14 Me

E Faapefea ona Fesoasoani le Alii i Alii ma Tamaitai ia Galulue Faatasi i le Faaipoipoga?

Mataio 19–20; Mareko 10; Luka 18

Fefautuaai Faatasi

Taitaiina e se uso o le au peresitene o le korama po o le vasega; pe a ma le 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitaia lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni a oe lava fesili (tagai i le Tusitaulima Aoao, 10.2, 11.2). Fuafua ni auala e faatino ai mea tou te talanoaina.

• Ola i le talalelei. E mafai faapefea ona fesoasoani le liliu atu i le Alii ia i tatou e taulima ai o tatou luitau ma tofotofoga?

• Tausia o i latou e lē tagolima. O ai tatou te iloa e moomia a tatou tatalo ma faauooga?

• Valaaulia tagata uma ia talia le talalelei. O a fuafuaga e faasoa atu ai le talalelei na talanoaina i le fono a le aufono a le autalavou i le uarota? E faapefea ona faaaofia ai la tatou vasega po o le korama?

• Tuufaatasia o aiga mo le faavavau. E faapefea e le faia o galuega o talafaasolopito o aiga ona faamalosia a tatou sootaga ma le Tama Faalelagi ma Iesu Keriso?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

Na amata ia Atamu ma Eva, sa saili ai e le Tama Faalelagi ma Iesu Keriso e faamalolosia ma tuufaatasia ava ma tane i le faaipoipoga. Na aoao mai le Faaola, “O le mea lea e tuua ai e le tane o lona tama ma lona tina ae faatasi ma lana ava: ona avea lea o i laua o le tino e tasi” (Mataio 19:5). I le taimi lava e tasi, e faia ai e Satani mea uma na te mafaia e motusia ai faaipoipoga ma faatamaia ai aiga. Atonu o loo silafia e tagata o lau vasega po o le korama le tele o luitau o loo feagai ma faaipoipoga i aso nei. Atonu ua latou vaai foi i ava ma tane o galulue faatasi ma sailia le fesoasoani a le lagi e ausia ai le lotogatasi. Mafaufau loloto pe mafai faapefea e nei aafiaga ona aoaoina i latou e uiga i mea e manaomia e ausia ai le lotogatasi i se faaipoipoga. O le a se mea e mafai ona e faia e aoao ai i latou i le taua o le saunia nei mo sootaga faaleulugalii i le lumanai?

I le vaiaso ua te‘a, sa maua ai e tagata o le vasega po o le korama le avanoa e faitau ai aoaoga a le Faaola e uiga i le faaipoipoga i le Mataio 19:4–6. Ina ia saunia e aoao atu, suesue i nei fuaiupu, faatasi ai ma le savali a Peresitene Dieter F. Uchtdorf “Ia Viia i Latou O E Laveai” (Liahona, Me 2016, 77–80) po o isi savali o loo fautuaina mai i lenei otootoga.

Aoao Faatasi

Atonu e le o i ai le faaipoipoga i mafaufau o le toatele o talavou. Peitai, o se mea e matua taua lava e manaomia ai sauniuniga ma le faaeteete. Atonu e mafai ona e valaaulia le autalavou e vaai faalemafaufau faapea o loo latou tootutuli i se fatafaitaulaga i le malumalu ina ia faamauina ma ua fautuaina i latou e le fai faamauga e suesue le Mataio 19:4–6. O a upumoni tatou te maua i nei fuaiupu o le a fesoasoani i se ulugalii fou ua faaipoipo? E faapefea ona avea se tane ma se ava ia “tasi”? E faapefea ona fesoasoani le Faaola? O gaoioiga faapenei e mafai ona fesoasoani i lau vasega po o le korama ia malamalama ai i le auala e ausia ai le lotogatasi i le faaipoipoga.

• Ua tuuina mai e Atamu ma Eva se faataitaiga sili o se tane ma se ava o loo galulue faatasi i le lotogatasi. E mafai ona e faaali atu se ata o i laua (tagai i le Tusi Ata o le Talalelei [2009], nu. 5) ma fai i lau vasega po o le korama e faitau le Mose 5:1–12, ma vaavaai mo auala na galulue faatasi ai Atamu ma Eva i le lotogatasi. O le a le mea na la faia ina ia mafai ai e le Atua ona faamanuiaina le la‘ua sootaga? Ina ia fesoasoani i le autalavou e aoao atili e uiga i le lotogatasi i le faaipoipoga, e mafai ona latou suesue i tusitusiga paia i le “Punaoa Lagolago.”

• Na aoao mai Peresitene Dieter F. Uchtdorf e faapea i le tele o atunuu i aso nei, “e foliga mai o mea uma ua mafai ona tatia’i.” Ae o lenei uiga e le tatau ona faatatau i a tatou faaipoipoga ma aiga; nai lo lena, e tatau ona tatou “tuuto atu a tatou taumafaiga silisili i le laveaiina ma le faatamaoaigaina [o i latou]” (“Ia Viia i Latou O E Laveai,” 77). Ina ia fesoasoani e faapupula lenei manatu, e mafai ona e valaaulia le autalavou e mafaufau i se mea na latou suia talu ai nei lea na gauia, leva ona faaaoga ua tuai, pe ua le toe aoga. Aisea e ese ai faaipoipoga mai aitema e mafai ona suia e pei o nei? Ona mafai lea e le vasega po o le korama ona faitau le vaega o le savali a Peresitene Uchtdorf ua faaulutalaina “Laveaiina o a Tatou Faaipoipoga” ma faasoa mai auala e mafai ai e tane ma ava ona galulue faatasi ma le Faaola e faamalolosia a latou faaipoipoga. O le a se mea e mafai ona tatou faia nei ia saunia ai mo faaipoipoga malolosi ma lotogatasi?

• Mafaufau e tusi le Lotogatasi i le Faaipoipoga i luga o le laupapa ma valaaulia le autalavou e lisi ni mea e mafai ona faia e ava ma tane ina ia lotogatasi ai. Ona fai atu lea i le autalavou e suesue le “O Le Aiga: O Se Folafolaga i le Lalolagi” (ChurchofJesusChrist.org) mo ni manatu e mafai ona latou faaopoopo i a latou lisi. O a uiga auaumama o vaai i ai tagata o lau vasega po o korama i le tasi ma le isi po o ulugalii faaipoipo latou te iloa e taua mo le lotogatasi i le faaipoipoga? Aisea e taua ai le atiina ae ma faaaoga nei mataupu faavae i a tatou sootaga i le taimi nei? O vitio i le “Punaoa Lagolago” o loo aumaia ai nisi o faataitaiga o nei uiga auaumama i le faatinoga.

• Afai e i ai ni fesili po o ni atugaluga o tagata o lau vasega po o le korama e uiga i le tatalaina o faaipoipoga, mafaufau e iloilo faatasi vaega o le savali a Peresitene Dallin H. Oaks “Tatalaina o Faaipoipoga” (Liahona, Me 2007, 70–73).

Na amata ia Atamu ma Eva, ona saili le Tama Faalelagi ma Iesu Keriso e faamalolosia ma tuufaatasia ava ma tane i le faaipoipoga.

Faatino i le Faatuatua

Ia uunai tagata o le vasega po o le korama e manatunatu ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe o le a faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• 1 Korinito 11:11; Mataupu Faavae ma Feagaiga 42:22; 49:15–17; Mose 3:18, 21–24 (O le taua o le lotogatasi i le faaipoipoga)

• “Renaissance of Marriage,” “Let Us Be Men,” “Expressions of Love” (vitio), ChurchofJesusChrist.org

Aoao Atu i le Ala a le Faaola

O le faaali atu o le alofa faamaoni FaaKeriso e i ai sona mana maoae e faamalulu ai loto o tagata o le vasega o loo i ai tauiviga. Ina ia fesoasoani i tagata o le vasega ia lagona le manaomia ma le alofaina, e mafai ona e fai atu ia i latou e auai i se lesona o le a sosoo mai e ala i le faasoa atu o se aafiaga po o o latou lagona e uiga i se mau.