Ua Faamatala e Tanielu le Miti a Nepukanesa, saunia e Grant Romney Clawson

31 Oketopa–6 Novema

Tanielu 1–6

“E Leai Se Isi Atua Na Te Mafaia Ona Laveaiina”

Na faamalamalama mai e Elder Richard G. Scott e faapea, o le tusifaamaumauina o musumusuga “ua faaali atu ai i le Atua e paia Ana fesootaiga ma i tatou. O le tusifaamaumauina o le a faaleleia ai o tatou gafatia e manatua faaaliga” (“E Faapefea ona Maua Faaaliga ma Musumusuga mo Lou Olaga Patino,” Liahona, Me 2012,46).

Tusifaamaumau Ou Lagona Uunai

E foliga mai e leai se tasi o le a faamata’u atu e lafo oe i se ogaumu aasa po o se lua o leona ona o lou faatuatua ia Iesu Keriso. Ae e leai se tasi o i tatou e sao atu i lenei olaga e aunoa ma se tofotofoga o le faatuatua. E mafai ona tatou manuia uma mai le faataitaiga a tagata e pei o Tanielu, Sataraka, Mesako, ma Apeteniko, o e na ave faatagataotauaina a o avea o ni alii talavou e le Malo malosi a Papelonia (tagai 2 Tupu 24:10–16). O nei tagata talavou sa siomia e se aganuu sa le masani ai ma ni tulaga faatauaina ese, ma sa latou fetaiai ma faaosoosoga e lafoai o latou talitonuga ma tu ma aga amiotonu. Ae sa latou tumau pea i a latou feagaiga. E pei o Iosefa i Aikupito ma Eseta i Peresia, sa taofimau Tanielu ma ana uo i Papelonia i lo latou faatuatua i le Atua, ma sa faia e le Atua vavega na musuia ai pea tagata talitonu e oo mai i le asō.

Na faapefea ona latou maua le malosiaga e matuai tumau faamaoni ai? Sa latou faia na mea laiti ma faigofie ia ua ta’u mai e le Atua ia i tatou uma e fai—tatalo, anapogi, filifili uo lelei, faalagolago i le Atua, ma le avea ma malamalama i isi. Ao faamalolosia i tatou i le faia o nei lava mea laiti ma faigofie, e mafai ona tatou fetaiai ma leona ma ogaumu aasa i o tatou lava olaga ma le faatuatua.

Mo se vaaiga aoao o le tusi o Tanielu, tagai i le “Daniel, book of” i le Bible Dictionary.

Manatu mo Suesuega Faaletagata Lava Ia o Tusitusiga Paia

Tanielu 1; 3; 6

E mafai ona ou faalagolago i le Alii i taimi e tofotofoina ai lo’u faatuatua.

I se faauigaga, o loo tatou nonofo uma lava i Papelonia. Ua tumu le lalolagi o loo siomia ai i tatou i le tele o faaosoosoga ina ia fetuunai o tatou tulaga faatonuina ma fesiligia lo tatou faatuatua ia Iesu Keriso. Ao e faitau i le Tanielu 1, 3, ma le 6, maitau le ala na faamalosia ai Tanielu, Sataraka, Mesako, ma Apeteniko e fai mea na latou iloa e sese. Pe na i ai se taimi na e lagona ai faamalosia o oe e fetuunai ou talitonuga? O a ni mea ua e aoao mai i nei alii e mafai ona fesoasoani ia te oe e faalagolago ai i le Alii i taimi e te feagai ai ma mea faafeagai?

O le tusi o Tanielu ma le tele o isi mau ua tusifaamaumau ai aafiaga o faatuatua maoae na faapea ona oo atu ai i vavega tetele. Ae faapefea pe afai o lo tatou faatuatua e le oo atu ai i vavega o loo tatou sailia? (tagai, mo se faataitaiga, Alema 14:8–13). E faavae i mea e te faitauina i le Tanielu 3:13–18, o le a sou manatu, mata e faapefea ona taliina e Sataraka, Mesako, ma Apeteniko le fesili lenei? E mafai faapefea e la latou faataitaiga ona aafia ai le ala e te taulima ai ou tofotofoga o le faatuatua? Mo nisi faamatalaga e uiga i nei fuaiupu, tagai i le savali a Elder Dennis E. Simmons “But If Not…” (Liahona, Me 2004, 73–75).

O le tusi o Tanielu ua faaalia ai foi le ala e mafai ai e filifiliga amiotonu a se tagata e toatasi ona taitai atu isi i le faatuatua maoae atu i le Alii. O a ni faataitaiga o lenei mea e te maua i mataupu 1, 3, ma le6? Mafaufau loloto i aafiaga atonu o faia e au filifliga i isi (tagai Mataio 5:16).

Tagai foi Dieter F. Uchtdorf, “Aua le Mata’u, Tau Lava Ina Talitonu,” Liahona, Nov. 2015, 76–79; David R. Stone, “Siona i le Totonugalemu o Papelonia,” Liahona, Me 2006, 90–93.

Ata tusi o Tanielu ma ana uo o loo teenaina meaai a le tupu, saunia e Brian Call

Tanielu 2

O le Ekalesia a Iesu Keriso o le Au Paia o Aso e Gata Ai o le malo lea o le Atua i le lalolagi.

E ala i faaaliga, na vaai ai e Tanielu na muaita’u mai ai e le miti a Nepukanesa ia malo faalelalolagi i le lumanai, faapea foi ma le malo o le Atua i le lumanai, lea “e le faaumatia e faavavau” (Tanielu 2:44). Na aoao mai Elder D. Todd Christofferson, “O le Ekalesia o le malo lena na valoia i aso e gata ai e lei fausiaina e le tagata, ae na faatuina e le Atua o le lagi ma taavale atu ai e pei o se maa ‘na tofi mai le mauga e aunoa ma ni lima’ e faatumu ai le lalolagi” (“E Manaomia i Se A Le Ekalesia?,” Liahona, Nov. 2015,111). Mafaufau i le malo o le Atua i aso e gata ai ao e faitau i le faauigaga o le maa i le Tanielu 2:34–35, 44–45. O a ni mea e talitutusa ai ua e vaaia i le va o le maa ma le malo? O faapefea ona e vaaia le faatumuina e le malo o le Atua o le lalolagi i aso nei?

Tagai foi Gordon B. Hinckley, “O Le Maa Na Tofia i le Mauga,” Liahona, Nov. 2007, 83–86; L.Whitney Clayton, “Le A Oo Mai le Taimi,” Liahona, Nov. 2011, 11–13.

Tanielu 3:19–28

O le a lagolago a’u e le Alii i o’u tofotofoga.

O a ni malamalamaaga e oo atu ia te oe ao e faitau e uiga i le tagata lona fa sa faaali mai i totonu o le ogaumu aasa faatasi ma Sataraka, Mesako, ma Apeteniko? E mafai faapefea e lenei tala ona fesoasoani ia te oe i tofotofoga e te oo i ai? Atonu e te maua ni malamalamaaga loloto faaopoopo i le Mosaea 3:5–7; Alema 7:11–13; Mataupu Faavae ma Feagaiga 61:36–37; 121:5–8.

Manatu mo Suesuega Faaleaiga o Tusitusiga Paia ma Afiafi Faaleaiga

Tanielu 1–2.Ao e faitau faatasi le Tanielu 1 ma le2, e mafai ona e vaai mo faamanuiaga na maua e Tanielu ma ana uo e ala i le le tagofia o aano o manufasi ma uaina a le tupu. (Tagai i le vitio “God Gave Them Knowledge,” ChurchofJesusChrist.org.) E mafai ona e faatusatusaina na faamanuiaga i folafolaga a le Alii ia i tatou pe a tatou tausia Ana poloaiga, e pei o le Upu o le Poto (tagai Mataupu Faavae ma Feagaiga 89:18–21). O faapefea ona faamanuiaina i tatou e le Alii mo le ola i le Upu o le Poto?

Tanielu 3.E mafai faapefea ona e fesosoani i lou aiga ia aoao e uiga i le tala i le Tanielu 3? “E mafai ona fesoasoani le Sataraka, Mesako, ma Apeteniko” i Tala o le Feagaiga Tuai . O le a se mea ua faagaeetia ai i tatou e uiga ia Sataraka, Mesako, ma Apeteniko? O a ni tulaga tatou te fetaiai ai ma lena luitau i lo tatou faatuatua ma manaomia ai ona tatou faaali atu tatou te faatuatuaina le Atua?

Tanielu 6:1–23.Atonu o le a fiafia lou aiga e faatino ni vaega o le tala i le Tanielu 6:1–23 (mo se faataitaiga, fuaiupu 10–12 po o le 16–23). O le a se mea ua tatou aoao mai i le faataitaiga a Tanielu? O le a se mea e mafai ona tatou faia ia avea atili ai e pei o ia?

Tanielu 6:25–27.E tusa ai ma nei fuaiupu, na faapefea ona aafia le Tupu o Tariu ina ua laveai e le Alii ia Tanielu mai leona? E mafai foi ona tou faitau i le Tanielu 2:47; 3:28–29 i le ala na aafia ai le Tupu o Nepukanesa i le ala lava faapena. O a ni avanoa o loo ou maua e faatosina ai isi? Talanoa i ni faataitaiga ua tou vaaia o auala ua faatosinaina ai e le faatuatua o isi, e aofia ai ma tagata o le aiga, ia isi mo le lelei.

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Ou Te Fia Ola i le Talalelei,” Tusipese a Tamaiti,72.

Faaleleia o Lo Tatou Aoao Atu

Aoao atu le aoaoga faavae. O le talalelei a le Alii e matagofie i lona faigofie (tagai Mataupu Faavae ma Feagaiga 133:57). O gaoioiga faigofie ma talanoaga e taulai atu i le aoaoga faavae e mafai ona valaaulia ai le Agaga Paia e momoli atu le savali o le talalelei i totonu o loto o lou aiga.

Tanielu i le Lua o Leona, 1872. Rivière, Briton (1840–1920). Faaaloaloga: Walker Art Gallery, National Museums Liverpool/Bridgeman Images