alii o loo totolo i luga o le matafaga ma le tafola i le sami o loo i ona tua atu

O Iona i le Matafaga i Nineva, saunia e Daniel A. Lewis

21–27 Novema

Iona; Mika

“E Fiafia o Ia i le Alofa”

A o tusifaamaumauina ou lagona uunai, mafaufau pe o faapefea ona fesootai ia mataupu faavae o loo i le Iona ma le Mika i mea ua e aoaoina i tusitusiga paia.

Tusifaamaumau Ou Lagona Uunai

O Iona sa i luga o se vaa na agai atu i Tasesa. Sa leai se mea na leaga ai le folau atu i Tasesa, ae peitai e matuai mamao tele mai Nineva, i le mea sa tuu e alu i ai Iona e momoli i ai le savali a le Atua. Ina ua aafia la le vaa i se matagi tele, sa iloa e Iona na mafua ona o lona le usiusitai. I le tauanau atu a Iona, sa lafo ai e ona uso a seila o ia i le loloto o le sami ina ia taofi ai le matagi. Sa foliga mai o le mutaaga lea o Iona ma lana galuega. Ae sa le’i lafoai e le Alii ia Iona—e pei lava ona sa Ia le lafoaia foi tagata o Nineva ma faapea foi ona Ia le lafoaia ai soo se tasi o i tatou. E pei ona aoao mai Mika, e le fiafia le Alii e tausala i tatou, ae “e fiafia o Ia i le alofa.” A tatou liliu atu ia te Ia, “e toe alofa mai o ia ia te i tatou; e faatoilaloina e ia a tatou amioletonu; ma [o le a Ia] lafo foi a [tatou] agasala uma i mea loloto o le sami” (Mika 7:18–19).

Mo se vaaiga aoao i tusi o Iona ma Mika, tagai i le “Jonah” ma le “Micah” i le Bible Dictionary.

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Iona 1–4; Mika 7:18–19

E alofa mutimutivale le Alii ia i latou uma o e liliu atu ia te Ia.

O le tusi a Iona ua faaalia ai, faatasi ai ma isi lava mea, le alofa mutimutivale o le Alii pe a tatou salamo. A o e faitau i le Iona, vaavaai mo ni faataitaiga o Lona alofa mutimutivale. Mafaufau loloto pe na faapefea ona e maua lena alofa mutimutivale i lou olaga. O le a se mea ua e aoaoina e mafai ona fesoasoani e faateleina ai lou alofa mutimutivale ai i isi?

O le molimauina o le alofa mutimutivale o le Alii e masani ona musuia ai lagona o le alofa ma le agaga faafetai. Ae peitai, o Iona sa “matuai leaga lava lenei mea” ma “ita lava” (Iona 4:1) ina ua faaloaloa atu e le Alii le alofa mutimutivale i le nuu o Nineva, o e sa fai ma fili o Isaraelu. Aisea na manatu ai faapea ia Iona? Pe na i ai se taimi na i ai ni ou lagona tai faapena? O le a se mea e te manatu sa taumafai le Alii e fesoasoani ia Iona ia malamalama i ai i le mataupu 4?

Mafaufau loloto i aoaoga i le Mika 7:18–19. E mafai faapefea ona fesoasoani nei upumoni ia Iona e sui ai ona uiga e uiga i le Alii ma le nuu o Nineva?

Tagai foi Luka 15:11–32; Jeffrey R. Holland, “The Justice and Mercy of God,” Ensign, Sept. 2013, 16–21.

o ni tagata e toalua o loo talanoa i talane o le vaitafe

E mafai ona tatou faasoa atu le talalelei i fanau a le Atua.

Iona 1; 3–4

E manaomia e fanau uma a le Atua ona faalogo i le talalelei.

O Nineva sa o se vaega o le malo o Asuria, o se fili o Isaraelu sa lauiloa mo faatupu vevesi ma le saua. Ia Iona, atonu sa foliga o se mea e le mo’i le faapea ua sauni le nuu o Nineva e talia le afioga a le Atua ma salamo. Ae, e pei ona aoao mai Peresitene Dallin H. Oaks: “E le tatau lava ona tatou faatuina i tatou lava o ni faamasino po o ai ua saunia ae po o ai foi e lei saunia. Ua silafia e le Alii loto o Ana fanau uma, ma afai tatou te tatalo mo musumusuga, o le a Ia fesoasoani mai ia i tatou ia saili ni tagata ua Ia silafia ‘ua saunia e faalogo i le afioga’ (Alema 32:6)” (“Faasoaina Atu o le Talalelei Toefuataiina,” Ensign po o le Liahona, Nov. 2016, 58–59). O le a se mea e te aoao mai i le Iona 3 e musuia ai oe e faasoa atu le talalelei ia i latou foi o e e foliga mai e le’i sauni e sui?

Atonu e aoga le faatusatusa o le uiga faaalia o Iona (tagai Iona 1; 3–4) i lagona o Alema ma atalii o Mosaea (tagai Mosaea 28:1–5; Alema 17:23–25).

Tagai foi 3 Nifae 18:32.

Mika 4:11–13; 5:8–15; 7:5–7

Na sii mai e Iesu Keriso tusitusiga a Mika.

Ua lauiloa sa sii mai e le Faaola upu a Isaia ma Salamo. Na e iloa sa Ia siiina mai foi i ni nai taimi ia upu a Mika? Mafaufau i faataitaiga nei, ma mafaufau loloto pe aisea atonu na taua nei fuaitau i le Faaola. Aisea e taua ai i latou ia te oe?

Mika 4:11–13 (tagai 3 Nifae 20:18–20). Na faatusa e le Alii le faapotopotoina i aso e gata ai i se seleselega saito (tagai foi Alema 26:5–7; Mataupu Faavae ma Feagaiga 11:3–4). O le a se mea ua fautuaina mai ia te oe i lenei faatusaga e uiga i le faapotopotoina o Isaraelu?

Mika 5:8–15 (tagai 3 Nifae 21:12–21). O le a se mea ua fautuaina mai ia te oe i nei fuaiupu e uiga i le nuu o le Atua (“o e ua totoe o Iakopo”) i aso e gata ai?

Mika 7:5–7 (tagai Mataio 10:35–36). E tusa ai ma nei fuaiupu, aisea e taua ai le “faatalitali ia Ieova” muamua? Aisea e taua ai lenei fautuaga i aso nei?

Mika 6:1–8

“Se a foi se mea e finagalo ai Ieova ia te oe?”

Ua valaaulia i tatou e Mika e vaaifaalemafaufau pe atonu e faapei le “alu atu … i luma o Ieova, ma ifo atu … i le Atua maualuga” (Mika 6:6). O le a se mea o fautua atu e fuaiupu 6–8 ia te oe e uiga i le mea e taua i le Alii a o Ia iloiloina lou olaga?

Tagai foi Mataio 7:21–23; 25:31–40; Dale G. Renlund, “Ia Fai le Amiotonu, Ia Naunau i le Alofa, ma Ia Feoai ma Lou Atua ma le Lotofaamaulalo,” Ensign po o le Liahona, Nov. 2020, 109–12.

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Iona 1–4.Atonu e fiafia lau fanau e fai taga ma faamatala le tala ia Iona, pei e faafoliga o sola ese, fai leo e pei o le vasa sousou, po o le faafoliga foi le foloina e se i’a tele (tagai “Jonah the Prophet” i le Old Testament Stories). Fesili i tagata o le aiga po o a ni mea ua latou aoao mai i le aafiaga a Iona. Mo se faataitaiga se tasi o se lesona mai ia Iona, tagai i le fuaiupu e 7 o le “Follow the Prophet” (Children’s Songbook, 110–11).

Iona 3.O a ni mea na aoaoina e Iona e uiga i le faasoa atu o le talalelei? O ai tatou te iloa o le a faamanuiaina i le faalogo i le savali o le talalelei toefuataiina a Iesu Keriso?

Mika 4:1–5.E tusa ai ma nei fuaiupu, o le a le mea o le a aumaia le filemu ma le fiafia i le nuu o le Atua? O le a se mea e mafai ona tatou faia e faataunuu ai lenei valoaga i totonu o o tatou aiga?

Mika 5:2.E mafai ona faaali se ata o Iesu ao laitiiti faatasi ma Lona tina (tagai Gospel Art Book, nu.33) i se tasi pito o le potu ma se ata o le Au Makoi i le isi pito. Faitau faatasi le Mika 5:2 ma le Mataio 2:1–6. Na faapefea ona fesoasoani le valoaga a Mika i le Au Makoi e maua ai Iesu? E mafai e tagata o le aiga ona faame’i le ata o le Au Makoi i talane o le ata o Iesu. Atonu foi e fiafia lou aiga i le matamata o le vitio “The Christ Child: A Nativity Story” (ChurchofJesusChrist.org).

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Ou te Alu i Mea e te Tofia,” Viiga, nu. 169.

Faaleleia o Suesuega Faaletagata Lava ia

Mauaina o le alofa o le Atua. A o e faitau i tusitusiga paia, mafaufau e maitau faamaoniga o le alofa o le Atua e faapitoa ia te oe. Mo se faataitaiga, vaai pe na faapefea ona faaalia e le Atua Lona alofa mo Lana fanau i le tala ia Iona.

alii ua lafoina mai le vaa i le sami

Ata na tusia e Kevin Carden