9 Oketopa

Aisea e Tatau ai ona Faatotonugalemu Iesu Keriso i Lo’u Olaga?

Isaia 58–66

Fefautuaai Faatasi

E taitai e se uso o le au peresitene o le korama po o le vasega; 10–20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona, i le faaopoopo atu i le fefautuaai faatasi e faatatau i pisinisi patino a le korama po o le vasega, atonu e te manao e talanoaina uunaiga ma autu mai le konafesi aoao. Atonu o le a fesoasoani fesili nei.

• O a autu po o savali na tulagaese ia i tatou? O a mea na faamalosia ai lo tatou faatuatua ia Iesu Keriso?

• O a mea na faamalosia ai a tatou molimau e uiga i perofeta soifua? O a ni mea na tatou lagona le musuia e fai ona o mea na tatou aoaoina pe lagonaina?

• O a ni mea e tatau ona tatou faia o se vasega po o se korama e manatua ma faatino ai fautuaga na tatou faalogo i ai i le konafesi aoao?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

Aoao Atu le Aoaoga Faavae

Ia taitaia e se taitai matua po o se talavou; 25–35 minute

Saunia Oe Lava Faaleagaga

“Ou te matua fiafia ia Ieova, e olioli lo’u loto i lo’u Atua.” na fetalai ai Isaia, “aua ua na faaofuina au i ofu o le olataga, ua na faapulupuluina au i le ofu o le amiotonu” (Isaia 61:10). Aisea e te “fiafia [ai] ia Ieova”? E pei o Isaia, pe a tatou iloa le mea na faia e le Alii mo i tatou, tatou te fiafia, ma tatou te talanoa soo i le “alofa o Ieova, o viiga o Ieova” (Isaia 63:7).

O a ni lagona o i latou o loo e aoaoina e uiga i le Faaola? O le a se mea e mafai ona fesoasoani ia latou lagona ai le sili atu o le alofa ma le migao mo Ia? O le a se mea e ono fesoasoani ia latou lagona ai Lona alofa? Ao e mafaufau loloto i nei fesili ma faitau le Isaia 58–66, e te ono iloiloina foi le savali a Elder Matthew S. Holland “O Le Meaalofa Silisili o le Alo” (Liahona, Nov. 2020, 45–47); ma le savali a Sister Cristina B. Franco “O Le Mana Faaola o Iesu Keriso” (Liahona, Nov. 2020, 60–62).

A o tatou aoao atili e uiga i le Faaola, e musuia i tatou e avea o Ia ma totonugalemu o tatou olaga.

Aoao Faatasi

A o aoao tagata o le vasega po o le korama e uiga i le misiona na auina mai ai Iesu Keriso e faataunuu, o le a sili atu ona musuia i latou e avea le Faaola ma totonugalemu o o latou olaga. E mafai ona e suesue i le Isaia 61:1–3 ma fai se lisi i luga o le laupapa o le mea na faauuina le Faaola e fai (tagai foi Luka 4:16–20). Na faapefea ona faataunuu e le Faaola nei vaega o Lana misiona? O faapefea ona Ia faataunuuina ia mea i o tatou olaga i le taimi nei? O manatu nei e mafai ona fesoasoani i lau vasega po o le korama e faaauau ai se talanoaga e uiga i le mafuaaga e tatau ai ona avea Iesu Keriso ma totonugalemu o o tatou olaga.

• O le konafesi aoao e masani lava ona i ai savali e molimau mai ia Iesu Keriso. Atonu e te valaaulia ni nai tagata o le vasega po o le korama e faasoa mai se mea na latou aoaoina e uiga i le Faaola i le taimi o le konafesi aoao. Uunaia i latou e faasoa mai o latou lagona e uiga i le Faaola ona o mea na latou aoaoina.

• E mafai e tusitusiga paia ona fesoasoani i le autalavou ia malamalama lelei pe aisea e tatau ai ona totonugalemu le Faaola i o latou olaga. Atonu e te tusia i luga o le laupapa Aisea e tatau ai ona totonugalemu Iesu Keriso i loʻu olaga? Fai atu i le autalavou e faasoa mai o latou manatu. Ona mafai lea ona e fai atu ia i latou (taitoatasi pe i ni vaega) e suesue mau i lalo o “Punaoa Lagolago” e sue ai tali faaopoopo. Valaaulia le autalavou e faasoa mai mea ua latou aoaoina ma pe aisea e taua ai ia i latou.

• Mafaufau e fai atu ia i latou e te aoaoina e faamatala le aso e sili ona taua o o latou olaga. Faamata o le a le aso e sili ona taua i le talafaasolopito? Valaaulia i latou e saili le mea na saunoa ai Elder Dieter F. Uchtdorf i le aso sili ona taua e ala i le iloiloina o lana savali “Faauta i le Tagata!” (Liahona, Me 2018, 107–10). Uunai le autalavou e vaavaai mo faamanuiaga na folafola atu e Elder Uchtdorf ia i latou o e “taulai atu” ia Iesu Keriso. E mafai foi ona latou faasoa mea o loo latou faia e faatotonugalemu ai le Faaola i o latou olaga i aso uma. E mafai ona e fautuaina i latou e mafaufau i mea e mafai ona latou faia e faalatalata atili atu ai ia Iesu Keriso ma faatu se sini ina ia faia.

• Afai e fesili mai se tasi ia i tatou pe aisea tatou te talitonu ai ia Iesu Keriso, o le a la tatou tala e fai atu? Uunaia le autalavou e faasoa mai o latou manatu ma tusi i luga o le laupapa. E mafai foi ona e valaaulia i latou e iloilo le “O Le Keriso Soifua: O Le Molimau a le Au Aposetolo,” (ChurchofJesusChrist.org) po o le “O Le Misiona Paia a Iesu Keriso” i le mataupu 3 o le Tala’i La’u Talalelei ([2019], 60–61). Fautuaina i latou e vaavaai mo ni upumoni faigofie latou te faasoaina atu e faamatala ai pe aisea e taua ai le Faaola ia i latou. E mafai ona latou faaopoopo mea moni latou te maua i le lisi i luga o le laupapa ma talanoa pe faapefea ona latou faasoa atu nei mea moni i tagata latou te iloa.

Faatino i le Faatuatua

Ia uunai tagata o le vasega po o le korama e manatunatu ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe o le a faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• Ioane 8:12; 14:6; Roma 8:35–39; 2 Nifae 2:3–9; 9:5–10; Alema 36:3, 27; 3 Nifae 27:14–16, 27; Eteru 12:27 (O le pogai e tatau ai ona faatotonugalemu Iesu Keriso i o tatou olaga)

• Becky Craven, “Tuu Ma Oe le Sui,” (Liahona, Nov. 2020, 58–60)

• “Ou te Talitonu ia Iesu,” “Ou te Tu ma Ofo” ”(Viiga, nu. 71, 107)

• “Why We Need a Savior—A Christmas Message about Our Savior Jesus Christ,” “Because of Him” (vitio), ChurchofJesusChrist.org

Aoao Atu i le Ala a le Faaola

“O tagata taitoatasi o i lau vasega o se puna faaoaina o molimau, manatu ma aafiaga i le ola ai i le talalelei. Valaaulia i latou e faasoa ma siitia le tasi ma le isi” (Aoao Atu i le Ala a le Faaola,5).