26 Mati

E Mafai Faapefea e Tamaitai Talavou ma Alii Talavou ona Galulue Faatasi e Fesoasoani e Fausia le Malo o le Atua?

Mataio 13; Luka 8;13

Fefautuaai Faatasi

Taitaiina e se uso o le au peresitene o le korama po o le vasega; pe a ma le 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitaia lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni a oe lava fesili (tagai i le Tusitaulima Aoao, 10.2, 11.2). Fuafua ni auala e faatino ai mea tou te talanoaina.

• Ola i le talalelei. O faapefea ona tatou maua le olioli i le mulimuli ai ia Iesu Keriso?

• Tausia o i latou e lē tagolima. O ai o la tatou uarota po o le nuu o manaomia la tatou fesoasoani? E mafai faapefea ona tatou fesoasoani ia i latou?

• Valaaulia tagata uma ia talia le talalelei. E mafai faapefea ona tatou fesoasoani i le tasi ma le isi ia saunia mo le galuega faafaifeautalai?

• Tuufaatasia o aiga mo le faavavau. E faapefea ona tatou fesoasoani i taumafaiga a le tatou uarota e faia talafaasolopito o aiga ma galuega o le malumalu?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

Faatasi ai ma se faasologa o faataoto o loo maua i le Mataio 13, sa aoao mai ai e le Faaola upumoni taua e uiga i le malo o le Atua ma lona tuputupu ae ofoofogia i o tatou aso. I nei faataoto e lua, o se mea laitiiti ma faatauvaa na taunuu i se mea maoae. Ma o faatinoga a se atalii po o se afafine o le Atua na fesoasoani e tupu ai le vavega. O se tamai fatu o le sinapi na ola ae i se laau sa lava lona telē mo manulele e “nofo ai i totonu o lala” ina ua “ave e le tagata, ma lulu i lona fanua” (Mataio 13:31–32). Ma o sina mea faafefete itiiti na mafua ai ona tulai mai se paluga tele ina ua “ave e se fafine, ua natia i fuataga e tolu o le tausamiga” (Mataio 13:33). Ua faatupulaia le malo o le Atua i o tatou aso ma faasalalauina ona o Lana Au Paia—e aofia ai tamaitai talavou ma alii talavou—e galulue faatasi ma Ia e fausia.

E le gata i le faitauina o le Mataio 13 ma le Luka 8; 13 i lenei vaiaso, mafaufau e faitau le savali a Peresitene M. Russell Ballard “O Alii ma Tamaitai i le Galuega a le Alii” (New Era, Ape. 2014, 2–5) ma le savali a Peresitene Jean B. Bingham “Lotogatasi i le Faataunuuina o le Galuega a le Atua” (Liahona, Me 2020, 60–63).

Aoao Faatasi

Ina ia fesoasoani i le autalavou o loo e aoaoina e vaai faalemafaufau i faataoto i le Mataio 13, mafaufau e faaali atu ata o se fatu sinapi, mea faafefete (e pei o le fefete), se penina, ma se upega fagota. E mafai e le autalavou ona iloilo le Mataio 13:31–33, 45–48 ma faasoa mai mea ua aoao atu e nei faataoto taitasi ia i latou e uiga i le malo o le lagi. E mafai faapefea ona tatou faaaogaina savali a nei faataoto i o tatou lava olaga? O le a se mea o tatou faia e fesoasoani ai i le Alii e fausia Lona malo? O ni nai gaoioiga nei e mafai ona fesoasoani i le talanoaga.

• A o lei faia le sauniga, valaaulia tagata o le vasega po o le korama e aoao e uiga i tamaitai ma alii o e o i ai pe sa avea ma faataitaiga lelei e fesoasoani ai e fausia le malo o le Atua. O nei tagata e mafai ona o mai mai tusitusiga paia (tagai i le “Punaoa Lagolago”), mai le talafaasolopito o le Ekalesia, pe mai o latou lava olaga. Valaaulia le autalavou e faasoa mai mea na latou aoaoina. O a ni auala na fesoasoani ai nei tagata i le Alii e fausia Lona malo? E mafai faapefea ona tatou mulimuli i a latou faataitaiga?

• Afai e te aoaoina alii talavou, valaaulia i latou e iloilo le savali a Peresitene Bonnie L. Oscarson “Tamaitai Talavou i le Galuega” (Liahona, Me 2018, 36–38) ma saili ma faasoa mai ni auala e saofaga ai tamaitai talavou i le galuega a le Atua o le faaolataga ma le faaeaga. E mafai e tamaitai talavou ona faia se sailiga faapena i le savali a Brother Douglas D. Holmes “O Mea e Manaomia e i Latou Uma e Umia le Perisitua Arona ona Malamalama i ai” (Liahona, Me 2018, 50–53). E faapefea ona tai tutusa tiutetauave o tamaitai talavou ma alii talavou? E mafai faapefea ona tatou galulue faatasi ia sili atu a o tatou faia le galuega a le Atua?

• Ina ia fesoasoani i le autalavou ia malamalama i le auala e galulue faatasi ai tamaitai ma alii e fausia le malo o le Atua, e mafai ona e tusia fesili i luga o le laupapa e pei o nei: Aisea e manaomia ai e le Atua ia tamaitai ma alii e galulue faatasi e fesoasoani e fausia Lona malo? E mafai faapefea ona sili atu le galulue faatasi o au peresitene o vasega ma korama? E mafai e le autalavou ona iloiloina vaega o le savali a Peresitene M. Russell Ballard “Alii ma Tamaitai i le Galuega a le Alii” po o le savali a Peresitene Jean B. Bingham “Lotogatasi i le Faataunuuina o le Galuega a le Atua,” aemaise lava le vaega o loo amata i le “O le a la le uiga o lena mea mo oe ma au?” E mafai e le autalavou ona faasoa mai tali latou te maua i fesili.

• Ina ia fesoasoani i le autalavou ia malamalama pe mafai faapefea ona latou fesoasoani e fausia le malo o le Atua, mafaufau e faaali atu se tasi pe sili atu o vitio “We Are Strong Together,” ma le “A Promise for the Lord‘s Battalion,” ma le “Youth Responsibility in the Work of Salvation” (ChurchofJesusChrist.org). O a ni mea o tatou faia i totonu o o tatou aiga, o tatou uarota, ma o tatou nuu e fesoasoani ai i le galuega a le Atua? Mafaufau e fai atu i le peresitene o le vasega po o le korama e tuuina atu ni faafitauli na talanoaina i fonotaga a le aufono a le autalavou a le uarota e talafeagai ona faasoa atu. Valaaulia tagata o le vasega po o le korama e faasoa mai ni malamalamaaga e uiga i auala e mafai ona latou fesoasoani ai i faafitauli.

E manaomia e le Atua tamaitai ma alii e galulue faatasi i le fausiaina o Lona malo.

Faatino i le Faatuatua

Ia uunai tagata o le vasega po o le korama e manatunatu ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe o le a faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• Luka 2:21–38 (Simeona ma Ana); Galuega 9:36–41 (Tapita, po o Toreka); Mosaea 18:1–17 (Alema); Mosaea 28:1–3 (atalii o Mosaea); Alema 8:18–27 (Amoleka); Alema 19:15–17 (Apiso); Mataupu Faavae ma Feagaiga 25:5–8 (Ema Samita); Mose 5:10–12 (Atamu ma Eva)

Aoao Atu i le Ala a le Faaola

A e tuuina atu se valaaulia e ola i se mataupu faavae patino, fesoasoani i tagata aoao ia maua faamanuiaga sa folafolaina e le Atua ia i latou e ola i lena mataupu faavae.