11 Iuni

E Mafai Faapefea Ona Ou Tuputupuae Latalata Atili i le Tama Faalelagi ma Iesu Keriso?

Ioane 14–17

Fefautuaai Faatasi

Taitaiina e se uso o le au peresitene o le korama po o le vasega; pe a ma le 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitaia lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni a oe lava fesili (tagai i le Tusitaulima Aoao, 10.2, 11.2). Fuafua ni auala e faatino ai mea tou te talanoaina.

• Ola i le talalelei. O a ni aafiaga lata mai ua faamalosia ai a tatou molimau?

• Tausia o i latou e lē tagolima. O ai e manaomia la tatou fesoasoani ma tatalo? O le a se mea ua musuia i tatou e faia e fesoasoani atu ai?

• Valaaulia tagata uma ia talia le talalelei. E faapefea ona avea i tatou ma malamalama i tagata o aiga po o uo e le tutusa o tatou talitonuga?

• Tuufaatasia o aiga mo le faavavau. E faapefea ona faaalia le tele o le alofa ma le lagolago mo tatou aiga ma faia se eseesega lelei i totonu o o tatou aiga?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

E le mafai ona ola ni fua i luga o se lala ua vavae ese mai lona laau. I lea lava ala e tasi, e le mafai ona tatou tuputupu ae faaleagaga pe afai e vavaeeseina i tatou mai le Atua (tagai i le Ioane 15:4–6). Ae e tele naua malosiaga o loo saili e vavaeese i tatou mai ia te Ia—o nisi taimi o lo tatou lava faamaualuga po o filifiliga le lelei ae e masani lava o tulaga o le olaga faaletino. Ina ua feiloai Iesu ma Ona soo mo le taimi mulimuli i le olaga nei, sa Ia silafia o le a le pine ae tuueseeseina o Ia mai ia i latou. O lea sa Ia aoaoina ai i latou e uiga i le taua o le tausia o se sootaga vavalalata ma Ia ma Lona Tama—o le lotogatasi ia i latou e pei o se lala i se laau. Sa Ia ta‘ua lenei “tumau” ia te Ia. Ma sa Ia aoaoina Ona soo i le ala e faia ai lenei mea. O le mea aupito taua o mea uma, o Lana taulaga togiola, ua mafai ai ona tupu lena sootaga.

Mafaufau loloto i lou sootaga ma le Tama Faalelagi ma Iesu Keriso a o e suesue i le Ioane 14–17. Mafaufau foi i tagata o loo e aoaoina ma lo latou mananao ia latalata atili atu i le Atua. O le a se mea o le a e faia e fesoasoani ai ia i latou? E mafai ona e mafaufau loloto i le Mataupu Faavae ma Feagaiga 88:62–68 a o e sauni e aoao atu.

Aoao Faatasi

Mafaufau pe mafai faapefea ona e musuia le autalavou e talanoaina aoaoga a le Faaola e uiga i vine ma lala i le Ioane 15:1–12. Atonu e mafai ona e faaaogaina se ata tusi, se ata, po o se lala moni e fesoasoani ia i latou e vaai faalemafaufau ai i mea na aoao mai e Iesu. E mafai ona e fai atu ia i latou e talanoa e uiga i taimi na latou lagona ai le latalata atu i le Tama Faalelagi ma Iesu Keriso—po o taimi na latou lagonaina ai le taumamao mai ia i Laua. O a mea o aoao mai e nei fuaiupu e uiga i le ala e mafai ai ona tatou faalatalata atu ia i Laua? O gaoioiga e pei o nei e mafai ona fesoasoani e faalautele ai lenei talanoaga.

• Atonu e taua le faaalu o sina taimi e sailiili ai le fesili “O le a le mea e faataumamao ai i tatou mai le Tama Faalelagi ma Iesu Keriso?” E mafai ona e tusia le fesili i luga o le laupapa ma fesili atu mo ni tali. Atonu e mafai ona e talanoa e uiga i mea tatou te faia e fausia ai se sootaga ma se uo po o se tagata o le aiga. E faapefea ona tutusa lenei mea—ma ese mai ai—le auala tatou te fausia ai se sootaga ma le Tama Faalelagi ma Iesu Keriso? E faapefea ona fesoasoani Iesu Keriso ia i tatou e faalatalata atu ia te Ia ma Lona Tama? Fautuaina tagata o le vasega po o le korama e faitau mau o loo i le “Punaoa Lagolago” e fesoasoani ai ia i latou e tali lenei fesili. Atonu e aoga i le autalavou le suesueina o nei fuaiupu i ni paga ma faasoa mai mea ua latou aoaoina.

• E leai se tasi e sili ona latalata i le Atua le Tama nai lo Lona Alo Pele, o Iesu Keriso. O le a se mea ua tatou aoao mai le Faaola e uiga i le faalatalata atili atu i le Atua? E mafai e tagata o le vasega ma le korama ona mafaufau loloto i lenei fesili a o latou faitauina le Luka 22:41–43; Ioane 6:38; 17:3, 20–23; 3 Nifae 11:11; Mataupu Faavae ma Feagaiga 50:43. E mafai faapefea ona tatou maua le tasi faatasi ma Tama Faalelagi ma Iesu Keriso?

• I lana savali ”O Lo Tatou Faaola Patino,” na toe ta‘ua ai e Elder Michael John U. Teh se taimi na ia iloaina ai, “O mea ua ou iloa e uiga i le Faaola sa sili mamao atu i le tele o lou iloa moni o Ia” (Liahona, Me 2021, 99). E mafai ona e fai atu i lau vasega po o le korama e talanoaina eseesega i le va o le iloa e uiga ia Iesu Keriso ma le iloa moni o Ia. E mafai ona latou talanoa e uiga i mea o loo latou faia e iloa ai e uiga ia te Ia ma mea o loo latou faia e iloa moni ai o Ia. Ona mafai lea ona latou sailia ni vaega o le savali a Elder Teh e sue ai le fautuaga na ia tuuina mai e uiga i le iloaina moni o le Faaola. Ua faapefea ona faamanuiaina o tatou olaga e ala i le saili ia iloa o Ia?

• I le vitio “He Knows Me,” sa faamatala ai e ni talavou se toalua mai Kana a laua taumafaiga e faalatalata atili atu i le Atua. Atonu e mafai e tagata o le vasega po o le korama ona matamata i le vitio ma, a o latou faia, fai se lisi o manatu e tuuina atu ia i latou e uiga i le auala e faaleleia ai la latou sootaga ma lo latou Tama oi le Lagi. Valaaulia i latou e faasoa mai se mea mai a latou lisi. Afai e mafai, atonu latou te fiafia e fai a latou lava vitio pupuu e faamatala ai le auala latou te latalata atili atu ai i le Atua.

A oo ina tatou iloa le Faaola ma tausi Ana poloaiga, o le a tatou tumau i Lona alofa (tagai i le Ioane 15:10).

Faatino i le Faatuatua

Ia uunaia tagata o le vasega po o le korama e manatunatu ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe o le a faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• Ioane 14:6; 1 Timoteo 2:5–6; Iakopo 4:11; Mosaea 3:19; Mataupu Faavae ma Feagaiga 88:63; Mose 6:52

Aoao Atu i le Ala a le Faaola

Sa saunia le Faaola mo Lana galuega i le lalolagi e ala i le tatalo ma le anapogi ina ia mafai ona Ia latalata atu i Lona Tama (tagai i le Mataio 4:1–2; Luka 4:1–2). A o e sauni e aoao atu, faaalu se taimi e saili ai le taitaiga a le Tama Faalelagi, aua o loo e aoaoina Ana fanau!