11 Tīsema

ʻOku Ou Fakamuʻomuʻa Nai ʻa e Ngaahi Meʻa ʻa e ʻOtuá ʻi Heʻeku Moʻuí?

Hakeai; Sakalaia 1–3; 7–14

Fealeaʻaki Fakataha

Tataki ʻe ha mēmipa ʻo e kau palesitenisī fakakōlomú pe fakakalasí; miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kau Finemuí pe ko e Kaveinga ʻo e Kōlomu ʻo e Lakanga Taulaʻeiki Faka-ʻĒloné. Hili iá, tataki leva ha fealeaʻaki fekauʻaki mo e ngāue ʻo e fakamoʻuí mo e hakeakiʻí ʻo fakaʻaongaʻi ha fehuʻi ʻe taha pe lahi ange mei he ngaahi fehuʻi ʻi laló pe ngaahi fehuʻi pē ʻaʻau (vakai, Tohi Tuʻutuʻuni Fakakātoa, 10.2, 11.2, ChurchofJesusChrist.org). Palani ha ngaahi founga ke ngāueʻi ai e meʻa ne mou aleaʻí.

• Moʻui ʻaki e ongoongoleleí. Ko e hā e meʻa naʻe aleaʻi ʻe he kau pīsopelikí ʻi heʻetau fakataha alēlea fakauooti ʻa e toʻu tupú? Ko e hā ha ngaahi ngāue ʻe lava ke tau fakahoko ʻo makatuʻunga ʻi he fealeaʻaki ko iá?

• Tokanga kiate kinautolu ʻoku faingataʻaʻiá. Te tau tokoniʻi fēfē nai ʻa e kakaí ʻi ha ngaahi founga faka-Kalaisi ʻi he taimi ʻoku tau vakai ai ki ha fiemaʻu ka ʻoku ʻikai ke tau ʻilo ʻa e meʻa ke lea ʻakí?

• Fakaafeʻi ʻa e tokotaha kotoa pē ke nau maʻu e ongoongoleleí. Ko e hā ha meʻa ʻoku tau maʻu ʻi he ongoongolelei ʻo Sīsū Kalaisí ʻokú ne ʻomi ʻa e fiefiá? Te tau lava fēfē nai ke vahevahe ʻa e fiefia ko iá mo e niʻihi kehé?

• Fakatahaʻi ʻa e ngaahi fāmilí ke taʻengata. Ko e hā ha meʻa ʻoku tau fakahoko ke fekumi ai ki he ngaahi hingoa ʻo ʻetau ngaahi kui ʻoku nau fie maʻu ʻa e ngaahi ouau fakatemipalé? Ko e hā ha meʻa ʻe lava ke tau fakahoko ke tokoni ai ki he niʻihi kehé ke nau fekumi ki he ngaahi hingoa ʻo ʻenau ngaahi kuí?

ʻI he fakaʻosinga ʻo e lēsoní, fakahoko e ngaahi meʻa ko ʻení, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kalasí pe kōlomú fekauʻaki mo e ngaahi palani mo e fakaafe naʻe fakahoko ʻi he lolotonga e fakatahá.

Akoʻi ʻa e Tokāteliné

Tataki ʻe ha taki kakai lalahi pe toʻu tupu; miniti ʻe 25–35

Teuteuʻi Fakalaumālie Koe

ʻOku mahutafea ʻa e moʻuí ʻi ha ngaahi meʻa mahuʻinga ke fakahokó. Kapau he ʻikai ke tau tokanga, ʻe lava ke hoko ʻa e femoʻuekina ʻo e moʻuí ke fakatupu ai ha ngalo ʻiate kitautolu ʻa e taumuʻa ʻo e moʻuí. ʻOku tau ʻiloʻi ʻoku totonu ke hoko ʻa e Fakamoʻuí mo ʻEne ongoongoleleí ko ʻetau taumuʻa mahuʻinga tahá ia, ka ʻe lava ke tohoakiʻi ʻe he ngaahi meʻa kehé ʻetau tokangá. Mahalo ko e ʻuhinga ia ʻoku faleʻi mai ai ʻe he folofolá ke tau “fakakaukau ki he ʻalunga ʻo ho vaʻé” (Lea Fakatātā 4:26), “fakakaukau ki homou ngaahi ʻaluʻangá” (Hakeai 1:5), pea “ʻeke kiate kimoutolu, pe ʻoku mou ʻi he tuí” (2 Kolinitō 13:5).

Naʻe fie maʻu ʻe he kakai ʻIsileli ne nau moʻui ʻi he kuonga ʻo e palōfita ko Hakeaí ʻa e faʻahinga fakaafe ko ʻení. ʻI heʻenau ngaahi ngāue ʻaonga ke langa foʻou ʻa Selusalemá, ne nau fakatoloi ai ʻa hono toe langa foʻou ʻa e fale ʻo e ʻEikí. Fakakaukau ki he founga ʻe ala ʻaonga ai e ngaahi fakatokanga ʻa e ʻEikí ʻi he Hakeai 1 kiate kitautolu ʻi he ʻaho ní. Te ke fakalotoa fēfē nai ʻa kinautolu ʻokú ke akoʻí ke nau fakamahuʻingaʻi ʻenau tukupā ke fakamuʻomuʻa ʻa e ngaahi meʻa ʻa e ʻOtuá ʻi heʻenau moʻuí? Te ke lava ʻo toe vakaiʻi ʻa e pōpoaki ʻa ʻEletā Dale G. Renlund ko e “Tukupā Taʻeueʻia kia Sīsū Kalaisi” (Liahona, Nōvema 2019, 22–25) pe ko e ngaahi akonaki ʻa Palesiteni Ezra Taft Benson ʻi he “Ko e Fekau Lahí—ʻOfa ki he ʻEikí” (ʻi he Ngaahi Akonaki ʻa e Kau Palesiteni ʻo e Siasí: ʻEselā Tafu Penisoni [2014], 43–51).

Te tau lava ʻo fakamuʻomuʻa ʻa e ngaahi meʻa ʻa e ʻOtuá.

Ako Fakataha

Te ke lava ʻo kamataʻi e fealeaʻakí ʻaki hano tohi ha ngaahi kupuʻi lea mei he Hakeai 1:6 ʻi he palakipoé. Ko e hā ha meʻa ʻe lava ke tau ako mei he ngaahi fakakaukau ko ʻení—tō e tengaʻiʻakaú kae ʻikai pē ha ututaʻu, kai kae ʻikai pē ha mākona, pe ko e ngāueʻi e paʻangá ka ʻoku faʻo pē ia ki he kato ava—fekauʻaki mo hono fakaʻaongaʻi e taimí ʻi ha ngaahi meʻa kae ʻikai ko e meʻa ʻoku finangalo ʻa e ʻEikí ke tau fakahokó? Neongo ʻoku ʻikai folofola mai ʻa e ʻEikí ke tau tokanga taha ki hono langa ha temipalé, ka ko e hā e meʻa ʻokú Ne kole mai ke tau tokanga taha ki aí? Te tau fokotuʻu fēfē ʻa e ngaahi meʻa ko iá ke hoko ko ha taumuʻa mahuʻinga ʻi heʻetau moʻuí? ʻE ala tokoni ʻa e ngaahi ʻekitivitī ko ʻení ke fakamahuʻingaʻi ʻe he toʻu tupú ʻenau tukupā ke fakamuʻomuʻa ʻa e ngaahi meʻa ʻa e ʻOtuá ʻi heʻenau moʻuí.

• Ko hono maʻu fakauike ʻo e sākalamēnití ko ha faingamālie lelei ia ke fakamahuʻingaʻi ai ʻetau tukupā kia Sīsū Kalaisí. Te tau fakaʻaongaʻi fēfē nai ʻa e sākalamēnití ke fakakaukau pe ʻoku tau hangē ange nai ko e Fakamoʻuí? Mahalo naʻa lava ke vahevahe ʻe he toʻu tupú ʻa e founga ʻoku nau fakahoko ai ʻení. ʻE lava foki ke nau lisi ha ngaahi fehuʻi te nau ʻeke loto pē ʻiate kinautolu ʻi he lolotonga ʻo e sākalamēnití. Fakaafeʻi ke nau fakalaulauloto ki ha potufolofola, ngaahi pōpoaki, pe maʻuʻanga tokoni kehe ʻe taha pe lahi ange ʻi he “Ngaahi Maʻuʻanga Tokoni Poupoú” ʻi heʻenau faʻu ʻenau lisí.

• Naʻe vahevahe ʻe Palesiteni Dieter F. Uchtdorf ʻi heʻene pōpoaki “ʻO e Meʻa Mahuʻinga Tahá” (Liahona, Nōvema 2010, 19–22), ha faleʻi ʻe ala tokoni ki he toʻu tupú ke nau “fakakaukau ki [honau] ngaahi ʻaluʻangá” (Hakeai 1:5). Te ke lava ʻo fakaafeʻi ha niʻihi fakafoʻituitui pe ngaahi kulupu iiki ke nau lau ʻa e konga ʻe tolu fakamuimui ʻo e leá (ʻo kamata mei he konga “Ko e Mālohi ʻo e Ngaahi Makatuʻungá”), ʻo kumi ʻa e ʻuhinga ke fakatefito ʻetau moʻuí ʻi he Fakamoʻuí. ʻE lava ke nau vahevahe ha meʻa ʻoku nau ongoʻi fakalaumālie ke fakahoko ke fakamālohia ai ʻenau tukupā kia Sīsū Kalaisí.

• Ko e tokolahi ʻo kitautolu ʻoku tau femoʻuekina ʻi hono fakahoko ha ngaahi meʻa lelei. Ka ʻoku ʻikai ko e ngaahi meʻa lelei tahá maʻu pē ia. Fakakaukau ke vahevahe ha fakamatala mei he konga ʻuluaki ʻo e lea ʻa Palesiteni Dallin H. Oaks ko e “Good, Better, Best” (Liahona, Nov. 2007, 104–8) ʻa ia ʻe tokoni ke mahino ki he toʻu tupú ʻa e tefitoʻi moʻoni ko ʻení. Te ke lava foki ʻo fakaafeʻi kinautolu ke nau takitaha lisi ʻenau ngaahi ʻekitivitī fakaʻahó. Kole ange ke nau sivisiviʻi fakafoʻituitui pe ʻoku “lelei,” “lelei ange,” pe “lelei taha” ʻa e ʻekitivitī takitaha. Ko e hā ha meʻa ʻoku makatuʻunga ai ʻa e “lelei taha” ha ʻekitivitī? Fakaafeʻi ke nau fevahevaheʻaki ʻa e meʻa ʻoku nau ako mei he sivisiviʻi ko ʻení.

Ngāue ʻi he Tui

Poupouʻi e kau mēmipa ʻo e kalasí pe kōlomú ke nau fakalaulauloto mo lekooti ʻa e meʻa te nau fakahoko ke ngāueʻi ai e ngaahi ongo ne nau maʻu ʻi he ʻaho ní. ʻE lava ke nau vahevahe ʻenau ngaahi fakakaukaú, ʻo kapau te nau loto ki ai. Fakaafeʻi kinautolu ke nau fakakaukau ki he founga ʻe fakamālohia ai ʻe heʻenau ngāue ki heʻenau ngaahi ongo fakalaumālié ʻa honau ngaahi vāfetuʻutaki mo e Tamai Hēvaní mo Sīsū Kalaisí.

Ngaahi Maʻuʻanga Tokoni Poupoú

• Sosiua 24:14–15; Mātiu 6:19–34; 22:36–40; Maʻake 10:17–22; 1 Kolinitō 11:23–28; 2 Kolinitō 13:5; Kolose 3:1–2 (ʻOku totonu ke tau fakamuʻomuʻa ʻa e ngaahi meʻa ʻa e ʻOtuá ʻi heʻetau moʻuí)

• Scott D. Whiting, “Hoko ʻo Hangē ko Iá,” Liahona, Nōvema 2020, 12–15

Ko e Faiako ʻi he Founga ʻa e Fakamoʻuí

“ʻOku ʻikai fie maʻu ia ke ke akoʻi e meʻa kotoa pē ʻi he foʻi kalasi ʻe taha kae toki ongo e lēsoní ki ha loto ʻo ha taha—ʻi he taimi ʻe niʻihi, ʻoku feʻunga pē ha meʻa mahuʻinga ʻe taha pe ua” (Ko e Faiako ʻi he Founga ʻa e Fakamoʻuí, 7).