“14-20 Novema. Amosa; Opetaia: ‘Ia Outou Sailia ia Ieova, Tou te Ola Ai,’” Sau, Mulimuli Mai ia te Aʼu—Mo Tagata Taitoatasi ma Aiga: Feagaiga Tuai 2022 (2021)

“14-20 Novema. Amosa; Opetaia,” Sau, Mulimuli Mai ia te A’u—Mo Tagata Taitoatasi ma Aiga: 2022

Ata

foliga o Iesu o loo faamalamalamaina e moliga’o i totonu o se potu pogisa

Areto o le Ola, saunia e Chris Young

14–20 Novema

Amosa; Opetaia

“Ia Outou Sailia ia Ieova, Tou te Ola Ai”

O le Agaga Paia e mafai ona tatalaina lou mafaufau ma lou loto i savali i le upu a le Atua ua mo na’o oe lava. O le a sou manatu i se mea na finagalo le Alii e te aoaoina i lenei vaiaso?

Tusifaamaumau Ou Lagona Uunai

Na filifili e le Alii le fanau a Aperaamo e avea ma Ona nuu o le feagaiga ina ia avea o se “manuia” i tagata uma (tagai Kenese 12:2–3). Ae nai lo o lena, i le taimi o le auaunaga a Amosa, o le toatele o tagata o le feagaiga sa sauaina e matitiva ma le amanaiaina perofeta, ma faia a latou tapuaiga o se mea gaogao ma leai se aoga (tagai Amosa 2:6–16). E sa’o, o nuu na siomiaina i latou sa ta’usalaina i agasala e tele (tagai Amosa 1; 2:1–5), ae sa le’i avea lena ma se ‘alofaga mo le nuu o le Atua (tagai Amosa 3:2). O lea na auina atu ai e le Atua se failafumanu mai sa Iuta na igoa ia Amosa e talai atu le salamo i le Malo o Isaraelu. Mulimuli ane, sa tautino mai ai foi e le Atua e ala i le perofeta o Opetaia, e ui ina sa faatamaiaina le Malo o Iuta, ae o le a toe faapotopoto ma faamanuia e le Alii Lona nuu. Na se ese le nuu o le feagaiga mai le Alii, na molimau mai i la’ua uma, peitai o le a le tutuliesea i latou e faavavau. A faaali mai e le Atua Ana mealilo i Ana auauna o perofeta (tagai Amosa 3:7), e mafai ona tatou talia o se faailoga o loo finagalo pea o Ia e fesoasoani ia i tatou ia tatou ola i feagaiga na tatou osia ma Ia.

Mo nisi faamatalaga atili e uiga i tusi o Amosa ma Opetaia, tagai “Amos” ma “Opetaia” i le Bible Dictionary.

Ata

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Amosa 3:1–8; 7:10–15

E faaali mai e le Alii upumoni e ala mai i Ana perofeta.

I le Amosa 3:3–6, na tuuina mai ai e le perofeta o ni nai faataitaiga o mafuaaga ma aafiaga: ona a maua e se leona se vete, e tagi le leona; ona faatu se mailei maunu mo se manulele, e maileia le manulele. (Ia manatua, i le Faaliliuga a Iosefa Samita o le fuaiupu 6, o le upu “faia” sa suia i le “iloa” [i le Amosa 3:6, vaefaamatalaga e].) I fuaiupu 7–8, sa faatatau ai e Amosa lenei upumoni i perofeta. O le a le mea e mafua ai ona vavalo se perofeta. O a nisi mea na e aoaoina e uiga i perofeta ao e faitau i le Amosa 7:10–15? Mafaufau loloto pe aisea e te faafetai ai ona o loo “faaalia [mai pea e le Alii] lona finagalo i ana auauna o perofeta” (Amosa 3:7). O le a se mea ua fautuaina mai e lenei upumoni ia te oe e uiga i le Atua?

Tagai foi Mataupu Faavae ma Feagaiga 1:38; 21:4–8; 35:13–14.

Amosa 4–5

“Ia Outou Sailia ia Ieova, Tou te Ola Ai.”

A o e faitau i le Amosa 4:6–13, maitau faamasinoga na auina mai e le Alii i luga o le nuu o Isaraelu. O le a se mea o fautua mai e nei fuaiupu e uiga i le mea ua faamoemoe le Alii o le a tupu i le mavae ai o nei aafiaga? (tagai foi Helamana 12:3). Mafaufau i se tofotofoga lata mai nei na e oo i ai. E ui atonu e le’i auina mai e le Atua lou tofotofoga, mafaufau loloto pe ono faapefea ona tuuina atu ai ia te oe ni avanoa e saili ai o Ia.

Faitau le Amosa 5:4, 14–15, ma mafaufau loloto pe na faapefea ona “alofa” le Alii (fuaiupu 15) ia te oe ao e sailia o Ia, e oo lava i taimi o ou tofotofoga.

Tagai foi Donald L. Hallstrom, “Liliu Atu i le Alii,” Ensign po o le Liahona, Me 2010, 78–80.

Amosa 8:11–12

O le afioga a le Alii e mafai ona faamalieina ai le matelaina ma le galala faaleagaga.

Tatou te oo uma lava i periota o le matelaina ma le galala faaleagaga, ae tatou te le manaomia ona “feoai e pau mai i le tasi vasa e oo atu i le isi vasa” (Amosa 8:12) e vaavaai ai mo se mea e faamalieina ai i tatou. Ua tatou iloa le mea o le a faamalieina ai le matelaina faaleagaga, ma ua matuai tele naua le faamanuiaina o i tatou i le afioga a le Alii. Ao e faitau i le Amosa 8:11–12, mafaufau pe aisea ua avea ai le oge o se faatusatusaga lelei mo le ola e aunoa ma le afioga a le Atua. O a ni malamalamaaga faaopoopo e te maua i le Mataio 5:6; Ioane 6:26–35; 2 Nifae 9:50–51; 32:3; Enosa 1:4–8?

Tagai foi Jeffrey R. Holland, “He Hath Filled the Hungry with Good Things,” Ensign, Nov. 1997, 64–66; Gospel Topics, “Apostasy,” topics.ChurchofJesusChrist.org.

Ata

o se vaega o talavou o loo tutu i luma o le malumalu

E mafai ona avea i tatou ma faaola i le Mauga o Siona e ala i le faia o galuega o le malumalu ma talafaasolopito o aiga.

Opetaia 1:21

O ai “faaola i le mauga o Siona?

Na tuuina mai e Peresitene Gordon B. Hinckley se faaliliuga e mafai ona i ai o le fuaitau “faaola i le mauga o Siona,” i le faafesootai atu o le fuaitau i le galuega faalemalumalu ma talafaasolopito o aiga: “[I totonu o le malumalu] e avea moni lava i tatou ma faaola i le Mauga o Siona. O le a le uiga o lena mea? E pei lava ona ofoina atu e lo tatou Togiola Lona soifua e ositaulaga e fai ma sui o tagata uma, ma o le faia o lena mea ua avea ai ma o tatou Faaola, e faapena foi ia i tatou, i se auala itiiti lava, pe a tatou faia galuega e sui ai i totonu o le malumalu, e avea [i tatou] ma faaola ia i latou o loo i le isi itu, o ē ua leai se mea latou te toe mafaia e alualu ai i luma, vagana ua i ai se mea e fai mo i latou e i latou o loo i le fogaeleele” (“Tuleiga Faaiu,” Ensign po o le Liahona, Nov. 2004,105).

Ata

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Amosa 3:7.Atonu tou te toe faamanatu nisi o savali lata mai nei mai le Peresitene o le Ekalesia ma talanoa po o le a se mea o faaali mai e le Alii i lou aiga e ala mai ia te ia. Aisea e taua ai le i ai o se perofeta e taitaia le Ekalesia? Na faapefea ona tatou iloa o ia o se perofeta moni? O le a se mea o tatou faia e mulimuli ai i lana fautuaga?

Amosa 5:4.Atonu e fatu e lou aiga se pepa lautele o i ai se savali e faatautau i le tou fale e i ai ma le fuaiupu lea i luga. O le a le uiga o le sailia o le Alii? E faapefea ona tatou sailia o Ia? O a faamanuiaga tatou te maua pe a tatou faia? E mafai ona valaaulia tagata o le aiga e faasoa ma talanoa i isi fuaitau o loo aoao mai e uiga i le sailia o le Alii, e pei o le Mataio 7:7–8; Eteru 12:41; and Mataupu Faavae ma Feagaiga 88:63.

Amosa 8:11–12.Atonu o le a fiafia tamaiti e fai ni taga e ogatasi ma fuaitau o loo i nei fuaiupu. A fiaai pe fiainu o tatou tino, o le a le mea tatou te faia? A fiaai pe fiainu o tatou agaga, o le a le mea tatou te faia? Atonu foi tou te matamata i le vitio “The Great Apostasy” (ChurchofJesusChrist.org) ma talanoa pe faapefea ona faamalieina e le Toefuataiga o le talalelei lo tatou matelaina faaleagaga.

Opetaia 1:21.Mata o le a le uiga o le avea ma “faaola … i le mauga o Siona”? (Mo se faamalamalamaga se tasi e mafai ona i ai, tagata i le saunoaga a Peresitene Gordon B. Hinckley i le “Manatu mo Suesuega Faaletagata Lava Ia o Tusitusiga Paia.”) O ai o o tatou tuaa o manaomia sauniga faaola? O le a se mea o le a tatou faia e fesoasoani ai ia i latou?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Ia Viia Oe le Atua,” Viiga, nu.10.

Faaleleia Suesuega Faaletagata Lava Ia

Faaaoga musika e valaaulia ai le Agaga ma aoao ai aoaoga faavae. O le faalogologo po o le faitauina o se viiga e mafai ona fesoasoani ia te oe e aoao ai mataupu faavae o le talalelei. Mo se faataitaiga, e mafai ona tou faalogologo pe faitau le “Ia Viia Oe le Atua” (Viiga, nu.10) ina ia musuia se faatuatua malosi atu i perofeta soifua. (Tagai Aoao Atu i le Ala a le Faaola, 22.)