“12–18 Tesema. Malaki: ‘Ua Ou Alofa Atu ia te Outou, ua Fetalai Mai ai Ieova’” Sau, Mulimuli Mai ia te A’u—Mo Tagata Taitoatasi ma Aiga: Feagaiga Tuai 2022 (2021)

“12–18 Tesema. Malaki,” Sau, Mulimuli Mai ia te A’u—Mo Tagata Taitoatasi ma Aiga: 2022

Ata

faatagata o Keriso

12–18 Tesema

Malaki

“Ua Ou Alofa Atu ia te Outou, ua Fetalai Mai ai Ieova”

O le igoa Malaki o lona uiga “la’u avefeau” (Bible Dictionary, “Malaki”) A o e suesue i le savali a Malaki ia Isaraelu, o a ni savali e te maua ai mo lou olaga? E faapefea ona fesootai upu a Malaki i o tatou aso?

Tusifaamaumau Ou Lagona Uunai

Na tau atu e le Alii i Lona nuu e ala i le perofeta o Malaki, “Ua ou alofa atu ia te outou.” Ae peitai o Isaraelu, o e sa tigaina i augatupulaga o puapuaga ma le faatagataotauaina, sa fesili atu i le Alii, “Ua e alofa mai ia i matou i ni a?” (Malaki 1:2). I le mavae ai o mea uma na oo i ai Isaraelu, atonu sa mafaufau pe o le talafaasolopito o Isaraelu anamua o se tala moni o le alofa o le Atua mo Lona nuu o le feagaiga.

Ao e tomanatu i mea ua e faitau i ai i le Feagaiga Tuai i lenei tausaga, o le a se faamaoniga ua e maua o le alofa o le Atua? E faigofie ona iloa le tele o faataitaiga o vaivaiga ma le fouvale o le tagata. Ae i na mea uma, e le’i tuua ai lava le aapa atu o le Atua ma le alofa. Ina ua agaleaga atalii o Iakopo i lo latou uso o Iosefa, sa saunia lava pea e le Alii se auala e laveai ai i latou mai le oge (tagai Kenese 45:4–8). Ina ua muimui Isaraelu i le vao, sa fafaga i latou e le Atua i le manai (tagai Esoto 16:1–4). E ui lava ina lafoai o Ia e Isaraelu, liliuese atu i isi atua, ma sa faataapeapeina, sa le’i tuulafoaia atoa i latou e le Atua ae na folafola atu afai latou te salamo, o le a Ia faapotopoto mai ma laveai i latou ma le “alofa tele lava” (tagai Isaia 54:7).

O le vaai atu i lenei itu, o le Feagaiga Tuai o se tala o le alofa faapalepale ma tumau o le Atua. Ma o loo faaauau pea lenei tala i aso nei. Sa valoia e Malaki, “e alu ae … le La o le Amiotonu, e i ai foi le mea e malolo ai i ona apaau.” (Malaki 4:2). Na afio mai Iesu Keriso, ma aumai ai le faamalologa faaletino ma faaleagaga ia i latou uma o e o mai ia te Ia. O Ia o le faamaoniga silisili o le alofa o le Atua mo Isaraelu anamua ma mo i tatou uma.

Mo nisi faamatalaga e uiga i le tusi o Malaki, tagai i le “Malachi” i le Bible Dictionary.

Ata

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Malaki 1–4

“Foi mai ia te a’u, ona Ou foi atu ai lea ia te outou.”

I aso o Malaki, ua uma ona toe fausia e Isaraelu le malumalu i Ierusalema, ae i le avea ai o se nuu sa latou manaomia pea ona toe fausia la latou sootaga ma le Alii. A o e suesue i le Malaki, vaavaai mo fesili na fai atu e le Alii ia Isaraelu pe na latou fai atu ia te Ia. Mafaufau e fesili ia te oe lava ni fesili faapena (ua fautuaina atu i lalo nisi o faataitaiga) e fesoasoani e iloilo ai lau fesootaiga ma le Alii ma faalatalata atili atu ai ia te Ia.

O faapefea ona ou lagonaina le alofa o le Alii mo au? (tagai Malaki 1:2).
Pe o a’u taulaga i le Alii o faamamaluina moni ai o Ia? (tagai Malaki 1:6–11).
O a ni auala ou te manaomia e “foi” atu ai i le Alii? (tagai Malaki 3:7).
Pe o o’u faoa mea le Atua i soo se auala? (tagai Malaki 3:8–11).
E faapefea e o’u uiga faaalia i taimi o faigata ona atagia ai o’u lagona e faasaga i le Alii? (tagai Malaki 3:13–15; tagai foi 2:17).

Tagai foi D. Todd Christofferson, “Ou Te Aoai Atu ma Sasa ia i Latou Uma Ou te Alofa I Ai,” Ensign po o le Liahona, Me 2011, 97–100.

Malaki 1:6–14

E manaomia e le Alii se “taulaga lelei.”

O afioga a le Alii i le Malaki 1 ua faaalia ai sa ofoina atu e faitaulaga o Isaraelu ni manuvaefa faaletonu ma mamai e fai ma taulaga i le malumalu, lea na faasaina e le Aliii (tagai Levitiko 22:17–25). O a ni mea ua fautua mai e nei taulaga e uiga i lagona o faitaulaga e uiga i le Alii? (tagai Malaki 1:13). Aisea ua finagalo mai ai le Alii ia i tatou ia avatu ia te Ia a tatou taulaga lelei? Mafaufau i taulaga ua fetalai mai le Alii e te faia. O a ni mea e mafai ona e faia e avatu ai ia te Ia se “taulaga lelei”? (Malaki 1:11; tagai foi 3:3).

Tagai foi Moronae 7:5–14.

Malaki 3–4

O valoaga a Malaki ua faataunuuina i aso e gata ai.

Ina ua asiasi atu le Faaola i le atu Amerika, sa ia sii atu [upu] a Malaki 3–4 ia sa Nifae (tagai 3 Nifae 24–25). I le 1823, sa faasoa mai ai e le agelu o Morone ni vaega o nei lava mtaupu ia Iosefa Samita (tagai Iosefa Samita—Talafaasolopito 1:36–39; tagai foi Mataupu Faavae ma Feagaiga 2). Aisea e te manatu ua ta’ua soo ai upu a Malaki i tusitusiga paia? (tagai foi Mataupu Faavae ma Feagaiga 27:9; 110:13–16; 128:17–18). I lou manatu, o a ni savali mai le Malaki 3–4 e foliga mai e faapitoa le taua mo o tatou aso?

Ina ua sii mai e Moronae le Malaki 4:5–6 ia Iosefa Samita, sa ia faia “[ma] sa i ai sina eseesega itiiti mai le ala ua faitauina ai” i le Tusi Paia (Iosefa Samita—Talafaasolopito 1:36). O le a se mea ua faaopoopo mai e le eseesega [o le upusii mai] e Moronae i lo tatou malamalamaaga e uiga i lenei valoaga? Ina ia aoao atili e uiga i le oo mai o Elia ma ala ua faataunuuina ai lenei valoaga i aso nei, tagai i le Mataupu Faavae me Feagaiga 110:13–16 ma le savali a Elder David A. Bednar, “O Le a Liliu Atu Loto o Fanau i o Latou Tama” (Ensign po o le Liahona, Nov. 2011, 24–27). Aisea e te faafetai ai ua oo mai Elia?

Atatusi o Elia o loo faaali atu ia Iosefa Samita ma Oliva Kaotui i le Malumalu o Katelani, na saunia e Robert T. Barrett

Malaki 3:8–12

O le totogiina o le sefuluai e tatalaina pupuni o le lagi.

Ao e faitau i le Malaki 3:8–12, mafaufau i ou lava aafiaga i le totogiina o le sefuluai. O le a le uiga o le fuaitau “toina pupuni o le lagi” (fuaiupu 10) ia te oe?

Ata

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Malaki 1:2.O le a faapefea ona tali e lou aiga le fesili o loo maua i le Malaki 1:2—“Ua alofa mai [le Alii] ia i matou i ni a?” O a nisi o faamaoniga o le alofa o le Alii mo i tatou?

Malaki 3:8–12.Ao e faitau i le Malaki 3:8–12, valaaulia tagata o lou aiga e faasoa mai o latou manatu po o lagona e uiga i le sefuluai. O a ni faamanuiaga faaletino ma faaleagaga ua tatou vaaia mai le totogi o sefuluai? (tagai David A. Bednar, “O Pupuni o le Lagi,” Ensign po o le Liahona, Nov. 2013, 17–20). Atonu e fiafia tagata o le aiga e tusi ni ata e faatusa i ai nei faamanuiaga ma tautau ia ata i luga o se faamalama.

Malaki 3:13–18.O le a le uiga ia i tatou o le ā le Alii ma avea o se tasi o Ana “oloa taua”?

Malaki 4:5–6.A uma ona faitau nei fuaiupu, e mafai e le tou aiga ona faailoa mai tali i fesili nei e uiga i le valoaga a Malaki: O Ai? O le a? O a fea? O fea? Aisea? (tagai foi Mataupu Faavae ma Feagaiga 2).

E faapefea ona liliu atu o tatou loto i o tatou tamā. E faapefea ona faamanuiaina i tatou pe a tatou faia? Atonu tou te mafaufau loloto i fesili nei ao matamata le vitio “The Promised Blessings of Family History” (ChurchofJesusChrist.org). O a ni mea o le a tatou faia o se aiga ia maua ai nei faamanuiaga?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Talafaasolopito-O Lea Ou Te Faia,” Tusipese a Tamaiti,100.

Faaleleia o Suesuega Faaletagata Lava ia

Fai fesili a o e suesue. A o e suesue i tusitusiga paia, e mafai ona oo atu ni fesili i lou mafaufau. Manatunatu loloto i nei fesili, ma vaavaai mo tali.