27 Novema

E Mafai Faapefea Ona Ou Faasoa Atu le Talalelei?

Iona; Mika

Fefautuaai Faatasi

E taitai e se uso o le au peresitene o le korama po o le vasega; 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitai lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni a oe lava fesili (tagai i le Tusitaulima Aoao, 10.2, 11.2, ChurchofJesusChrist.org). Fuafua ni auala e faatino ai mea tou te talanoaina.

• Ola i le talalelei. Na mafai faapefea ona tatou latalata atili i le Faaola? O faapefea ona tatou taumafai ia avea atili e faapei o Ia?

• Tausia o i latou e lē tagolima. O ai na i ai i o tatou mafaufau talu ai nei? E mafai faapefea ona tatou fesoasoani i nei tagata taitoatasi?

• Valaaulia tagata uma ia talia le talalelei. E faapefea ona tatou taliina fesili a tatou uo e uiga i le Ekalesia?

• Tuufaatasia o aiga mo le faavavau. O a nisi auala e mafai ona tatou faaleleia atili ai a tatou sootaga ma tagata o le aiga lautele, e pei o matua o matua ma tausoga?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

Aoao Atu le Aoaoga Faavae

Ia taitai e se taitai matua po o se talavou; 25-35 minute

Saunia Oe Lava Faaleagaga

Atonu e i ai ni tagata o lau vasega po o le korama e masani ona sailia ni auala e fetufaai atu ai le talalelei. Masalo o e faia foi lenei mea! Peitai, mo le toatele o tagata, o le faasoaina atu o le talalelei e faigata ma e taufaafefe foi. O le mea e lelei ai, o i tatou uma e mafai ona lelei atu i le faasoaina atu o lo tatou faatuatua ia Iesu Keriso. Atonu e te le o faalogo tino i le siufofoga o le Alii o faatonuina oe e faia se mea e pei o le “ina alu i Nineva le aai tele, ma alaga atu i ai,” e pei ona sa faia e Iona (Iona 1:2). Ae o le leo lemu o le Agaga Paia e mafai ona musuia oe e “alu i” tagata patino o aiga ma uo o e ua saunia e faalogo i lau molimau. Tatala ou manatu i mea e mafai ona e aoaoina mai le aafiaga o Iona ao e suesue i lenei vaiaso, ma saunia oe lava e faasoa atu mea ua e aoaoina ia i latou o loo e aoaoina. E mafai foi ona e faitau i le savali a Elder D. Todd Christofferson “Faasoaina Atu o le Savali o le Toefuataiga ma le Toetu” ao e sauni e aoao atu (Liahona, Me 2020, 110-13).

E mafai e le Agaga Paia ona musuia i tatou e faasoa atu le talalelei ia i latou o e ua saunia e faalogo ia tatou molimau.

Aoao Faatasi

Ina ia fesoasoani ia i latou e te aoaoina e faasoa ni lagona mai a latou suesuega ia Iona i lenei vaiaso, e mafai ona e faaali atu se ata o Iona (tagai i le otootoga o lenei vaiaso o le Sau, Mulimuli Mai ia te Au—Mo Tagata Taitoatasi ma Aiga). Valaaulia i latou e talanoa i mea na latou aoaoina e uiga i le faasoa atu o le talalelei mai le mea na tupu ia Iona. E mafai ona e valaaulia i latou e iloilo faapitoa le Iona 1 ma le 3 ma fesili atu: O le a le mea ua tatou aoaoina e uiga i le faasoaina atu o le talalelei ia i latou atonu e le o sauni e suia? O le a se mea ua tatou aoaoina e uiga i le finagalo o le Atua e faamagalo i latou ua salamo? Ina ia musuia tagata o lau vasega po o le korama e faasoa atu le talalelei, faaaoga se tasi pe sili atu o nei gaoioiga pe fai se tasi o sau oe lava gaoioiga.

• Ina ia maua ni manatu e uiga i le faasoaina atu o le talalelei a le Faaola i isi, e mafai e lau vasega po o le korama ona iloiloina tala nei i tusitusiga paia: Ioane 4:3–26; Galuega 16:25–33; Alema 19:14–18, 28–31. Ona mafai lea ona outou talanoaina faatasi fesili faapenei: Na faapefea ona saunia tagata i nei tala e faalogo i le savali o le talalelei? O le a le mea ua e maitauina e uiga i le auala na faasoa atu ai le savali? Aisea e te manatu ai e finagalo le Tama Faalelagi ma Iesu Keriso ia tatou faasoa atu le talalelei? Ona mafai lea ona outou talanoaina o se vasega po o se korama mea o loo aoao mai e nei tala ia i tatou e uiga i auala e mafai ona tatou faasoa atu ai le talalelei i aso nei.

• O le faitauina o faataitaiga musuia a isi o loo faasoa atu le talalelei e mafai ona faamalosia ai le autalavou o loo e aoaoina ia faia le mea lava lea e tasi. Na faasoa mai e Elder D. Todd Christofferson ni faataitaiga i lana savali “Faasoaina Atu o le Savali o le Toefuataiga ma le Toetu.” I lenei savali, na aoao mai ai Elder Christofferson e tolu mea e manaomia e faamalosi ai a tatou valaaulia ia talia le talalelei: o lo tatou alofa, a tatou faataitaiga, ma lo tatou faaaogaga o le Tusi a Mamona. Talanoa i faataitaiga o le faasoaina atu o le talalelei i lenei savali, ma valaaulia i latou o loo e aoaoina e faasoa atu isi faataitaiga, e aofia ai a latou aafiaga patino. E faapefea ona faaalia e nei aafiaga mea e tolu na aoao mai e Elder Christofferson?

• E faapefea ona e fesoasoani ia i latou o loo e aoaoina ia malamalama o le faasoaina atu o le talalelei e mafai ona masani a’i ma e le tatau ona taufaamatauina? E te ono faaalia vitio o loo i “Punaoa Lagolago” ma fai i le autalavou e mafaufau i auala latou te faasoaina atu ai le talalelei i se tasi latou te iloa. O a ni mea e mafai ona tatou faia e valaaulia ai i latou e o mai e matamata? O a avanoa ua ia i latou e o mai ai ma fesoasoani? E faapefea ona tatou fesoasoani ia i latou ia lagona le manao e o mai ma nonofo? E faapefea ona tatou faia le faasoaina o le talalelei o se vaega o tatou olaga i aso uma?

Faatino i le Faatuatua

Ia uunai tagata o le vasega po o le korama e manatunatu ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe o le a faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• Carlos A. Godoy, “Ou Te Talitonu i Agelu,” Liahona, Nov. 2020, 86-88

• “Sharing the Gospel,” “Inviting Others to ‘Come and See,’” “Inviting Others to ‘Come and Help,’” “Inviting Others to ‘Come and Stay’” (videos), ChurchofJesusChrist.org; e mafai ona e mauaina isi punaoa i lalo o le “Sharing the Gospel,” Potutusi o le Talalelei

Aoao Atu i le Ala a le Faaola

E sili atu ona faia e tagata ni suiga anoa i o latou olaga pe a o mai na suiga mai lo latou lava faatinoina o le faitalia. A e tuuina atu ni valaaulia e faatino, ia mautinoa lou faaaloalo i le faitalia o i latou e te aoaoina” (Aoao Atu i le Ala a le Faaola, 35).