tamaitai ma le alii faaipoipo i laufanua o le malumalu

7–13 Novema

Hosea 1–6; 10–14; Ioelu

“Ou Te Alofa Fua Ia te i Latou”

Ia valaaulia le Agaga ia avea o se vaega o lau suesuega o le Hosea ma le Ioelu. Ia faamau savali e tuu atu e le Agaga i lou loto ma lou mafaufau.

Tusifaamaumau Ou Lagona Uunai

O le feagaiga a Isaraelu ma le Alii sa tatau ona matuai loloto ma anoa o lea na faatusaina ai e le Alii i se faaipoipoga. O le feagaiga, e pei o se faaipoipoga, e aofia ai ni tautinoga faavavau, aafiaga e faasoa, atinaeina o le ola faatasi, lotonuu atoa, ma le mea sili lava, o le alofa ma le lotoatoa. O lenei ituaiga o tuuto na oo mai ma ni faamoemoega maualuluga—ma ni taunuuga leaga tele o le le faamaoni. E ala mai i le perofeta o Hosea, na faamatala mai ai e le Atua nisi o taunuuga na feagai ma Isaraelu ona o le solia o le latou feagaiga. Ae peitai o Lana savali sa le o le “O le a ou teena oe e faavavau ona o le le faamaoni.” Nai lo lena, sa o le “Ou te toe valaaulia mai oe” (tagai Hosea 2:14–15). “Ta te osi sa ta feagaiga ma a’u i le amiotonu,” na folafola atu ai le Alii (Hosea 2:19). “Ou te faamaloloina lo latou liliu ese, ou te alofa fua ia te i latou” (Hosea 14:4). O le savali lava foi lea o loo Ia tuuina mai ia i tatou i le aso a o tatou taumafai ia ola i a tatou feagaiga i le alofa ma le tuuto.

Sa faasoa mai foi e Ioelu se savali tutusa: “Toe foi ia Ieova lo outou Atua: aua e alofa fua, ma alofa mutimutivale o ia, e tele gese lona toasa, ua tele foi lona alofa” (Ioelu 2:13). “O Ieova, o le malu o ia o lona nuu, ma le ‘olo o le fanauga a Isaraelu” (Ioelu 3:16). Ao e faitau i le Hosea ma Ioelu, mafaufau loloto i lua faiā ma le Alii. Mafaufau pe faapefea ona musuia e Lona faamaoni oe ia e faamaoni ia te Ia.

Mo se vaaiga aoao i tusi o Hosea ma Ioelu, tagai i le “Hosea, poo Hoshea” ma le “Joel” i le Bible Dictionary.

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Hosea 1–3; 14

E le aunoa ona valaaulia a’u e le Alii e toe foi atu ia te Ia.

O le toalua o Hosea, o Komeri, sa le faamaoni ia te ia, ma sa faaaoga e le Alii lenei mea faanoanoa e aoao ai Isaraelu i le ala e manatu ai o Ia ia te i latou ma a latou feagaiga ma Ia. Ao e faitau i le Hosea 1–3, mafaufau loloto pe o le a se finagalo o le Alii i Lana faiā ma Lona nuu o le feagaiga. Atonu e te mafaufau loloto i auala atonu na e le faamaoni ai, e pei o Isaraelu, i le Alii ma le ala na Ia aapa mai ai ia te oe. Mo se faataitaiga, o le a se mea o aoao mai e le Hosea 2:14–23 ma le Hosea 14 ia te oe e uiga i le alofa ma le alofa mutimutivale o le Alii? E faapefea ona faaali atu lou alofa ma lou lotonuu ia te Ia?

Tagai foi Dieter F. Uchtdorf, “Vaega Tonu o le Toe Foi Saogalemu,” Liahona, Me 2007, 99–101.

tamaitai o loo saofai i le eleele ma se alii o loo tuu lima i luga o le ulu.

O Komeri agasala, ua faatusa ia Isaraelu, sa ofoina atu i ai le faaolataga e le Alii. Ata na tusia e Deb Minnard, laisene mai le goodsalt.com

Hosea 6:4–7; Ioelu 2:12–13

O le tuuto i le Atua e ao ona lagonaina i le loto, ae le na’o le faaalia i fafo.

Na poloaiina e le Alii Lona nuu e osi taulaga i manuvaefa. Ae e ui ina sa usitai tagata i aso o Hosea i lena tulafono, ae sa latou solia poloaiga e sili atu le taua (tagai Hosea 6:4–7). O le a sou manatu i le uiga o le faapea, “o le alofa [e] loto i ai [le Alii], ae le o le taulaga; ia iloa foi le Atua e sili lea i lo’u manatu i taulaga mu? (Hosea 6:6). O le a sou manatu i le uiga o le, mo le amiotonu ia pei o se puao po o le pei o se sau i le taeao? O le a le mea e tatau ona pei ai lo tatou amiotonu? (tagai Isaia 48:18; 1 Nifae 2:9–10).

E mafai foi ona e faitau i le Mataio 9:10–13; 12:1–8 e vaai pe o faapefea ona faaaoga e le Faaola le Hosea 6:6 i le taimi o Lana auaunaga. E faapefea ona fesoasoani nei fasifuaitau ina ia e malamalama i upu a Hosea?

A faitau le Ioelu 2:12–13, atonu e fesoasoani lou iloa o le saeia po o le sasaeina o ofu o se tagata sa o se faailoga i fafo i aso la o le faavauvau po o le faanoanoa (mo se faataitaiga, tagai 2 Nofoaiga Tupu 34:14–21,27). E faapefea ona ese le saeia o o tatou loto mai le saeia o o tatou ofu?

Tagai foi Isaia 1:11–17; Mataio 23:23; 1 Ioane 3:17–18.

Ioelu 2

“E iu ina ou liligi ifo ai lou agaga i luga ifo i tagata uma.”

Ina ua vavalo Ioelu e uiga i “le aso o Ieova,” sa ia faamatalaina “o se aso pouliuli ma le pogisa,” “e mamafa ma matua matautia” (Ioelu 2:1–2,11). Sa fetaiai Isaraelu ma le tele o aso mamafa ma matautia i lona talafaasolopito, ma o le a feagai le nuu o le feagaiga a le Atua ma [mea mamafa ma matautia] i le lumanai. O le a se mea ua faagaeetia ai oe e uiga i le fautuaga na tuuina mai e le Alii i le Ioelu 2:12–17? Ia maitau foi faamanuiaga sa Ia folafola mai i le Ioelu 2:18–32. Aisea e ono faapitoa ai le taua o faamanuiaga ua folafolaina mai i le fuaiupu 27–32 i aso e pei o aso ua faamatalaina i le Ioelu 2, e aofia ai ma o tatou aso?

O le a sou manatu o le a le uiga o le faapea, o le “liligi ifo [e le Alii Lona] agaga i luga o tagata uma”? (Ioelu 2:28). O a ni auala ua faataunuuina ai valoaga i le Ioelu 2:28–29 ? (Tagai Galuega 2:1–21; Iosefa Samita—Talafaasolopito 1:41.)

Atonu e te mafaufau loloto i upu nei mai ia Peresitene Russell M. Nelson: “I aso a sau, o le a le mafai ona ola ai faaleagaga e aunoa ma le taiala, taitaiga, faamafanafanaga, ma le faatosinaga faifai pea a le Agaga Paia” (“Faaaliga mo le Ekalesia, Faaaliga mo o Tatou Olaga,” Liahona, Me 2018,96). Aisea e alagatatau ai faaaliga i lo tatou ola faaleagaga? E mafai faapefefa ona e faateleina lou gafatia ona maua faaaliga faaletagata lava ia?

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Hosea 2:19–20.Na faaaoga e le Alii le talafaafaatusa o le faaipoipoga e faamatala ai Lana faiā faafeagaiga ma Isaraelu (tagai foi i le Guide to the Scriptures, “Bridegroom,” scriptures.ChurchofJesusChrist.org). E mafai e lou aiga ona talanoa pe aisea e mafai ai ona avea le faaipoipoga ma se talafaatusa mo a tatou feagaiga. E faapefea ona fesoasoani le Hosea 2:19–20 ia i tatou ia malamalama pe faapeī lagona o le Atua ia i tatou? E mafai faapefea ona tatou faamaoni i a tatou feagaiga ma Ia?

Hosea 10:12.Atonu o le a fiafia tamaiti e tusi se ata o se uati ma fuafua ni auala e mafai ona latou sailia ai le Alii i taimi eseese i le aluga o le aso.

Ioelu 2:12–13.Ina ia fesoasoani i lou aiga e talanoa e uiga i le Ioelu 2:12–13, e mafai ona e tuua se ata o le Faaola i se tasi itu o le potu ma le upu agasala i le itu faafeagai. Valaaulia tagata o le aiga e auauai e faasaga i le faailoga ona faliu lea agai i le Faaola a o latou faasoa mai ni mea e mafai ona fesoasoani tatou te liliu atu ai ia te Ia “ma o [tatou] loto atoa.” Faamalosiau i tagata o le aiga e mafaufau i itu uma o o tatou olaga, e aofia ai gaoioiga, galuega, aoga, ma mafutaga.

Ioelu 2:28–29.Faamata o le a le uiga mo le Agaga ina ia “liligi ifo” i o tatou luga? Masalo e mafai ona e faaali atu lenei mea e ala i le liligiina o se vai ona faatusatusa lea i se sinasina po o se tulutulu.

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “O Mai ia Iesu,” Viiga, nu.117.

Faaleleia o Lo Tatou Aoao Atu

Aoao atu le aoaoga faavae. “Ia le misia se avanoa e faapotopoto faatasi ai le fanau e aoao i aoaoga faavae a Iesu Keriso O taimi faapena e seāseā lava ona maua pe a faatusatusa atu i taumafaiga a le fili” (Henry B. Eyring, “O Le Mana o le aoao Atu o Aoaoga Faavae,” Liahona, Iulai 1999,74).

Iesu o loo tu i le faitotoa

O Mai ia te A’u, saunia e Kelly Pugh