Pepe o Iesu o loo ‘aui i le ie paepae ma o loo taoto i luga o lauvao mago

Aua Ua Fanau Mai Mo i Tatou le Tama, saunia e Simon Dewey

19–25 Tesema

Kerisimasi

“Sa Tatou Faatalitali ia te Ia, ua Ia Faaolaina Foi i Tatou”

Sa taulai atu perofeta o le Feagaiga Tuai ma le olioli tele i le fanau mai o le Mesia (tagai i le Isaia 25:9). A o e sauni e aoao atu i le vaitau o le Kerisimasi, mafaufau pe mafai faapefea ona e fesoasoani i tamaiti ia maua le olioli i le fanau mai o le Faaola o Iesu Keriso.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Valaaulia tamaiti e faasoa mai mea latou te iloa e uiga i le fanau mai o Iesu Keriso. A o latou ta’uina mai se tagata po o se mea faitino mai le tala, fai atu ia i latou e tusi i luga o le laupapa. Fesili i tamaiti pe o le a se mea latou te fiafia ai e uiga i le tala.

aikona o le aoao atu

Aoao atu le Aoaoga Faavae: Tamaiti Laiti

Ua aoaoina a’u e le Feagaiga Tuai e uiga ia Iesu.

Fesoasoani i tamaiti ia taulai atu i le Faaola o Iesu Keriso o le mafuaaga tatou te faamanatu ai le Kerisimasi. E mafai ona e faia lenei mea i le faaaogaina o mau mai le Feagaiga Tuai lea e molimau mai ia te Ia.

Gaoioiga e Mafai Ona Fai

• Faaali se ata o le fanau mai o Iesu (e pei o le Gospel Art Book, nu.30, po o se tasi o ata o i le otootoga o lenei vaiaso i le Sau, Mulimuli mai ia te A’u—Mo Tagata Taitoatasi ma Aiga). Faitau le Isaia 9:6, ma tuu atu i tamaiti taitasi le avanoa e faasino ai i le pepe o Iesu pe a latou faalogo i le fuaitau “ua fanau mai mo i tatou le tama.” Faasoa atu lau molimau faapea na silafia e perofeta o le Feagaiga Tuai o le a fanau mai Iesu.

• Valaaulia tamaiti taitasi e ta’u mai lona igoa, ma faailoa mai e le gata i o tatou igoa, e mafai ona ta’ua i tatou i isi mea, e pei o le tuafafine po o le uso po o le uo. Valaaulia tamaiti e mafaufau i nisi faataitaiga. Faitau le Isaia 9:6 i tamaiti, faamamafa atu ia igoa ia e faasino ia Iesu Keriso: “Silisili ese, Faipule, O Le Atua malosi, O Le Tama o le Faavavau, O Le Alii o le Filemu.” Fesoasoani i tamaiti ia malamalama po o le a le mea o tau mai e nei igoa ia i tatou e uiga ia Iesu.

• Tuu atu ia tofu le tamaitiiti ma se fetu pepa, ma valaaulia ia tamaiti e uu i luga a latou fetu a o e faitauina ia fuaitau nei mai le Numera 24:17: “le alu le fetu mai ia Iakopo.” Valaaulia tamaiti e faasoa atu le auala e pei ai Iesu o se fetu pupula e susulu atu i le lalolagi atoa. Usu faatasi se pese e uiga i le fetu lea na faaalia mai ina ua fanau mai Iesu, e pei o le “Stars Were Gleaming” (Tusipese a Tamaiti,37) po o le “O Le Noea Muamua” (Viiga, nu.123).

O Iesu Keriso o lo’u Faaola.

O le Kerisimasi o se taimi e faamanatu ai e le na o le fanau mai o Iesu ae faapea foi Lona soifuaga ma le misiona o se Faaola o le lalolagi. E mafai faapefea ona e fesoasoani i tamaiti ia lagona le olioli ma le agaga faafetai mo le Togiola a Iesu Keriso?

Gaoioiga e Mafai Ona Fai

• Fai atu i tamaiti e mafaufau i se mea o latou tulimatai atu i ai. Faamalamalama atu o tagata faamaoni i le vaitaimi o le Feagaiga Tuai sa taulai atu i le fanau mai o Iesu Keriso. Faitau le Isaia 25:9 i tamaiti, ma fai atu ia i latou e toe fai mai le fuaiupu “Sa tatou faatalitali ia te ia, tatou te fiafia ma olioli i lana faaolataga.” Faasoa atu ma i latou le mafuaaga ua e fiafia ai ma olioli ua fanau mai Keriso. Valaaulia tamaiti e faasoa mai o latou lagona e uiga i le Faaola.

• Usu faatasi se pese uiga i le fanau mai o Iesu, e pei o le “Away in a Manger” (Tusipese a Tamaiti, 42–43) po o le “Hark! The Herald Angels Sing” (Viiga, nu.209). Fesoasoani i tamaiti ia iloa fuaiupu i pese nei lea e aoao mai ia i tatou e uiga i lo tatou Faaola ma faamanuiaga ua tatou maua ona o Ia.

aikona o le aoao atu

Aoao atu le Aoaoga Faavae: Tamaiti Matutua

Ua aoaoina a’u e uiga ia Iesu Keriso, o le Mesia folafolaina.

O le Feagaiga Tuai ua sili atu nai lo na o se faaputuga o tala ma tusitusiga mata’ina; o ona faamoemoega, e pei o tusitusiga paia uma, e molimau mai ia Iesu Keriso. Fesoasoani i tamaiti e aoao i le auala e saili ai o Ia i le Feagaiga Tuai.

Gaoioiga e Mafai Ona Fai

• Valaaulia tamaiti e fai se lisi o igoa ma faalagina uma o Iesu Keriso e mafai ona latou mauaina i le Mose 7:53; Salamo 23:1; Iopu 19:25; Isaia 7:14; 9:6; 12:2; Amosa 4:13; ma le Sakaria 14:16. Tuu atu latou te galulue fai paga pe a latou mananao ai. Valaaulia i latou e faasoa atu a latou lisi ma le tasi ma le isi. O le a se mea ua tatou aoao e uiga i le Faaola mai nei igoa ma faalagina taitasi?

• Faaali atu i tamaiti ni nai mea teufale o le Kerisimasi (po o nisi o ata), e pei o se fetu, moli, po o se meaalofa. Fesili i tamaiti pe faapefea e nei mea taitasi ona ono faamanatu mai ia i tatou e uiga i le Faaola. Faamalamalama atu e tele ina faaaoga e tusitusiga paia ni faatusa e aoao mai ai ia i tatou e uiga ia Iesu Keriso. Valaaulia tamaiti e vaavaai i se tasi po o nisi o mau nei e tele mo se mea e mafai ona faatusa ia Iesu Keriso: Kenese 22:8; Esoto 17:6; Salamo 18:2; 27:1 (tagai i le otootoga o lenei vaiaso i le Sau, Mulimuli mai ia te A’u—Mo Tagata Taitoatasi ma Aiga mo nisi faataitaiga). E faapefea ona pei Iesu o se mamoe, vai, ma’a, o se olo, po o se malamalama?

• I le faaiuga o le suesue i le Feagaiga Tuai i lenei tausaga, valaaulia tamaiti e faasoa mai ni a latou tala e fiafia i ai po o ni mau mai le Feagaiga Tuai. O a ni mea o loo aoao mai e nei tala po o mau e uiga ia Iesu Keriso? Aisea tatou te lotofaafetai ai i le mauaina o le Feagaiga Tuai?

O Iesu Keriso o lo’u Faaola ma le Togiola.

Ao tatou faamanatuina le fanau mai o Iesu Keriso, e mafai ona tatou olioli i Lona soifuaga ma le taulaga togiola. E faʻapefea ona e faaaogaina mau mai le Feagaiga Tuai e fesoasoani i tamaiti e fausia lo latou faatuatua i lo latou Faaola ma Togiola?

Gaoioiga e Mafai Ona Fai

• Faitau faatasi le Isaia 7:14; ona valaaulia lea o tamaiti e faasoa mai mea na latou iloa e uiga i le fanau mai o Iesu Keriso. Pe faaali le vitio “The Nativity” (ChurchofJesusChrist.org), ma valaaulia tamaiti taitasi e filifili se tagata mai le vitio ma faasoa atu pe na faapefea lagona o lena tagata. Faasoa atu lau molimau e uiga i le Faaola, ma valaaulia tamaiti e faia foi lea mea e tasi.

• Ina ia fesoasoani i tamaiti is sili atu ona malamalama i le matafaioi a Iesu Keriso o lo tatou Faaola, valaaulia i latou e faitau le Isaia 25:8–9; 53:3–5; ma le Hosea 13:14. O le a se mea o aoao mai e nei mau e uiga i le auala na faasaoina ai i tatou e le Alii? E mafai faapefea ona tatou “olioli i lana faaolataga”? (Isaia 25:9).

• Usu faatasi se pese uiga i le alofa o Iesu Keriso mo i tatou, e pei o le “Away in a Manger” (Tusipese a Tamaiti, 42–43) po o le “Ou Te Tu ma Ofo” (Viiga, nu.107). Valaaulia tamaiti e faasoa atu ni fuaitau ia e fesoasoani ia i latou e lagona le alofa o le Faaola.

aikona o le aoaoina

Uunaia le Aoaoina i le Aiga

Valaaulia tamaiti e faasoa atu i o latou aiga po o se uo se mea na latou aoaoina e uiga ia Iesu Keriso mai le Feagaiga Tuai. Faamalosia i latou e amata ona suesue i le Feagaiga Fou i lenei vaiaso.

Faaleleia o Lo Tatou Aoao Atu

Fatu se Siosiomaga e Valaauliaina le Agaga. E tele auala e mafai ai ona valaaulia le Agaga i lau vasega. O musika e mafai ona uunaia le faaaloalo. O foliga alofa ma le molimau e mafai ona fatuina se siosiomaga mafanafana, ma faaleagaga. Mafaufau ma le agaga tatalo i mea e mafai ona e faia e fatuina ai se siosiomaga faaleagaga i lau vasega. (Tagai i le Aoao Atu i le Ala a le Faaola,15.)

itulau o gaoioiga: ua aoaoina a’u e le Feagaiga Tuai e uiga ia Iesu