“Iona le perofeta,” Tala o le Feagaiga Tuai (2022)
“Iona le perofeta,” Tala o le Feagaiga Tuai
Iona 1–4
Iona le Perofeta
Aoao e faatuatuaina le alofa mutimutivale o le Alii
O Iona sa avea ma perofeta. Na ta’u atu e le Alii ia te ia e lapatai atu i tagata o Nineva o lo latou aai o le a faaumatia pe a afai latou te le salamo.
Ae o tagata o Nineva sa avea ma fili o tagata Isaraelu. Sa le manao Iona e talai atu ia i latou. O lea na ia alu ai i se vaa e malaga ai i se mea e mamao ese ma Nineva.
A o i ai Iona i luga o le vaa, na sau se afa tele. O tamaloloa sa i luga o le vaa sa fefefe mo o latou ola. Na latou fai atu ia Iona e tatalo i le Alii ia faasaoina i latou.
Na iloa e Iona o le Alii na ia aumaia le afa ona sa ia sola ese mai le mea na fai atu le Alii ia te ia e fai. Sa manao Iona e laveaiina tagata o loo i le vaa. Sa ia fai atu a latou lafoina o ia i le sami, o le a uma le afa.
Sa le mananao tagata e lafo Iona i lalo. Sa latou taumafai e alo le vaa i le pa’u matu, ae sa malosi tele le afa. Na i’u lava ina latou lafoina Iona i le sami.
Na uma le afa. Ae na foloina e le i’a tele Iona.
Sa i ai Iona i totonu o le manava o le i’a mo le tolu aso ma le tolu po. I le aluga o lena taimi, sa tatalo Iona ma ua salamo. Sa ia manao e fai le mea ua sa’o ma faalogo i le Alii. Na faafofogaina e le Alii le tatalo a Iona ma Ia faia le i’a ia luai Iona i fafo i le eleele matūtū.
Ona toe ta’u atu lea e le Alii ia Iona e talai atu i tagata o Nineva. O le taimi lea na usitai Iona. Na ia alu i Nineva ma ta’u atu i tagata ia salamo po o le a faaumatia e le Alii lo latou aai. Na salamo le tupu ma ona tagata. Sa faamagaloina e le Alii i latou ma ua le faaumatiaina Nineva.
Peitai sa matua le fiafia Iona ona ua le faaumatiaina le nuu. Sa ia manatu ua le tatau ia i latou le faamagaloga.
Mo le aoaoina atu o se lesona ia Iona, sa faatupu e le Alii se laau e faapaolo ai Iona mai le la. Ona pe lea o le laau, ma lagona ai e Iona le faanoanoa mo le laau.
Sa aoao atu e le Alii se lesona ia Iona e uiga i Ana fanau. Sa aoaoina e Iona e tatau ona ia faanoanoa pe a le salamo tagata ma e tatau ona ia fiafia pe a latou salamo.