Ko e hā ʻa Sīsū kia Mele Makitaliné

9 ʻEpeleli

Te u Fakamālohia Fēfē ʻEku Fakamoʻoni ki he Toetuʻu ʻa Sīsū Kalaisí?

Toetuʻú

fakaʻilonga fealēleaʻaki fakatahá

Fealeaʻaki Fakataha

Tataki ʻe ha mēmipa ʻo e kau palesitenisī fakakalasí pe fakakōlomú; fakafuofua ki ha miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kau Finemuí pe ko e Kaveinga ʻo e Kōlomu ʻo e Lakanga Taulaʻeiki Faka-ʻĒloné. Hili iá, makehe mei he fealeaʻaki fekauʻaki mo e ngaahi fiemaʻu pau ʻa e kalasí pe kōlomú, ʻe lava ke mou aleaʻi ha ngaahi ongo fakalaumālie mo ha ngaahi kaveinga mei he konifelenisi lahí. ʻE lava ke tokoni atu e ngaahi fehuʻi ko ʻení.

• Ko e hā ha ngaahi kaveinga pe pōpoaki ne makehe kiate kitautolú? Ko e hā e meʻa naʻá ne fakamālohia ʻetau tui kia Sīsū Kalaisí?

• Ko e hā e meʻa naʻá ne fakamālohia ʻetau fakamoʻoni ki he kau palōfita moʻuí? Ko e hā ne tau ongoʻi ne ueʻi kitautolu ke tau fakahoko koeʻuhí ko e meʻa ne tau ako pe ongoʻí?

• Ko e hā ʻoku fie maʻu ke tau fakahoko ko ha kalasi pe kōlomu ke tau ngāueʻi ai e faleʻi ne tau fanongoa ʻi he konifelenisi lahí?

ʻI he fakaʻosinga ʻo e lēsoní, fakahoko e ngaahi meʻa ko ʻení, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kalasí pe kōlomú fekauʻaki mo e ngaahi palani mo e fakaafe naʻe fakahoko ʻi he lolotonga e fakatahá.

fakaʻilonga akoʻi e tokāteliné

Akoʻi e Tokāteliné

Tataki ʻe ha taki kakai lalahi pe toʻu tupu; fakafuofua ki ha miniti ʻe 25–35

Teuteuʻi Fakalaumālie Koe

ʻOku fakamoʻoniʻi ʻe he kau ʻAposetolo ʻi he kuonga muʻá mo onopōní ʻoku moʻui ʻa Sīsū Kalaisi! Naʻá Ne mamahi pea pekia ʻi he kolosí, naʻe telio Ia ʻi ha fonualoto, pea ʻi he ʻaho hono tolú naʻá Ne toe tuʻu hake. Koeʻuhí naʻá Ne ikunaʻi ʻa e maté, te tau toetuʻu kotoa pē. Naʻe ʻomi ʻe he Toetuʻu ʻa e Fakamoʻuí ʻa e talaʻofa ʻo e moʻui taʻe-faʻa-maté mo e ʻamanaki lelei ki he moʻui taʻengatá. Ko e talaʻofá ni ʻoku ʻi he uho ia ʻo e Toetuʻú.

ʻI heʻetau hoko ko e kāingalotu ʻo e Siasi ʻo e Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku tau maʻu ai ha ʻuhinga makehe ke tui naʻe toetuʻu ʻa Sīsū Kalaisi. Makehe mei he kau fakamoʻoni ʻo e kakai mei he kuonga ʻo e Fuakava Foʻoú, ʻoku tau maʻu e ngaahi fakamoʻoni ʻa e kakai naʻe moʻui ʻi he kuonga ʻo e Tohi ʻa Molomoná, ʻa e palōfita ko Siosefa Sāmitá, mo ʻetau kau palōfita mo e kau ʻaposetolo moʻuí. Te tau lava foki ʻo maʻu ha fakamoʻoni fakataautaha ki he Toetuʻú ʻo fakafou ʻi he Laumālie Māʻoniʻoní. Te ke lava fēfē ʻo tokoniʻi e toʻu tupú ke fakamālohia ʻenau fakamoʻoni naʻe toetuʻu ʻa Sīsū Kalaisí? ʻI hoʻo teuteú, ʻe lava ke ke ako e pōpoaki ʻa Sisitā Leina I. ʻApeto “ʻOku ʻIkai ha Mālohi ʻo e Faʻitoká” (Liahona, Mē 2021, 85–86) mo e pōpoaki ʻa ʻEletā S. Maʻake Palama “ʻE Liliu ʻEtau Mamahí ko e Fiefia” (Liahona, Mē 2021, 88–89).

Ako Fakataha

Te ke lava ʻo kamataʻi ha fealēleaʻaki fekauʻaki mo e Toetuʻu ʻa Sīsū Kalaisí ʻaki hano fakaafeʻi e toʻu tupú ke vahevahe ʻa e meʻa kuo nau fai ʻi he uiké ni ke fakamanatu ʻaki ʻa e Toetuʻú. Te ke lava ʻo ʻeke ange pe ko e hā kuo nau ako pe fakahoko fakafoʻituitui pe mo honau ngaahi fāmilí ke fakamālohia ʻenau fakamoʻoni ki he Toetuʻu ʻa e Fakamoʻuí. ʻOku ʻoatu ʻi lalo ha ngaahi ʻekitivitī ke tokoni ki he kau mēmipa ʻo hoʻo kalasí pe kōlomú ke fakamālohia ʻenau fakamoʻoní.

• Aleaʻi fakataha ʻa e ʻuhinga ʻoku mahuʻinga ai e kau fakamoʻoní ʻi he moʻui fakaʻahó. Hili iá pea hiki ha lisi ki he lahi taha ʻe lava ʻo e kau fakamoʻoni ki he Toetuʻu ʻa Sīsuú ke fakakaukau ki ai hoʻo kalasí pe kōlomú, . ʻE lava leva ke fili ʻe he tokotaha takitaha ha potufolofola mei he konga ʻoku lisi atu ʻi he “Ngaahi Maʻuʻanga Tokoni Poupoú” ke ako fekauʻaki mo ha niʻihi ʻo e kau fakamoʻoni ko ʻení. Fakaafeʻi e kau mēmipa ʻo e kalasí pe kōlomú ke vahevahe e meʻa ne nau akó. Poupouʻi kinautolu ke vahevahe foki e founga ʻoku fakamālohia ai ʻe he kau fakamoʻoni ko ʻení ʻenau fakamoʻoni ki he Toetuʻu ʻa Sīsū Kalaisí.

• Ko e hā ha ngaahi tūkunga te tau lava ai ʻo vahevahe ʻetau fakamoʻoni ki he Toetuʻu ʻa e Fakamoʻuí? Kapau kuo maʻu ʻe ha taha ʻi he kalasí pe kōlomú ha aʻusia ʻi haʻane talanoa mo ha taha fekauʻaki mo e Toetuʻu ʻa e Fakamoʻuí, fakakaukau ke fakaafeʻi ia ke vahevahe ʻa e aʻusia ko iá. Poupouʻi e kau mēmipa ʻo e kalasí pe kōlomú ke nau fakakaukau ki he founga te nau tokoni ai ke mahino ki ha taha ʻa e Toetuʻu ʻa Sīsū Kalaisí pea maʻu ha fakamoʻoni te tau lava kotoa ʻo toetuʻu koeʻuhí ko Ia. Ko e hā ha ngaahi moʻoni mahuʻinga fekauʻaki mo e Toetuʻu ʻa e kakai kotoa pē ʻe mahuʻinga ke akoʻi ki he niʻihi kehé? ʻE lava ke maʻu ʻe he kau mēmipa ʻo e kalasí pe kōlomú ʻa e ngaahi talí ʻi he folofolá ʻi he “Ngaahi Maʻuʻanga Tokoni Poupoú.”

• ʻI he taimi naʻe fakahā ai ʻe he kau ʻAposetoló kia Tōmasi kuo nau mamata ki he Fakamoʻui kuo toetuʻú, naʻe pehē ʻe Tōmasi he ʻikai ke ne tui kae ʻoua kuó ne mamata tonu. Naʻe folofola ʻa Sīsū kia Tōmasi kimui ange, “ʻOku monūʻia ʻa kinautolu ʻoku ʻikai mamata, kae tuí.” Toe vakaiʻi fakataha e aʻusia ʻa Tōmasi ʻoku maʻu ʻi he Sione 20:24–29. Kuo tāpuekina fēfē kitautolu ʻi heʻetau tui ki he Fakamoʻuí taʻe te tau mamata kiate Iá? Te tau lava fēfē ʻo fakamālohia ʻetau tui kia Sīsū Kalaisí? Fakaafeʻi e kau mēmipa ʻo e kalasí pe kōlomú ke nau fekumi ʻi ha pōpoaki ʻe taha pe lahi ange mei he kau taki ʻo e Siasí ʻi he “Ngaahi Maʻuʻanga Tokoni Poupoú” pea vahevahe ʻa e ʻuhinga ʻoku nau houngaʻia ai ʻi he Toetuʻu ʻa e Fakamoʻuí. ʻOku kaunga fēfē ʻetau ʻilo te tau toetuʻú ki he anga ʻetau fakakaukau ki hotau sinó pea mo e ngaahi fili ʻoku tau fakahokó?

Koeʻuhí Ke Mou ʻIlo, tā fakatātaaʻi ʻe Gary L. Kapp

Koeʻuhí Ke Mou ʻIlo, tā fakatātaaʻi ʻe Gary L. Kapp

Ngāue ʻi he Tui

Poupouʻi e kau mēmipa ʻo e kalasí pe kōlomú ke nau fakalaulauloto mo lekooti ʻa e meʻa te nau fakahoko ke ngāueʻi ai e ngaahi ongo ne nau maʻu ʻi he ʻaho ní. ʻE lava ke nau vahevahe ʻenau ngaahi fakakaukaú, ʻo kapau te nau loto ki ai. Fakaafeʻi ke nau fakakaukau ki he founga ʻe fakamālohia ai ʻe heʻenau ngaahi ueʻi fakalaumālié ʻa honau vā fetuʻutaki mo e Tamai Hēvaní mo Sīsū Kalaisí.

Ngaahi Maʻuʻanga Tokoni Poupoú

• Mātiu 28:1–10; Luke 24:13–35; Luke 24:36–48; Sione 20:11–29; 1 Kolinitō 15:3–8; 3 Nīfai 11:1–15; ʻEta 12:38–39; Tokāteline mo e Ngaahi Fuakava 76:19–24 (Kau Fakamoʻoni ʻo e Toetuʻú)

• 2 Nīfai 9:10–15; Mōsaia 16:8–11; ʻAlamā 11:42–45; ʻAlamā 40:23–25; Tokāteline mo e Ngaahi Fuakava 93:33–34 (Ngaahi potufolofola ʻokú ne akoʻi ʻe Toetuʻu ʻa e kakai kotoa peé)

• D. Todd Christofferson, “Ko e Toetuʻu ʻa Sīsū Kalaisí,” Liahona, Mē 2014, 111–14

• Gerrit W. Gong, “Hosana mo Haleluʻia—Ko e Sīsū Kalaisi Moʻuí: Ko e ʻElito ʻo e Fakafoki Mai ʻo e Ongoongoleleí mo e Toetuʻú,” Liahona, Mē 2020, 52–55

• Reyna I. Aburto, “ʻOku ʻIkai ha Mālohi ʻo e Faʻitoká,” Liahona, Mē 2021, 85–86

• S. Mark Palmer, “ʻE Liliu ʻEtau Mamahí ko e Fiefia,” Liahona, Mē 2021, 88–89

• ʻE lava ke maʻu e ngaahi vitioó fekauʻaki mo e Tortuʻú ʻi he ChurchofJesusChrist.org/study/video/easter-videos.

Ko e Faiako ʻi he Founga ʻa e Fakamoʻuí

ʻE lava ke maʻu ʻe he tokotaha ko ia ʻokú ne ʻilo e founga hono maʻu e fakaʻuhingá mei he folofolá pea tafoki fakaʻaho ki aí, ʻo maʻu ha tataki fakalangi ke ikunaʻi ha faʻahinga faingataʻa pē. ʻI hoʻo faiakó, fai ha ngaahi fehuʻi ʻe fie maʻu ke kumi ai ʻe he kau akó e ngaahi talí mei he folofolá.