24 Sepitema

Te u Muimui Fēfē ki he Sīpinga ʻa e Fakamoʻuí ʻi Hono Tokoniʻi ʻa Kinautolu ʻOku Faingataʻaʻiá?

2 Kolinitō 8–13

Fealeaʻaki Fakataha

Tataki ʻe ha mēmipa ʻo e kau palesitenisī fakakalasí pe fakakōlomú; fakafuofua ki ha miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kau Finemuí pe ko e Kaveinga ʻo e Kōlomu ʻo e Lakanga Taulaʻeiki Faka-ʻĒloné. Hili iá, tataki leva ha fealeaʻaki fekauʻaki mo e ngāue ʻo e fakamoʻuí mo e hakeakiʻí ʻo fakaʻaongaʻi ha fehuʻi ʻe taha pe lahi ange mei he ngaahi fehuʻi ʻi laló pe ngaahi fehuʻi pē ʻaʻau (vakai, Tohi Tuʻutuʻuni Fakakātoa, 10.2, 11.2). Palani ha ngaahi founga ke ngāueʻi ai e meʻa ne mou aleaʻí.

• Moʻui ʻaki e ongoongoleleí. Ko e hā ʻa e meʻa naʻa tau aleaʻi ʻi he kalasi kuo ʻosí, pea ko e hā ʻa e ngaahi fakaafe pe ngāue naʻe fakahokó? Ko e hā kuo tau fakahoko ke ngāue ai ki he ngaahi fakaafe pe ngāue ko ia ne vahe maí?

• Tokanga kiate kinautolu ʻoku faingataʻaʻiá. Ko e hā ha meʻa ʻe lava ke tau fakahoko pe lea ʻaki ke tokoni kiate kinautolu ʻoku ongoʻi tuenoa pe mamaʻo mei he Tamai Hēvaní?

• Fakaafeʻi ʻa e tokotaha kotoa pē ke nau maʻu e ongoongoleleí. Ko e hā ha ngaahi founga ʻe niʻihi ʻe lava ke tau tokoni ai ki he niʻihi kehé ke nau ongoʻi ʻa e ʻofa ʻa Sīsū Kalaisí?

• Fakatahaʻi ʻa e ngaahi fāmilí ke taʻengata. Ko e hā ha ngaahi fakakaukau te tau lava ʻo fevahevaheʻaki ke tokoni ke fakamālohia hotau fāmilí?

ʻI he fakaʻosinga ʻo e lēsoní, fakahoko e ngaahi meʻa ko ʻení, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kalasí pe kōlomú fekauʻaki mo e ngaahi palani mo e fakaafe naʻe fakahoko ʻi he lolotonga e fakatahá.

Akoʻi e Tokāteliné

Tataki ʻe ha taki kakai lalahi pe toʻu tupu; fakafuofua ki ha miniti ʻe 25–35

Teuteuʻi Fakalaumālie Koe

Ko e hā ha ngaahi faingamālie ʻokú ke maʻu mo e kau mēmipa hoʻo kalasí pe kōlomú ke tokoniʻi ʻa kinautolu ʻoku faingataʻaʻia ʻi ho ʻātakaí? ʻI ha taimi naʻe faingataʻaʻia mo fie maʻu tokoni ai e Kāingalotu ʻi Selusalemá, naʻe tohi ʻa Paula ki he kakai Kolinitoó ke poupouʻi kinautolu ke nau foaki lahi, “kae ʻikai ʻi he mamahi, pe ʻi hono puleʻi: he ʻoku ʻofa ʻa e ʻOtuá ki ha foaki fiefia.” Naʻá ne palōmesi ange ʻi heʻenau fai ʻení, ʻe hanga ʻe he ʻOtuá ʻo “fakatupulekina ʻa e ngaahi meʻa lelei kotoa pē kiate [kinautolu]” koeʻuhí ke nau “faʻa fai ʻa e ngāue lelei kotoa pē” (2 Kolinitō 9:7–8).

Naʻe fakamahinoʻi ange foki ʻe Paula e sīpinga ʻa Sīsū Kalaisí, ʻ“[neongo naá Ne] mohu koloaʻia, ka naʻe hoko ʻo masiva koeʻuhí ko [kinautolu], koeʻuhí ʻi heʻene masivá ke [nau] koloaʻia ai” (2 Kolinitō 8:9). Naʻe feilaulauʻi loto-fiemālie ʻe he Fakamoʻuí e ngaahi koloa ʻo e langí koeʻuhí ke Ne lava ʻo tokoniʻi mo ngaohi kitautolu ke tau tuʻumālie ʻo taʻengata. Fakakaukau ki ha ngaahi sīpinga mei Heʻene moʻuí ʻi he taimi naʻá Ne ala atu ai ke tokoniʻi ʻa kinautolu ne nau feohí. Makehe mei hono lau e 2 Kolinitō 8–9 ʻi hoʻo teuteu ke faiakó, fakakaukau ke lau e pōpoaki ʻa Sisitā Misieli D. Kuleiki “Mata ke Mamatá” (Liahona, Nōvema 2020, 15–17).

Ako Fakataha

Ke kamata hoʻomou fealēleaʻakí, kole ki he kalasí pe kōlomú ke nau ʻai ha lisi ʻo ha niʻihi ʻo e ngaahi ʻuhinga he ʻikai tokoniʻi ai ʻe ha taha ʻa e niʻihi ʻoku faingataʻaʻiá. Ko e hā ʻoku tau ako mei he ngaahi akonaki ʻa Paula ʻi he 2 Kolinitō 8:9; 9:7–8 ʻokú ne ueʻi kitautolu ke tau fai ha meʻa lahi ange ke tokoniʻi ʻa kinautolu ʻoku faingataʻaʻiá? ʻE lava ke tokoni e ngaahi ʻekitivitī ko ʻení kiate kinautolu ʻokú ke akoʻí ke mahino ange e founga ke nau tokoni ai ki hono tokangaʻi ʻo kinautolu ʻoku nau feohí.

• Naʻe tuʻo lahi hono akoʻi ʻe he ʻEikí ʻi he folofolá ʻa e ongo ʻokú Ne maʻu ki hono tokangaʻi ʻo e masivá mo e faingataʻaʻiá. ʻOku lisi ʻi he “Ngaahi Maʻuʻanga Tokoníha konga ʻo e ngaahi sīpingá.” Ko e founga ʻe taha ke toe vakaiʻi ai e ngaahi akonaki ko ʻení ko hano vahevahe hoʻo kalasí pe kōlomú ke nau tauhoa pea kole ki he hoa takitaha ke nau ako ha niʻihi ʻo e ngaahi folofolá. Kole ange ke nau aleaʻi ʻa e meʻa ʻoku akoʻi mai ʻe he ngaahi potufolofolá fekauʻaki mo hono tokangaʻi ʻo e masivá mo e faingataʻaʻiá. Ko e hā ʻoku fuʻu mahuʻinga ai ki he Tamai Hēvaní mo Sīsū Kalaisi ʻa hono tokangaʻi ʻo e masivá mo e faingataʻaʻiá? Fakaafeʻi e toʻu tupú ke nau palani ha ngaahi founga te nau lava ai ʻo tokoniʻi fakafoʻituitui ʻa kinautolu ʻoku faingataʻaʻiá.

• ʻOku tau fuʻu femoʻuekina he taimi ʻe niʻihi ʻi he ngaahi meʻa ʻoku tau tokanga ki aí ʻo ʻikai ai ke tau fakatokangaʻi e ngaahi fie maʻu ʻa e niʻihi ʻoku tau feohí. ʻI he pōpoaki ʻa Misieli D. Kuleiki “Mata ke Mamatá,” naʻá ne fakamanatu mai ai e talanoa ʻo hono fakaʻā ʻe he ʻOtuá e fofonga ʻo ha talavou (vakai, 2 Ngaahi Tuʻi 6:15–17). Ko e hā ʻoku tau ako mei he talanoa ko ʻení? Ko e hā te tau lava ʻo ako mei he ngaahi fakamatala kehe naʻá ne vahevahe fekauʻaki mo hono fakatokangaʻi e ngaahi fie maʻu ʻa e niʻihi kehé mo tokoniʻi kinautolú? ʻE lava foki ke vahevahe ʻe he kau mēmipa ʻo e kalasí pe kōlomú ha ngaahi aʻusia ʻi ha taimi naʻe fakatokangaʻi ai ʻe ha taha ʻenau ngaahi fie maʻú pea tokoniʻi kinautolu. Ko e fē ha taimi kuo tau fakatokangaʻi ai e ngaahi fie maʻu ʻa e niʻihi kehé pea tau tokoniʻi kinautolu? Ko e hā e ongo ʻoku tau maʻu ʻi he taimi ʻoku fakahoko mai ai pe fakahoko atu ai ha ngāue fakaetauhi peheé?

• ʻOku mahino nai ki he kau mēmipa ʻo hoʻo kalasí pe kōlomú e founga ke fakahoko ai honau fatongia ke tokoni ʻi hono tokangaʻi ʻo kinautolu ʻoku faingataʻaʻiá? Fakakaukau ke aleaʻi fakataha ʻa e Mōsaia 4:16–21 mo e 18:8–10, pea pehē ki he ngaahi konga ʻoku fekauʻaki mo ia ʻi he Tohi Tuʻutuʻuni Fakakātoa (10.2.2 ki maʻá e ngaahi kōlomu ʻo e Lakanga Taulaʻeiki Faka-ʻĒloné pe 11.2.2 maʻá e kau finemuí). Ko e hā ʻoku ueʻi kitautolu ke tau fakahoko ko ha ola ʻo hono ako e ngaahi maʻuʻanga tokoni ko ʻení? Fakakaukau ke palani ha ngaahi founga te mou lava ai ʻo ngāue fakataha ke tokoniʻi ʻa kinautolu ʻoku faingataʻaʻia ʻi hoʻomou kalasí pe kōlomú, uōtí, pe koló. ʻE lava ke ʻoatu ʻe he ngaahi vitiō ʻi he “Ngaahi Maʻuʻanga Tokoni Poupoú” ha ngaahi fakakaukau. Ki ha ngaahi faingamālie ngāue tokoni ʻi homou feituʻú, vakai ki he JustServe.org.

ʻE lava ke faitāpuekina ʻe heʻetau ngāue tokoni faka-Kalaisí ʻa e moʻui ʻa kinautolu ʻoku tau feohí.

Ngāue ʻi he Tui

Poupouʻi e kau mēmipa ʻo e kalasí pe kōlomú ke nau fakalaulauloto mo lekooti ʻa e meʻa te nau fakahoko ke ngāueʻi ai e ngaahi ongo ne nau maʻu ʻi he ʻaho ní. ʻE lava ke nau vahevahe ʻenau ngaahi fakakaukaú, ʻo kapau te nau loto ki ai. Fakaafeʻi ke nau fakakaukau ki he founga ʻe fakamālohia ai ʻe heʻenau ngaahi ueʻi fakalaumālié ʻa honau vā fetuʻutaki mo e Tamai Hēvaní mo Sīsū Kalaisí.

Ngaahi Maʻuʻanga Tokoni Poupoú

• Mātiu 25:31–45; Sēmisi 1:27; Mōsaia 2:17; ʻAlamā 34:27–28; Molomona 8:35–39; Tokāteline mo e Ngaahi Fuakava 104:14–18 (Ko e mahuʻinga ʻo hono tokangaʻi ʻo e masivá mo e faingataʻaʻiá)

• Jeffrey R. Holland, “ʻIkai ko e Kau Kolekole Kotoa Pē Kitautolu?,” Liahona, Nōvema 2014, 40–42

Ko e Faiako ʻi he Founga ʻa e Fakamoʻuí

Ko e folofolá mo e ngaahi lea ʻa e kau palōfita mo e kau ʻaposetolo he ngaahi ʻaho kimui ní, ʻa e feituʻu ʻoku maʻu mei ai e ngaahi moʻoni ʻoku tau akoʻí. Fakalotoa e niʻihi ʻokú ke akoʻí ʻi he faingamālie kotoa pē, ke nau tafoki ki he folofola ʻa e ʻOtuá ke maʻu mei ai ha tataki, ngaahi tali ʻo ha ngaahi fehuʻí pea mo ha poupou.