e dua na veiwatini e tautuba ni valetabu

14 ni Me

E Vukei ira vakacava na Tagane kei na Yalewa na Turaga mera Cakacaka ena Duavata ena Vakawati?

Maciu 19–20; Marika 10; Luke 18

ivakatakilakila ni veivakasalataki vata

Veivakasalataki Vata

Me liutaka e dua na lewe ni mataveiliutaki ni kuoramu se kalasi; me rauta ni 10–20 na miniti

Ena itekivu ni soqoni, cavuta vata na Itoko ni Goneyalewa se na Itoko ni Kuoramu ni Matabete i Eroni. Qai liutaka e dua na veivosaki me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro e ra se nomu taro vakai iko (raica na iVoladusidusi Raraba, 10.2, 11.2). Tuvana na sala mo cakava na veika sa veivosakitaki.

• Bulataka na kosipeli. Ena vukei keda vakacava noda gole vua na Turaga meda sotava kina na bolebole kei na veivakatovolei?

• Qaravi ira era gadreva tu na veivuke. O cei eda kila e gadreva tu na noda masu kei na noda veitokani?

• Sureta na tamata kecega me ra ciqoma na kosipeli. Na ituvatuva cava me wasei kina na kosipeli sa veivosakitaki ena bose ni matabose ni itabagone ni tabanalevu? Ena rawa ni vakaitavi vakacava na noda kalasi se kuoramu?

• Vakaduavatataki ni matavuvale me tawamudu. E rawa vakacava ni vaqaqacotaka na keda isema vua na Tamada Vakalomalagi kei Jisu Karisito e na noda cakava na tuva kawa?

Ena itini ni lesoni, ke veiganiti, vakayacora na veika oqo:

• Vakadinadinataka na ivakavuvuli eso e sa vakatavulici.

• Vakananumi ira na lewe ni kuoramu se kalasi me baleta na ituvatuva kei na veisureti e caka ena gauna ni soqoni.

ivakatakilakila ni vakavulici ni ivunau

Vakavulica na iVunau

Liutaki mai vua e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

Vakatekivu vei Atama kei Ivi, na Tamada Vakalomalagi kei Jisu Karisito e rau segata me rau vaqaqacotaka ka vakaduavatataki rau na veiwatini ena vakamau. A vakavulica na iVakabula, “Ena vuku ni ka oqo ena biuti tamana kei na tinana na tagane, ka kabita na watina: a rau na lewe dua” (Maciu 19:5). Ena gauna vata oqori, sa cakava tiko o Setani na ka kece e rawata me voroka kina na vakawati ka vakarusa na matavuvale. O ira na lewe ni nomu kalasi se kuoramu era sa kila tiko beka e vuqa na bolebole era sotava tu na vakamau nikua. E rairai beka era sa raici ira talega na marama kei na tagane vakawati era cakacakavata ka vakasaqara na veivuke mai lomalagi me rawati na duavata. Vakasamataka vakatitobu na sala e rawa ni vakavulici ira kina na veika oqo me baleta na veika me caka me rawati kina na duavata ena dua na vakawati. Na cava o rawa ni cakava mo vakavulica vei ira na bibi ni vakavakarau ena gauna oqo me baleta na veimaliwai ni vakamau ena veisiga ni mataka?

Ena macawa sa oti, a donumaka na lewe ni kalasi se kuoramu na madigi mera wilika na ivakavuvuli ni iVakabula ena vakamau ena Maciu 19:4–6. Mo vakavakarau mo veivakavulici, vulica na veitikina oqo, vata kei na itukutuku nei Peresitedi Dieter F. Uchtdorf “Veivakacaucautaki Vei Ira Era Veivakabulai” (Liaona, Me 2016, 77–80) se itukutuku tale eso e vakaturi tiko ena ituvatuva oqo.

Vulica Vata

Ena sega beka ni tiko ena nodra vakanananu e vuqa na itabagone na vakawati. Ia, na ka bibi oqo e ganita na vakavakarau vakavinaka. E rawa beka nio sureti ira na itabagone mera raitayaloyalotaka nira tekiduru tiko ena dua na icabocabo ni soro ena valetabu me ra vauci ka sa vakasalataki ira na dauveivauci me ra vulica na Maciu 19:4–6. Na dina cava soti eda kunea ena veitikina oqo ka na vukea e dua na veiwatini vou? E yaco vakacava e dua na tagane kei na yalewa vakawati me rau lewe “dua”? E veivuke vakacava na iVakabula? Na vei itaviqaravi vakaoqo e rawa ni vukea na nomu kalasi se kuoramu me kila vakavinaka na sala me rawati kina na duavata ena vakamau.

• A vakarautaka o Atama kei Ivi e dua na ivakaraitaki cecere ni nodrau cakacakavata e dua na tagane kei na yalewa vakawati ena duavata. Sa rawa mo vakaraitaka e dua na kedrau iyaloyalo (raica na iVola ni Yaloyalo Vakosipeli [2009], naba 5) ka kerea na nomu kalasi se kuoramu mera wilika na Mosese 5:1–12, ka vaqara na sala erau cakacakavata kina ena duavata o Atama kei Ivi. Na cava erau cakava me rawa ni vakalougatataka kina na Kalou na nodrau veimaliwai? Me vukei ira na itabagone mera vulica vakalevu cake na duavata ena vakamau, e rawa nira vulica na ivolanikalou ena “iVurevure Veitokoni”

• E vakavuvulitaka o Peresitedi Dieter F. Uchtdorf ena vuqa na isoqosoqo nikua, “na veika kece sa vaka me cacawale.” Ia na ivakarau oqo me kakua ni vakayagataki ena noda bula vakawati kei na matavuvale; ia, e dodonu meda “solia na noda igu vinaka duadua me da vakabulai ira ka vakavutuniyautaki [ira]” (“Praise of Those Who Save,” 77). Me vukea na kena vakamatatataki na tikina oqo, sa rawa mo sureti ira na itabagone mera vakasamataka e dua na ka era se qai vakaisosomitaka wale toka ga oqo ka a kavoro, madra, se makawa. Na cava na vuna e duidui kina na vakamau mai na iyaya ka rawa vakasosomitaki? E rawa nira qai wilika na kalasi se kuoramu na iwase ni itukutuku nei Peresitedi Uchtdorf ka kena ulutaga “Vakabulai Noda Vakawati” ka wasea na sala eso e rawa ni rau cakacaka vata kina na tagane kei na yalewa vakawati vata kei na iVakabula me vaqaqacotaka na nodrau bula vakawati. Na cava eda rawa ni cakava me vakarautaki keda me vaqaqacotaki na noda vakawati, ena duavata?

• Vakasamataka mo vola na Duavata ena Vakawati ena vava ni volavola ka sureti ira na itabagone me ra vola na veika e rawa ni ra cakava na veiwatini me ra duavata kina. Qai kerei ira na itabagone me ra vakasaqara “Na Matavuvale: Ai Vakaro ki Vuravura Raraba” (ChurchofJesusChrist.org) me baleta na vakasama eso e rawa ni ra vakuria ki na nodra lisi. Na ivakarau cava soti era raica na lewe ni nomu kalasi se kuoramu vei ira vakai ira se vei ira na veiwatini era kila ni bibi kina duavata ena vakawati? Na cava na vuna e bibi kina meda vakatorocaketaka ka bulataka na vei ivakavuvuli oqo ena noda veimaliwai ena gauna oqo? Na video era kune ena “Supporting Resources” e solia eso na ivakaitaki ni ivakavuvuli matanataki.

• Kevaka e basika cake eso na vakatataro se nuiqawaqawa me baleta na veisere, raica vata eso na tiki ni nona vosa o Peresitedi Dallin H. Oaks “Veisere” (Liahona, Me 2007, 70–73).

veimokomoko na veiwatini

Tekivu vei Atama kei Ivi, na Tamada Vakalomalagi kei Jisu Karisito erau segata me rau vaqaqacotaka ka vakaduavatataki rau na veiwatini ena vakamau.

Cakacaka ena Vakabauta

Vakauqeti ira na lewe ni kuoramu se kalasi mera vakasamataka vakatitobu ka vola na cava era na cakava mera vakayacora kina na veivakauqeti era ciqoma nikua. Kevaka era vinakata, e rawa nira wasea na nodra vakasama. Sureti ira mera vakasamataka na sala ena vaqaqacotaka kina na nodra veiwekani kei na Tamada Vakalomalagi kei Jisu Karisito na nodra cakacakataka na nodra veivakauqeti.

iVurevure Veitokoni

• 1 Korinica 11:11; Vunau kei na Veiyalayalati 42:22; 49:15–17; Mosese 3:18, 21–24 (Na bibi ni duavata ena vakamau)

• “Renaissance of Marriage,” “Let Us Be Men,” “Expressions of Love” (videos), ChurchofJesusChrist.org 

Veivakavulici ena iVakarau ni iVakabula

Na vakaraitaki ni loloma dina sa vaKarisito sa kaukauwa cecere me vakamalumalumutaka na yalodra na lewe ni kalasi era sasaga bula tiko. Me vukei ira na lewe ni kalasi mera vakila nira gadrevi ka lomani, e rawa nio kerei ira mera vakaitavi ena dua na lesoni e tarava ena nodra wasea e dua na ka era sotava se na veika era vakila me baleta na ivolanikalou.