Iesu o loo silasila atu i luga i fetu

“O Ona ala ia mai le vavau” (Sapakuka 3:6). I le Amataga sa I Ai le Upu, saunia e Eva Timothy

28 Novema–4 Tesema

Nauma; Sapakuka; Sefanaia

“O Ona Ala ia mai le Vavau”

O lou fiafia i tusitusiga paia e mafai ona i ai se faatosinaga malosi i tamaiti o loo e faiaoga ai. Tuu atu latou te vaai i lou loto faafetai mo le upu a le Atua.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Valaaulia tamaiti e auauai e tutu ma faafoliga e avea o se perofeta o le Feagaiga Tuai o loo tu “i luga o le olo” e pei o Sapakuka (Sapakuka 2:1). Fai atu ia i latou e ta’u atu i isi tamaiti se mea o loo latou aoaoina e uiga ia Iesu Keriso ma Lana talalelei.

aikona o le aoao atu

Aoao atu le Aoaoga Faavae: Tamaiti Laiti

Sapakuka 2:3

O le a faataunuuina lava e le Atua Ana folafolaga.

Na atuatuvale le perofeta o Sapakuka i le amio leaga na ia vaai i tagata o Iuta (tagai i le Sapakuka 1:2–4). Na faamautinoa atu e le Alii ia te ia o le a faataunuuina Ana folafolaga i Lana taimi (tagai i le Sapakuka 2:3).

Gaoioiga e Mafai Ona Fai

• Faasoa atu ni faataitaiga o mea e lelei ae pe afai na tatou te faatali—e pei o fualaau ‘aina lea e manaomia le pula po o se palu e manaomia ona tao. O le a le mea e ono tupu pe afai tatou te taumafai e ‘ai le fualaau ‘aina po o le palu ae lei sauniaina? Faamatala e uiga i le perofeta o Sapakuka, o le na fia iloa le taimi o le a taofia ai e le Alii le amioleaga na ia vaaia o vagaia o ia. Faitau i tamaiti le tali a le Alii, o loo maua i le Sapakuka 2:3. Faamamafa atu faapea na manaomia e Sapakuka le faatali mo folafolaga a le Alii ia faataunuuina, e pei lava foi ona tatou manaomia le faia i nisi taimi. Faasoa se taimi na e faatali ai mo se faamanuiaga.

• Fesoasoani i tamaiti e mafaufau i mea na folafola mai e le Atua—mo se faataitaiga, o le a toe afio mai Iesu Keriso i le lalolagi pe o le a mafai ona tatou toe nonofo faatasi ma le Atua. Faatasi ai ma faataitaiga taitasi, valaaulia tamaiti e toe fai mai le fuaiupu lea “Faatalitali pea i ai, aua e oo mai lava.”

Sapakuka 2:14

E mafai ona ou fesoasoani e faatumulia le lalolagi i le malamalama o Iesu Keriso.

Sa valoia e Sapakuka e uiga i le aso o le a iloa ai e le lalolagi atoa ia Iesu Keriso. O lena valoaga ua amata ona faataunuuina i o tatou aso. Mafaufau pe mafai faapefea ona e fesoasoani i tamaiti e avea o se vaega o lona faataunuuga.

Gaoioiga e Mafai Ona Fai

• Faaali atu se fagu gaogao, ma tuu atu ia tofu tamaiti ma se mea faitino laitiiti. Fai atu i tamaiti taitasi e faasoa mai se mea na faia e Iesu pe na aoao ona tuu lea o a latou mea faitino i totonu o le fagu. Faitau leotele le Sapakuka 2:14, ma faamatala atu faapea e pei lava ona faatumu e tamaiti le fagu ma lo latou malamalama e uiga i le Alii, e mafai foi ona tatou faatumuina le lalolagi i le malamalama o Ia.

• Faali atu i tamaiti se faafanua o le lalolagi (tagai Church History Maps, no.7, “Map of the World”). Fesoasoani atu ia i latou e sue le nofoaga o latou nonofo ai ma nofoaga ia na talai ai faifeautalai latou te iloa. Tuu atu lau molimau e finagalo le Tama Faalelagi i tagata uma i le lalolagi atoa ia iloa e uiga ia Iesu Keriso. E mafai faapefea ona tatou fesoasoani e aoao atu isi tagata e uiga ia Iesu? Faamatala atu i tamaiti e uiga i mea na e vaai o latou faia lea e aoao atu oe e uiga ia Iesu Keriso. Fesoasoani ia latou mafaufau i isi mea e mafai ona latou faia.

• Usu faatasi se pese e faatatau i le faasoaina atu o le talalelei, e pei o le “Ou Te Fia Avea Nei Ma Faifeautalai” (Tusipese a Tamaiti,90). O le a se mea e mafai ona tatou ta’u atu i isi e uiga ia Iesu Keriso? Mo nisi manatu, tagai i le Mataupu Faavae o le Faatuatua.

Sefanaia 2–3

“Saili atu i le Alii.”

Sa aoao mai Sefania e tatau ona tatou saili le Alii i taimi o le tele o e amioleaga, e pei o aso nei e gata ai. Mafaufau loloto pe o le a faapefea ona e uunaia tamaiti e saili o Ia.

Gaoioiga e Mafai Ona Fai

• Faaali atu se ata o Iesu, ma faitau i tamaiti le Sefanaia 2:3. Valaaulia i latou e faaofuofu o latou lima faataamilo i o latou mata e pei o ni matatioata ma tilotilo i le ata i taimi uma e te faitau ai le upu “saili.” Faamalamalama atu na manao le perofeta o Sefania i tagata e saili le Alii. E faapefea ona tatou saili le Alii? O fea e mafai ona tatou maua ai o Ia?

• Faaaoga le itulau o gaoioiga o le vaiaso lenei, pe mafaufau i se isi taaloga lea e uunaia tamaiti e saili le Alii. Ta pe usu faatasi se pese e faatatau i le autu lenei, e pei o le “Seek the Lord Early” (Children’s Songbook,108). Ia talanoaina mea o loo aoao mai e le pese e uiga i auala e mafai ai ona maua Iesu Keriso i o tatou olaga.

aikona o le aoao atu

Aoao atu le Aoaoga Faavae: Tamaiti Matutua

Nauma 1:7

“O loo agalelei le Alii, o le olo ia i aso o le puapuaga.”

E tofu feagai i tatou taitoatasi ma o tatou lava “aso o le puapuaga.” E faapefea ona e fesoasoani i tamaiti e liliu atu i le Alii, “faalagolago ia te ia,” ma saili le saogalemu faaleagaga i o latou aso o le puapuaga?

Gaoioiga e Mafai Ona Fai

• Faaali atu i tamaiti se ata o se nofoaga malupuipuia po o se olo. O a ni mafuaaga e ono manaomia ai e tagata se olo? Valaaulia tamaiti e faitau le Nauma 1:7 e saili ai po o le a le mea na fai mai ai le perofeta o Nauma e pei o se nofoaga malupuipuia po o se olo mo i tatou. O le a le mea o le a puipuia mai ai i tatou e le Faaola?

• Valaaulia tamaiti e tusi se ata o latou ma o latou aiga i totonu o se nofoaga malupuipuia po o se olo. Uunaia i latou e tusi ni upu faataamilo i le olo o faamatala ai nisi o faatosinaga leaga i le lalolagi. Valaaulia i latou e tusi ni upu i totonu o le olo o faamatala ai Iesu Keriso. O le a se mea o loo Ia talosagaina i tatou e fai tatou te maua ai Lona malosi ma le puipuiga? (tagai i le Mataupu Faavae ma Feagaiga 35:24).

  olo maa

  “O loo agalelei le Alii, o le olo ia i aso o le puapuaga” (Nauma 1:7).

Sapakuka 3:17–19

E mafai ona ou maua le olioli ia Iesu Keriso, e tusa lava pe le o sologa lelei mea.

Na faamatala e Sapakuka nisi o luitau lea e ono tupu i lona nuu, e aofia ai laau po o vine e le fua. Ona ia ta’ua lea, e tusa lava pe ua tutupu nei mea, “ae o le a ou olioli i le Alii.”

Gaoioiga e Mafai Ona Fai

• Valaaulia tamaiti e faitau le Sapakuka 3:17 ma faailoa mai luitau o loo faamatalaina i lenei fuaitau. Mata o le a se lagona o se tagata pe afai na tupu nei mea. Fesoasoani i tamaiti e mafaufau i luitau lea e mafai ona tutupu ia i latou. Ona faitau faatasi lea o fuaiupu 18–19 e aoao ai i le auala na fai mai ai Sapakuka o ona lagona e tusa lava pe tutupu nei mea ia te ia.

• Fesoasoani i tamaiti e sue nisi faataitaiga o tagata o i tusitusiga paia o e na olioli i le Alii e oo lava i taimi faigata. E mafai ona latou maua ni faataitaiga i le Galuega 16:19–25; Mosaea 24:10–15; ma le savali a Peresitene Dieter F. Uchtdorf’ “Ia Lotofaafetai i Soo Se Tulaga” (Ensign po o le Liahona, Me 2014, 70–77), aemaise lava le vaega “Ia Lotofaafetai i o Tatou Tulaga.” Aisea na mafai ai e nei tagata ona fiafia i taimi faigata? E mafai faapefea ona tatou mulimuli i a latou faataitaiga?

Sefanaia 3:14–20

O i latou e mulimuli ia Iesu Keriso o le a maua le filemu ma le olioli.

O loo faamatalaina i le Sefanaia 3:14–20 le aso fiafia o le a nofotupu ai Iesu Keriso “le tupu o Isaraelu,” i totonu o Ona tagata ma “ollioli i [tatou] i pesega” (fuaiupu 15,17).

Gaoioiga e Mafai Ona Fai

• Faitau faatasi le Sefanaia 3:14. Ona valaaulia lea o tamaiti taitasi e filifili se tasi o fuaiupu i le Sefanaia 3:15–20 ma suesue i ai, vaavaai mo se mea e mafai ona latou fesoasoani ai ia i tatou “ia fiafia ma olioli.” Fai i ai e faasoa mai mea ua latou maua.

• Fesoasoani i tamaiti e sue ni viiga po o ni pese a tamaiti lea e fesoasoani ia i latou “ia fiafia ma olioli lava ma le loto atoa” (Sefanaia 3:14). Usu faatasi ni nai pese, ma uunaia tamaiti e talanoa e uiga i le fiafia na latou mauaina i le talalelei a Iesu Keriso.

aikona o le aoaoina

Uunaia le Aoaoina i le Aiga

Fai atu i tamaiti e tusi i lalo se mau faasino i se mau latou te mananao e fetufaai atu ma o latou aiga (pe tusi mo i latou).

Faaleleia o Lo Tatou Aoao Atu

Fesoasoani i tamaiti ia iloa le Agaga. Taumafai e maitau ni taimi atonu e lagona ai e tamaiti le faatosinaga a le Agaga. A tupu lenei mea, fesoasoani ia i latou ia malamalama o nei lagona e sau mai le Agaga Paia.

itulau o gaoioiga: Saili ia le Alii