“19–25 Tesema. Kerisimasi: ‘Sa Tatou Faatalitali ia te Ia, ua Ia Faaolaina Foi i Tatou’” Sau, Mulimuli Mai ia te A’u—Mo Tagata Taitoatasi ma Aiga: Feagaiga Tuai 2022 (2021)

“19–25 Tesema. Kerisimasi,” Sau, Mulimuli Mai ia te A’u—Mo Tagata Taitoatasi ma Aiga: 2022

Ata

O le Pepe o Iesu na aui i se ie pa’epa’e ma taoto i vaovao

Aua Ua Fanau Mai Mo i Tatou le Tama, saunia e Simon Dewey

19–25 Tesema

Kerisimasi

“Sa Tatou Faatalitali ia te Ia, ua Ia Faaolaina Foi i Tatou”

I lenei vaitau o le Kerisimasi, mafaufau pe ua faapefea ona faamalosia e le Feagaiga Tuai lau molimai ia Iesu Keriso i le aluga o le tausaga.

Tusifaamaumau Ou Lagona Uunai

O le Feagaiga Tuai o loo tauave ai se agaga o le faamoemoe naunautai. I le itu lena, e tai pei teisi lava o le vaitau o le Kerisimasi. O le amata ai ia Atamu ma Eva, o peteriaka, perofeta, fatusolo, ma tagata o le Feagaiga Tuai sa tulimata’i atu i aso lelei, e faatumulia i le faamoemoe mo faafouga ma le laveaiga e le Mesia. Ma sa manaomia soo e Isaraelu lena faamoemoe—pe sa latou i ai i le faatagataotauaina i Aikupito po o Papelonia pe na taofiofi faatagataotauaina e a latou lava agasala po o le fouvale. Ae i na mea uma, sa faamanatu atu e perofeta ia i latou, o le a oo mai se Mesia, se tasi e Laveai, “e talai le saolotoga i le tafeaga” (Isaia 61:1).

O lena faamoemoe sa amata ona faataunuuina ina ua fanau mai Iesu Keriso i Peteleema. Na fanau mai le Laveai malosi o Isaraelu i se falepovi ma sa taoto i se faatanoa vao (tagai Luka 2:7). Ae sa le na’o se Laveai o Isaraelu anamua. Sa afio mai o Ia e laveai oe—e onosaia ou tiga, e tauave ou faanoanoaga, ma ia e manua mo au solitulafono, ina ia mafai ona faamaloloina oe i Ona faalavalava (tagai Isaia 53:4–5). O le mafuaaga lenei e faatumulia ai le Kerisimasi i naunautaiga fiafia e oo mai lava i aso nei. Ua silia ma le 2000 tausaga talu ai na afio mai ai le Mesia. Ma o loo faaauau ona oo mai o Ia i o tatou olaga i soo se taimi tatou te sailia ai o Ia.

Ata

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Ou te olioli i lo’u Faaola.

O le Kerisimasi ua lauiloa o se vaitau olioli ona o le olioli lea na aumai e Iesu Keriso i le lalolagi. E oo lava i tagata e le tapuai ia Iesu o le Alo o le Atua e masani ona lagona le fiafiaga o le Kerisimasi. Mafaufau loloto i le olioli e te lagona ona na auina mai e le Tama Faalelagi Lona Alo.

O seneturi ao le’i soifua mai le Faaola, sa lagona ai foi e perofeta o le Feagaiga Tuai le olioli a o latou saunoa i le afio mai o le Mesia. Faitau nisi o fuaitau nei, ma mafaufau pe aisea na taua ai ia i latou o e sa tulimatai atu i le misiona a le Faaola: Salamo 35:9; Isaia 25:8–9; 44:21–24; 51:11; Sefanaia 3:14–20; Mose 5:5–11. Aisea e taua ai nei fuaitau ia te oe?

Tagai foi Russell M. Nelson, “O Le Olioli ma le Ola ai Faaleagaga,” Ensign po o le Liahona, Nov. 2016, 81–84.

O faailoga e mafai ona fesoasoani ou te manatua ai Iesu Keriso.

O le tele o tu ma aga e o faatasi ma le Kerimasi e mafai ona i ai uiga faafaailoga e faasino atu ai i tatou ia Keriso. O mea teuteu e mamanu o se fetu, e faatusa i le fetu pupula lea na susulu i le po na fanau ai Iesu (tagai Mataio 2:2). O au manuao e mafai ona faamanatu ai ia i tatou ia agelu o e na faaali atu i leoleo mamoe (tagai Luka 2:13–14). A o e suesueina le Feagaiga Tuai i lenei tausaga, atonu na e maitauina ai le tele o faailoga e uiga i le Faaola. O loo lisi atu i lalo ni nai faailoga. Mafaufau e suesue i nei fuaitau ma tusifaamaumau mea ua latou aoaoina ai oe e uiga ia te Ia.

Tamai Mamoe (Kenese 22:8; Esoto 12:5; 1 Peteru 1:18–20).

Manai (Esoto 16:4, 12–21,31; Teuteronome 8:3; Ioane 6:30–40).

Vai (Esoto 17:1–6; Ieremia 2:13; Esekielu 47:1–12; Ioane 4:7–14).

Gata uamea (Numera 21:4–9; Ioane 3:14–15).

Papa (1 Samuelu 2:2; 2 Samuelu 22:2–3; Salamo 118:22–23; Isaia 28:16; Efeso 2:20).

Lala (Isaia 11:1–2; Ieremia 23:5; 33:15).

Malamalama (Salamo 27:1; Isaia 9:2; 60:19; Mika 7:8; Ioane 8:12).

O a isi faailoga, fuaitau, ma tala na e maua i tusitusiga paia o molimau mai ia Iesu Keriso?

Tagai foi 2 Nifae 11:4; Mosaea 3:14–15; Mose 6:63; “Types or Symbols of Christ,” i le Guide to the Scriptures, “Jesus Christ,” scriptures.ChurchofJesusChrist.org.

“E igoa foi o Ia o le Silisili Ese.”

E tele suafa ma faalaniga eseese ua ta’ua ai Iesu Keriso. O a faalaniga e te maua i fuaiupu nei? Salamo 23:1; 83:18; Isaia 7:14; 9:6; 12:2; 63:16; Amosa 4:13; Sakaria 14:16; Mose 7:53. O a isi faalaniga e mafai ona e mafaufau i ai? Atonu foi e te fiafia e lisi faalaniga o Iesu Keriso e te maua i viiga o le Kerisimasi? E faapefea e faalaniga taitasi ona faatosina ai le ala e te mafaufau ai ia te Ia?

Ata

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

O tu ma agaifanua o le Kerisimasi e mafai ona faasino atu ia Iesu Keriso.O aiga Isaraelu na i ai a latou tu ma agaifanu, e pei o le Paseka ma isi lava tausamaaga, sa faamoemoe e faasino atu ai o latou loto ma mafaufau i le Alii (tagai Esoto 12). O a ni tu ma agaifanua a le tou aiga i le vaitau o le Kerisimasi e fesoasoani e te taulai atu ai ia Iesu Keriso? O a ni tu ma ni agaifanua ua e iloa mai le talafaasolopito o lou aiga? Atonu e te mafaufau e talanoa o se aiga ia nisi o tu ma agaifanua tou te mananao e amata. O nisi manatu e ono aofia ai le auauna atu i se tasi o manaomia le fesoasoani (mo manatu, tagai ComeuntoChrist.org/light-the-world), valaaulia o se uo tou te matamata i le Faigalotu o le Kerisimasi a le Au Peresitene Sili (broadcasts.ChurchofJesusChrist.org), tusiaina o se tou lava pese o le Kerisimasi, po o le sue o se auala fatufatuai e faasoa atu ai le savali o le soifua mai o Keriso.

“The Christ Child: A Nativity Story.”E mafai faapefea ona e fesoasoani i tagata o le aiga ia lagona le migao ma le olioli o le soifua mai o Keriso? Atonu tou te matamata i le vitio “The Christ Child: A Nativity Story” (ChurchofJesusChrist.org) pe faitau faatasi le Mataio 1:18–25; 2:1–12; Luka 1:26–38; 2:1–20. E mafai e tagata taitoatasi o le aiga ona filifili se tagata mai le vitio po o se tala i tusitusiga paia ma faasoa atu po o a lagona o lena tagata e uiga i le Faaola. E mafai foi e tagata o le aiga ona faasoa atu o latou lagona e uiga ia te Ia.

Mauaina o le Faaola i le Feagaiga Tuai.Ao outou sauniuni e suesue le soifua o Iesu Keriso i le Feagaiga Fou i le tausaga a sau, mafaufau e toe faamanatu ma le tou aiga mea na latou aoaoina e uiga ia te Ia i lenei tausaga i le Feagaiga Tuai. Atonu tou te toe faamanatua ia otootooga o loo i lenei punaoa ma soo se faamatalaga o suesuega patino e fesoasoani tou te manatua ai mea na outou aoaoina. Atonu o le a aoga i tamaiti laiti le matamata i Old Testament Stories po o ata o loo i lenei punaoa. O a ni valoga po o tala na tulagaese ia te outou? O le a se mea ua tatou aoaoina e uiga i le Faaola?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Peteleema e, le Aai,” Viiga, nu.122.

Faaleleia o Lo Tatou Aoao Atu

Faalogo i tagata o lou aiga. “O le faalogo o se faatinoga lea o le alofa. E manaomia ai lo tatou popole tele e uiga i mea o loo i ai i le loto o le isi tagata nai lo le mea e sosoo ai i luga o la tatou lisi o mea e fai po o le otootoga. … Ao e gauai atu ma le faaeteete i savali e faailoa mai ma savali e le faailoa mai [a tagata o le aiga], o le a e iloa ma malamalama atili i o latou manaoga, o latou atugaluga, ma o latou manao. O le a fesoasoani atu le Agaga ia e iloa le ala e aoao ai i latou” (Aoao Atu i le Ala a le Faaola, 34).