5–11 Tesema

Hakai; Sakaria 1–3; 7–14

“E Paia i le Alii”

Faitau ma le agaga tatalo Hakai ma Sakaria, mafaufau loloto i lagona na e mauaina. E mafai faapefea e upumoni o loo i totonu o nei tusi ona fesoasoani e ausia ai manaoga o tamaiti?

Tusi Faamaumau Ou Lagona Uunai

Valaaulia le Fefaasoaai

Tusi se foliga fiafia i se fasipepa, ma tuu atu i tamaiti e auauai i le uuina. I le taimi latou te uuina ai, valaaulia i latou e faasoa atu se mea o loo latou aoaoina e uiga i le Tama Faalelagi ma Iesu Keriso lea e faafiafiaina ai i latou.

Aoao atu le Aoaoga Faavae: Tamaiti Laiti

Hakai 1:6–8

E mafai ona ou faamuamua le Atua i loʻu olaga.

O le aoao e uiga i le fautuaga a le Alii e “mafaufau i o outou ala” o se avanoa lea mo tamaiti e faamautinoa ai o loo latou faia ni mea taua ua fetalai atu ai le Atua ia i latou e fai.

Gaoioiga e Mafai Ona Fai

• Faamalamalama atu i tamaiti na finagalo le Alii i le fanauga a Isaraelu e fausia le malumalu, ae peitai sa latou faia nisi mea. Faitau leotele le Hakai 1:7, ma faamalamalama atu o le “mafaufau i o outou ala” o lona uiga sa finagalo le Alii i le fanauga a Isaraelu e mafaufau pe o latou faia mea e sili ona taua. Faitau le fuaiupu 8 i tamaiti, ma valaaulia i latou e faafoliga e “o ae i le mauga,” “aumaia laau,” ma “faia le fale [o le Alii].” O a mea taua e finagalo le Atua tatou te faia?

• Tuu faau i lalo ni ata i luga o se laulau lea e suitulaga i nisi o mea e taua i le Atua, e pei o tusitusiga paia, tatalo, ma le malumalu. Valaaulia tamaiti e auauai i le filifiliina o se ata ma faaali atu i le vasega. Fesoasoani ia i latou ia malamalama i le mafuaaga e taua ai le faamautinoa o lo tatou faaavanoaina o se taimi mo mea taitasi o i totonu o ata.

Sakaria 3:1–7

E mafai ona faamamaina e Iesu Keriso lo’u agaga.

O ofu eleelea a le faitaulaga sili o Iosua, o loo faamatalaina i le Sakaria 3:1–7, o loo faatusaina i mea e tutupu pe a tatou agasala. E ala atu i le Togiola a Iesu Keriso, e mafai ai ona faamamaina i tatou, e pei ona faamamaina Iosua ina ua ia mauaina ni ofu fou.

Gaoioiga e Mafai Ona Fai

• Tuu atu i tamaiti e fepasiai solo se ofutino eleelea, ma faitau le Sakaria 3:3. Ona pasi faataamilo lea o se ofutino mama, ma faitau le fuaiupu 4. Talatalanoa ma tamaiti e uiga i le auala e pei ai le faia o filifiliga sese o le palapalā faaleagaga, ae e mafai e le Faaola ona toe faamamaina i tatou. O a ni o tatou lagona pe a tatou mama? Faasoa atu lau molimau talu ai na mafatia Iesu Keriso ma maliu mo i tatou, o le a tatou mama mai a tatou agasala pe a tatou salamo.

• Afai e mafai, faaali atu i tamaiti se ata o se tagata latou te iloa o ofu paepae i lona papatisoga (po o le tagai i le Gospel Art Book, nu. 103, 104). Aisea tatou te ofu paepae ai i a tatou papatisoga? Usu faatasi ma tamaiti se pese e uiga i le papatisoga, e pei o le “Pe A Ou Papatiso” (Tusipese a Tamaiti,53). Valaaulia tamaiti e tusi se ata o i latou lava o loo papatiso ma faasoa atu ni o latou lagona e uiga i le papatisoina i se aso.

Sakaria 2:10; 9:9; 14:3–9

Ua aoao i tatou e perofeta e uiga ia Iesu Keriso.

E pei o isi perofeta o le Feagaiga Tuai, ua valoia e Sakaria ia Iesu Keriso. O a mea e mafai ona aoao atu i tamaiti e valoaga o i le Sakaria 2:10; 9:9; 14:3–9 e uiga ia te Ia?

Gaoioiga e Mafai Ona Fai

• Faaali atu se ata o Iesu Keriso o loo ulufale atu i Ierusalema i luga o se asini (tagai i le Gospel Art Book, nu.50). Faamatala atu i tamaiti faapea i le tele o tausaga ao lei afio mai Iesu i le lalolagi, na valoia e Sakaria o le a tietie atu Iesu Keriso i se asini i totonu o Ierusalema ao le’i maliu o Ia mo i tatou. Ao e faitau atu le Sakaria 9:9, ma fai atu i tamaiti e faasino i tagata o loo i le ata o loo “matua olioli” ma faasino atu foi i le “Tupu.” O ai le Tupu? Fai atu i tamaiti e faasoa mai le mafuaaga latou te faafetai ai mo Iesu.

• Faitau atu i tamaiti nisi o valoaga na faia e Sakaria e uiga i le Toe Afio Mai Faalua o le Faaola, e pei o na o loo i le Sakaria 2:10; 14:9. Fai atu i tamaiti e tusi ni ata o mea latou te mafaufau o le a pei o le toe afio mai o Iesu, pe usu faatasi se pese e uiga i le Toe Afio Mai, e pei o le “When He Comes Again” (Children’s Songbook, 82–83).

Aoao atu le Aoaoga Faavae: Tamaiti Matutua

Hakai 1:2–8

“Mafaufau i ou ala.”

E taua mo i tatou uma le nofouta i mea tatou te faamuamua ma faaalu se taimi e “mafaufau ai i [o tatou] ala.” E mafai faapefea ona e uunaia tamaiti e faaalu se taimi i o latou olaga mo mea a le Atua?

Gaoioiga e Mafai Ona Fai

• Valaaulia tamaiti e faitau le Hakai 1:2–5 ia iloa ai pe aisea e ele’i fiafia ai le Alii i le fanauga a Isaraelu. Fai i tamaiti e piki se fuaitau mai le fuaiupu e 6 ma tusi se ata e uiga i ai. Tuu atu i le vasega e mate po o le a le fuaitau o loo suitulaga ai ata taitasi. Talanoa pe faapefea ona faaalu ni taimi i mea e ese mai le mea e finagalo ai le Alii e pei o le ‘ai ae le maona, fai o ofu ae le mafanafana, ma isi mea faapena. Aisea e taua ai le faaavanoa o se taimi mo mea e taua i le Alii?

• Tusi “Mafaufau i ou ala” i luga o le laupapa (fuaiupu e 7). Valaaulia tamaiti taitasi e fai se lisi o mea na te ono faia i se aso masani, e aofia ai mea na talosaga mai ai le Alii ia i tatou ia faia. Fai atu i tamaiti e “mafaufau i [o latou] ala” e ala i le li’oina o mea e ono fetalai ai le Alii o mea e sili ona taua ia latou lisi. E faapefea ona tatou faamautinoa ua tatou tuuina atu se taimi i aso taitasi mo mea e finagalo le Alii tatou te faia.

Tatou te oofu i le paepae i a tatou papatisoga e faaali atu ai e mafai e Iesu Keriso ona faamamaina i tatou pe a tatou salamo mai ia tatou agasala (tagai i le Sakaria 3:3–4).

Sakaria 3:1–7

O le osia ma le tausia o feagaiga e mafai ona fesoasoani ia te a’u ina ia faapei atili o le Tama Faalelagi ma Iesu Keriso.

I se faaaliga, na vaai ai Sakaria i se faitaulaga sili e igoa ia Iosua o le na ofu i ni “ofu eleelea” (Sakaria 3:3). Na tuuina atu i ai e se agelu ni ofu mama ma faamatalaina o lenei mea e faatusa i le faamamaina mai ana agasala. E mafai ona e faaaogaina lenei faaaliga e fesoasoani atu ai i tamaiti ia malamalama i feagaiga ma faamanuiaga e fesootai ma le papatisoga.

Gaoioiga e Mafai Ona Fai

• Faitau faatasi le Sakaria 3:1–7 ma talanoaina fesili e pei o nei: O a mea na suitulaga e “ofu eleelea” a Iosua? E faapefea ona tatou mama mai a tatou agasala? E faapefea ona fesoasoani a tatou feagaiga o le papatisoga ia i tatou ina ia “savavali i ala a le Alii”?

• I ni nai aso ao lei faia le vasega, valaaulia se tamaitiiti e sau saunia e talanoa atu e uiga i lana papatisoga. Iloilo faatasi le feagaiga sa tatou faia i le papatisoga (tagai i le Mataupu Faavae ma Feagaiga 20:37). E faapefea ona fesoasoani le tausia o a tatou folafolaga ia i tatou ia avea atili e pei o le Tama Faalelagi ma Iesu Keriso? E faapefea i le ‘ai ma inu i le faamanatuga i vaiaso taitasi ona fesoasoani ia i tatou e tausia a tatou feagaiga o le papatisoga?

Sakaria 9:9–11; 11:12; 13:6–7

O Iesu Keriso o le Mesia na folafolaina.

O le a se mea e mafai ona aʻoaʻoina e tamaiti mai valoaga a Sakaria e uiga ia Iesu Keriso?

Gaoioiga e Mafai Ona Fai

• Vaevae tamaiti i ni paga. Tuu atu ia tofu paga taitasi ma se valoaga se tasi lenei mai ia Sakaria, faatasi ai ma mau o loo faamatalaina ai lona faataunuuga: Sakaria 9:9 ma le Mataio 21:5–9; Sakaria 9:11 ma le 1Peteru 3:18–19; Sakaria 11:12 ma le Mataio 26:14–16; Sakaria 13:7 ma le Mataio 26:31. Fai atu i paga taitasi e faasoa atu i le vasega mea sa latou aoaoina e uiga ia Iesu Keriso mai a latou mau ma pe asiea ua latou loto faafetai ai ia te Ia.

• Faaali atu ata 50, 60, ma le64 mai le Gospel Art Book. Tusi mau faasino nei i luga o le laupapa, ma valaaulia tamaiti e faatusatusa ia mau faasino i ata: Sakaria 9:9; 13:6; 13:7. Valaaulia tamaiti e faasoa mai o latou lagona e uiga ia Iesu Keriso.

Uunaia le Aoaoina i le Aiga

Valaaulia tamaiti e tusi i lalo se upumoni na latou aoaoina i le vasega. Valaaulia i latou e talanoaina i o latou aiga le auala e mafai ai ona latou maua se molimau malosi e uiga i lena upumoni.

Faaleleia o Lo Tatou Aoao Atu

Faaaoga lou fatufatuai. Tuu atu i manatu o i lenei otootoga ia faaosofia ai lou lava sogasoga. Mafaufau i mea o le a fiafia ai tamaiti o i lau vasega ma po o le a le mea o le a fesoasoani ia i latou e saili ai fesootaiga i le va o tusitusiga paia ma o latou olaga.