tamaitai ma le alii faaipoipo i laufanua o le malumalu

7–13 Novema

Hosea 1–6; 10–14; Ioelu

“Ou Te Alofa Fua ia te i Latou”

A o e suesue i tusitusiga paia ma sauni e aoao atu, saili musumusuga mai le Agaga Paia. O le a le mea e te lagona le faʻaosofia ai e taulaʻi i ai i le taimi o le vasega i lenei vaiaso?

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Faaali se ata o le Faaola, ma valaaulia tamaiti e fetufaai mai se mea latou te iloa pe na latou aoaoina e uiga ia te Ia i lenei vaiaso. Tuu atu ia i latou e feauauai e uu le ata a o latou fetufaai.

aikona o le aoao atu

Aoao atu le Aoaoga Faavae: Tamaiti Laiti

Hosea 10:12

E mafai ona ou saili atu i le Alii.

O loo faaaoga ina e le Hosea 10:12 ata o le luluina, seleseleina, taimi, ma le timu e valaaulia ai i tatou e saili le Alii. Ao e faitau i lenei fuaiupu, o a manatu fatufatuai e oo mai i lou mafaufau e mafai ona musuia tamaiti e saili ia te Ia?

Gaoioiga e Mafai Ona Fai

• Faitau le Hosea 10:12 i tamaiti, ma valaaulia i latou e fai ni taga faigofie e fesoasoani ia i latou e malamalama ai i le fuaiupu, e pei o le faafoliga o toto ni fatu laau, piki ni fualaau faisua mai se laau, po o le tutu i le timu. Pe faaali ni ata o fatu laau, laau, ma le timu. Fesoasoani i tamaiti e faatusatusa le totoina o se fatu laau ma selesele ni meaʻai lelei i le ola amiotonu ma le mauaina o faamanuiaga a le Alii. Ia molimau atu i faamanuiaga ua to mai e le Alii i ou luga a o e taumafai e saili ia te Ia.

• Tusi se uati i luga o le laupapa, ma fai atu i tamaiti e faasoa mai ni auala e mafai ai ona tatou sailia le Alii i taimi eseese o le aso. Valaaulia i latou e toe fai faatasi ma oe le fasifuaitau “Ua oʻo i le taimi e saili ai le Alii” (Hosea 10:12). Fesoasoani ia latou malamalama o taimi uma lava e saili ai le Alii. Faasoa mea e te faia e manatua ai pea o Ia.

O Iesu o loo nofonofo ma tamaiti

O Iesu Keriso o lo tatou Faaola ma le Togiola.

Hosea 13:4,14

O Iesu Keriso o lo’u Faaola.

A’o e aoao atu e uiga i le Faaola ma Lana Togiola, molimau atu i Lona alofa mo tamaiti uma.

Gaoioiga e Mafai Ona Fai

• Faaali atu ni ata o ni tagata, e aofia ai ma Iesu, ma fai atu i tamaiti e saili po o fea o nei tagata o lo tatou Faaola. Faitau le Hosea 13:4, ma faamamafa atu e leai se Faaola na o Iesu Keriso. Ia molimau atu talu ai ona o le Togiola a Iesu Keriso, ua mafai ai ona tatou toe foi atu e nonofo faatasi ma le Tama Faalelagi.

• Tuu atu i tamaiti e auauai i le uuina o se ata o Iesu i luga o le satauro po o le tuugamau ma se ata o Iesu i fafo atu o le tuugamau avanoa. Valaaulia tamaiti e talanoa e uiga i mea o faaalia i ata. Faitau mai le Hosea 13:14 le fuaitau “Ou te laveai ia te i latou ai le malosi o le tuugamau; ou te faaola ia te i latou ai le oti.” Ia molimau atu na faasaoina i tatou e Iesu Keriso mai le oti ma e mafai ona tatou toetutu. Usu se pese e faatatau i le Toetu, e pei o le “Pe Na Toe Soifua Moni Mai ea Iesu?” (Tusipese a Tamaiti,45). Fesoasoani i tamaiti ia iloa le Agaga ao latou pepese.

Ioelu 2:28

E mafai e le Agaga Paia ona taiala au.

A o e aoao atu e uiga i le valoaga a Ioelu i le Ioelu 2:28, mafaufau pe mafai faapefea ona e fesoasoani i tamaiti e sauniuni mo le mauaina o le meaalofa o le Agaga Paia pe a uma ona papatisoina.

Gaoioiga e Mafai Ona Fai

• Faitau le Ioelu 2:28 i tamaiti, ma faamatala o upu “tagata uma” o lona uiga o tagata uma, aofia ai “atalii” ma “afafine” pei o latou. Fai i tamaiti e tusi ni ata o tagata o lo o taʻua i lenei fuaiupu (atalii ma afafine, alii talavou ma alii matutua, tamaitai talavou ma tamaitai matutua), e aofia ai ma latou. Faamatala o se tasi auala e liligi mai ai e le Tama Faalelagi Lona Agaga o le tuuina mai ia i tatou o le meaalofa o le Agaga Paia pe a tatou papatiso.

• Valaaulia tamaiti e faasoa mai mea latou te iloa e uiga i le Agaga Paia. Fesoasoani ia latou malamalama o le Agaga Paia e mafai ona aʻoaʻoina i tatou e uiga i le Tama Faalelagi ma Iesu Keriso ma mafai ona fesoasoani ia tatou iloa le mea moni (tagai Ioane 14:26; Mataupu Faavae ma Feagaiga 42:17). Faasoa atu ni mea na tutupu e fesoasoani ai i tamaiti ia malamalama i auala e mafai ai ona fesoasoani le Agaga ia i tatou.

aikona o le aoao atu

Aoao atu le Aoaoga Faavae: Tamaiti Matutua

Tanielu 2:19--20

E mafai ona ou tausia ma le faamaoni a’u feagaiga.

I le tusi a Hosea, na faʻatusatusa ai e le Alii Ana feagaiga ma Isaraelu i se faʻaipoipoga. E ui lava i le le faamaoni o Isaraelu, na alofa pea o ia ia te i latou ma finagalo ia latou toe foi. O lenei faatusatusaga e mafai ona fesoasoani ia te oe e aʻoaʻo ai tamaiti e uiga i le taua o le tausia o a tatou feagaiga ma le Aliʻi.

Gaoioiga e Mafai Ona Fai

• Tau atu i tamaiti o le tusi a Hosea, na faatusaina ai e le Alii Ana feagaiga ma Isaraelu i se faaipoipoga. Faaali atu i tamaiti se ata o se tamaitai ma se alii faaipoipo. E faapefea ona finagalo le Tama Faalelagi e taulimaina ai e se tane ma se ava le tasi ma isi? Faafefea ona tatou faaali atu i le Alii tatou te alolofa ia te Ia ma o le a tatou faamaoni ia te Ia?

• Fesoasoani i tamaiti ia malamalama o feagaiga tatou te osia ma le Alii e tatau ona tumau e faavavau. Ia valaaulia se tasi o tamaiti e faitau le Hosea 2:19–20, saili mo upu e faamatala ai lagona o le Alii e uiga i Ana feagaiga ma tatou. O le a le mea tatou te osi feagaiga e fai pe a tatou papatiso? Faafefea ona tatou tausia lenei feagaiga ua tatou osia ma le Aliʻi?

Hosea 13:4,14

O Iesu Keriso o Lo’u Faaola ma le Togiola.

Faafefea ona e faaaogaina upu a Hosea e faamalosia ai molimau a tamaiti i lo latou Faaola ma le Togiola? A o e aoao atu, fesoasoani i tamaiti ia lagonaina le olioli ma le alofa i le Togiola a Iesu Keriso.

Gaoioiga e Mafai Ona Fai

• Valaaulia tamaiti e faitau le Hosea 13:4,14, saili mo upu poʻo fasifuaitau e faamatalaina Iesu Keriso. O le a se mea o aoao mai e nei upu e uiga ia te Ia? Valaaulia tamaiti e faaaoga le Taiala mo Autu po o le Taiala i Tusitusiga Paia e saili ai ma fetufaai atu isi mau o loʻo aoao mai ai e uiga ia Iesu Keriso o le Faaola ma le Togiola. Faasoa atu lau molimau e uiga i le Faaola, ma tuu i tamaiti le avanoa e faia ai foi lena mea.

• Ina ia fesoasoani i tamaiti ia malamalama pe faafefea e le Faaola ona totogia pe togiolaina tatou mai le oti, faʻaali le vitio “Handel’s Messiah: Debtor’s Prison” (ChurchofJesusChrist.org). O le a se mea ua tatou aʻoaʻo mai lenei vitio e fesoasoani tatou te malamalama ai i mea ua faia e le Faaola mo i tatou?

Ioelu 2:28–29.

E mafai e le Agaga Paia ona taiala au.

O le tele o tamaiti e te aʻoaʻoina atonu na papatisoina ma mauaina le meaalofa o le Agaga Paia. Faafefea ona e faaaogaina nei mau e fesoasoani ia latou malamalama ai i le mana ma faamanuiaga e sau mai le faalogo i le leo o le Agaga?

Gaoioiga e Mafai Ona Fai

• Valaaulia tamaiti e faitau faatasi le Ioelu 2:28–29, tuu ai igoa o tamaiti e suitulaga i fuaitau “tou atalii” ma “tou afafine.” Tusi i luga o le laupapa se fuaiupu e pei o lea E mafai e le Agaga Paia … ma valaaulia tamaiti e auauai e faauma ai le fuaiupu. Uunaia i latou e faaaofia ai mea na latou aoaoina mai le Ioane14:16; Moronae 10:5; Mataupu Faavae ma Feagaiga 42:17, ma isi mau.

• Tuʻu se mea i totonu o se pesini, ma feauauai tamaiti e sasaa le vai i luga Faamatala o le mea faitino e fai ma sui o tatou, ma le vai e faatusa i le Agaga Paia. Pe a papatisoina i tatou, tatou te mauaina le meaalofa o le Agaga Paia, o se tasi auala e faataunuu ai e le Alii Lana folafolaga e “liligi mai [Lona] agaga.” O le a le mea e tatau ona tatou faia e maua ai le Agaga Paia? Ia valaaulia tamaiti e fetufaai mai ni taimi na latou lagonaina ai le uunaiga a le Agaga.

aikona o le aoaoina

Uunaia le Aoaoina i le Aiga

Fesoasoani i tamaiti e faailoa mai se mea na latou aoaoina e uiga i le Tama Faalelagi, Iesu Keriso, po o le Agaga Paia i aso nei i le vasega. Uunaia i latou e faasoa atu le mea lenei ma o latou aiga.

Faaleleia o Lo Tatou Aoao Atu

Saili faaaliga i aso uma. A o e sauniuni e aoao atu, tatalo ma mafaufau loloto i tusitusiga paia i le gasologa o le vaiaso. O manatu ma lagona e uiga i le auala e aʻoaʻo atu ai e mafai ona oʻo mai ia te oe i soo se taimi ma soo se mea. (Tagai Aoao Atu i le Ala a le Faaola, 12.)

itulau o gaoioiga: E mafai e le Agaga Paia ona taitaia au.