vosa tiko o Pita na Apositolo vei ira na tamata

Ni oti na Nona Tucaketale, a liutaka na Nona Lotu na iVakabula mai vei iratou na Nona Apositolo, oka kina o Pita.

9 ni Jiulai

E Liutaka Vakacava o Jisu Karisito na Nona Lotu?

Cakacaka 1–5

ivakatakilakila ni veivakasalataki vata

Veivakasalataki Vata

Me liutaka dua na lewe ni mataveiliutaki ni kuoramu se kalasi; me rauta ni 10–20 na miniti

Ena itekivu ni soqoni, cavuta vata na Itoko ni Goneyalewa se na Itoko ni Kuoramu ni Matabete i Eroni. Qai liutaka e dua na veivosaki me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro e ra se nomu taro vakai iko (raica na iVoladusidusi Raraba, 10.2, 11.2). Tuvana na sala mo cakava na veika sa veivosakitaki.

• Bulataka na kosipeli. Na ulutaga cava soti eratou sa veitalanoataka na matabisopi ena noda bose ni matabose ni itabagone ni tabanalevu? Na cava eda rawa ni cakava vakalasi se vakuoramu ka yavutaki ena veitalanoa oqori?

• Nodra vukei o ira era gadreva tu na veivuke. Eda na dodoliga yani vakacava vei ira na tamata ena sala vaKarisito ni da raica e dua na gagadre ka sega ni kila na ka meda kaya?

• Sureta na tamata kecega mera ciqoma na kosipeli. Na cava eda sa kunea ena kosipeli i Jisu Karisito e kauta mai vei keda na reki? E rawa vakacava nida wasea na reki oqori vei ira tale eso?

• Vakaduavatataki ni matavuvale me tawamudu. Na cava eda cakava tiko me kunei kina na yacadra na noda qase e liu era gadreva tu na cakacaka vakalotu ni valetabu? Na cava eda rawa ni cakava meda vukei ira tale eso mera kunea na yacadra na nodra qase e liu?

Ena itinitini ni lesoni, ke veiganiti, cakava na veika oqo:

• Vakadinadinataka na ivakavuvuli eso e sa vakatavulici.

• Vakananumi ira na lewe ni kuoramu se kalasi me baleta na ituvatuva kei na veisureti e caka ena gauna ni soqoni.

ivakatakilakila ni vakavulici ni ivunau

Vakavulica na iVunau

Liutaki mai vua e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

E dua na ka meda kila ni Lotu e vinaka, ni sa vakavulica na Lotu na ivakavuvuli dina, se na Lotu e rawa ni vukei iko mo tamata vinaka cake. E dua tale na ka meda kila ni Lotu nikua sa Lotu dina i Jisu Karisito, a tauyavutaka o Koya ka liutaki mai Vua ka tomani tikoga mai vua e dua na parofita bula. Na ivola ni Cakacaka e solia e levu na ivakadinadina ni iVakabula e vakaitavi vakavoleka sara ena liutaki ni Nona Lotu. Nio vulica na wase e 1–5, vakaraica na ivakadinadina oya, ka vakasamataka vakatitobu na sala o kila kina ni tomana tikoga o Koya me liutaka na Nona Lotu nikua. E sa vakalougatataki iko vakacava na kilaka oqo?

Era sa vakadinadinataka beka na itabagone o vakavulica ni Lotu era lewena tiko sa liutaka tiko na iVakabula vakai Koya? Ena vakalougatataki ira vakacava na ivakadinadina vakaoqo? O na vukei ira me rawata se vakaqaqacotaka na nodra ivakadinadina? Me ikuri ni vulici ni Cakacaka 1–5, sa rawa talega mo wilika na itukutuku nei Elder Quentin L. Cook “Na Veivakalougatataki ni iVakatakila Tomani Tiko vei ira na Parofita kei na iVakatakila Yadua me Dusimaka Noda Bula” (Liaona, Me 2020, 96–100).

Vulica Vata

Me tekivu na nomuni veivosaki, sa rawa mo vola ena papa ni volavola ni liutaka o Jisu Karisito na Nona Lotu ena ivakatakila vei iratou na Nona Apositolo. Sa rawa kina lewe ni kalasi se kuoramu mera wasea e dua na ka era sa kunea ena nodra vulica na Cakacaka 1–5 ka tokona na itukutuku oqo. (Ke ganita, sa rawa mo dusimaki ira ki na Cakacaka 1:1–8; 2:36–39; 4:1–13, 31–33.) Na ivakadinadina cava eda raica nio Jisu Karisito e liutaka tiko na Nona Lotu ena sala vata ga nikua? Na vei itaviqaravi ka koto tarava ena rawa ni vukei ira na gone o vakatavulica me vaqaqacotaka na nodra vakabauta na dina bibi oqo.

• E rawa nio vakarautaka e vica na taro vakaoqo: E liutaka vakacava o Jisu Karisito na Nona Lotu? Eda na vakalevutaka vakacava na noda vakabauta ni sa liutaka tiko o Jisu Karisito na Nona Lotu? Na cava na vuna o nuitaki ira kina na parofita kei na apositolo ni Turaga? Solia vei ira yadua na lewe ni kalasi se kuoramu e dua na taro, ka sureti ira mera vakasamataka vakatitobu na taro ka vakasamataka na ivolanikalou cava e rawa ni vukei ira mera sauma (kevaka e gadrevi, raica na “iVurevure Veitokoni” me baleta eso na vakasama). Qai solia na gauna kina tamata yadua me wasea ka veivosakitaka na veika era sa vulica.

• Me vukea na kalasi se kuoramu me raica na sala e liutaka kina na Turaga na Nona Lotu, sa rawa mo sureti ira mera railesuva na imatai ni wase ni itukutuku nei Elder Quentin L. Cook “Na Veivakalougatataki ni iVakatakila Tomani Tiko vei ira na Parofita kei na iVakatakila Yadua me Dusimaka Noda Bula.” Sa rawa kina lewe ni kalasi se kuoramu yadua me wasea e dua na ka mai na itukutuku e vukei ira mera kila ni o Jisu Karisito e yavala ka liutaka tiko vakaikoya na Nona Lotu. Na veivakararamataki cava tale eso eda kunea ena ivolanikalou ena ruku ni “iVurevure Veitokoni”?

• E rawa talega ni veivuke vei ira na itabagone mera vulica eso tale na ka me baleta na sala e liutaka tiko kina na Turaga na nomu tabanalevu. Sa rawa mo kerei ira na itabagone mera wasea na ivakaraitaki ni sala e dusimaki ira tiko kina na iliuliu yadudua ni tabanalevu na Turaga, oka kina na peresitedi ni kalasi se kuoramu. Ena loma ni macawa ni bera na kalasi, sa rawa mo kerea eso na iliuliu ni tabanalevu mera wasea—vakai ira se ena sala vakalivaliva—na veika era sotava ka vakaraitaka na sala e dusimaki ira kina na Turaga. Sa rawa kina lewe ni kalasi se kuoramu mera raica na ikuri ni ivakaraitaki ena itukutuku nei Peresitedi Henry B. Eyring “Na Turaga sa Liutaka Tiko na Nona Lotu” (Liaona, Nove. 2017, 81–84). Na cava e bibi kina meda vakabauta ni Turaga e vakauqeti ira tiko na noda iliuliu ni tabanalevu?

• Eso era nanuma ni kevaka eda tamata vinaka ka cakava na veika vinaka, eda sega ni gadreva e dua na lotu. Sa rawa mo tarogi ira na itabagone se ra na sauma vakacava na ka oqo. Ena nona itukutuku “Na Gagadre me Dua na Lotu” (Liaona, Nove. 2021, 24–26), o Peresitedi Dallin H. Oaks e solia kina e vica na vuna era bibi kina na lotu, oka kina na Lotu vakalesui mai ni Turaga. Sa rawa mera vakasaqara vakaisa na itabagone na itukutuku oqo, vakailawalawa lalai, se vakalasi se kuoramu ka wasea na veika era sa kunea.

era soqoni tiko na cauravou

Na Turaga e dusimaka na Nona Lotu ena ivakatakila, oka kina na mataveiliutaki ni kalasi kei na kuoramu.

Cakacaka ena Vakabauta

Vakauqeti ira na lewe ni kuoramu se kalasi mera vakasamataka vakatitobu ka vola na cava era na cakava mera vakayacora kina na veivakauqeti era ciqoma nikua. Kevaka era vinakata, e rawa ni ra wasea na nodra vakasama. Sureti ira mera vakasamataka na sala ena vaqaqacotaka kina na nodra veiwekani kei na Tamada Vakalomalagi kei Jisu Karisito na nodra cakacakataka na nodra veivakauqeti.

iVurevure Veitokoni

• Efeso 2:19–20; 4:11–15; Vunau kei na Veiyalayalati 1:38; 21:1–6; Yavu ni Vakabauta 1:5–6

Veivakavulici ena iVakarau ni iVakabula

Ni gadrevi mo sureta na Yalo ena nomu veivakavulici, vakayaloqaqataki ira eso mera wasea nodra ivakadinadina baleta na dina e veivosakitaki tiko.