temipale

Temipale Indianapolis Indiana

27 ʻAokosi

Te u Fakahaaʻi Fēfē ʻOku ou ʻIloʻi Ko Hoku Sinó ko ha Meʻaʻofa Toputapu ia mei he ʻOtuá?

1 Kolinitō 1–7

fakaʻilonga fealeaʻaki fakatahá

Fealeaʻaki Fakataha

Tataki ʻe ha mēmipa ʻo e kau palesitenisī fakakalasí pe fakakōlomú; fakafuofua ki ha miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kau Finemuí pe ko e Kaveinga ʻo e Kōlomu ʻo e Lakanga Taulaʻeiki Faka-ʻĒloné Hili iá, tataki leva ha fealeaʻaki fekauʻaki mo e ngāue ʻo e fakamoʻuí mo e hakeakiʻí ʻo fakaʻaongaʻi ha fehuʻi ʻe taha pe lahi ange mei he ngaahi fehuʻi ʻi laló pe ngaahi fehuʻi pē ʻaʻau (vakai, Tohi Tuʻutuʻuni Fakakātoa, 10.2, 11.2). Palani ha ngaahi founga ke ngāueʻi ai e meʻa ne mou aleaʻí.

• Moʻui ʻaki e ongoongoleleí. Ko e hā ha ngaahi aʻusia kimuí ni kuo nau ʻomi kitautolu ke tau ofi ange ki he Tamai Hēvaní mo Sīsū Kalaisí?

• Tokanga kiate kinautolu ʻoku faingataʻaʻiá. ʻOku ʻi ai nai ha taha ne toki hiki foʻou mai ki hotau uōtí pe toki kau mai ki he Siasí? Te tau tokoniʻi fēfē nai kinautolu ke nau ongoʻi ʻoku talitali lelei kinautolu?

• Fakaafeʻi ʻa e tokotaha kotoa pē ke nau maʻu e ongoongoleleí. Ko e hā ha ngaahi ʻekitivitī ʻoku ʻamanaki ke fakahoko ʻe lava ke tau fakaafeʻi hotau ngaahi kaungāmeʻá ke nau omi ki ai?

• Fakatahaʻi ʻa e ngaahi fāmilí ke taʻengata. Ko e hā ha ngaahi ngāue ʻe lava ke tau fakahoko ke lekooti ʻetau ngaahi hisitōlia fakatāutahá?

ʻI he fakaʻosinga ʻo e lēsoní, fakahoko ʻa e ngaahi meʻa ko ʻení, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kalasí pe kōlomú fekauʻaki mo e ngaahi palani mo e fakaafe naʻe fakahoko ʻi he lolotonga e fakatahá.

fakaʻilonga akoʻi e tokāteliné

Akoʻi e Tokāteliné

Tataki ʻe ha taki kakai lalahi pe toʻu tupu; fakafuofua ki ha miniti ʻe 25–35

Teuteuʻi Fakalaumālie Koe

ʻI ha faʻahinga tūkunga pē, ʻoku hangē ʻoku ʻiloa e Kāingalotu ʻo e Siasí ʻi he meʻa ʻoku ʻikai ke tau faí. ʻOku fekauʻaki ha konga lahi ʻo e ngaahi meʻa ko ia ʻoku “ʻikai” ke tau faí mo e founga ʻoku tau tokangaʻi ʻaki hotau sino fakamatelié. ʻOku ʻi mui ʻi he ngaahi fili takitaha ko ia fekauʻaki mo e meʻa ke faí ha ngaahi moʻoni taʻengata—ko e meʻa ʻoku tau ʻiló. ʻI he taimi ʻoku tataki ai ʻe he ngaahi moʻoni taʻengatá ʻetau ngaahi filí, ʻe faingofua, fakafiefia mo tuʻuloa ange ai e ngaahi fili ko iá. ʻOku tokoni foki e ngaahi moʻoni taʻengatá ke tau fakamatalaʻi ʻetau ngaahi filí ki hotau ngaahi kaungāmeʻá. Mahalo ʻoku ʻikai ngata pē ʻi hono ʻiloʻi kitautolu ʻi he meʻa ʻoku ʻikai ke tau faí, ka ʻe lava ke toe ʻiloʻi lelei ange kitautolu ʻi he meʻa ʻoku tau ʻiló.

Fakakaukau ki he ngaahi moʻoni taʻengata ʻokú ke ʻilo fekauʻaki mo hotau sino fakamatelié—ko e hā ʻoku tau maʻu [ha sinó], ongo ʻoku maʻu ʻe he ʻOtuá [fekauʻaki mo hotau sinó], mo e ongo ʻokú Ne finangalo ke tau maʻu [fekauʻaki mo hotau sinó]. Kuo tāpuekina fēfē koe ʻe hono ʻiloʻi e ngaahi moʻoni ko ʻení mo tākiekina hoʻo ngaahi filí? ʻE tāpuekina fēfē ʻe he ʻilo ko ʻení e kau mēmipa hoʻo kalasí pe kōlomú? ʻI hoʻo fakalaulauloto ki he meʻá ni, lau ʻa e Sēnesi 1:27; 1 Kolinitō 6:19–20; pea mo e fakamatala ʻa Palesiteni Lāsolo M. Nalesoni “Ko Ho Sinó: Ko ha Meʻaʻofa Fakaofo ia ke Mataʻikoloa ʻAki” (Liahona, ʻAokosi 2019, 50–55).

Ako Fakataha

ʻI hono ako ʻe he kau mēmipa hoʻo kalasí pe kōlomú e folofolá he uike ní, mahalo naʻa nau fakakaukau ki he ngaahi akonaki ʻa Paula fekauʻaki mo hotau sinó ʻi he 1 Kolinitō 6. Ko e founga ʻe taha ke fakaafeʻi ai kinautolu ke vahevahe e ngaahi fakakaukau ko iá ko hono ʻoange kiate kinautolu takitaha ha laʻipepa pea kole ange ke nau hiki ha ngaahi tali ʻe tolu ki he fehuʻi “ʻOku tatau fēfē hotau sinó mo e ngaahi temipalé?” Poupouʻi kinautolu ke lau ʻa e 1 Kolinitō 6:19–20 ʻi heʻenau fakalaulauloto ki he fehuʻi ko ʻení. ʻE lava leva ke nau vahevahe ʻenau ngaahi talí mo e niʻihi kehé. ʻOku takiekina fēfē ʻe he ngaahi akonaki ʻa e Fakamoʻuí fekauʻaki mo hotau sinó ʻa e ngaahi fili ʻoku tau faí? Ko ha ngaahi fakakaukau ʻeni ki ha ngaahi ʻekitivitī kehe ʻi he tefitó ni; fili mei he ngaahi meʻá ni, pe palani haʻo ʻekitivitī pē ʻaʻau.

• Kapau ʻokú ke fie aleaʻi lahi ange fekauʻaki mo hono fakafehoanaki ʻe Paula ʻa e sinó mo e temipalé, ʻe lava ke ke fakaʻaliʻali ha ngaahi fakatātā ʻo ha ngaahi temipale kehekehe. ʻE lava ke ke maʻu ha ngaahi fakatātā ʻi he temples.ChurchofJesusChrist.org. ʻE lava ke aleaʻi ʻe he kau mēmipa ʻo e kalasí pe kōlomú ha ngaahi faikehekehe ʻoku nau fakatokangaʻi ʻi he ngaahi temipale ko ʻení, fakataha mo ha ngaahi meʻa ʻoku nau faitatau ai. Te nau lava foki ʻo talanoa fekauʻaki mo e ongo ʻoku nau maʻu ʻi he taimi ʻoku nau ʻi he temipalé ai. Ko e hā ʻokú ne ʻai e temipalé ke hoko ko ha feituʻu fakalaumālie mo toputapú? Te ke lava leva ʻo poupouʻi e kalasí pe kōlomú ke nau fakafekauʻaki e ngaahi meʻa kuo nau aleaʻi fekauʻaki mo e temipalé ki hotau sinó. ʻE fehokotaki fēfē e ngaahi akonaki fekauʻaki mo e ngaahi temipalé ʻi he Tokāteline mo e Ngaahi Fuakava 97:15–16; 109:8, 12 mo hotau sino fakamatelié?

• Mahalo kuo maʻu ʻe he kau mēmipa ʻo hoʻo kalasí pe kōlomú—pe te nau maʻu—ha ngaahi faingamālie ke fakamatalaʻi e ʻuhinga ʻoku nau muimui ai ki he ngaahi akonaki ʻa e Fakamoʻuí fekauʻaki mo hono tokangaʻi honau sinó. ʻE lava ke ke ʻeke ange ki hanau niʻihi pe ko e hā te nau lea ʻakí kapau naʻe fehuʻi ange ʻe ha taha pe ko e hā ʻoku ʻikai ke nau inu kava mālohi, tī, pe kofi aí pe ko e hā ʻoku ʻikai ke nau tui ai ha ʻū vala ʻe niʻihí. Ko e hā ha ngaahi moʻoni mei he ongoongolelei ʻo Sīsū Kalaisí ʻokú ne liliu e anga ʻo ʻetau tauhi hotau sinó? ʻE lava ke kumi ʻe he kau mēmipa ʻo e kalasí pe kōlomú ha niʻihi ʻo e ngaahi moʻoni ko ʻení ʻi he “Ngaahi Maʻuʻanga Tokoni Poupoú.”

• Ke tokoni kiate kinautolu ʻokú ke akoʻí ke fakaloloto ʻenau fakaʻapaʻapa ki hotau ngaahi sino fakaofó, te ke lava ʻo huluʻi e vitiō “Fakatupu Maʻongoʻonga Taha ʻa e ʻOtuá” (vakai foki, Russell M. Nelson, “Ko Ho Sinó, Ko ha Meʻaʻofa Fakaofo ia ke Mataʻikoloa ʻAki,” 50–55). Ko e hā ʻoku finangalo e Tamai Hēvaní mo Sīsū Kalaisi ke tau ongoʻi fekauʻaki mo hotau sinó? ʻE lava foki ke mou aleaʻi e ngaahi founga ʻoku feinga ai ʻa Sētane ke fakalotoʻi kitautolu ke tau taʻefakaʻapaʻapaʻi mo fehiʻa hotau sinó. Ko e hā te tau lava ʻo fai ke ikunaʻi ai ʻene ngaahi loí mo e ʻahiʻahí? Ko e hā ha ngaahi moʻoni te ne tokoniʻi kitautolu? ʻE ala tokoni ha niʻihi ʻo e ngaahi maʻuʻanga fakamatala ʻi he “Ngaahi Maʻuʻanga Tokoni Poupoú.”

toʻu tupu ʻoku nau lele

Ko hotau sinó ko ha ngaahi meʻaʻofa ia mei he ʻOtuá, pea ʻoku tokoni e ngaahi moʻoni ʻo e ongoongoleleí ke tau tokangaʻi ai kinautolu.

Ngāue ʻi he Tui

Poupouʻi e kau mēmipa ʻo e kalasí pe kōlomú ke nau fakalaulauloto mo lekooti ʻa e meʻa te nau fakahoko ke ngāueʻi ai e ngaahi ongo ne nau maʻu ʻi he ʻaho ní. ʻE lava ke nau vahevahe ʻenau ngaahi fakakaukaú, ʻo kapau te nau loto ki ai. Fakaafeʻi ke nau fakakaukau ki he founga ʻe fakamālohia ai ʻe heʻenau ngaahi ueʻi fakalaumālié ʻa honau vā fetuʻutaki mo e Tamai Hēvaní mo Sīsū Kalaisí.

Ngaahi Maʻuʻanga Tokoni Poupoú

• Sēnesi 1:27; 1 Kolinitō 6:19–20; ʻAlamā 11:42–44; 40:23; Tokāteline mo e Ngaahi Fuakava 89; 130:22

• “Ko e Fāmilí: Ko ha Fanongonongo ki he Māmaní,” tautautefito ki he ʻuluaki palakalafi ʻe tolú

• “Ko Hoku Temipale Mei he ʻEikí,” Tohi Hiva ʻa e Fānaú, 73

• Ngaahi talanoa fekauʻaki mo hotau sino fakamatelié ʻi he New Era pe Liahonaʻo ʻAokosi 2019

• Naʻe akonaki ʻa Palesiteni Lāsolo M. Nalesoni: “Kuo hanga ʻe he ʻOtuá ʻi Heʻene foaki mai e meʻaʻofa ʻo ha sinó ʻo fakaʻatā, ke tau fakahoko ha sitepu mahuʻinga ke tau tatau ange ai mo Ia. ʻOku mahino ʻeni kia Sētane. … ʻI heʻene peheé, ko e lahi taha pe kotoa ʻo e ngaahi ʻahiʻahi ʻokú ne tuku ʻi hotau halá, ʻoku nau fakatupu ke tau ngaohikovia hotau sinó pe sino ʻo e niʻihi kehé. … Ko ho sinó ko ho temipale, naʻe fakatupu ke ne kofukofuʻi ho laumālie taʻengatá [vakai, 1 Kolinitō 3:16–17; 6:18–20]. ʻOku mahuʻinga ke ke tokangaʻi e temipale ko iá. ʻOku ou fehuʻi atu leva, … ʻokú ke tokanga ange nai ki hono fakavalaʻi mo teuteuʻi ho sinó ke matamatalelei ki māmani kae ʻikai ke ke fakahōifua ki he ʻOtuá? ʻOku ʻoatu ʻe hoʻo tali ki he fehuʻí ni ha pōpoaki hangatonu kiate Ia fekauʻaki mo hoʻo ongo ki Heʻene meʻaʻofa taʻe-fakatataua kiate koé” (“Te Tau Lava ʻo Fai Lelei Ange pea Toe Lelei Angé,” Liahona, Mē 2019, 68).

• Naʻe akoʻi ʻe ʻEletā D. Toti Kulisitofasoni: “He ʻikai ongoʻi ʻe kinautolu ʻoku tui ko hotau sinó ko e ola pē ia ʻo ha meʻa ne hoko noa peé, ke nau taliui ki he ʻOtuá pe ha taha pē ki he meʻa ʻoku nau faí pe ki honau sinó. Ka ko kitautolu ʻoku maʻu e fakamoʻoni ʻo e moʻui kimuʻa he māmaní, moʻuí ni, pea mo e taʻengatá hili ʻa e maté, ʻoku tau ʻilo ʻoku ʻi ai hotau fatongia ki he ʻOtuá pea ki Heʻene ngāue nāunauʻia hono fakatupu e sinó. … ʻI he hoko hotau sinó ko e meʻangāue hotau laumālié, ʻoku mahuʻinga ke tau tokanga ʻaki e lelei tahá ki hotau sinó. ʻOku totonu ke tau fakatapui hono mālohí ke tokoni pea ʻunuaki ʻaki e ngāue ʻa Kalaisí” (“Fakakaukauloto ki ha Moʻui Kuo Fakatapui,” Liahona, Nōvema 2010, 17).

Ko e Faiako ʻi he Founga ʻa e Fakamoʻuí

Tokanga kiate kinautolu ʻi hoʻo kalasí pe kōlomú ʻoku ʻi ai honau ngaahi fakangatangata fakaesinó pe ngaahi faingataʻaʻia fakaesino kehé. Tokoni ke mahino kiate kinautolu ʻoku mahuʻinga ʻa e sino ʻo e tokotaha kotoa pē pea ʻoku taau ke fakaʻapaʻapaʻi. ʻE lava ke maʻu ʻe he ʻofa faka-Kalaisi ʻokú ke fakahaaʻi ki he taha kotoa peé ha ivi tākiekina mālohi ʻi he founga ʻoku fevakaiʻaki ai e kau mēmipa ʻo e kalasí pe kōlomú pe kiate kinautolu peé.