13 Novema

E Mafai Faapefea ona Ou Maua se Liligi Mai o le Agaga o le Alii?

Hosea 1–6; 10–14; Ioelu

Fefautuaai Faatasi

E taitai e se uso o le au peresitene o le korama po o le vasega; 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitai lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni au lava fesili (tagai i le Tusitaulima Aoao, 10.2, 11.2, ChurchofJesusChrist.org). Fuafua ni auala e faatino ai mea tou te talanoaina.

• Ola i le talalelei. O a ni aafiaga lata mai ua faamalosia ai a tatou molimau?

• Tausia o i latou e lē tagolima. O ai e manaomia la tatou fesoasoani ma tatalo? O le a se mea ua musuia i tatou e fai e fesoasoani atu ai?

• Valaaulia tagata uma ia talia le talalelei. E faapefea ona avea i tatou ma malamalama i tagata o aiga po o uo e le tutusa o tatou talitonuga?

• Tuufaatasia o aiga mo le faavavau. E faapefea ona faaalia le tele o le alofa ma le lagolago mo tatou aiga ma faia se eseesega lelei i totonu o o tatou aiga?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

Aoao Atu le Aoaoga Faavae

Ia taitai e se taitai matua po o se talavou; 25-35 minute

Saunia Oe LavaFaaleagaga

E le fesiligia ua tatou ola i se vaitaimi o le le mautonu ma le fefe. Na faamatala e le perofeta o le Feagaiga Tuai o Ioelu lo tatou taimi—o le “aso o Ieova”—e pei “o le aso pouliuli ma le pogisa” ma le “mamafa ma le matautia” (Ioelu 2:1-2, 11). Ae e le faapea o lona uiga ua leai se faamoemoe i o tatou aso. Mafaufau i le folafolaga na faia e Elder Dieter F. Uchtdorf: “E ui lava e i ai taimi e pei tatou te lagona ai le tanumiaina i tofotofoga o le olaga pe siomia i le pogisa faalelagona, ae o le alofa o le Atua ma faamanuiaga o le talalelei toefuataiina a Iesu Keriso o le a aumaia se mea e le’i mafaufauina ia fotu mai” (“O Le A Faia e le Atua se Mea E Le’i Mafaufauina,” Liahona, Nov. 2020, 52).

A e maitauina la le pouliuli ma le pogisa o o tatou taimi, ia manatua na folafola mai foi e le Alii ni faamanuiaga maoae—o ni faamanuiaga—e le i mafaufauina lava: “e iu ina ou liligi ifo ai lo’u Agaga i luga i tagata tuma; ona perofeta ai lea o outou atalii ma o outou afafine (Ioelu 2:28; tagai foi Iosefa Samita—Talafaasolopito 1:41). Matau le folafolaga maoti o le a liligi ifo le Agaga o le Atua i luga o alii talavou ma tamaitai talavou. Aisea e te lagona ai e taua mo i latou e te aoaoina ona malamalama i na mea? Mafaufau i lenei fesili ao e faitau i le Ioelu 2 ma le savali a Elder Uchtdorf i au sauniuniga e aoao atu.

Ua folafola mai e le Alii i aso amulī, o le a Ia liligi mai Lona Agaga, ma “ona perofeta ai lea o outou atalii ma o outou afafine” (Ioelu 2:28).

Aoao Faatasi

Ina ia fesoasoani ia i latou e te aoaoina ia malamalama lelei i le Ioelu 2:28–29, e mafai ona e tuu se mea faitino i totonu o se pesini ma tuu atu i se tasi e sasaa i ai i luga ni vai. E faapefea ona fesoasoani lenei mea ia tatou malamalama ai i le uiga o le ia “liligi ifo [e le Alii Lona] agaga i luga o tagata uma”? O faapefea ona faataunuuina valoaga i le Ioelu 2:28–29 ? O nisi nei o manatu e mafai ona fesoasoani i le autalavou ia malamalama atili ai i auala o loo liligi mai ai e le Alii Lona Agaga i aso nei.

• O loo tusia i tusitusiga paia le tele o taimi na liligi mai ai e le Alii Lona Agaga i luga o Ona tagata. O le iloiloina o nisi o nei mea e mafai ona fesoasoani i le autalavou ia malamalama atili ai i auala e maua ai se liligi mai o le Agaga o le Atua i o latou olaga. Mafaufau e tusi le ata o se sioti lapoa o loo liligi le vai i luga o le laupapa ma fai atu i tagata taitoatasi po o ni vaega e faitau se tasi pe sili atu o fuaitau o mau i totonu o “Punaoa Lagolago.” E mafai ona latou tusia i luga o le laupapa e faataamilo i le sioki mea na faia e tagata o loo i a latou mau ina ia mafai e le Alii ona liligi mai Lona Agaga ma pe o a foi faamanuiaga na mulimuli mai ai. O anafea na tatou lagonaina ai le Agaga o faamafanafana, taiala, pe faamama i tatou?

• Atonu e te tusia upu nei mai ia Elder Dieter F.Uchtdorf i luga o le laupapa: “O loo i ai i le Atua se mea e le’i mafaufauina mo oe lava ia ma le Ekalesia atoa—o se galuega ofoofogia ma le mea e ofo ai” (“O Le A Faia e le Atua se Mea E Le’i Mafaufauina,” 53). Mafaufau e fai atu i le autalavou e vaai i le savali a Elder Uchtdorf mo faamanuiaga le mafaufauina na tuuina atu e le Atua i tagata i tusitusiga paia ina ua mavae taimi o faigata. O le a le mea na aoao mai e Elder Uchtdorf tatou te faia ina ia mafai ai ona tatou faia ni filifiliga lelei pe a feagai ma faigata? Valaaulia le autalavou e fai se lisi o mea e “le’i mafaufauina” atonu o i ai i le Atua mo i tatou. Valaaulia i latou e te aoaoina e mafaufau loloto i mea latou te naunau e fai ia maua ai nei faamanuiaga.

• Mafaufau e faaali le vitio “President Nelson: Hear Him—Personal Revelation” (ChurchofJesusChrist.org). Fai atu i le autalavou e faalogo mo ni malamalamaaga e uiga i le auala e talanoa mai ai le Agaga ia i tatou ma le auala Na te faamanuiaina ai o tatou olaga. E mafai foi ona latou iloiloina le savali a Peresitene Russell M. Nelson “Faaaliga mo le Ekalesia, Faaaliga mo o Tatou Olaga” (Liahona, Me 2018, 93–96). Fai atu ia i latou e vaavaai mo tali i fesili faapenei: Na faapefea ona sailia ma maua e Peresitene Nelson le uunaiga a le Agaga? O le a le mea ua tatou aoaoina mai ia Iosefa Samita e uiga i le finagalo o le Atua e fetalai mai i Lana fanau? O le a le mea na fautuaina tatou e Peresitene Nelson e fai? Tau atu i le autalavou e uiga i se taimi na e lagonaina ai le liligi mai e le Alii o Lona Agaga. Valaaulia i latou e mafaufau loloto i ni mea na latou oo i ai ma, afai latou te lagona le lagolelei, faasoa mai.

Faatino i le Faatuatua

Ia uunai tagata o le vasega po o le korama e manatunatu ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe o le a faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• Galuega 2:1–6, 14–21; Iakopo 7:1–8; Mosaea 4:1–3, 19–20; 18:7–11; Alema 19:14, 28–36; Helamana 6:34–36; Mataupu Faavae ma Feagaiga 19:37–41

Aoao Atu i le Ala a le Faaola

“I le faaopoopo atu i le fesoasoani i tagata aoao e lagona ma iloa le Agaga, fesoasoani ia i latou e faatino i luga o musumusuga latou te maua” (Aoao Atu i le Ala a le Faaola,10).