Iesu o loo silasila i luga i fetu

“O Ona ala ia mai le vavau” (Sapakuka 3:6). Sa i le Amataga le Lokou, saunia e Eva Timothy

28 Novema–4 Tesema

Nauma; Sapakuka; Sefanaia

“O Ona Ala ia Mai le Vavau”

E mafai ona e suesue i tusitusiga paia i le olaga atoa ma maua ai lava malamalamaaga fou. Aua le manatu faapea, e tatau lava ona e malamalama i mea uma i le taimi nei. Tatalo mo se fesoasoani ia iloa ai savali e te manaomia i le asō.

Tusifaamaumau Ou Lagona Uunai

O le faitauga o le Feagaiga Tuai e masani ona faauigaina o le faitau i valoaga e uiga i faatafunaga. E masani ona valaauina e le Alii ia perofeta e lapatai atu i e amioleaga ua i o latou luga Ana faamasinoga. O auaunaga a Nauma, Sapakuka, ma Sefanaia o faataitaiga lelei ia. I talatalaga le manaia ma taufaafefe, na muai ta’u atu ai e nei perofeta le pauu o nuu sa faapea, i lena taimi, ona foliga malolosi ma matautia—o Nineva, Papelonia, faapea foi ma Ierusalema. Peitai o lena taimi o le fia afe lena o tausaga ua tuanai. Aisea e taua ai le faitau i nei valoaga i aso nei?

E ui ina sa faatamaiaina nei nuu faamaualuluga ma amioleaga, ae o loo i ai pea le faamaualuga ma le amioleaga. I le lalolagi i aso nei, e o nisi taimi e mafai ona tatou lagona ai le siomia i mea leaga ia sa ta’usalaina e perofeta anamua. E mafai foi ona tatou iloaina ni nai faailoga o na mea i o tatou lava loto. O nei valoaga o le Feagaiga Tuai ua faaalia le finagalo o le Alii e uiga i le faamaualuga ma le amioleaga, ma ua aoao mai ai e mafai ona tatou liliu ese mai nei mea leaga. Atonu o le tasi lena o pogai o loo tatou faitau ai pea i nei valoaga anamua i aso nei. O Nauma, Sapakuka, Sefanaia, ma isi sa le na’o ni perofeta o le faamalaiaga—o i latou o ni perofeta o le laveaiga. O le faamatalaga o faatafunaga o loo tuuitiitia e valaaulia ia o mai ia Keriso ma maua Lona alofa mutimutivale: “Ia outou saili ia Ieova …; saili le amiotonu, … saili le agamalu” (Sefanaia 2:3). O le auala lenei a le Alii anamua, ma o Lana ala foi lea i aso nei. “O Ona ala ia mai le vavau” (Sapakuka 3:6).

Mo se vaaiga aoao o nei tusi, tagai i le “Nahum,” “Habakkuk,” ma le “Zephaniah” i le Bible Dictionary.

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Nauma 1

O le Alii e malosi ma alofa mutimutivale.

O le misiona a Nauma o le muai ta’u atu lea o le faatafunaga o Nineva—o le laumua o le malo saua o Asuria, lea sa faataapeapeina Isaraelu ma sauaina faalealofa Iuta. Sa amata Nauma i le faamatalaina o le toasa ma le malosi lemafaatusalia o le Atua, ae sa Ia saunoa foi e uiga i le alofa mutimutivale ma le agalelei o le Atua. Atonu e te mafaufau e sue fuaiupu i le mataupu 1 e fesoasoani e te malamalama ai i nei uiga taitasi—ma isi uiga auaumama o le Atua e te maitauina. Aisea e te manatu e taua ai le iloa o nei mea taitasi e uiga i le Alii?

Atonu e faigata i ni isi ona aumai faatasi le aoaoga faaletusipaia e faapea, “o loo agalelei Ieova” (Nauma 1:7) ma le aoaoga e faapea “e taui ma sui [o Ia] i e ita ia te ia” (Nauma 1:2). I le Tusi a Mamona, na i ai foi ni fesili faapena a Korianetona le atalii o Alema e “faatatau i le faamasinotonu o le Atua i le faasalaina o le tagata agasala” (Alema 42:1). Ina ia aoao atili e uiga i le alofa mutimutivale ma le ala e fesootai ai i Lana faamasinoga tonu, faitau le tali a Alema ia Korianetone i le Alema 42.

‘olo maa

“O loo agalelei Ieova, o le ‘olo ia i le aso o le puapuaga” (Nauma 1:7).

Sapakuka

E mafai ona ou faatuatuaina le finagalo o le Alii ma Lana taimi.

E oo lava foi i perofeta e i ai a latou fesili e uiga i ala o le Alii. O Sapakuka, o le sa ola i se taimi o le taatele o le amioleaga i sa Iuta, sa amata ana faamaumauga i fesili i le Alii (tagai Sapakuka 1:1–4). E faapefea ona e aoteleina atugaluga a Sapakuka? Pe na i ai ni ou lagona tai faapena?

Sa tali le Alii i fesili a Sapakuka i le fetalai mai o le a Ia auina atu Kaletaia (o le au Papelonia) e faasala sa Iuta (tagai Sapakuka 1:5–11). Ae sa atugalu pea Sapakuka, ona sa foliga mai e le amiotonu le Alii ma le tutu mai ae “fasioti e [Papelonia] agasala le tagata e sili ona amiotonu [Iuta]” (tagai fuaiupu 12–17). O le a se mea e te maua i le Sapakuka 2:1–4 e musuia ai oe e faalagolago i le Alii pe a i ai ni au fesili e le’i taliina?

I le mataupu 3 o le Sapakuka o se tatalo o le viiga i le Atua ma se faailoga o le faatuatua ia te Ia. O le a se mea ua faagaeetia ai oe e uiga i upu Sapakuka i fuaiupu 17–19? E faapefea ona ese mai le lagona o nei fuaiupu mai le Sapakuka 1:1–4? Mafaufau loloto i auala e mafai ona e atiina ae ai le faatuatua faateleina i le Atua, e tusa lava pe foliga mai e le fea le olaga.

Tagai foi i le Eperu 10:32–39; 11; Mataupu Faavae ma Feagaiga 121:1–6; Robert D. Hales, “Faatalitali i le Alii: Ia Faia Lou Finagalo,” Ensign po o le Liahona, Nov. 2011, 71–74.

Sefanaia

“Ia outou sailia ia Ieova, outou uma ua agamalu i le nuu.”

Sa vavalo Sefanaia e faapea, o le a faatamaiaina uma le nuu o Iuta e le au Papelonia ona o lo latou amioleaga. “Ua fetalai mai Ieova, Ou te matua faaumatia mea uma i le fogaeleele” (Sefanaia 1:2). Ae sa faapea mai foi Sefanaia e faapea, “o e totoe” o le a faasaoina (Sefanaia 3:13). Ao e faitau i nei valoaga, ia maitau le ituaiga uiga faaalia ma amioga na faapea ona oo atu ai Iuta ma isi vaega i le faatafunaga—tagai faapitoa i le Sefanaia 1:4–6,12; 2:8, 10,15; 3:1–4. Ona vaavaai lea mo uiga o tagata o le a faasaoina e le Atua—tagai Sefanaia 2:1–3; 3:12–13, 18–19. O le a le savali e te manatu o loo i ai i le Alii mo oe i nei fuaiupu?

O le Sefanaia 3:14–20 o loo faamatala ai le olioli o e amiotonu i le mavae ai ona “aveeseina [e le Alii] le na fai oe ma ona fili” (fuaiupu 15). O a ni faamanuiaga ua folafolaina mai i nei fuaiupu e tulaga ese ia te oe? Aisea e taua ai mo oe le iloa e uiga i nei faamanuiaga? Atonu e te faatusaina nei fuaiupu i aafiaga o loo faamatalaina i le 3 Nifae 17 ma mafaufau loloto pe o a ni lagona o Iesu Keriso e uiga i Lona nuu—e aofia ai ma oe.

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Nauma 1:7.E faapefea ona pei le Alii o “se ‘olo malosi”? Atonu e mafai e lou aiga ona fau se ‘olo malosi faigofie i totonu o le tou fale ma talanoaina le Nauma 1:7 ao i ai i totonu. O a ni mea e fai ai o tatou aso o se “aso o puapuaga”? E faapefea ona faamalosi i tatou e Iesu Keriso ma Lana talalelei? E faapefea ona tatou faaali atu tatou te “faatuatuaina o Ia”?

Sapakuka 2:14.E mafai faapefea ona tatou fesoasoani e faataunuu le valoaga o loo i lenei fuaiupu?

Sapakuka 3:17–19.O le a se mea ua tatou aoao mai i le faataitaiga a Sapakuka i nei fuaiupu?

Sefanaia 2:3.E mafai ona outou taaalo i se taaloga lea e sue ai e tagata o le aiga ia upu “amiotonu” ma le “agamalu” i se itulau e i ai nisi upu se tele. Ona latou talanoa lea e uiga i faataitaiga o le amiotonu ma le agalelei na latou vaaia i le tasi ma le isi. O le a le uiga o le saili i le amiotonu ma le agamalu?

Sefanaia 3:14–20.O le a se mea ua tatou maua i le Sefanaia 3:14–20 tatou te fia “pese, … ia fiafia ma olioli lava ma le loto atoa”? Atonu e mafai e lou aiga ona usu ni viiga po o ni pese e oo atu i le mafaufau a o latou faitau nei fuaiupu.

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Saili Vave le Alii,” Tusipese a Tamaiti,67.

Faaleleia o Suesuega Faaletagata Lava Ia

Ia onosai. O nisi taimi tatou te mananao ai i le taimi lava lea i tali i a tatou fesili, peitai o malamalamaaga faaleagaga e manaomia ai le taimi ma e le mafai ona faamalosia mai. E pei ona ta’u atu e le Alii ia Sapakuka, “Ia faatalitali pea i ai, aua e oo mai lava” (Sapakuka 2:3).

O Iesu o loo afio ifo ma laei i se ofutalaloa mumu

“O Ieova lou Atua i totonu ia te oe o lē malosi ia” (Sefanaia 3:17). E Toe Afio Mai o Ia e Pule ma Nofotupu, saunia e Mary R. Sauer