Ua Faaali atu Iesu ia Maria le Makatala

9 Aperila

E Mafai Faapefea Ona Ou Faamalosia La‘u Molimau i le Toetu o Iesu Keriso?

Eseta

aikona o le fefautuaai faatasi

Fefautuaai Faatasi

Taitaiina e se uso o le au peresitene o le korama po o le vasega; pe a ma le 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona, i le faaopoopo atu i le fefautuaai faatasi e faatatau i pisinisi patino a le korama po o le vasega, atonu e te manao e talanoaina uunaiga ma autu mai le konafesi aoao. Atonu o le a fesoasoani fesili nei.

• O a autu po o savali na tulagaese ia i tatou? O a mea na faamalosia ai lo tatou faatuatua ia Iesu Keriso?

• O a mea na faamalosia ai a tatou molimau e uiga i perofeta soifua? O a ni mea na tatou lagona le musuia e fai ona o mea na tatou aoaoina pe lagonaina?

• O a ni mea e tatau ona tatou faia o se vasega po o se korama e manatua ma faatino ai fautuaga na tatou faalogo i ai i le konafesi aoao?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

aikona o le aoao atu le aoaoga faavae

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

Ua molimau uma aposetolo anamua ma ona po nei o loo soifua Iesu Keriso! Sa puapuagatia o Ia ma maliu i luga o le satauro, sa tanumia o Ia i se tuugamau, ma o le aso lona tolu na Ia toetu mai ai. Aua ua Ia manumalo i le oti, o le a tatou toe tutu uma . O le Toetu o le Faaola na aumaia ai le folafolaga o le tino ola pea ma le faamoemoe o le ola e faavavau. O lenei folafolaga o loo i le fatu o le Eseta.

I le avea ai ma tagata o Le Ekalesia a Iesu Keriso o le Au Paia o Aso e Gata Ai, ua ia i tatou se mafuaaga taua e talitonu ai e faapea na toetu Iesu Keriso. E faaopoopo atu i molimau a tagata mai taimi o le Feagaiga Fou, ua ia i tatou molimau a tagata sa ola i taimi o le Tusi a Mamona, o le Perofeta o Iosefa Samita, ma o tatou perofeta ma aposetolo soifua. E mafai foi ona tatou maua se molimau patino o le Toetu e ala i le Agaga Paia. E mafai faapefea ona e fesoasoani i le autalavou e faamalosia a latou molimau faapea na toetu Iesu Keriso? A o e sauniuni, mafaufau e suesue i le savali a Sister Reyna I. Aburto “E Leai se Manumalo o le Tuugamau” (Liahona, Me 2021, 85–86) ma le savali a Elder S. Mark Palmer “O Le a Liua Lo Tatou Faanoanoa i le Olioli” (Liahona, Me 2021, 88–89).

Aoao Faatasi

E mafai ona e amataina se talanoaga e uiga i le Toetu o Iesu Keriso e ala i le valaauliaina o le autalavou e faasoa mai mea sa latou faia i lenei vaiaso e faamanatu ai le Eseta. E mafai ona e fesili atu ia i latou po o a mea na latou suesueina pe faia taitoatasi pe faatasi ma o latou aiga e faamalolosia ai a latou molimau i le Toetu o le Faaola. O loo i lalo ni gaoioiga e fesoasoani ai i tagata o lau vasega po o le korama e faamalolosia a latou molimau.

• Talanoa faatasi pe aisea e taua ai molimau i le olaga i aso uma. Ona fai lea o se lisi o molimau e toatele o le Toetu o Iesu e mafai ona mafaufau i ai lau vasega po o le korama. Ona mafai lea e tagata taitoatasi ona filifili se mau o loo lisiina i le “Punaoa Lagolago” e aoao ai e uiga i nisi o nei molimau. Valaaulia tagata o le vasega po o le korama e faasoa mai ni mea sa latou aoaoina. Fautuaina foi i latou e faasoa mai pe faapefea e nei molimau ona faamalolosia a latou molimau i le Toetu o Iesu Keriso.

• O a nisi o tulaga e mafai ai ona tatou faasoa atu a tatou molimau i le Toetu o le Faaola? Afai e i ai se tasi i le vasega po o le korama na i ai se aafiaga i le talanoa atu i se tasi e uiga i le Toetu o le Faaola, mafaufau e valaaulia o ia e faasoa mai lena aafiaga. Uunaia tagata o le vasega po o le korama e mafaufau pe faapefea ona latou fesoasoani i se tasi ia malamalama i le Toetu o Iesu Keriso ma maua se molimau e faapea, ona o Ia ua mafai ai ona tatou toetutu uma. O a upumoni taua e uiga i le Toetutu o tagata uma o le a taua ona aoao atu i isi? E mafai e tagata o le vasega po o le korama ona maua tali i tusitusiga paia i le “Punaoa Lagolago.”

• Ina ua ta‘u atu e Aposetolo ia Toma sa latou vaai i le Faaola toetu, sa fai atu Toma o le a ia le talitonu sei vagana ua ia vaai moni ia lava. Mulimuli ane na tau atu ai e Iesu ia Toma “Amuia i latou o e talitonu ae lei vaai, ae talitonu mai pea.” Toe faamanatu faatasi le aafiaga o Toma o loo maua i le Ioane 20:24–29. Na faapefea ona faamanuiaina i tatou mo le talitonu i le Faaola e aunoa ma le vaai ia te Ia? E mafai faapefea ona faamalosia lo tatou talitonu ia Iesu Keriso? Valaaulia tagata o le vasega po o le korama e saili se savali se tasi pe sili atu mai taitai o le Ekalesia i le “Punaoa Lagolago” ma faasoa mai pe aisea latou te faafetai ai mo le Toetu o le Faaola. E faapefea e lo tatou malamalama o le a tatou toetutu ona aafia ai le ala tatou te mafaufau ai e uiga i o tatou tino ma faaiuga tatou te faia?

Ina ia Outou Iloa, saunia e Gary L. Kapp

Ina ia Outou Iloa, saunia e GaryL. Kapp

Faatino i le Faatuatua

Ia uunai tagata o le vasega po o le korama e manatunatu ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe o le a faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• Mataio 28:1–10; Luka 24:13–35; Luka 24:36–48; Ioane 20:11–29; 1 Korinito 15:3–8; 3 Nifae 11:1–15; Eteru 12:38–39; Mataupu Faavae ma Feagaiga 76:19–24 (O Molimau o le Toetu)

• 2 Nifae 9:10–15; Mosaea 16:8–11; Alema 11:42–45; Alema 40:23–25; Mataupu Faavae ma Feagaiga 93:33–34 (O mau o loo aoao mai ai e uiga i le Toetutu o tagata uma)

• D. Todd Christofferson, “O Le Toetu o Iesu Keriso,” Liahona, Me 2014, 111-14.

• (Gerrit W. Gong, “Osana ma Aleluia—O Le Iesu Keriso Soifua: O Le Fatu lea o le Toefuataiga ma le Eseta,” Liahona, Me 2020, 52-55

• Reyna I. Aburto, “E Leai se Manumalo o le Tuugamau,” Liahona, Me 2021, 85-86

• S. Mark Palmer, “O Lo Tatou Faanoanoa o le a Liua i le Olioli,” Liahona, Me 2021, 88–89

• E mafai ona maua vitio o le Eseta i le ChurchofJesusChrist.org/study/video/easter-videos.

Aoao Atu i le Ala a le Faaola

O se tagata e iloa pe faapefea ona sili le faauigaga mai tusitusiga paia ma faitau i ai i aso uma o le a mafai ona maua le taitaiga paia e faatoilalo ai soo se luitau. Ao e aoao atu, fai ni fesili e manaomia ai e le tagata aoao ona saili tali i tusitusiga paia.