E Uiga i le Feagaiga Tuai

O folafolaga a le Tama Faalelagi i Ana fanau i aso ua leva

O le vaega muamua o le Tusi Paia o le Feagaiga Tuai. O nei mau sa tusia i se taimi ua leva lava, ae lei fanau mai Iesu Keriso. E i ai tala e fesoasoani tatou te maua ai le faatuatua ia te Ia. Ua aoao mai ai i tatou o tagata taitoatasi i le lalolagi o se vaega o le aiga o le Tama Faalelagi ma e alofa o Ia i Ana fanau.

Teuteronome 7:7–9; Isaia 45:10–12

I le Feagaiga Tuai, ua ta‘ua Iesu Keriso o Ieova ma le Alii. E mulimuli o ia i faatonuga a le Tama Faalelagi. Talu mai le taimi o Atamu ma Eva, ua auina mai e le Tama Faalelagi le Alii o Iesu Keriso e fetalai mai i Ana perofeta. E auina mai e le Tama Faalelagi le Agaga Paia e fesoasoani ia i tatou ia iloa e moni upu a se perofeta.

Esoto 6:2–3; 2 Nofoaiga a Tupu 20:20; Amosa 3:7; 2 Peteru 1:21; Mose 2:1

Sa folafola atu e le Alii i le perofeta o Aperaamo ma lana ava o Sara o le a tuputupu ae lo latou aiga ma faamanuiaina ai le lalolagi atoa. Sa i ai se aiga toatele o le atalii o le la tama o Iakopo lea na avea ma se atunuu. Sa ta‘ua i latou o le aiga o Isaraelu, po o Isaraelu. Sa aoao i latou e perofeta ina ia tulimatai atu i le taimi o le a afio mai ai Iesu Keriso.

Kenese 15:5–6; 17:1–8; Teuteronome 18:15; Isaia 7:14

E tele tala i le Feagaiga Tuai o loo faaalia ai le ala na tausia ai e le Alii Ana folafolaga ia Isaraelu.

Kenese 9:13–17; Ieremia 11:4–5; Eperu 11:1–35

Ina ua faalogo Isaraelu i perofeta ma tausia poloaiga, sa fesoasoani le Alii ia i latou. Pe a latou le usitai, e le mafai ona Ia fesoasoani ia i latou.

Teuteronome 11:26–28; Iopu 36:11–12

O oe o se vaega o le aiga o le Tama Faalelagi. E agalelei le Tama Faalelagi, ma e alofa o Ia ia te oe. O loo i ai Sana fuafuaga mo oe. Ona o le Alii o Iesu Keriso, ua mafai ai ona e toe foi atu e toe mau faatasi ma le Tama Faalelagi. E pei lava ona aoaoina ai Isaraelu, e mafai foi ona e filifili ia faatuatua i le Alii ma tausi Ana poloaiga.

Esoto 15:2; Teuteronome 4:31; 5:10; Mose 1:39