E Lako Tale Mai me Veiliutaki ka Vakatulewa, mai vei Mary R.Sauer

He Comes Again to Rule and Reign [E Lako Tale Mai me Lewa ka Veiliutaki], mai vei Mary R.Sauer

28 ni Me

Na Cava Au Rawa ni Cakava Oqo meu Vakavakarau kina iKarua ni Lako Mai ni iVakabula?

Josefa Simici—Maciu 1; Maciu 24–25; Marika 12–13; Luke 21

ivakatakilakila ni veivakasalataki vata

Veivakasalataki Vata

Me liutaka e dua na lewe ni mataveiliutaki ni kuoramu se kalasi; me rauta ni 10–20 na miniti

Ena itekivu ni soqoni, cavuta vata na Itoko ni Goneyalewa se na Itoko ni Kuoramu ni Matabete i Eroni. Qai liutaka e dua na veivosaki me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro e ra se nomu taro vakai iko (raica na iVoladusidusi Raraba, 10.2, 11.2). Tuvana na sala mo cakava na veika sa veivosakitaki.

• Bulataka na kosipeli. Na cava eda veivosakitaka ena soqoni sa oti, kei na veisureti se ilesilesi cava a vakayacori? Na cava eda sa cakava meda cakacakataka kina na veisureti se ilesilesi oya?

• Vukei ira era gadreva tu na veivuke. Na cava eda rawa ni cakava se tukuna meda dodoliga yani vei ira era na rairai galili se yawa mai vua na Tamada Vakalomalagi?

• Sureta na tamata kecega mera ciqoma na kosipeli. Na cava eso na sala eda rawa ni vukei ira kina eso mera vakila na loloma i Jisu Karisito?

• Vakaduavatataki ni matavuvale me tawamudu. Na vakasama cava so eda rawa ni veiwasei kina vakai keda me vukea me vaqaqacotaka noda matavuvale?

Ena itinitini ni lesoni, ke veiganiti, cakava na veika oqo:

• Vakadinadinataka na ivakavuvuli eso e sa vakatavulici.

• Vakananumi ira na lewe ni kuoramu se kalasi me baleta na ituvatuva kei na veisureti e caka ena gauna ni soqoni.

ivakatakilakila ni vakavulici ni ivunau

Vakavulica na iVunau

Liutaki mai vua e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

Na cava era vakila na itabagone o vakavulica me baleta na bula tiko ena iotioti ni gauna ni bera na iKarua ni Lako Mai i Jisu Karisito? E dina ni oqo na gauna ni veivakararawataki, ka vakatakilakilataki ena veika dredre, ivalavala ca, kei na veivakarusai. Ia ni vakamacalataka na iVakabula na noda gauna vei ira na Nona tisaipeli ni voleka ni cava na Nona bula vakayago, a solia vei keda o Koya na inuinui. Ni vakadinadinataka tiko na butobuto ka lako mai, a yalataka o Koya ni Nona rarama ena “[ubia] na vuravura taucoko” ena Nona lesu mai (raica na Josefa Simici—Maciu 1:22–26; raica talega na Vunau kei na Veiyalayalati 45:34–38).

O na vukei ira vakacava na itabagone mera kila vakavinaka cake na veivakalougatataki kei na madigi ni bula ena iotioti ni gauna oqo? Na cava o rawa ni cakava mo vakauqeti ira kina mera vakarautaki ira kei na vuravura me baleta na iKarua ni Lako Mai ni iVakabula? Me kena ikuri na vulici ni tiki ni volanikalou ena macawa oqo, raica e vica na ivurevure era lisitaki ena “Second Coming of Jesus Christ” ena Ulutaga Vakaivunau (topics.ChurchofJesusChrist.org). 

Vulica Vata

Me vukei ira na itabagone mera railesuva na veika era sa wilika ena ivolanikalou ena macawa oqo, sa rawa mo vola na ulutaga oqo ena vava ni volavola: Vei Parofisai Bibi kei na iTukutuku Lagilagi (raica na Russell M. Nelson, “Karona na Veisiga ni Mataka ena Vakabauta,” Liaona, Nove. 2020, 73–76). Na tamata yadua me railesuva na Josefa Simici—Maciu 1:22–37 ka vola na “bibi” kei na “lagilagi” ni se bera ni lesu mai na iVakabula. Na cava e bibi kina vei keda meda kila tiko na veika ena yaco oqo? Me vukei ira na itabagone me ra vulica vakalevu cake na sala ni vakavakarau kina nona lako mai na iVakabula, vakasamataka na vei itaviqaravi e ra se dua na nomu vakai iko.

• Na ivolanikalou ena “iVurevure Veitokoni” e rawa ni vukei ira na itabagone me ra kila se sa vakarautaka tiko vakacava na Tamada Vakalomalagi na sala ni iKarua ni Lako Mai ni Luvena. Vakasamataka mo vola na veika e vakamacalataki ena ivolanikalou ena vava ni volavola ka kerea na tamata yadua me wilika e dua na iwasewase ni ivolanikalou. Sa rawa kina tamata yadua me vakasotara vata na nodra iwasewase kei na dua na ka a yaco ena vava ni volavola ka veivosakitaka na iwasewase oqo kei na kalasi. Na cava era vakatura na veika yaco oqo me baleta na noda itavi ena vakavakarau kina iKarua ni Lako Mai ni iVakabula? Na cava eda sa vakauqeti meda cakava vakalasi se kuoramu?

• E vakasalataka o Peresitedi Russel M. Nelson: Meda sa qai cakava vakacava na veiparofisai dina kei na ivakaro lagilagi me baleta na noda gauna nikua? Na Turaga sa tukuna vei keda na kena rawarawa, ia e kaukauwa, ni veivakadeitaki: ‘Kevaka dou sa vakarau vakavinaka tu, dou na sega sara ni rere’.[Vunau kei na Veiyalayalati 38:30]” (“Karona na Veisiga ni Mataka ena Vakabauta,” 74). Me vukei ira na itabagone mera vakavakarau vakalevu cake kina nona lesu mai na iVakabula, navuca mo kerei ira yadua mera wilika e dua vei ira na tolu na ivakavuvuli ni vakavakarau a wasea o Peresitedi Nelson ena nona itukutuku. Vukei ira mera wasea na ka era sa vulica. Na cava eda vakauqeti kina meda cakava me cakacakataki kina nai vakasala oqo?

• Ena itekivu ni nona itukutuku ka kena ulutaga na “Vakavakarau ki na Lesu Mai ni Turaga.,” e vakamacalataka o Elder D. Todd Christofferson nai tuvaki ni vuravura ni oti na iKarua ni Lako Mai i Jisu Karisito (Liaona, Me 2019, 81–84). Sureti ira na itabagone me ra railesuva na nona ivakamacala ka veidutaitaka vata kei na veika sa yaco tu e vuravura ena gauna oqo. E rawa nira veivosakitaka na veika eda rawa ni cakava oqo me da tu vakarau kina me da bula ena mataqali vuravura e vakamacalataka o Elder Christofferson. (Na va na parakaravu ni nona itukutuku vakatekivu ena “iMatai, ka bibi sara kina lesu mai ni iVakabula” ena rawa ni veivuke.) E vukei keda vakacava na Lotu ni iVakabula me vakarautaki keda kina iKarua ni Nona Lako Mai? E tuva o Elder Christofferson e tolu na sala “e sa vakataudeitaki ka lesi vakatabakidua me cakava na vakavakarau e ganita me baleta na iKarua ni Lako Mai ni Turaga” na Lotu. Sa rawa kina lewe ni kalasi mera raica ka veivosakitaka na veika oqo.

vuli tiko na goneyalewa

Kevaka eda sa vakarau tu, e sega ni gadrevi meda rerevaka na veika ena yaco ni bera na iKarua ni Nona Lako Mai na iVakabula.

Cakacaka ena Vakabauta

Uqeti ira na lewe ni kuoramu se kalasi mera vakasamataka vakatitobu ka vola na cava era na cakava mera vakayacora kina na veivakauqeti era ciqoma nikua. Kevaka era vinakata, e rawa nira wasea na nodra vakasama. Sureti ira mera vakasamataka na sala ena vaqaqacotaka kina na nodra veiwekani kei na Tamada Vakalomalagi kei Jisu Karisito ena nodra cakacakataka na nodra veivakauqeti.

iVurevure Veitokoni

• Vunau kei na Veiyalayalati 65:1–2 (Vakalesui mai ni kosipeli)

• Vunau kei na Veiyalayalati 20:8–12 (Lako mai ni iVola i Momani)

• Malakai 4:5–6; Vunau kei na Veiyalayalati 110:13–16 (Vakalesui mai ni idola ni matabete)

• 3 Nifai 21:1, 8 (Vakasoqoni vata o Isireli)

• Josefa Simici—Maciu 1:28–30 (iValu, yavavala, kei na i valavala ca)

• Josefa Simici—Maciu 1:31 (Vunautaki na Kosipeli ki vuravura)

• Gary E. Stevenson, “E Dua na Yavu Vinaka me Sabaya na Veigauna ena Lako Mai,” Liaona, Me 2020, 48–52

Veivakavulici ena iVakarau ni iVakabula

Vakavuvulitaka vei ira na vuli tiko ni so na gauna na Yalo ena vakavulica vei ira eso na ka ena veivosaki vakalasi ka sega ni na tukuni e cake.