26 Māʻasi

ʻE Ngāue Fakataha Fēfē e Kau Finemuí mo e Kau Talavoú ke Tokoni ʻi Hono Langa e Puleʻanga ʻo e ʻOtuá?

Mātiu 13; Luke 813

Fealeaʻaki Fakataha

Tataki ʻe ha mēmipa ʻo e kau palesitenisī fakakalasí pe fakakōlomú; fakafuofua ki ha miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kau Finemuí pe ko e Kaveinga ʻo e Kōlomu ʻo e Lakanga Taulaʻeiki Faka-ʻĒloné. Hili iá, tataki leva ha fealeaʻaki fekauʻaki mo e ngāue ʻo e fakamoʻuí mo e hakeakiʻí ʻo fakaʻaongaʻi ha fehuʻi ʻe taha pe lahi ange mei he ngaahi fehuʻi ʻi laló pe ngaahi fehuʻi pē ʻaʻau (vakai, Tohi Tuʻutuʻuni Fakakātoa, 10.2, 11.2). Palani ha ngaahi founga ke ngāueʻi ai e meʻa ne mou aleaʻí.

• Moʻui ʻaki e ongoongoleleí. Ko e hā ʻa e founga ʻoku tau maʻu ai ʻa e fiefiá ʻi he muimui kia Sīsū Kalaisí?

• Tokanga kiate kinautolu ʻoku faingataʻaʻiá. Ko hai ʻi hotau uōtí pe tukui koló ʻokú ne fie maʻu ʻetau tokoní? Te tau lava fēfē nai ʻo tokoniʻi kinautolu?

• Fakaafeʻi ʻa e tokotaha kotoa pē ke nau maʻu e ongoongoleleí. Te tau fetokoniʻaki fēfē nai ke mateuteu ki he ngāue fakafaifekaú?

• Fakatahaʻi ʻa e ngaahi fāmilí ke taʻengata. Te tau tokoni fēfē nai ki he ngaahi ngāue ʻa hotau uōtí ke fakahoko ʻa e hisitōlia fakafāmilí mo e ngāue fakatemipalé?

ʻI he fakaʻosinga ʻo e lēsoní, fakahoko e ngaahi meʻa ko ʻení, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kalasí pe kōlomú fekauʻaki mo e ngaahi palani mo e fakaafe naʻe fakahoko ʻi he lolotonga e fakatahá.

Akoʻi e Tokāteliné

Tataki ʻe ha taki kakai lalahi pe toʻu tupu; fakafuofua ki ha miniti ʻe 25–35

Teuteuʻi Fakalaumālie Koe

Naʻe akoʻi ʻe he Fakamoʻuí ʻʻi ha ngaahi talanoa fakatātā lahi ʻi he Mātiu 13, ha ngaahi moʻoni mahuʻinga fekauʻaki mo e puleʻanga ʻo e ʻOtuá pea mo ʻene tupulaki fakaofo ʻi hotau kuongá. ʻI he talanoa fakatātā ʻe ua ʻo e ngaahi talanoa fakatātā ko ʻení, naʻe ʻi ai ha meʻa siʻisiʻi mo faingofua naʻe iku ko ha meʻa maʻongoʻonga. Pea ko e ngaahi ngāue ia ʻo ha foha pe ʻofefine ʻo e ʻOtuá naʻe tokoni ke hoko ai ʻa e maná. Naʻe tupu ha kiʻi tengaʻi mūsita ʻo hoko ko ha fuʻu ʻakau lahi feʻunga “ke tuʻu [ai] ʻa e fanga manu ʻo e ʻataá ʻi hono ngaahi vaʻá” ʻi he taimi “naʻe tō [ai] ʻe ha tangata ʻi heʻene ngoué” (Mātiu 13:31–32). Pea naʻe fakatupu ʻe he lēvaní ha foʻi tou fōlahi ʻi he taimi “naʻe toʻo [ai] ʻe ha fefine, ʻo ʻai [ia] ki [ha] fua mahoaʻa ʻe tolu” (Mātiu 13:33). ʻOku tupulaki mo mafola e puleʻanga ʻo e ʻOtuá ʻi hotau kuongá koeʻuhí ko Hono Kāingalotú—kau ai ʻa e kau finemuí mo e kau talavou—ʻoku nau ngāue fakataha mo Ia ke langa hake iá.

Makehe mei hono lau ʻo e Mātiu 13 mo e Luke 8; 13 ʻi he uike ní, ʻe lava ke mou lau e pōpoaki ʻa Palesiteni M. Lāsolo Pālati ko e “Kakai Tangata mo Fafine ʻi he Ngāue ʻa e ʻEikí” (Liahona, ʻEpeleli 2014, 2–5) mo e pōpoaki ʻa Palesiteni Sini B. Pingihemi “Faaitaha ʻi Hono Fakahoko e Ngāue ʻa e ʻOtuá” (Liahona, Mē 2020, 60–63).

Ako Fakataha

Ke tokoni ki he toʻu tupu ʻokú ke akoʻí ke nau sioloto ki he ngaahi talanoa fakatātā ʻi he Mātiu 13, ʻe lava ke ke fakaʻaliʻali ha ngaahi fakatātā ʻo ha tengaʻi mūsita, lēvani (hangē ko e ʻīsité), mataʻitofe, mo ha kupenga toutai. ʻE lava ke toe vakaiʻi ʻe he toʻu tupú ʻa e Mātiu 13:31–33, 45–48 pea vahevahe ʻa e meʻa ʻoku akoʻi kiate kinautolu ʻe he ngaahi talanoa fakatātā takitaha ko ʻení fekauʻaki mo e puleʻanga ʻo e langí. Te tau fakaʻaongaʻi fēfē nai e ngaahi pōpoaki ʻo e ngaahi talanoa fakatātā ko ʻení ʻi heʻetau moʻuí? Ko e hā ʻoku tau fakahoko ke tokoni ki he ʻEikí ke langa Hono puleʻangá? Ko ha ngaahi ʻekitivitī ʻeni ʻe niʻihi ʻe lava ʻo tokoni ʻi he fealēleaʻakí.

• Kimuʻa pea kamata e fakatahaʻangá, fakaafeʻi e kau mēmipa ʻo e kalasí pe kōlomú ke ako fekauʻaki mo e houʻeiki fafine pe tangata ʻoku nau hoko pe ne nau hoko ko ha sīpinga ʻo e tokoni ki hono langa e puleʻanga ʻo e ʻOtuá. ʻE lava ke maʻu e kakai ko ʻení mei he folofolá (vakai, “Ngaahi Maʻuʻanga Tokoni Poupoú”), mei he hisitōlia ʻo e Siasí, pe mei heʻenau moʻuí. Fakaafeʻi e toʻu tupú ke vahevahe e meʻa naʻa nau akó. Ko e hā ha ngaahi founga kuo tokoniʻi ai ʻe he kakai ko ʻení ʻa e ʻEikí ke langa Hono puleʻangá? Te tau lava fēfē ʻo muimui ki heʻenau sīpingá?

• Kapau te ke akoʻi e kau talavoú, fakaafeʻi kinautolu ke nau toe vakaiʻi e pōpoaki ʻa Palesiteni Poni L. ʻOsikasoni ko e “Kau Finemui ʻi he Ngāué” (Liahona, Mē 2018, 36–38) pea fekumi mo vahevahe ha ngaahi founga ʻoku tokoni ai e kau finemuí ki he ngāue ʻa e ʻOtuá ʻo e fakamoʻuí mo e hakeakiʻí. ʻE lava ke fai ʻe he kau finemuí ha fekumi tatau ʻi he pōpoaki ʻa Brother Takilesi D. Holomesi ko e “Meʻa ʻOku Fie Maʻu ke Mahino ki he Tokotaha Maʻu Lakanga Taulaʻeiki Faka-ʻĒlone Kotoa Peé” (Liahona, Mē 2018, 50–53). ʻOku faitatau fēfē nai e ngaahi fatongia ʻo e kau finemuí mo e kau talavoú? Te tau lava fēfē ʻo ngāue fakataha lelei ange ʻi heʻetau fai e ngāue ʻa e ʻOtuá?

• Ke tokoni ke mahino ki he toʻu tupú e founga ʻoku ngāue fakataha ai e houʻeiki fafiné mo e houʻeiki tangatá ke langa hake e puleʻanga ʻo e ʻOtuá, te ke lava ʻo hiki ha ngaahi fehuʻi hangē ko ʻení ʻi he palakipoé : Ko e hā ʻoku fie maʻu ai ʻe he ʻOtuá ke ngāue fakataha ʻa e houʻeiki fafiné mo e tangatá ke tokoni ʻi hono langa hake Hono puleʻangá? ʻE lava fēfē ke ngāue fakataha lelei ange ʻa e kau palesitenisī fakakalasí mo fakakōlomú? ʻE lava ke toe vakaiʻi ʻe he toʻu tupú ha ngaahi konga ʻo e pōpoaki ʻa Palesiteni M. Lāsolo Pālati ko e “Kakai Tangata mo Fafine ʻi he Ngāue ʻa e ʻEikí” pe ko e pōpoaki ʻa Sini B. Pingihemi ko e “Faaitaha ʻi hono Fakahoko e Ngāue ʻa e ʻOtuá,” tautautefito ki he konga ʻoku kamata ʻaki e “Ko e hā ʻene ʻuhinga kiate koe mo aú?” ʻE lava ke fevahevaheʻaki ʻe he toʻu tupú e ngaahi tali ʻoku nau maʻu ki he ngaahi fehuʻí.

• Ke tokoni ke mahino ki he toʻu tupú e founga te nau lava ai ʻo tokoni ke langa e puleʻanga ʻo e ʻOtuá, ʻe lava ke ke kole ange ki he palesiteni ʻo e kalasí pe kōlomú ke ʻoatu ha ngaahi meʻa naʻe aleaʻi ʻi he ngaahi fakataha alēlea ʻa e toʻu tupu ʻo e uōtí ʻoku feʻunga ke vahevahe. Fakaafeʻi e kau mēmipa ʻo e kalasí pe kōlomú ke vahevahe ha ngaahi fakakaukau fekauʻaki mo e founga te nau lava ai ʻo tokoni ʻi he palopalema ko ʻení. Ko e hā ʻoku tau fakahoko ʻi hotau ngaahi ʻapí, uōtí mo e tukui koló ke tokoni ʻi he ngāue ʻa e ʻOtuá? ʻE lava ke ke kole ki he palesiteni ʻo e kalasí pe kōlomú ke ʻoatu ha ngaahi meʻa naʻe aleaʻi ʻi he ngaahi fakataha alēlea fakauooti ʻa e toʻu tupú ʻoku feʻunga ke vahevahé. Fakaafeʻi e kau mēmipa ʻo e kalasí pe kōlomú ke vahevahe ha ngaahi fakakaukau fekauʻaki mo e founga te nau lava ai ʻo tokoni ʻi he ngaahi palopalemá.

ʻOku fie maʻu ʻe he ʻOtuá ʻa e houʻeiki fafiné mo e tangatá ke nau ngāue fakataha ʻi hono langa hake Hono puleʻangá.

Ngāue ʻi he Tui

Poupouʻi e kau mēmipa ʻo e kalasí pe kōlomú ke nau fakalaulauloto mo lekooti ʻa e meʻa te nau fakahoko ke ngāueʻi ai e ngaahi ongo ne nau maʻu ʻi he ʻaho ní. ʻE lava ke nau vahevahe ʻenau ngaahi fakakaukaú, ʻo kapau te nau loto ki ai. Fakaafeʻi ke nau fakakaukau ki he founga ʻe fakamālohia ai ʻe heʻenau ngaahi ueʻi fakalaumālié ʻa honau vā fetuʻutaki mo e Tamai Hēvaní mo Sīsū Kalaisí.

Ngaahi Maʻuʻanga Tokoni Poupoú

• Luke 2:21–38 (Simione mo ʻAna); Ngāue 9:36–41 (Tāpaita mo Toakasi); Mōsaia 18:1–17 (ʻAlamā); Mōsaia 28:1–3 (ngaahi foha ʻo Mōsaiá); ʻAlamā 8:18–27 (ʻAmuleki); ʻAlamā 19:15–17 (ʻĀpisi); Tokāteline mo e Ngaahi Fuakava 25:5–8 (ʻEma Sāmita); Moses 5:10–12 (ʻĀtama mo ʻIvi)

Ko e Faiako ʻi he Founga ʻa e Fakamoʻuí

ʻI he taimi ʻokú ke fai ai ha fakaafe ke moʻui ʻaki ha tefitoʻi moʻoni pau, tokoni ki he kau akó ke nau ʻiloʻi e ngaahi tāpuaki kuo talaʻofa ʻe he ʻOtuá ki he niʻihi ʻoku nau moʻui ʻaki e tefitoʻi moʻoni ko iá.