25 Setema

O a o Tatou Matafaioi i le Galuega o le Faaolataga ma le Faaeaga?

Isaia 40-49

Fefautuaai Faatasi

E taitaiina e se uso o le korama poo le au peresitene o le vasega; 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitaia lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni a oe lava fesili (tagai i le Tusitaulima Aoao, 10.2, 11.2, ChurchofJesusChrist.org). Fuafua ni auala e faatino ai mea tou te talanoaina.

• Ola i le talalelei. O a mea na tatou talanoaina talu ai, ma o a valaaulia po o tofiga na faia? O le a se mea ua tatou faia e faatino ai nei valaaulia po o tofiga?

• Tausia o i latou e lē tagolima. O le a se mea e mafai ona tatou faia pe ta’u atu e aapa atu ai ia i latou o e atonu ua lagona le tuuatoatasi pe ua taumamao mai le Tama Faalelagi?

• Valaaulia tagata uma ia talia le talalelei. O a nisi auala e mafai ona tatou fesoasoani ai i isi ia lagona le alofa o Iesu Keriso?

• Faatasia o aiga mo le faavavau. O a ni manatu e mafai ona tatou faasoa atu i le tasi ma le isi e fesoasoani e faamalosia ai o tatou aiga?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

Aoao Atu le Aoaoga Faavae

Ia taitai e se taitai matua po o se talavou; 25-35 minute

Saunia Oe Lava Faaleagaga

O loo manino mai i tusitusiga paia o le fesoasoani i le galuega a le Alii e le mo naʻo tagata matutua. Sa tamaitiiti Samuelu i le taimi muamua na fetalai mai ai le Alii ia te ia. Na avea Maria ma se tamaitai talavou ina ua asia o ia e se agelu, ma faailoa atu o ia o le a avea ma tina o le Faaola. Ma sa 14 tausaga o Iosefa Samita ina ua valaauina o ia e le Alii e toefuatai le talalelei. Talu ai nei lava, na valaaulia ai e Peresitene Russell M. Nelson tagata talavou uma e “auai i le autau talavou a le Alii e fesoasoani e faapotopoto Isaraelu (“Faamoemoe o Isaraelu” [worldwide youth devotional, June 3, 2018], ChurchofJesusChrist.org). E mautinoa lava, ina ua fetalai mai le Alii, “A o oe Isaraelu e lau auauna” (Isaia 41:8), na aofia uma ai ii Ana tagata o le feagaiga, e aofia ai ma i latou i lau vasega po o le korama.

E tusa lava pe tatou te osi feagaiga uma e auauna i le Atua pe a tatou papatiso, e le o tagata talavou uma e vaai ia i latou lava o ni auauna a le Alii. Atonu latou te le iloaina auala tulaga ese e mafai ona latou fesoasoani ai i Lana galuega. Vaavaai mo ni fuaitau i le Isaia 41-44 ma le vaega 1.2 o le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai e mafai ona fesoasoani i le autalavou ia malamalama i le uiga o le avea ma ni auauna a le Alii.

E tofu lava le tagata talavou ma gafatia tulaga ese e saofaga atu ai i le galuega o le faaolataga ma le faaeaga.

Aoao Faatasi

E mafai ona fesoasoani leIsaia 41–44 i le autalavou ia malamalama i le uiga o le avea ma auauna a le Alii. Ina ia amata se talanoaga, e mafai ona e tusia mau faasino pei o nei i le laupapa: Isaia 41:8-10; 42:6–7; 43:9–12; 44:21. E mafai e tagata taitasi ona piki se fuaitau, faitau i ai, ma faasoa mai mea ua ia aoaoina e uiga i le avea ma auauna a le Alii. O a ni auala ua avea ai i tatou ma auauna a le Alii? O a faamanuiaga e oo mai pe a tatou i ai i Lana galuega? O isi auala nei e fesoasoani ai ia i latou o loo e aoaoina e aumaia tagata ia Keriso o ni tagata auai malolosi i Lana galuega.

• O malamalama i latou o loo e aoaoina i le uiga o le “galuega o le faaolataga ma le faaeaga”? Ina ia fesoasoani ia i latou, atonu e te tofia i latou e suesue (taitasi pe i ni vaega toalaiti) se tasi o vaega e fa o le vaega 1.2 o le Tusitaulima Aoao. O vaega taitasi e faamatalaina ai se itu o le galuega. Fai atu i le autalavou e mafaufau loloto i fesili faapenei: O a ni mea faapitoa e mafai e se tagata o laʻu tupulaga ona fai e auai ai i lenei vaega o le galuega o le faaolataga? O le a se mea e mafai ona fai e la tatou vasega po o le korama? E mafai e tagata taitoatasi po o vaega ona faasoa mai mea na latou aoaoina, faatasi ai ma tali i fesili.

• Atonu e aoga ia i latou e te aoaoina le aoao atili e uiga i vaega e fa o le galuega o le faaolataga ma le faaeaga—ola i le talalelei a Iesu Keriso, tausia i latou e manaomia le fesoasoani, valaaulia tagata uma ia talia le talalelei, ma tuufaatasia aiga mo le faavavau. E mafai ona latou filifilia se itu latou te fiafia i ai ma suesue nisi o aitema e faatatau i ai i lalo o “Punaoa Lagolago.” Tuu atu i le autalavou e fetufaai mai mea na latou mauaina na musuia ai i latou ia liua atili i le Alii ma fesoasoani i isi ia faia le mea lava lea e tasi. Ona mafai lea ona latou faia ni fuafuaga e faia se mea e fesoasoani e faataunuu ai lenei galuega. O le peresitene o le vasega po o le korama e mafai ona taitaia lenei talanoaga.

• Ina ia fesoasoani i le autalavou e mafaufau loloto i le ala e mafai ona latou faaaogaina ai a latou taleni e aumai ai agaga ia Keriso, e mafai ona e fai atu ia i latou taitoatasi e suesue se vaega o le savali a Elder John C. Pingree Jr. “Ua ia te A’u Se Galuega mo Oe” (Liahona, Nov. 2017, 32–35). E mafai ona latou faasoa mai le auala na avea ai mea na latou aoaoina e fesoasoani i se tasi e le o mautinoa e mafai ona ia fesoasoani i le galuega a le Alii. E mafai foi ona outou suesue faatasi le vaega “Iloa ma Atiae Meaalofa Faaleagaga” i le savali a Elder Pingree. E faapefea ona fesoasoani le Alii ia i tatou e iloa ma atiae a tatou taleni?

Faatino i le Faatuatua

Ia uunai tagata o le vasega po o le korama e manatunatu ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe o le a faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• Ola i le talalelei a Iesu Keriso: 2 Nifae 31:17–21; 3 Nifae 27:13–21; “Following God” (vitio), ChurchofJesusChrist.org

• Tausia i latou e le tagolima: Mataio 25:34–40; Mosaea 18:8–9; “You Are the Gift” (vitio), ChurchofJesusChrist.org

• Valaaulia tagata uma e talia le talalelei: Mataio 5:14–16; 1 Peteru 3:15; “Sharing Your Beliefs” (vitio), ChurchofJesusChrist.org

• Tuufaatasia aiga mo le faʻavavau: Mataupu Faavae ma Feagaiga 2; 128:18; “Because of James” (vitio), ChurchofJesusChrist.org

Aoao Atu i le Ala a le Faaola

“Afai e lagona e le autalavou e te faatuatuaina i latou, o le latou talitonuga i lo latou gafatia paia o le a tuputupu ae” (Aoao Atu i le Ala a le Faaola, 28).