10 Sepitema

Te u Maʻu Fēfē ha Fiemālie ʻia Sīsū Kalaisi ʻi he Taimi ʻOku Pekia ai ha Taha ʻOku Ou ʻOfa ai?

1 Kolinitō 14–16

Fealeaʻaki Fakataha

Tataki ʻe ha mēmipa ʻo e kau palesitenisī fakakalasí pe fakakōlomú; fakafuofua ki ha miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kau Finemuí pe ko e Kaveinga ʻo e Kōlomu ʻo e Lakanga Taulaʻeiki Faka-ʻĒloné. Hili iá, tataki leva ha fealeaʻaki fekauʻaki mo e ngāue ʻo e fakamoʻuí mo e hakeakiʻí ʻo fakaʻaongaʻi ha fehuʻi ʻe taha pe lahi ange mei he ngaahi fehuʻi ʻi laló pe ngaahi fehuʻi pē ʻaʻau (vakai, Tohi Tuʻutuʻuni Fakakātoa, 10.2, 11.2). Palani ha ngaahi founga ke ngāueʻi ai e meʻa ne mou aleaʻí.

• Moʻui ʻaki e ongoongoleleí. ʻE tokoni fēfē nai ʻa e tafoki ki he ʻEikí ke tau matatali e ngaahi faingataʻá mo e ngaahi ʻahiʻahí?

• Tokanga kiate kinautolu ʻoku faingataʻaʻiá. Ko hai ʻoku tau ʻiloʻi ʻokú ne fie maʻu ʻetau lotú mo e anga fakakaumeʻá?

• Fakaafeʻi ʻa e tokotaha kotoa pē ke nau maʻu e ongoongoleleí. Ko e hā ha ngaahi palani ke vahevahe e ongoongoleleí kuo aleaʻi ʻi he ngaahi fakataha alēlea fakauooti ʻa e toʻu tupú? ʻE kau atu fēfē nai ki ai ʻetau kalasí pe kōlomú?

• Fakatahaʻi ʻa e ngaahi fāmilí ke taʻengata. ʻE fakamālohia fēfē nai ʻe he ngāue ki he hisitōlia fakafāmilí ʻa hotau ngaahi vā fetuʻutaki mo e Tamai Hēvaní mo Sīsuú?

ʻI he fakaʻosinga ʻo e lēsoní, fakahoko e ngaahi meʻa ko ʻení, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kalasí pe kōlomú fekauʻaki mo e ngaahi palani mo e fakaafe naʻe fakahoko ʻi he lolotonga e fakatahá.

Akoʻi e Tokāteliné

Tataki ʻe ha taki kakai lalahi pe toʻu tupu; fakafuofua ki ha miniti ʻe 25–35

Teuteuʻi Fakalaumālie Koe

ʻE malava ke fakamamahi ʻa e taimi ʻoku mate ai ha taha ʻoku tau ʻofa ai. ʻOku ʻomi ʻe he mavahe mei he niʻihi ʻoku tau ʻofa aí ha tēngihia mo ha mamahi lahi. Ka naʻe akoʻi ʻe Paula ʻe iku ʻo “folo hifo ʻa e maté ʻe he mālohí” (1 Kolinitō 15:54) koeʻuhí ko e Toetuʻu ʻa Sīsū Kalaisí. ʻI hono fakalea ʻe tahá, ko e “huhu ʻo e maté”—ko e mamahi mo e siva ʻa e ʻamanakí ʻoku tau ongoʻi ʻi he matelié—“ʻoku folo hifo … [ia] ʻia Kalaisi” (Mōsaia 16:7–8; vakai foki, 1 Kolinitō 15:54–57).

ʻE aʻusia ʻe he tokotaha kotoa pē ʻi ha taimi ʻi heʻenau moʻuí, ʻa e mole ʻo hanau ʻofaʻanga. Te ke tokoniʻi fēfē nai ʻa kinautolu ʻokú ke akoʻí ke nau maʻu ha fiemālie lolotonga e ngaahi taimi faingataʻa ko iá ʻi heʻenau tui kia Sīsū Kalaisí? Fakakaukau ki he fehuʻi ko ʻení ʻi hoʻo teuteu ke faiakó ʻaki haʻo lau ʻa e 1 Kolinitō 15, Mōsaia 16:7–9, mo e Tokāteline mo e Ngaahi Fuakava 42:44–46.

Ako Fakataha

Te ke lava ʻo fakaafeʻi e kau mēmipa ʻo e kalasí pe kōlomú ke vahevahe ha taimi ne nau ongoʻi ai ha huhu [ʻoku mamahi]. Te ke lava leva ʻo fehuʻi ange pe ʻoku nau pehē ko e hā naʻe fakaʻaongaʻi ai ʻe Paula e foʻi lea “huhú” ke fakamatalaʻi ʻaki ʻa e maté (vakai, 1 Kolinitō 15:54–56). Tuku ange ha ngaahi miniti siʻi ke nau toe vakaiʻi ʻa e 1 Kolinitō 15 pea vahevahe e ngaahi moʻoni ʻoku nau maʻu fekauʻaki mo e founga ʻoku ikunaʻi ai e huhu ʻo e maté. Fakakaukau leva ki ha ngaahi ʻekitivitī hangē ko ia ʻi laló ke tokoni ke mahino lelei ange ki he toʻu tupú e founga ʻe lava ke fakafiemālieʻi ai kitautolu ʻe he Fakamoʻuí ʻi he taimi ʻoku pekia ai ha taha ʻoku tau ʻofa ai.

• ʻE lava ke ke vahevahe e kau mēmipa ʻo e kalasí pe kōlomú ke nau tauhoa pea kole ki he hoa takitaha ke nau toe vakaiʻi fakataha ha niʻihi ʻo e ngaahi potufolofola ʻi he “Ngaahi Maʻuʻanga Tokoni Poupoú.” ʻE lava ke nau hiki ha ngaahi tali ki ha fehuʻi hangē ko e “Ko e hā ha ngaahi moʻoni mahuʻinga ʻoku ou ʻamanaki ke manatu ki ai ʻi he mole ʻa ha taha ʻoku ou ʻofa ai?” Kole ange ke nau fakakau ha fakamatala mei he ngaahi potufolofolá ʻi heʻenau talí. Fakaafeʻi leva kinautolu ke nau vahevahe mo e kalasí e ngaahi moʻoni ʻoku mahuʻingamālie taha kiate kinautolú pea mo hono ʻuhingá.

• Fakakaukau ke toe vakaiʻi fakataha ha fakamatala mei ha pōpoaki konifelenisi lahi ʻo fakahaaʻi e founga naʻe maʻu ai ʻe ha taha ha ʻamanaki lelei ʻia Sīsū Kalaisi ʻi he mate ʻa ha taha ne nau ʻofa ai. ʻOku kau ʻi he ngaahi sīpingá ʻa e pōpoaki ʻa Sisitā Leina I. ʻApeto “ʻOku ʻIkai ha Mālohi ʻo e Faʻitoká” (Liahona, Mē 2021, 85–86) pe pōpoaki ʻa ʻEletā S. Maʻake Paame, “ʻE Liliu ʻEtau Mamahí ki he Fiefiá” (Liahona, Mē 2021, 88–89). Mahalo te ke ongoʻi ke vahevahe haʻo aʻusia pē ʻaʻau pe fakaafeʻi e toʻu tupú ke vahevahe e founga ne nau maʻu ai ha fakafiemālie mo ha ʻamanaki lelei ʻia Sīsū Kalaisi hili e pekia ʻa ha taha ne nau ʻofa ai.

• Hili hono fakakaukauʻi e ngaahi fie maʻu ʻa e kau mēmipa hoʻo kalasí pe kōlomú, huluʻi ha foʻi vitiō ʻe taha pe lahi ange ʻi he “Ngaahi Maʻuʻanga Tokoni Poupoú.” Fakaafeʻi ‘a e toʻu tupú ke vahevahe ʻenau ngaahi fakakaukaú. ʻOku liliu fēfē ʻe heʻetau ʻiloʻi naʻe toetuʻu ʻa Sīsū Kalaisí ʻa e anga ʻo ʻetau vakai ki he maté? Fakaafeʻi e kau mēmipa hoʻo kalasí pe kōlomú ke vahevahe ʻenau fakamoʻoni fekauʻaki mo e Fakamoʻuí mo ʻEne Toetuʻú pea mo e founga ʻoku ʻomi ai ʻe he ʻilo ko ʻení ha ʻamanaki lelei kiate kinautolú.

• ʻOku fakamatalaʻi ʻi heSione 11 ʻa e aʻusia ʻa e Fakamoʻuí ʻi he pekia ha taha naʻá Ne ʻofeina—ko Hono kaungāmeʻa ko Lāsalosí. Mahalo ʻe lava ke lau fakataha ʻe he kalasí pe kōlomú e veesi 1–45 , pea ʻi heʻenau laú, ʻe lava ke nau vahevahe e ngaahi meʻa ʻoku nau ako mei he sīpinga ʻa e Fakamoʻuí. Ko e hā te tau lava ʻo ako mei he fakamatala ko ʻení te ne lava ʻo fakafiemālieʻi kitautolu ʻi he taimi ʻoku mate ai ha taha ʻoku tau ʻofa ai? Te tau lava fēfē ʻo muimui ʻi he sīpinga ʻa e Fakamoʻuí ʻo “tangi fakataha mo kinautolu ʻoku tangí … pea fakafiemālieʻi ʻa kinautolu ʻoku ʻaonga ki ai ʻa e fakafiemālié”? (Mōsaia 18:9). Ko e hā ʻoku tau ako mei he Tokāteline mo e Ngaahi Fuakava 42:45–46 ʻe lava ʻo tokoni ke tau fai ʻeni?  

ʻOku ʻomi ʻe heʻetau fakamoʻoni ki he Toetuʻu ʻa Sīsū Kalaisí ha ʻamanaki lelei ʻi he taimi ʻoku mate ai ha taha ʻoku tau ʻofa ai.

Ngāue ʻi he Tui

Poupouʻi e kau mēmipa ʻo e kalasí pe kōlomú ke nau fakalaulauloto mo lekooti ʻa e meʻa te nau fakahoko ke ngāueʻi ai e ngaahi ongo ne nau maʻu ʻi he ʻaho ní. ʻE lava ke nau vahevahe ʻenau ngaahi fakakaukaú, ʻo kapau te nau loto ki ai. Fakaafeʻi ke nau fakakaukau ki he founga ʻe fakamālohia ai ʻe heʻenau ngaahi ueʻi fakalaumālié ʻa honau vā fetuʻutaki mo e Tamai Hēvaní mo Sīsū Kalaisí.

Ngaahi Maʻuʻanga Tokoni Poupoú

• ʻĪsaia 25:8; 1 Kolinitō 15:20–22; Mōsaia 16:7–9; ʻAlamā 7:11–12; 11:42–44; 22:14; 28:12–14; 40:11–12

• Dallin H. Oaks, “Ko e Hā Kuo Fai ʻe Hotau Fakamoʻuí Maʻatautolú?,” Liahona, Mē 2021, 75–77

• Moisés Villanueva, “Kuo ʻOfeina Lahi Au ʻe he ʻEikí ʻi Hoku Ngaahi ʻAhó Kotoa Pē,” Liahona, Nōvema 2021, 44–46

• Vitiō: “Kae ʻOua Ke Tau Toe Feʻiloaki” (ChurchofJesusChrist.org)

Ko e Faiako ʻi he Founga ʻa e Fakamoʻuí

ʻOku kau ʻi he faiakó ʻa e ngāue tokoni ʻi he ʻofá mo e tokoniʻi e niʻihi kehé ke nau maʻu e ngaahi tāpuaki ʻo e ongoongoleleí, pea meimei ko e tokoni ko ʻení ko e meʻa tofu pē ia ʻoku fie maʻu ʻe ha mēmipa māmālohí. ʻOku fie maʻu ke tau ngāue fakataha kotoa ke tokoniʻi ʻa kinautolu ʻoku fefaʻuhi mo ha faingataʻá, pea ʻi hoʻo hoko ko ha faiakó, ʻe lava ke ke ʻi ha tuʻunga makehe ke fai ai ha tokoni.