12–18 Tesema

Malaki

“Ua Ou Alofa Atu ia te Outou, Ua Fetalai Mai ai le Alii”

E alofa le Alii i tamaiti e te faiaoga ai. O le a faapefea ona e fesoasoani i tamaiti ia lagona Lona alofa ao e aoao atu le aoaoga faavae o loo maua i le tusi a Malaki?

Tusi Faamaumau Ou Lagona Uunai

Valaaulia le Fefaasoaai

Faitau le fuaitau lenei mai le Malaki 1:2: “Ua ou alofa atu ia te outou, ua fetalai mai ai le Alii.” Valaaulia tamaiti taitasi e faasoa mai se auala e tasi latou te iloa e alofa ai le Alii ia i latou. A uma ona faasoa mai tamaiti taitasi, faafetai atu ia te ia, ma faasoa atu lau molimau e uiga i le alofa o le Alii mo lena tamaitiiti.

Aoao atu le Aoaoga Faavae: Tamaiti Laiti

Malaki 3:10–12

O le a faamanuiaina a’u e le Tama Faalelagi pe a ou totogiina le sefuluai.

E tusa lava pe o tamaiti laiti o loo e faiaoga ai e le maua ni a latou tupe, ae e mafai lava ona latou aoao e uiga i faamanuiaga o le totogiina o le sefuluai.

Gaoioiga e Mafai Ona Fai

• Fesoasoani i tamaiti e faitau ni mea faitino laiti se 10, e pei o tupe siliva i le itulau o gaoioiga o lenei vaiaso. Valaaulia i latou e tuuese se tasi o mea faitino mai le vaega atoa, ma faamalamalama atu e tai pei lenei mea o le sefuluai lea tatou te avatu i le Alii. Tatou te tuuina atu ia te Ia le tasi vae-sefulu o mea tatou te maua. Faasoa atu lau molimau i le auala e faamanuiaina ai i tatou e le Alii ao tatou totogiina le sefuluai. Usu faatasi se pese e faatatau i le sefuluai, e pei o le “I Want to Give the Lord My TenthChildren’s Songbook,150).

• Tusi se faamalama i luga o le laupapa, ma faitau le Malaki 3:10 i tamaiti. Fai atu ia i latou e faasino atu i faamalama ao e faitauina le fuaitau “faamalama o le lagi.” Faamalamalama atu o le uiga o lenei mea e faapea o loo tuuina mai e le Tama Faalelagi ia i tatou ni faamanuiaga maoae pe a tatou totogi le sefuluai. Ao valivali e tamaiti le itulau o gaoioiga o lenei vaiaso, talanoa e uiga i nisi o mafuaaga tatou te totogiina ai le sefuluai.

• Faasoa atu se tala mai le mekasini o le Uo pe mai lou lava olaga e uiga i le totogiina o le sefuluai. Valaaulia tamaiti e faalogo mo faamanuiaga lea e mafai ona oo mai mai le totogi o le sefuluai.

Malaki 4:5–6

E faamauina i tatou o ni aiga i le malumalu.

Ona o ki o le perisitua o faamauga lea na tuuina mai e Elia ia Iosefa Samita i le Malumalu o Katelani, ua mafai ai ona tuufaatasi aiga mo le faavavau. A o e aoao atu lenei upumoni, ia nofouta i lagona o tamaiti e lei faamauina o latou aiga i le malumalu.

Gaoioiga e Mafai Ona Fai

• Faitau le Malaki 4:5 i tamaiti. Ona tau atu lea ia i latou o lenei folafolaga sa faataunuuina ina ua faaali mai Elia ia Iosefa Samita i le Malumalu o Katelani (tagai i le “Mataupu 40: Faaaliga i le Malumalu o Katelani,” i Tala o le Mataupu Faavae ma Feagaiga,157). Faaali atu se ata o lenei mea na tupu (tagai i le Tusi Ata o le Talalelei, nu. 95), ma valaaulia tamaiti e tusi ia Elia ma ia Iosefa Samita. Faamalamalama atu faapea talu ai na sau Elia, ua mafai ona faamauina i tatou o ni aiga i le malumalu. Faasoa atu lau molimau i le taua o le faamauina o ni aiga.

• Tau atu i tamaiti e uiga i lou alofa mo lou aiga; faaali se ata, pe a mafai. Valaaulia ni nai tamaiti e faasoa mai o latou lagona mo o latou aiga. Usu faatasi se pese e uiga i aiga, e pei o le “E Mafai Ona Faavavau Aiga” (Viiga, 98), ma molimau mai e finagalo le Tama Faalelagi ia faamauina faatasi aiga ma o le tasi lea o mafuaaga ua i ai a tatou malumalu. Fesoasoani i tamaiti ia malamalama faapea ona o Iesu Keriso, e mafai foi ona faamauina i tatou i tagata o le aiga o e ua le mafai ona o i le malumalu i lenei olaga. Valaaulia ia tamaiti e tusi se ata o lo latou aiga o loo faatasi i le lagi.

Aoao atu le Aoaoga Faavae: Tamaiti Matutua

Malaki 3:8–12

O le a faamanuiaina a’u e le Tama Faalelagi pe a ou totogiina le sefuluai.

O le totogiina o le sefuluai e faatatau sili atu i le mauaina o le faatuatua i le Tama Faalelagi ma Iesu Keriso nai lo le faatatau i tupe. O a mea o malamalama i ai tamaiti o loo e aoaoina e uiga i le sefuluai? E mafai faapefea ona e fesoasoani ia i latou ia maua le faatuatua e totogi ai le sefuluai?

Gaoioiga e Mafai Ona Fai

• Tusi i luga o le laupapa ni fesili e uiga i le sefuluai e pei o laia O le a le sefuluai? E faapefea ona ou totogiina le sefuluai? E mo le a le sefuluai? O a ni faamanuiaga o le totogiina o le sefuluai? Valaaulia tamaiti e suesue le Malaki 3:8–12 ma “Tithes, Tithing” i Taiala i Tusitusiga Paia (scriptures.ChurchofJesusChrist.org) ma tusi i lalo mea latou te mauaina. Valaaulia i latou e faasoa mai a latou tali ma le tasi ma le isi. O le a le ituaiga o tagata tatou te avea ai e ala i le totogiina o le sefuluai?

• Faaali le vitio “Jesus Teaches about the Widow’s Mite” (ChurchofJesusChrist.org), po o le faitau faatasi le Mareko 12:41–44. O le a se mea ua aoao mai e lenei tala ia i tatou e faatatau i ni lagona o le Alii e uiga ia tatou taulaga?

• Tusi se faamalama i luga o le laupapa, ma valaaulia tamaiti e tusi i totonu o le faamalama faamanuiaga lea atonu na maua e se tagata mo le totogiina o le sefuluai (mo ni manatu, tagai i le Malaki 3:10–12). Valaaulia tamaiti e faasoa atu se faataitaiga a le tagata lava ia o le ala na faamanuiaina ai i latou po o o latou aiga e ala i le totogiina faamaoni o le sefuluai. Pe mafai foi ona e faasoa atu se faataitaiga mai lou lava olaga ole ala na faateleina ai e le totogiina o le sefuluai lou faatuatua i le Tama Faalelagi ma Iesu Keriso.

Ata o Elia o loo faaali atu ia Iosefa Samita ma Oliva Kaotui i le Malumalu o Katelani, na saunia e Robert T. Barrett

Malaki 4:5–6

“O le a Ia auina atu Elia le perofeta.”

O le valoaga a Malaki e uiga i le perofeta o Elia na faataunuuina ina ua faaali mai Elia ia Iosefa Samita i le Malumalu o Katelani ma tuuina atu ia te ia ki o le perisitua lea na faatagaina ai aiga ina ia faamauina faatasi e faavavau. Atonu e mafai ona e mafaufau e valaaulia se tagata i le uarota ua i ai le tiutetauave mo le galuega o malumalu ma talafaasolopito o aiga (e pei o se sui o le au perisitene o le korama a toeaina po o le au peresitene o le Aualofa) e fesoasoani ia te oe e aoao atu lenei aoaoga faavae i tamaiti. Manatua ia nofouta i lagona o tamaiti e lei faamauina o latou aiga.

Gaoioiga e Mafai Ona Fai

• Tusi fasifuaitau taitasi mai le Malaki 4:5–6 i luga o se isi fasi pepa. Tuu atu fasi pepa i tamaiti, ma fai atu ia i latou e faatulaga sa’o ia fuaitau taitasi. Faitau faatasi le mau, ma talanoa i fesili e pei o fesili nei: O ai na folafola mai e le Alii e auina mai? O ana fea na Ia fai mai ai o le a sau ai lenei tagata? O le a le mea na fai mai le Alii o le a fai e lenei tagata? Aisea e manaomia ai ona sau lenei tagata? O fea na faataunuu ai lenei valoaga? (tagai i le Mataupu Faavae ma Feagaiga 110:13–16).

• Tusi i luga o le laupapa se fesili e pei o lea O le a le uiga o le fesili o le a liliu atu loto o tama ia latou fanau? (tagai i le Malaki 4:6). Valaaulia tamaiti e mafaufau loloto i le fesili lenei ao latou matamata i le vitio: “Their Hearts Are Bound to You” (ChurchofJesusChrist.org). Ona valaaulia lea o tamaiti e faasoa mai o latou manatu e uiga i le fesili o i luga o le laupapa. Talanoaina faatasi ni aafiaga na e mauaina po o tamaitai i le aoaoina e uiga i le talafaaasolopito o aiga.

• Faaali atu le ata o Elia mai le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga. Fai i tamaiti e faasoa mai ni mea latou te iloa e uiga i mea e tutupu o loo faaalia mai e lenei ata (tagai foi i le Mataupu Faavae ma Feagaiga 110:13–16). Molimau atu faapea o le mana faamau lea na toefuatai mai e Elia ua faataga ai aiga ina ia tuufaatasia e faavavau—e aofia ai aiga o e e le’i maua le avanoa i le olaga faitino. Afai sa e auai i se faamauga, a le mo oe lava ia po o se tagata ua maliu, talanoa e uiga i ou lagona i le taimi o lena sauniga. Fai i tamaiti e faasoa mai o latou lagona e uiga i o latou aiga ma e uiga i le fuafuaga a le Atua e fesoasoani i aiga ina ia faatasia e faavavau.

Uunaia le Aoaoina i le Aiga

Valaaulia tamaiti e mafaufau i se mea sa latou aoaoina i le taimi o le vasega i le asō, ma fai atu i tamaiti e faasoa mai. Uunaia tamaiti uma e faasoa atu ma o latou aiga se mea sa latou aoaoina e uiga i aoaoga a Malaki.

Faaleleia o Lo Tatou Aoao Atu

Faagauai tamaiti i talanoaga faaletalalelei. Atonu e manaomia ona e mafaufau e fatufatu ni auala e faagauai ai tamaiti i talanoaga faaletalalelei. Mo se faʻataʻitaʻiga, e mafai e tamaiti ona pasi faataamilo se polo ma faasoa mai a latou tali i se fesili pe a latou uuina le polo.