Samaria Agalelei, saunia e Annie Henrie Nader

23 Aperila

E Mafai Faapefea Ona Ou Faaali Atu le Alofa Faateleina ia i Latou o siomia Au?

Mataio 18; Luka 10

Fefautuaai Faatasi

Taitaiina e se uso o le au peresitene o le korama po o le vasega; pe a ma le 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitaia lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni a oe lava fesili (tagai i le Tusitaulima Aoao, 10.2, 11.2, Fuafua ni auala e faatino ai mea tou te talanoaina.

• Ola i le talalelei. O a ni aafiaga lata mai nei ua tatou latalata atili atu ai i le Tama Faalelagi ma Iesu Keriso?

• Tausia o i latou e lē tagolima. O i ai se tasi na siitia mai talu ai nei i le tatou uarota pe faatoa auai i le Ekalesia? E faapefea ona tatou fesoasoani ia i latou ia lagona le taliaina?

• Valaaulia tagata uma ia talia le talalelei. O i ai ni gaoioiga o loma nei e mafai ona tatou valaaulia ai a tatou uo e auai ai?

• Tuufaatasia o aiga mo le faavavau. O a ni taumafaiga e mafai ona tatou faia e faamaumau ai a tatou talafaasolopito patino?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

Ina ua uma ona aoao atu e Iesu se “loia faapitoa” i le taua o poloaiga sili e lua—alofa i le Atua ma le alofa i o tatou tuaoi—sa fesili le loia, “O ai lo‘u tuaoi?” (tagai i le Luka 10:25–29; Mataio 22:35–40). I le tali atu i ai, sa faasoa mai ai e le Faaola se faataoto e uiga i se Samaria o le sa lamatia lona ola e tausi se tagata Iutaia na manu‘a, ave le tagata i se malutaga ina ia tausia, ma totogi le tau mo lona tausiga ia toe manuia ai. E lei taulai atu le Samaria i eseesega i le va o ia lava ma le tagata, o le sa manatu i ai o se fili e ona tagata, pe faamasinoina o ia pe sue ni mafuaaga e le fesoasoani ai. Sa ia auauna atu i le tagata sa manaomia le fesoasoani, e ui lava i faigata patino ma le ositaulaga, ma faaalia ai le alofa mo le tagata ma mo le Atua. A o e mafaufau loloto i aoaoga a le Faaola i le Luka 10:25–37, mafaufau i le uiga moni o le “alofa … i le lua te tuaoi e pei o oe lava ia te oe” (fuaiupu 27).

E faapefea ona e fesoasoani ia i latou o loo e aoaoina ia malamalama afai latou te auauna atu ia i latou o siomia i latou, o loo latou faaalia lo latou alolofa mo le Atua? O le a se mea e ono musuia ai i latou e alolofa ma auauna atu i isi? A o e sauniuni, e mafai ona e iloiloina le savali a Peresitene Russell M. Nelson “O Le Poloaiga Sili Lona Lua” (Liahona, Nov. 2019, 96–100).

Aoao Faatasi

Ina ia amata se talanoaga e uiga i le faaalia o le alofa sili atu mo i latou o siomia i tatou, e mafai ona e fai atu i tagata o le vasega po o le korama e faasoa mai mea sa latou aoaoina e uiga i le alofa atu i isi mai le faataoto i le Samaria agalelei, o loo maua i le Luka 10:25–37. O le a se mea ua tatou aoaoina e uiga i le sootaga i le va o poloaiga sili muamua ma le lona lua mai le Luka 10:27 ma le saunoaga a Peresitene Dallin H. Oaks i le “Punaoa Lagolago”? O manatu nei e mafai ona fesoasoani ia te oe e faaauau ai se talanoaga e uiga i le faaalia o le alofa sili atu ia i latou o siomia i tatou.

• O Iesu Keriso o lo tatou faataitaiga sili o le faaalia o le alofa mo le Atua e ala i le auauna atu i isi, ma o le a musuia tagata o le vasega po o le korama e ala i le suesueina o Lana faataitaiga. Valaaulia tagata taitoatasi e mafaufau i le soifuaga faaletino o Iesu Keriso ma filifili se aafiaga mai Lona soifuaga e faaalia ai Lona alofa tele mo isi tagata. Fai atu i tagata taitoatasi e faasoa mai le aafiaga na latou filifilia, faatasi ai ma le mafuaaga e taua ai ia i latou. Valaaulia i latou o loo e aoaoina e mafaufau i se auala se tasi latou te mananao e mulimuli ai i le faataitaiga a le Faaola o le alofa. E mafai foi ona latou faasoa mai o latou manatu e uiga i se tasi latou te iloa e mulimuli i lenei faataitaiga.

• Faasoa ma talanoaina ma tagata o le vasega po o le korama le saunoaga a Peresitene Russell M. Nelson loo maua i le “Punaoa Lagolago.” E mafai ona e valaaulia tagata o le vasega po o le korama e iloilo se tasi pe sili atu o savali o le konafesi aoao o loo ta‘ua i lenei otootoga, ma vaavaai mo aoaoga e mafai ona taiala ai i tatou i a tatou taumafaiga e alolofa atu i isi. Atonu latou te taulai atu i mea nei: o faataitaiga o auala e mafai ona tatou auauna atu ai mai le “O Le Poloaiga Sili Lona Lua” saunia e Peresitene Nelson; vaega I,II, ma leVI i le savali a Peresitene Oaks “Ola Faatasi ma Alolofa atu i Isi e Eseese o Tatou Talitonuga”; ma le tala e uiga i lapiti ma fautuaga i le autalavou mai le “E Fusia Faatasi Loto” saunia e Elder Gary E. Stevenson. E mafai foi ona outou faitau faatasi le Mosaea 2:17 ma le Moronae 7:45–48. Atonu e aoga le tusi o aoaoga na talanoaina e le autalavou i luga o le laupapa. Ona mafai lea e le vasega po o le korama ona fefautuaai faatasi e uiga i ni auala patino e mafai ona latou faaaogaina lelei ai nei aoaoga i a latou sootaga ma tagata o aiga, ma uo, ma i totonu o o latou nuu, e tusa lava pe foliga mai e faigata ona alolofa i tagata.

• O taumafaiga a tagata o le vasega po o le korama i le galuega o le faaolataga ma le faaeaga o le a sili atu ona anoa ma olioli pe a musuia i latou e le alofa. Ina ia fesoasoani ia i latou ia iloa le auala e faaosofia ai vaega taitasi o le galuega o le faaolataga ma le faaeaga (tagai i le Tusitaulima Aoao, 1.2) e faaosofia e ala i le alofa, tusi vaega e fa i luga o le laupapa. Ona fai atu lea i le autalavou e talanoaina pe mafai faapefea e le i ai o se loto e tumu i le alofa mo isi ona suia le ala e latou te auai ai i vaega taitasi. Atonu e i ai ni o latou aafiaga mai o latou lava olaga po o olaga o isi e mafai ona latou faasoa atu.

Na aoao mai e Peresitene Nelson “A tatou alolofa i le Atua ma o tatou loto atoa, Na te liliu atu o tatou loto i le tulaga manuia o isi.”

Faatino i le Faatuatua

Ia uunai tagata o le vasega po o le korama e manatunatu ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe o le a faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• Dallin H. Oaks, “Ola Faatasi ma Alolofa atu i Isi e Eseese o Tatou Talitonuga,” Liahona, Nov. 2014, 25-28

• Gary E. Stevenson, “E Lalagaina Faatasi Loto,” Liahona, Me 2021, 19-23.

• “A Good Samaritan,” “The Greatest Commandment” (vitio), ChurchofJesusChrist.org

• Na aoao mai Peresitene Dallin H. Oaks: “O lo tatou naunau e tausia [le] poloaiga lona lua e le tatau ona mafua ai ona tatou faagalo le muamua, ia alofa i le Atua ma o tatou loto, agaga, ma mafaufau atoa. E tatau ona tatou taumafai ia tausia poloaiga sili uma e lua. O le faia o lena mea, tatou te savavali faapaleni ai i le va o le tulafono ma le alofa—tausia o poloaiga ma savavali i le ala o feagaiga, a o alolofa atu i o tatou tuaoi i lenei soifuaga. O lenei savaliga, e manaomia ai lo tatou sailia o musumusuga faalelagi i mea e lagolago ai ma mea e tetee atu ai ma le auala e alofa atu ai ma faalogo ma le faaaloalo ma aoao atu ai i le faagasologa. O la tatou savaliga e manaomia ai lo tatou le fetuunaia o poloaiga ae faaali atu se fuataga atoa o le malamalama ma le alofa” (“Lua Poloaiga Sili,” Liahona, Nov. 2019, 73–75).

• Na aoao mai Peresitene Russell M. Nelson: “O Au Paia o Aso e Gata Ai … e saili moni ia ola i poloaiga sili muamua ma le lona lua. A tatou alolofa i le Atua ma o tatou loto atoa, Na te liliu atu o tatou loto i le tulaga manuia o isi i se taamilosaga matagofie, ma mama. … O le tuuina atu o le fesoasoani i isi—i le faia o se taumafaiga lotofuatiaifo e popole mo isi e pei, pe sili atu nai lo le tatou popole ia i tatou lava ia—o lo tatou olioli lea. Aemaise lava, ou te fia faaopoopo atu, pe a le talafeagai ma pe a aveesea ai i tatou mai i o tatou tulaga mafanafana. O le ola ai i lena poloaiga sili lona lua o le ki lea i le avea ai ma se soo moni o Iesu Keriso” (“O Le Poloaiga Lona Lua ma le Sili,” Liahona, Nov. 2019, 97, 100).

Aoao Atu i le Ala a le Faaola

O lou aafiaga faaletagata lava ia i le ola i le talalelei o le a mafai ai ona e faasoa atu le molimau mamana o mataupu faavae e te aoaoina. Ona o loo e ola ai, o le a molimauina e le Agaga Paia o mea o loo e aoao atu e moni.