27 Nōvema

Te U Lava Fēfē Nai ke Vahevahe ʻa e Ongoongoleleí?

Siona; Maika

Fealeaʻaki Fakataha

Tataki ʻe ha mēmipa ʻo e kau palesitenisī fakakōlomú pe fakakalasí; miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kau Finemuí pe ko e Kaveinga ʻo e Kōlomu ʻo e Lakanga Taulaʻeiki Faka-ʻĒloné. Hili iá, tataki leva ha fealeaʻaki fekauʻaki mo e ngāue ʻo e fakamoʻuí mo e hakeakiʻí ʻo fakaʻaongaʻi ha fehuʻi ʻe taha pe lahi ange mei he ngaahi fehuʻi ʻi laló pe ngaahi fehuʻi pē ʻaʻau (vakai, Tohi Tuʻutuʻuni Fakakātoa, 10.2, 11.2, ChurchofJesusChrist.org). Palani ha ngaahi founga ke ngāueʻi ai e meʻa ne mou aleaʻí.

• Moʻui ʻaki e ongoongoleleí. ʻOku tau ofi ange fēfē nai ki he Fakamoʻuí? ʻOku tau feinga fēfē nai ke tatau ange mo Iá?

• Tokanga kiate kinautolu ʻoku faingataʻaʻiá. Ko hai ha tokotaha naʻa tau fakakaukau ki ai kimuí ni? Te tau tokoniʻi fēfē nai ʻa e kakai fakafoʻituitui ko ʻení?

• Fakaafeʻi ʻa e tokotaha kotoa pē ke nau maʻu e ongoongoleleí. Te tau tali fēfē nai ʻa e ngaahi fehuʻi hotau ngaahi kaungāmeʻá fekauʻaki mo e Siasí?

• Fakatahaʻi ʻa e ngaahi fāmilí ke taʻengata. Ko e hā ha ngaahi founga ʻe lava ke tau fehokotaki lelei ange ai mo e kāingá, hangē ko e ngaahi kuí mo e ngaahi tokoua ʻakí?

ʻI he fakaʻosinga ʻo e lēsoní, fakahoko e ngaahi meʻa ko ʻení, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kalasí pe kōlomú fekauʻaki mo e ngaahi palani mo e fakaafe naʻe fakahoko ʻi he lolotonga e fakatahá.

Akoʻi ʻa e Tokāteliné

Tataki ʻe ha taki kakai lalahi pe toʻu tupu; miniti ʻe 25–35

Teuteuʻi Fakalaumālie Koe

Mahalo ʻoku ʻi ai ha kau mēmipa ʻo hoʻo kalasí pe kōlomú ʻoku nau ʻilo maʻu pē ha ngaahi founga ke vahevahe ai e ongoongoleleí. Mahalo ʻokú ke fakahoko mo koe ʻa e founga ko ʻení! Ka neongo iá, ki ha kakai tokolahi, ko hono vahevahe ko ia ʻo e ongoongoleleí ʻoku faingataʻa mo fakailifia ia. Ko e meʻamālié, ʻoku tau malava kotoa pē ʻo toe lelei ange ʻi hono vahevahe ʻetau tui kia Sīsū Kalaisí. Mahalo he ʻikai te ke fanongo tonu ki he leʻo ʻo e ʻEikí ʻoku fekau mai ke ke fakahoko ha meʻa hangē ko e “ʻalu ki Ninive, ʻa e kolo lahi ko iá, peá ke kalanga ki ai,” ʻo hangē ko ia ne hoko kia Sioná (Siona 1:2). Ka ʻe lava ke ueʻi koe ʻe he leʻo vaivai ʻo e Laumālie Māʻoniʻoní ke ke “ʻalu ki” ha mēmipa pau ʻo e fāmilí mo e ngaahi kaungāmeʻa kuo nau mateuteu ke fanongo ki hoʻo fakamoʻoní. Tauʻatāina ki he meʻa ʻe lava ke ke ako mei he aʻusia ʻa Sioná ʻi hoʻo ako ʻi he uike ní, pea teuteu ke ke vahevahe ʻa e meʻa ʻokú ke akó mo kinautolu ʻokú ke akoʻí. Te ke lava foki ʻo lau ʻa e lea ʻa ʻEletā D. Todd Christofferson “Ko Hono Vahevahe e Pōpoaki ʻo hono Fakafoki Mai e Ongoongoleleí mo e Toetuʻú” ʻi hoʻo teuteu ke faiakó (Liahona, Mē 2020, 110–13).

ʻE lava ke ueʻi kitautolu ʻe he Laumālie Māʻoniʻoní ke tau vahevahe ʻa e ongoongoleleí mo kinautolu kuo teuteuʻi ke fanongo ki heʻetau ngaahi fakamoʻoní.

Ako Fakataha

Ke tokoni kiate kinautolu ʻokú ke akoʻí ke vahevahe ʻenau ngaahi ongó mei heʻenau ako e tohi ʻa Sioná ʻi he uike ní, te ke lava ʻo fakaʻaliʻali ha fakatātā ʻo Siona (vakai ki he lēsoni ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). Fakaafeʻi ke nau aleaʻi ʻa e meʻa ne nau ako fekauʻaki mo hono vahevahe ʻo e ongoongoleleí mei he ngaahi aʻusia ʻa Sioná. Te ke lava ʻo fakaafeʻi ke nau toe lau fakalelei ʻa e Siona 1 mo e 3 pea fehuʻi ange: Ko e hā ʻoku tau ako fekauʻaki mo hono vahevahe ʻo e ongoongoleleí mo kinautolu ʻoku hangē ʻoku ʻikai ke nau mateuteu ke liliú? Ko e hā ʻoku tau ako fekauʻaki mo e finangalo lelei ʻa e ʻOtuá ke fakamolemoleʻi ʻa kinautolu ʻoku fakatomalá? Ke ueʻi fakalaumālie ʻa e kau mēmipa ʻo hoʻo kalasí pe kōlomú ke nau vahevahe ʻa e ongoongoleleí, fakaʻaongaʻi ha foʻi ʻekitivitī ʻe taha pe lahi ange mei he ngaahi ʻekitivitī ko ʻení pe ko haʻo ʻekitivitī pē ʻaʻau.

• Ke maʻu ha ngaahi fakakaukau ki he founga ke vahevahe ai mo e niʻihi kehé ʻa e ongoongolelei ʻa e Fakamoʻuí, ʻe lava ke toe lau ʻe hoʻo kalasí pe kōlomú ʻa e ngaahi talanoa ko ʻeni ʻi he folofolá: Sione 4:3–26; Ngāue 16:25–33; ʻAlamā 19:14–18, 28–31. Te mou lava leva ʻo aleaʻi fakataha ʻa e ngaahi fehuʻi hangē ko ʻení: Naʻe mateuteu fēfē nai ʻa e kakai ʻi he ngaahi talanoa ko ʻení ke nau fanongo ki he pōpoaki ʻo e ongoongoleleí? Ko e hā e meʻa ʻokú ke fakatokangaʻi fekauʻaki mo e founga ne vahevahe ai ʻa e pōpoakí? ʻOkú ke pehē ko e hā nai ʻoku finangalo ai ʻa e Tamai Hēvaní mo Sīsū Kalaisi ke tau vahevahe ʻa e ongoongoleleí? Te mou lava leva ʻo aleaʻi fakakalasi pe fakakōlomu ʻa e meʻa ʻoku akoʻi ʻe he ngaahi talanoa ko ʻení fekauʻaki mo e founga ʻe lava ke tau vahevahe ai ʻa e ongoongoleleí ʻi he ʻaho ní.

• ʻE malava ke hoko ʻa hono lau ʻa e ngaahi sīpinga fakalaumālie ʻo hono vahevahe ʻe he niʻihi kehé ʻa e ongoongoleleí, ke fakalotolahiʻi ai ʻa e toʻu tupu ʻokú ke akoʻí ke nau fakahoko ʻa e meʻa tatau. Naʻe vahevahe ʻe ʻEletā D. Todd Christofferson ha ngaahi sīpinga ʻi heʻene pōpoaki “Ko Hono Vahevahe e Pōpoaki ʻo hono Fakafoki Mai e Ongoongoleleí mo e Toetuʻú.” ʻI he pōpoaki ko ʻení, naʻe akoʻi ai ʻe ʻEletā Kulisitofasoni ʻoku fie maʻu ha meʻa ʻe tolu ke fakalotoa ʻaki ʻetau fakaafe ke maʻu e ongoongoleleí: ko ʻetau ʻofá, ko ʻetau tā sīpingá, pea mo ʻetau fakaʻaongaʻi ʻo e Tohi ʻa Molomoná. Aleaʻi e ngaahi sīpinga ʻo hono vahevahe ʻo e ongoongoleleí ʻi he pōpoaki ko ʻení, pea fakaafeʻi ʻa kinautolu ʻokú ke akoʻí ke nau vahevahe mo ha ngaahi sīpinga kehe, ʻo kau ai ʻenau ngaahi aʻusia fakatāutahá. ʻOku fakatātaaʻi fēfē nai ʻe he ngaahi aʻusia ko ʻení ʻa e ngaahi meʻa ʻe tolu naʻe akoʻi ʻe ʻEletā Kulisitofasoní?

• Te ke tokoniʻi fēfē nai ke mahino kiate kinautolu ʻokú ke akoʻí ko hono vahevahe ko ia ʻo e ongoongoleleí ʻe lava pē ke fakanatula pea ʻikai fie maʻu ia ke fakailifia? Te ke ala fakaʻaliʻali ha ngaahi vitiō mei he “Ngaahi Maʻuʻanga Tokoni Poupoú” pea kole ki he toʻu tupú ke nau fakakaukau ki ha founga ʻe lava ke nau vahevahe ai ʻa e ongoongoleleí mo ha taha ʻoku nau ʻiloʻí. Ko e hā ha meʻa te tau lava ʻo fakahoko ke fakaafeʻi kinautolu ke nau haʻu ʻo mamata? Ko e hā ha ngaahi faingamālie ʻoku nau maʻu ke nau haʻu ai ʻo tokoní? Te tau tokoni fēfē nai ke nau ongoʻi ha loto-holi ke haʻu ʻo nofó? Ko e hā ha founga ʻe lava ke tau ʻai ai ʻa hono vahevahe ʻo e ongoongoleleí ko ha konga ʻo ʻetau moʻui fakaʻahó?

Ngāue ʻi he Tui

Poupouʻi e kau mēmipa ʻo e kalasí pe kōlomú ke nau fakalaulauloto mo lekooti ʻa e meʻa te nau fakahoko ke ngāueʻi ai e ngaahi ongo ne nau maʻu ʻi he ʻaho ní. ʻE lava ke nau vahevahe ʻenau ngaahi fakakaukaú, ʻo kapau te nau loto ki ai. Fakaafeʻi ke nau fakakaukau ki he founga ʻe fakamālohia ai ʻe heʻenau ngaahi ongo fakalaumālié ʻa honau vā fetuʻutaki mo e Tamai Hēvaní mo Sīsū Kalaisí.

Ngaahi Maʻuʻanga Tokoni Poupoú

• Carlos A. Godoy, “ʻOku ou Tui ki he Kau ʻĀngeló,” Liahona, Nōvema 2020, 86–88

Ko e Faiako ʻi he Founga ʻa e Fakamoʻuí

“ʻE meimei ke fakahoko ʻe he kakaí ha ngaahi liliu mahuʻinga ʻi heʻenau moʻuí ʻi he taimi ʻoku fakahoko ai e ngaahi liliu ko iá ʻi heʻenau tauʻatāina ke filí. ʻI hoʻo fakahoko ha ngaahi fakaafe ke ngāué, fakapapauʻi ʻokú ke fakaʻapaʻapaʻi e tauʻatāina ke fili ʻa kinautolu ʻokú ke akoʻí” (Ko e Faiako ʻi he Founga ʻa e Fakamoʻuí, 35).