Malumalu o Laie Hawaii

5–11 Tesema

Hakai; Sakaria 1–3; 7–14

“E Paia ia Ieova”

O le faitauina o tusitusiga paia e valaaulia ai faaaliga. Ia nofouta i savali e faaali mai e le Agaga Paia ia te oe ao e faitau i le Hakai ma le Sakaria.

Tusifaamaumau Ou Lagona Uunai

I le mavae ai o le fiasefulu o tausaga o faatagaotauaina, sa faapea ona faataga ai se vaega o tagata Isaraelu, e masalo na aofia ai ma perofeta o Hakai ma Sakaria, e toe foi atu i Ierusalema. Sa manatua e nisi o lenei vaega ia foliga sa i ai o Ierusalema a’o lei faatafunaina. Vaai faalemafaufau i o latou lagona ao latou vaai atu i le gasu lea sa avea i se taimi ma o latou fale, o latou nofoaga tapuai, ma la latou malumalu. Ia i latou o e sa mafaufau pe mata o le a toe foliga le malumalu le “fale [o le Alii] i lona muai matagofie” (Hakai 2:3), sa tautala atu le perofeta o Hakai i fetalaiga faamalosiau a le Alii: “Ia faamalolosi outou tagata uma o le nuu, ua fetalai mai ai Ieova, ma ia outou galulue: aua o a’u ou te ia te outou, … aua le fefefe outou.” “Ou te faatumuina foi lenei fale i le pupula, … ou te avatu foi le manuia i le mea nei.” (Hakai 2:4–5, 7,9.)

Ae sa le na’o le malumalu paia sa manaomia ona toe fausia. I le tele o itu, sa faaleagaina faaleagaga foi le nuu o le Atua. Ma o le toefauina o se malumalu paia e sili atu nai lo na o le taina o papa ma faagatasi e fau ai se puipui o le malumalu. O aso nei, ua i ai i malumalu ia tusitusiga “Paia i le Alii,” ma o na upu e le na’o se fale e faatatau i ai, ae o se ituaiga o olaga foi. O le vaneina o na upu i luga o “tagitagi uamea o solofanua” ma “ulo uma foi i Ierusalema” (Sakaria 14:20–21) e pau lava le aoga pe afai lea e vaneina foi i loto o tagata uma. O le paia moni e manaomia ai le “maua atu” (Sakaria 1:6) o afioga ma tulafono a le Alii i totonu ia i tatou, e mafai ai e Lona mana ona sui o tatou natura ina ia tatou paia ai e pei o Ia (tagai Levitiko 19:2).

Mo se vaaiga aoao i tusi o Hakai ma Sakaria, tagai i le “Haggai” ma le “Zechariah” i le Bible Dictionary.

Manatu mo Suesuega Faaletagata Lava Ia o Tusitusiga Paia

Hakai 1; 2:1–9

“Mafaufau i ou ala.”

Sa tele mea taua e fai e toe fausia ai Ierusalema. Ae ina ua mavae le tusa ma le 15 tausaga talu ona toe foi atu Isaraelu, sa le fiafia ai le Alii ona sa le’i tuua le faamuamua maualuga i le fausiaina o le malumalu (tagai Hakai 1:2–5; tagai foi Esera 4:24). Ao e faitau i le Hakai 1; 2:1–9, mafaufau i fesili e pei o nei: O a taunuuga sa feagai ma Isaraelu ona latou te le’i faamae’aina le malumalu? O a faamanuiaga na folafola mai e le Alii ia i latou pe afai latou faamae’aina le fauina o Lona maota? Atonu e te faaaoga lenei avanoa e “mafaufau [ai] i ou ala”—e te mafaufau ai i mea e ave i ai lau faamuamua ma pe faapefea ona e faaogatasia ma le Alii.

Tagai foi Mataupu Faavae ma Feagaiga 95; Terence M. Vinson, “Soo Moni o le Faaola,” Ensign po o le Liahona, Nov. 2019, 9–11.

Sakaria 1–3; 7–8;14

E mafai ona faapaia a’u e le Alii.

Na aoao mai Sister Carol F. McConkie: “O le paia o le faia o filifiliga o le a avea ai pea le Agaga Paia ma o tatou taiala. O le paia o le tuuese lea o tatou faanaunauga natura ma ia avea ma se tagata paia e ala i le togiola a Keriso le Alii’ [Mosaea 3:19]. … O lo tatou faamoemoe mo le paia ua faatotonugalemu ia Keriso, i Lona alofa mutimutivale ma Lona alofa tunoa” (“O Le Matagofie o le Mamalu,” Ensign po o le Liahona, Me 2017, 9–10). Ia taofi i lou mafaufau nei aoaoga ao e faitau i afioga a le Alii, ua tuuina mai e ala i le perofeta o Sakaria, e uunaia ai Isaraelu ia faateleina le paia: Sakaria 1:1–6; 3:1–7; 7:8–10; 8:16–17. Maitau mea na fetalai atu le Alii ia Isaraelu e fai ina ia Ona faapaiaina i latou. O faapefea ona fesoasoani o Ia ia faateleina lou paia?

O le Sakaria 2:10–11; 8:1–8; 14:9–11, 20–21 o loo faamatala ai le mea o le a i ai le olaga i se aso i le lumanai pe a tatou mafuta faatasi uma ma le Alii i se tulaga o le paia. Mata o le a se uiga o nei faamatalaga ia i latou na toefausiaina Ierusalama i taimi o Sakaria? O le a o latou uiga ia te oe?

“Faauta, o le a alu atu lou Tupu ia te oe: o ia o le amiotonu ma le faaola; e agamalu o ia, o loo tietie i le asini” (Sakaria 9:9). O le Ulufale Manumalo, saunia e Harry Anderson

Sakaria 9:9–11; 11:12–13; 12:10; 13:6–7; 14:1–9

O Iesu Keriso o le Mesia na folafolaina.

O nai nisi tusitusiga a Sakaria sa faasino atu i le auaunaga faalelalolagi a Iesu Keriso faapea foi ma Lona Afio Mai tulaga ese. Faatusatusa valoaga nei mai le Sakaria i savali e faatatau i ai mai isi tusi o tusitusiga paia:

• Sakaria 9:9–11 (tagai Mataio 21:1–11; 1 Peteru 3:18–19)

• Sakaria 11:12–13 (tagai Mataio 26:14–16; 27:1–7)

• Sakaria 12:10 (tagai Ioane 19:37; Faaaliga 1:7)

• Sakaria 13:6–7; 14:1–9 (tagai Mataio 26:31; Mataupu Faavae ma Feagaiga 45:47–53)

O a ni mea na e aoaoina e uiga i le Faaola ao e suesue i nei fuaitau? Aisea e taua ai mo oe ona malamalama i nei fuaitau?

Tagai foi i Taiala i Tusitusiga Paia, “Messiah” (scriptures.ChurchofJesusChrist.org).

Manatu mo Suesuega Faaleaiga o Tusitusiga Paia ma Afiafi Faaleaiga

Hakai 1:2–7.O nei fuaiupu e ono faaosofia ai lou aiga ia “mafaufau i ou ala.” Atonu e mafai e lou aiga ona faatino ia fuaitau o loo i le fuaiupu 6. O le a se mea o aoao mai e lenei fuaiupu e uiga i le faatauaina o mea o le lalolagi i mea a le Atua? Atonu tou te fono faatasi e uiga i mea e ave i ai le faamuamua o lou aiga. O le usuina o se pese e pei o le “O Loo Ou Taumafai e Avea e Pei o Iesu” (Tusipese a Tamaiti, 40) e mafai ona fesoasoani i lou aiga e iloilo ai mea o loo lelei ona tou faia ma eria e mafai ona outou faaleleia atili.

Hakai 2:1–9.Ina ia faailoa atu nei fuaiupu , e mafai ona e faasoa atu le ala i le Malumalu o Provo City Center, lea sa toe fausia mai le tapeneko pele lea na faaleagaina e le afi (tagai i le vitio “Provo City Center Temple Completed,” ChurchofJesusChrist.org). Ao faitau e lou aiga le Hakai 2:1–9, atonu e te fesili atu i tagata o lou aiga e mafaufau i se mea i o latou olaga e ono pei o le galuega o le toefausiaina o le malumalu lea na faatamaiaina. E faapefea ona toefausia i tatou e le Alii i le mavae ai o se mala po o se faafitauli faigata?

Sakaria 3:1–7.A o e faitauina nei fuaiupu, e mafai ona e faaali atu i lou aiga ni lavalava palapala. Mata o a ni lagona o Iosua ina ua tu o ia i luma o se agelu i lavalava palapala? E faapefea ona pei agasala o ni lavalava palapala? O le a se mea ua aoao mai e le Sakaria 3:1–7 ia i tatou e uiga i le faamagaloga? Ona tou faamamaina faatasi lea o lavalava ma talanoa e uiga i le mana faamama o le Togiola a le Faaola.

Sakaria 8:1–8.O le a se mea ua faagaeetia ai i tatou e uiga i le faaaliga a Sakaria i le lumanai o Ierusalema? O a ni mea tatou te maua iina o le a tatou mananao e vaaia i o tatou lotoifale? E mafai faapefea ona tatou valaaulia le Faaola e “mafuta i lo [tatou] totonugalemu”? (tagai Gary E. Stevenson, “O Fale Paia, O Malumalu Paia,” Ensign po o le Liahona, Me 2009, 101–3).

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “O Loo Ou Taumafai e Avea e Pei o Iesu,” Tusipese a Tamaiti, 40–41

Faaleleia o Suesuega Faaletagata Lava Ia

Faaaoga avanoa mo se iloiloga faaletagata lava ia. A ou suesue i tusitusiga paia, o le a masani ona musuia oe e mafaufau loloto i au lava tautinoga i le Tama Faalelagi ma Iesu Keriso. Ia faatino i luga o uunaiga e te maua.