagalo le Alii tatou te faia? E ui e le o fetalai mai le Alii ia i tatou e taulai atu i le fausiaina o se malumalu, o le a le mea o loo Ia finagalo tatou te taulai i ai? E faapefea ona tatou faia na mea o se faamuamua maualuga i o tatou olaga? O gaoioiga nei e mafai ona fesoasoani i le autalavou e iloilo ai a latou tautinoga i le faamuamua o mea a le Atua i o latou olaga.

• O le taumafa i le faamanatuga o se avanoa sili lea i vaiaso taitasi e iloilo ai la tatou tautinoga ia Iesu Keriso. E faapefea ona tatou faaaogaina le faamanatuga e mafaufau ai pe ua tatou avea atili e pei o le Faaola? Masalo e mafai e le autalavou ona faasoa mai le auala latou te faia ai lenei mea. E mafai foi ona latou faia se lisi o fesili latou te ono fesiligia ai i latou lava i le taimi o le faamanatuga. Valaaulia i latou e mafaufau loloto i se tasi po o le sili atu o mau, savali, po o isi punaoa o i lalo o “Punaoa Lagolago” a o latou faia a latou lisi.

• Na faasoa mai e Peresitene Dieter F. Uchtdorf i lana savali “E Uiga i Mea e Sili Ona Taua” (Liahona, Nov. 2010, 19–22), se fautuaga e mafai ona fesoasoani ai i le autalavou e “mafaufau i o [latou] ala” (Hakai 1:5). E mafai ona e valaaulia tagata taitoatasi po o ni vaega toatele e faitau vaega mulimuli e tolu o le lauga (amata i le vaega “O Le Mana o Mea Faavae”), vaavaai mo le uiga o le taulai o o tatou olaga i le Faaola. E mafai ona latou faasoa mai se mea latou te lagona le musuia e fai e faamalosia ai la latou tautinoga ia Iesu Keriso.

• O le toatele o tatou e pisi e fai mea lelei. Ae e le o ni mea e sili ona lelei i taimi uma. Mafaufau e faasoa atu se faamatalaga mai le vaega muamua o le savali a Peresitene Dallin H. Oaks “Lelei, Lelei Tele, Lelei Silisili” (Liahona, Nov. 2007, 104–8) lea e mafai ona fesoasoani i le autalavou ia malamalama i lenei mataupu faavae. E mafai foi ona e valaaulia i latou e fai se lisi o a latou gaoioiga o aso uma. Fai atu ia i latou e iloilo patino pe o gaoioiga taitasi e “lelei,” “lelei tele,” pe “lelei silisili.” O le a le mea e avea ai se gaoioiga ia “lelei silisili”? Uunaia le autalavou e fefaasoaai i le tasi ma le isi mea latou te aoaoina mai lenei lava iloiloga.

Faatino i le Faatuatua

Ia uunaia tagata o le vasega po o le korama e manatunatu ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe o le a faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• Iosua 24:14–15; Mataio 6:19–34; 22:36–40; Mareko 10:17–22; 1 Korinito 11:23–28; 2 Korinito 13:5; Kolose 3:1–2 (E tatau ona tatou faamuamua mea a le Atua i o tatou olaga)

• Scott D. Whiting, “Avea Faapei o Ia,” Liahona, Nov. 2020, 12–15

• “As Now We Take the Sacrament,” Hymns, no. 169

Aoao Atu i le Ala a le Faaola

“E tele naua mea e talanoaina i lesona taitasi, ae e le manaomia ona faia le lesona atoa i se vasega se tasi ina ia ootia ai se loto o se tasi—o le tele lava e lava le tasi pe lua ni vaega autu” (Aoao Atu i le Ala a le Alii,7).