e masu tiko o goneyalewa

11 ni Jiune

Ena Rawa Vakacava Meu Toro Voleka Vua na Tamada Vakalomalagi kei Jisu Karisito?

Joni 14–17

ivakatakilakila ni veivakasalataki vata

Veivakasalataki Vata

Me liutaka e dua na lewe ni mataveiliutaki ni kuoramu se kalasi; me rauta ni 10–20 na miniti

Ena itekivu ni soqoni, cavuta vata na Itoko ni Goneyalewa se na Itoko ni Kuoramu ni Matabete i Eroni. Qai liutaka e dua na veivosaki me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro e ra se nomu taro vakai iko (raica na iVoladusidusi Raraba, 10.2, 11.2). Tuvana na sala mo cakava na veika sa veivosakitaki.

• Bulataka na kosipeli. Na cava so e sotavi wale tikoga oqo e sa vakaqaqacotaka na noda ivakadinadina?

• Vukei ira era gadreva tu na veivuke. O cei e gadreva na noda veivuke kei na masu? Na cava e vakauqeti keda meda veivuke?

• Sureta na tamata kecega mera ciqoma na kosipeli. E rawa vakacava meda na vu ni rarama vei ira na lewe ni matavuvale se itokani ka ra sega ni duavata kei na noda vakabauta?

• Vakaduavatataki ni matavuvale ki na tawamudu. Eda na vakaraitaka vakacava na loloma kei na veitokoni levu cake kina noda matavuvale ka vakayaco veisau vinaka ena noda itikotiko?

Ena itini ni lesoni, ke veiganiti, vakayacora na veika oqo:

• Vakadinadinataka na ivakavuvuli eso e sa vakatavulici.

• Vakananumi ira na lewe ni kuoramu se kalasi me baleta na ituvatuva kei na veisureti e caka ena gauna ni soqoni.

ivakatakilakila ni vakavulici ni ivunau

Vakavulica na iVunau

Liutaka e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

Na vuanikau e sega ni rawa ni tubu ena dua na taba ni kau ka tawasei tani tu mai na vunikau. Ena sala vata ga, eda na sega ni rawa ni tubu vakayalo kevaka eda tawasei tani mai vua na Kalou (raica na Joni 15:4–6). Ia e vuqa na kaukauwa era segata mera tawasei keda tani mai Vua—ena so na gauna na noda dokadoka se digidigi cala ia sa vakavuqa ga na ituvaki ni bula vakayago. Niona sotavi iratou na Nona tisaipeli o Jisu ena iotioti ni gauna ena bula oqo, a kila o Koya ni na sega ni dede sa na tawase tani mai vei iratou. A vakavulica vei iratou na bibi ni kena maroroi e dua na isema voleka Vua kei Tamana—me duavata kei rau me vaka na tabanikau kina dua na vunikau. E vakatoka o Koya oqo meda “tu vei” Koya. Ka vakavulici ira na Nona tisaipeli ena ivakarau mera cakava kina na ka oqo. Ka bibi duadua, ena vuku ni Nona solibula ni veisorovaki, sa vakarautaka rawa kina o Koya na isema oqori.

Vakasamataka vakatitobu na kemu isema vua na Tamada Vakalomalagi kei Jisu Karisito nio vulica na Joni 14–17. Vakasamataki ira talega na tamata o vakavulica kei na nodra gagadre me ra voleka vua na Kalou. Na cava eda na rawa ni cakava meda vukei ira kina? Sa rawa mo vakasamataka vakatitobu na Vunau kei na Veiyalayalati 88:62–68 nio vakavakarau mo veivakavulici.

Vulica Vata

Vakasamataka na sala o rawa ni vakauqeti ira kina na itabagone mera veivosakitaka na ivakavuvuli ni iVakabula me baleta na vaini kei na tabana ena Joni 15:1–12. Sa rawa mo vakayagataka e dua na droini, iyaloyalo, se dua na tabanikau dina me vukei ira mera raitayaloyalotaka na veika e vakavulica o Jisu. Sa rawa mo kerei ira mera veivosakitaka na gauna era vakila ni ra sa voleka sara vei Tamada Vakalomalagi kei Jisu Karisito—se na gauna era vakila ni ra yawa mai Vei Rau. Na cava era vakavulica na veitikina oqo me baleta na sala eda rawa ni tiko volekati Rau kina? Na vei itaviqaravi ka koto tarava ena rawa ni vukea na tosoi ni veivosaki oqo.

• Ena yaga beka me vakayagataki eso na gauna me dikevi kina na taro “Na cava e dau vakayawaki keda mai vei Tamada Vakalomalagi kei Jisu Karisito?” Sa rawa mo vola na taro ena papa ka kerea mera saumi mai. Sa rawa moni qai veivosakitaka na veika eda cakava me tarai cake kina e dua na veimaliwai vata kei na dua na itokani se lewe ni matavuvale. E tautauvata vakacava oqo—ka duatani mai—na sala eda tara cake kina e dua na veiwekani kei na Tamada Vakalomalagi kei Jisu Karisito? E vukei keda vakacava o Jisu Karisito meda toro voleka yani Vua kei na Tamana? Vakayaloqaqataki ira na lewe ni kalasi se kuoramu mera wilika na ivolanikalou ena “iVurevure Veitokoni” me vukea nodra sauma na taro oqo. Ena yaga vei ira na itabagone mera vulica vakaisa na veitikina oqo ka wasea na veika era sa vulica.

• E sega ni dua e voleka cake vua na Kalou na Tamada mai vua na Luvena Lomani, o Jisu Karisito. Na cava eda vulica mai vua na iVakabula me baleta na toro voleka vua na Kalou? Sa rawa kina kalasi kei na lewe ni kuoramu mera vakasamataka vakatitobu na taro oqo ni ra wilika na Luke 22:41–43; Joni 6:38; 17:3, 20–23; 3 Nifai 11:11; Vunau kei na Veiyalayalati 50:43. Eda na yaco vakacava meda duabau vata kei na Tamada Vakalomalagi kei Jisu Karisito?

• Ena nona itukutuku “Na Noda iVakabula Yadua,” a nanuma lesu o Elder Michael John U. Teh e dua na gauna a qai kila kina, “Na veika au kila tu me baleta na iVakabula e bibi vakalevu cake sara mai na levu ni noqu kilai Koya dina” (Liaona,, Me 2021, 99). Sa rawa mo kerea na nomu kalasi se kuoramu mera veivosakitaka na duidui ni nodra kila na veika baleti Jisu Karisito kei na nodra kilai Koya vakaidina. E rawa ni ra veivosakitaka na veika era sa cakava tiko me ra kila na veika me baleti Koya kei na veika era sa cakava tiko me ra kilai Koya vakaidina sara. Sa rawa nira qai vakasaqaqara ena tiki eso ni itukutuku nei Elder Teh me ra kunea kina na ivakasala a solia o koya me baleta na nona yaco me mai kila vakaidina sara na iVakabula. Sa vakalougatataki vakacava na noda bula ena noda vakasaqara meda kilai Koya?

• Ena vidio oqo “He Knows Me,” e rua na itabagone mai Ghana e vakamacalataka na nodrau sasaga me rau toro voleka vua na Kalou. Sa rawa kina lewe ni kalasi se kuoramu mera cakava e dua na lisi ni veivakasama eso me baleta na sala mera vakavinakataka cake kina na nodra veiwekani kei na Tamada mai Lomalagi. Sureti ira me ra wasea e dua na ka mai na nodra lisi. Kevaka e rawa, era na marautaka beka me ra cakava na nodra vidio lekaleka me vakamacalataka na sala era toro voleka kina vua na Kalou.

era vulica tiko na ivolanikalou na goneyalewa

Ni yaco me da kila na iVakabula ka muria na Nona ivunau, eda na tiko ga ena Nona loloma (raica na Joni 15:10).

Cakacaka ena Vakabauta

Vakauqeti ira na lewe ni kuoramu se kalasi me ra vakasamataka vakatitobu ka vola na cava era na cakava mera vakayacora kina na veivakauqeti era ciqoma nikua. Kevaka era vinakata, e rawa nira wasea na nodra vakasama. Sureti ira mera vakasamataka na sala ena vaqaqacotaka kina na nodra veiwekani kei na Tamada Vakalomalagi kei Jisu Karisito na nodra cakacakataka na nodra veivakauqeti.

iVurevure Veitokoni

• Joni 14:6; 1 Timoci 2:5–6; Jekope 4:11; Mosaia 3:19; Vunau kei na Veiyalayalati 88:63; Mosese 6:52

Veivakavulici ena iVakarau ni iVakabula

A vakavakarau na iVakabula kina Nona ilesilesi ni veiqaravi e vuravura ena masu kei na lolo me rawa ni voleka kina vei Tamana (raica na Maciu 4:1–2; Luke 4:1–2). Nio vakavakarau mo veivakavulici, taura na gauna mo vakasaqara na veidusimaki ni Tamada Vakalomalagi, baleta nio vakavulici ira tiko na Luvena!