E Toe Afio Mai o Ia e Pule ma Nofotupu, saunia e Mary R. Sauer

28 Me

O a Mea e Mafai ona Ou Faia Nei e Saunia ai mo le Afio Mai Faalua o le Faaola?

Iosefa Samita—Mataio 1; Mataio 24–25; Mareko 12–13; Luka 21

Fefautuaai Faatasi

Taitaiina e se uso o le au peresitene o le korama po o le vasega; pe a ma le 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitaia lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni a oe lava fesili (tagai i le Tusitaulima Aoao, 10.2, 11.2). Fuafua ni auala e faatino ai mea tou te talanoaina.

• Ola i le talalelei. O a mea na tatou talanoaina talu ai, ma o a valaaulia po o tofiga na faia? O le a se mea ua tatou faia e faatino ai nei valaaulia po o tofiga?

• Tausia o i latou e lē tagolima. O le a se mea e mafai ona tatou faia pe ta’u atu e aapa atu ai ia i latou o e atonu ua lagona le tuuatoatasi pe ua taumamao mai le Tama Faalelagi?

• Valaaulia tagata uma ia talia le talalelei. O a nisi auala e mafai ona tatou fesoasoani ai i isi ia lagona le alofa o Iesu Keriso?

• Faatasia o aiga mo le faavavau. O a ni manatu e mafai ona tatou faasoa atu i le tasi ma le isi e fesoasoani e faamalosia ai o tatou aiga?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

O a ni lagona o le autalavou o loo e aoaoina e uiga i le ola ai i aso e gata ai a o lei oo i le Afio Mai Faalua o Iesu Keriso? E moni o taimi faigata nei, ua faailogaina i faigata, amioleaga, ma le faatafunaga. Ae ina ua faamatala e le Faaola o tatou aso i Ona soo ina ua lata i le iuga o Lona soifua faaletino, sa Ia tuuina mai ia i tatou le faamoemoe. A o faailoa atu le pogisa o le a oo mai, sa Ia folafola atu o Lona malamalama o le a “ufitia ai le lalolagi atoa” i Lona toe foi mai (tagai i le Iosefa Samita—Mataio 1:22–26; tagai foi i le Mataupu Faavae ma Feagaiga 45:34–38).

E mafai faapefea ona e fesoasoani i le autalavou ia malamalama atili i faamanuiaga ma avanoa o le ola ai i aso e gata ai? O a mea e mafai ona e faia ia musuia ai i latou e saunia ai i latou lava ma le lalolagi mo le Afio Mai Faalua o le Faaola? E faaopoopo atu i le suesueina o fuaitau o mau o lenei vaiaso, mafaufau e iloilo ni nai punaoa o loo lisi atu i le “Afio Mai Faalua o Iesu Keriso” i Autu o le Talalelei (topics.ChurchofJesusChrist.org).

Aoao Faatasi

Ina ia fesoasoani i le autalavou e toe faamanatu mea na latou faitauina i tusitusiga i lenei vaiaso, e mafai ona e tusia ulutala nei i luga o le laupapa: Valoaga Mamalu ma Faasilasilaga Matagofie (tagai Russell M. Nelson, “Opogi le Lumanai ma le Faatuatua,” Liahona, Nov. 2020, 73–76). Ona mafai lea e tagata taitoatasi ona iloilo le Iosefa Samita—Mataio 1:22–37 ma lisi mea “faanoanoa” ma “mamalu” o le a tutupu a o lei toe afio mai le Faaola. Aisea e taua ai mo i tatou ona iloa nei mea e tutupu? Ina ia fesoasoani i le autalavou e aoao atili e uiga i le auala e saunia ai mo le afio mai o le Faaola, mafaufau i gaoioiga nei po o se tasi o au lava gaoioiga.

• O mau o loo i le “Punaoa Lagolago” e mafai ona fesoasoani i le autalavou ia malamalama i le ala o loo saunia ai e le Tama Faalelagi le ala mo le Afio Mai Faalua o Lona Alo. Mafaufau e tusi mea e tutupu o loo faamatala mai i tusitusiga paia i luga o le laupapa ma fai atu i tagata taitoatasi e faitau se tasi o fuaitau o mau. E mafai e tagata taitoatasi ona faafetaui a latou fuaitau i se mea e tupu i luga o le laupapa ma talanoaina le fuaitau ma le vasega. O a mea o fautua mai e nei mea e tutupu e uiga i la tatou matafaioi i le saunia mo le Afio Mai Faalua o le Faaola? O le a se mea ua musuia i tatou e fai o se vasega po o se korama?

• Na fautua mai Peresitene Russell M. Nelson: “O faapefea ona tatou taulimaina uma valoaga faanoanoa ma faasilasilaga mamalu e uiga i o tatou aso? Na ta‘u mai e le Alii ia i tatou le ala i se faamautinoaga faigofie, ae ofoofogia: ‘Afai ua outou saunia o le a outou le matatau’ [Mataupu Faavae ma Feagaiga 38:30]” (“Talia le Lumanai ma le Faatuatua,” 74). Ina ia fesoasoani i le autalavou ia saunia atili mo le toe afio mai o le Faaola, mafaufau e fai atu ia i latou taitoatasi e faitau se tasi o mataupu faavae e tolu o le sauniuniga na faasoa mai e Peresitene Nelson i lana savali. Valaaulia i latou e faasoa mai ni mea na latou aoaoina. O le a le mea ua musuia i tatou e faatino i lenei fautuaga a Peresitene Nelson?

• I le amataga o lana savali ua faaautuina “Saunia mo le Toe Afio Mai o le Alii,” sa faamatala ai e Elder D. Todd Christofferson le tulaga o le a i ai le lalolagi pe a mavae le Afio Mai Faalua o Iesu Keriso (Liahona, Me 2019, 81–84). Valaaulia le autalavou e toe iloilo lana faamatalaga ma faatusatusa pe faape‘i le lalolagi i le taimi nei. E mafai ona latou talanoaina mea e mafai ona tatou faia i le taimi nei e saunia ai e ola i le ituaiga o lalolagi lea na faamatalaina e Elder Christofferson. (O parakalafa e fa o lana savali e amata i le “Muamua, ma e taua tele mo le toe foi mai o le Alii” atonu e aoga.) E faapefea ona fesoasoani le Ekalesia a le Faaola e saunia i tatou mo Lona Afio Mai Faalua? Na lisi mai e Elder Christofferson ni auala se tolu lea e “matuai faamalosia ma poloaiina ai le Ekalesia e faataunuu sauniuniga talafeagai mo le Afio Mai Faalua o le Alii.” E mafai e tagata o le vasega ona faailoa ma talanoaina nei mea.

Afai ua tatou saunia, e le manaomia ona tatou fefefe i mea e tutupu e tau atu i le Afio Mai Faalua o le Faaola.

Faatino i le Faatuatua

Ia uunai tagata o le vasega po o le korama e manatunatu ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe o le a faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• Mataupu Faavae ma Feagaiga 65:1–2 (Toefuataiga o le talalelei)

• Mataupu Faavae ma Feagaiga 20:8–12 (O le oo mai o le Tusi a Mamona)

• Malaki 4:5–6; Mataupu Faavae ma Feagaiga 110:13–16 (Toefuataiga o ki o le perisitua)

• 3 Nifae 21:1, 8 (Faapotopotoina o Isaraelu)

• Iosefa Samita—Mataio 1:28–30 (Taua, fevesiaiga, ma le amioletonu)

• Iosefa Samita—Mataio 1:31 (Ua talai atu le Talalelei i le lalolagi)

• Gary E. Stevenson, “O Se Faavae Lelei mo Aso Atalī,” Liahona, Me 2020, 48-52)

Aoao Atu i le Ala a le Faaola

Aoao tagata aoga e faapea, o nisi taimi o le a aoao ai i latou e le Agaga i le taimi o se talanoaga a le vasega i mea e le tautalagia leotele.