O Le Togiola a le Faaola: O Le Faavae o le FaaKerisiano Moni, saunia e Kirk Richards

25 Iuni

O Le a Le Uiga o le Togiola a Iesu Keriso ia te A’u?

Mataio 27; Mareko 15; Luka 23; Ioane 19

Fefautuaai Faatasi

Taitaiina e se uso o le au peresitene o le korama po o le vasega; pe a ma le 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitaia lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni a oe lava fesili (tagai i le Tusitaulima Aoao, 10.2, 11.2). Fuafua ni auala e faatino ai mea tou te talanoaina.

• Ola i le talalelei. O faapefea ona tatou faalatalata atili i le Faaola? O faapefea ona tatou taumafai ia avea atili e faapei o Ia?

• Tausia o i latou e lē tagolima. O ai na i ai i o tatou mafaufau talu ai nei? E mafai faapefea ona tatou fesoasoani i nei tagata taitoatasi?

• Valaaulia tagata uma ia talia le talalelei. E faapefea ona tatou tali atu i fesili a tatou uo e uiga i le Ekalesia i se auala e faamalosia ai lo latou faatuatua i le Faaola?

• Tuufaatasia o aiga mo le faavavau. O a nisi o auala e mafai ona tatou faaleleia atili ai a tatou sootaga ma tagata o le aiga lautele, e pei o matua o matua ma tausoga?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

Na ta’ua e Elder David A. Bednar e faapea, o nisi Au Paia o Aso e Gata Ai “e foliga mai e faatuatua i le Faaola, ae latou te le talitonu o loo avanoa Ana faamanuiaga folafolaina mo i latou” (“Ana Iloa e Outou o Au,” Liahona, Nov. 2016, 104). I se isi faaupuga, e ui lava ina tatou talitonu na puapuagatia Iesu Keriso ma maliu mo agasala a le lalolagi, atonu tatou te taumanatunatu pe na puapuagatia o Ia ma maliu patino mo a tatou agasala. Pe na e maua ea ni lagona faapea muamua? E faapefea ona manuia tagata o lau vasega po o le korama mai le malamalama o le Togiola a le Faaola e faatatau ia i latou patino lava? E mafai faapefea ona e fesoasoani ia i latou?

Mafaufau loloto i nei fesili a o e faitau e uiga i le Faasatauroga o le Faaola i lenei vaiaso. A o e sauni e aoao atu e uiga i le natura patino o le Togiola a Keriso, atonu e mafai ona e suesue i le savali a Peresitene Dallin H. Oaks “O Le A Se Mea Ua Faia e lo Tatou Faaola mo i Tatou?” (Liahona,, Me 2021, 75–77).

Aoao Faatasi

Valaaulia tagata o le vasega po o le korama e faasoa mai se mea na latou aoaoina e uiga i le Faasatauroga o le Faaola i le vaiaso ua tuanai i le Feagaiga Fou ma o latou lagona e uiga i le Faaola. Ina ia fesoasoani e uunaia i latou, e mafai ona e fai atu se fesili e pei o le “O le a se mea ua tatou aoaoina e uiga ia Iesu Keriso mai mea na Ia fetalai i ai ma faia i Ona toe itula?” Mo se faataitaiga, e mafai ona e sailiili i taimi na silasila ai le Faaola, a o puapuagatia mo tagata uma, sa silasila atu pea ia i latou sa siomia o Ia ma le agaalofa (tagai, mo se faataitaiga, Luka 23:34, 39–43; Ioane 19:25–27). O lenei mea e mafai ona taitai atu ai i se talanoaga e uiga i le ala e aoao ma patino ai le faatatauga o le Togiola a Iesu Keriso. O gaoioiga e pei o nei e mafai ona fesoasoani ia te oe e talanoa atili ai i le Togiola a le Faaola.

• I le parakalafa muamua o lana savali “O Le A Se Mea Ua Faia e lo Tatou Faaola mo i Tatou?,” sa faamatala ai e Peresitene Dallin H. Oaks se talanoaga ma se tamaitai sa lei talitonu na faia e Iesu Keriso se mea mo ia. Atonu e mafai e tagata o le vasega po o le korama ona faitau lena parakalafa, ma tuu i latou lava i le tulaga o Peresitene Oaks. Faamata o le a se tatou tala e fai atu i lenei tamaitai? E mafai ona e tuuina atu i tagata taitasi o le vasega po o le korama se tasi o vaega ua faanumera o le savali a Peresitene Oaks. O le faaaogaina o mea ua latou aoaoina, faatasi ai ma o latou lava aafiaga, e mafai ona latou faasoa atu a latou lava tali i le fesili “O le a le mea na faia e Iesu Keriso mo au?”

• Ina ia musuia se talanoaga e uiga i le ala e aafia patino ai i tatou i le Togiola a le Faaola, e mafai ona e tusia i luga o le laupapa se fasifuaitau e pei o le Ona sa puapuagatia Iesu Keriso ma maliu mo tagata uma… . E mafai e tagata o le vasega po o le korama ona fautuaina mai ni auala e faauma ai le fuaiupu. Ona mafai lea ona e suia le fasifuaitau ia faitau Ona sa puapuagatia Iesu Keriso ma maliu mo au… ma valaaulia soo se fautuaga faaopoopo. A o talanoaina e tagata o le vasega po o le korama nei faamatalaga, uunaia i latou e faitau mau o loo i le “Punaoa Lagolago.” O le a se mea o aoao mai e nei mau ia i tatou e uiga i le faatosinaga o le Togiola a le Faaola i o tatou olaga taitoatasi?

• O le isi auala e suesue ai mau o loo i le “Punaoa Lagolago” e mafai ona valaaulia ai le autalavou e sui ia upu i fuaiupu ina ia talanoa sa‘o atu fuaiupu ia i latou. E faapefea e le faia o lenei mea ona aafia ai o tatou lagona e uiga i upumoni i fuaiupu? E mafai faapefea ona tatou faaalia lo tatou loto faafetai mo le ositaulaga a le Faaola mo i tatou?

• O musika paia e mafai ona molimau mamana ia Iesu Keriso. Mafaufau e valaaulia tagata o le vasega po o le korama e o mai saunia e faasoa mai ni viiga e fesoasoani ia i latou ia lagona ai le mana o le Togiola a le Faaola i o latou lava olaga. (E mafai ona latou vaai i viiga o le faamanatuga po o le tusiga “Iesu Keriso—Faaola” i le faasino autu o Viiga.) Fai atu i tagata o le vasega po o le korama e faailoa mai fasifuaitau i viiga e fesoasoani latou te lagona ai le alofa o le Faaola mo i latou taitoatasi. E mafai foi ona e talanoa e uiga i le ala e aafia ai o tatou olaga i aso taitasi i le taulaga a le Faaola. Mo se faataitaiga, e faapefea ona aafia ai filifiliga tatou te faia?

Keriso i Ketesemane, saunia e Dan Burr

Faatino i le Faatuatua

Ia uunai tagata o le vasega po o le korama e manatunatu ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe o le a faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• 1 Korinito 15:20–22; 2 Korinito 12:7–9; Alema 7:11–12; 3 Nifae 11:10–11

• Tad R. Callister, “O le Togiola a Iesu Keriso,” Liahona, Me 2019, 85-87.

Aoao Atu i le Ala a le Faaola

O le faaali atu o le alofa faamaoni FaaKeriso e i ai sona mana maoae e faamalulu ai loto o tagata o le vasega o loo tauivi ma le talalelei. O le tele o taimi o nei tagata taitoatasi e tau lava o le manaomia ona iloa e manaomia ma alofaina i latou.