23 Oketopa

Pe Ua Tusia le Talalelei i Lo’u Loto?

Ieremia 30–33; 36; Auega 1; 3

Fefautuaai Faatasi

E taitai e se uso o le au peresitene o le korama po o le vasega; 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitai lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni a oe lava fesili (tagai i le Tusitaulima Aoao, 10.2, 11.2, ChurchofJesusChrist.org). Fuafua ni auala e faatino ai mea tou te talanoaina.

• Ola i le talalelei. O a mea na tatou talanoaina talu ai, ma o a valaaulia po o tofiga na faia? O le a se mea ua tatou faia e faatino ai nei valaaulia po o tofiga?

• Tausia o i latou e lē tagolima. O le a se mea e mafai ona tatou faia pe ta’u atu e aapa atu ai ia i latou o e atonu ua lagona le tuuatoatasi pe ua taumamao mai le Tama Faalelagi?

• Valaaulia tagata uma ia talia le talalelei. O a nisi auala e mafai ona tatou fesoasoani ai i isi ia lagona le alofa o Iesu Keriso?

• Tuufaatasia o aiga mo le faavavau. O a manatu e mafai ona tatou faasoa atu i le tasi ma le isi e fesoasoani e faamalosia ai o tatou aiga?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

Aoao Atu le Aoaoga Faavae

Ia taitaia e se taitai matua po o se talavou; 25-35 minute

Saunia Oe Lava Faaleagaga

Na taʻu atu e le Alii i le perofeta o Ieremia e faapea, i aso a sau, o le a Ia faapotopotoina Isaraelu ma osia se “feagaiga fou” ma Lona nuu. Na Ia folafola mai, “Ou te tuuina la’u tulafono i totonu ia te i latou, ma ou tusi ai i o latou loto; e fai foi au mo latou Atua, o i latou foi e fai mo’u nuu” (tagai Ieremia 31:31-34). O aso na o aso nei, ma o tatou o le nuu o le Atua. O nei aoaoga e ono musuia ai oe—ma i latou e te aoaoina—e fesili, O le a le uiga o le tusia o le talalelei i loʻu loto? Pe ua tusia le talalelei i lo’u loto? Afai e leai, o le a laʻu mea e fai i ai?

Mafaufau pe o le a faapefea ona e fesoasoani i tagata o lau vasega po o le korama ia mafaufau i nei fesili mo i latou lava. Ina ia saunia e aoao atu, e mafai ona e sailia savali e faasoa atu mai le Ieremia 30-33; 36; mai le savali a Peresitene Russell M. Nelson “Ia Faamuamua le Atua” (Liahona, Nov. 2020, 92–95); ma mai le savali a Elder D. Todd Christofferson “Pe a Liua Mai Oe” (Liahona, Me 2004, 11-13).

A o tatou alolofa i le Alii ma saili e aoao ia te Ia, o le a tusia le talalelei i o tatou loto.

Aoao Faatasi

Uunai le autalavou e talanoaina le Ieremia 31:31–34. Ina ia faia lenei mea, e mafai ona e avatu ia i latou ni fatu e fai i pepa ma ni fesili ua tusia ai i le uiga o le i ai o le talalelei i o tatou loto, e pei o na o loo maua i lalo o le “Saunia Oe Lava Faaleagaga.” Galulue taitoatasi, i ni paga, po o ni vaega toalaiti, e mafai e le autalavou ona faitau nei fuaiupu mai ia Ieremia ma mafaufau loloto pe faapefea ona latou taliina fesili. Tuu atu ia i latou e faasoa mai a latou fesili ma tali na latou mafaufau i ai. O loo lisi atu i lalo nisi manatu e mafai ona fesoasoani ia oe e aoao ai le autalavou e uiga i auala e mafai ai ona tusia le talalelei i o latou loto.

• Ina ua tuuina atu e Mose nisi o ana aoaoga faaiu i le fanauga a Isaraelu, sa ia uunaia i latou e talia afioga a le Atua i o latou loto. Sa ia aoao atu foi nisi o auala e mafai ai ona latou faia lenei mea, e pei ona maua i le Teuteronome 6:3-9. I le avea ai o se vasega po o se korama, faitau faatasi nei fuaiupu ma talanoaina auala e mafai ai ona tatou faia le mea na fautua mai ai Mose. Mo nisi o aitia, e mafai ona matamata e lau vasega po o le korama le vitio “Come, Follow Me: These Words” (ChurchofJesusChrist.org). E mafai foi ona latou suesue i le Alema 5:14, 26–35 e saili ai le mea na aoao mai e Alema e uiga i le auala tatou te mafai ai ona tusia le talalelei i o tatou loto.

• I lana savali “Pe a Liua Mai Oe,” na faamatala e Elder D. Todd Christofferson mea e mafai ona tatou faia ina ia tusia ai le talalelei i o tatou loto. O le a le mea ua tatou aoao mai parakalafa muamua e fa e uiga i le tusia o le talalelei i o tatou loto? E mafai ona e valaaulia talavou taitasi e faitau se tasi po o le sili atu o parakalafa o totoe ma vaavaai mo mea e tatau ona tatou faia e tupu ai lenei mea. O le a le matafaioi a le Faaola? O le a le tatou matafaioi? Faamalosiau i le autalavou e faasoa mai a latou tali, faatasi ai ma isi malamalamaaga na latou mauaina. O a ni mea na tutupu ua fesoasoani ia i tatou e tusia ai le talalelei i o tatou loto? O le a le matafaioi a le tausia o a tatou feagaiga i lenei faagasologa?

• Na faamatala e Peresitene Russell M. Nelson o le upu Isaraelu e faasino i se tagata o loo loto e faamuamua le Atua i lona olaga” (“Ia Faamuamua le Atua,” 92). E mafai ona e valaaulia le autalavou e saili parakalafa muamua e ono o le savali a Peresitene Nelson ma le vaega mulimuli o le savali e amata i le “O le fesili mo i tatou taitoatasi.” Fai atu ia i latou e saili se mea e fesoasoani latou te malamalama ai i le uiga o le “ia faamuamua le Atua” i o latou olaga. O a ni o tatou lagona ma gaoioiga pe a faamuamua le Atua i o tatou olaga? O le a le mea na aoao mai e Peresitene Nelson e uiga i le tusiaina o le talalelei i o tatou loto e aafia ai a tatou taumafaiga e faapotopoto Isaraelu?

Faatino i le Faatuatua

Ia uunai tagata o le vasega po o le korama e manatunatu ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe o le a faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• Henry B. Eyring, “Tusia i Lou Loto” (Liahona, Nov. 2000, 85–87)

• Linda K. Burton, “Pe Ua Tusia ea i o Tatou Loto le Faatuatua i le Togiola a Iesu Keriso?” (Liahona, Nov. 2012, 111-15)

Aoao Atu i le Ala a le Faaola

O aoaoga faavae o loo maua i totonu o tusitusiga paia ma i upu o perofeta o aso e gata ai e i ai le mana e suia ai loto ma faateleina le faatuatua. Ao e taumafai ma i latou e te aoaoina e “faataitaia le mana o le afioga a le Atua,” o le a e iloa e i ai lona “uiga malosi e taitai atu ai tagata ia latou faia le mea [e] tonu” (Alema 31:5)” (Aoao Atu i le Ala a le Faaola, 5).