8 ʻOkatopa

ʻE Tokoniʻi Fēfē Au ʻe he Ongoongolelei ʻo Sīsū Kalaisí ke Fakamālohia Hoku Fāmilí?

ʻEfesō

Fealeaʻaki Fakataha

Tataki ʻe ha mēmipa ʻo e kau palesitenisī fakakalasí pe fakakōlomú; fakafuofua ki ha miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kau Finemuí pe ko e Kaveinga ʻo e Kōlomu ʻo e Lakanga Taulaʻeiki Faka-ʻĒloné. Hili iá, makehe mei he fealeaʻaki fekauʻaki mo e ngaahi fiemaʻu pau ʻa e kalasí pe kōlomú, ʻe lava ke mou aleaʻi ha ngaahi ongo fakalaumālie mo ha ngaahi kaveinga mei he konifelenisi lahí. ʻE lava ke tokoni atu e ngaahi fehuʻi ko ʻení.

• Ko e hā ha ngaahi kaveinga pe pōpoaki ne makehe kiate kitautolú? Ko e hā e meʻa naʻá ne fakamālohia ʻetau tui kia Sīsū Kalaisí?

• Ko e hā e meʻa naʻá ne fakamālohia ʻetau fakamoʻoni ki he kau palōfita moʻuí? Ko e hā ne tau ongoʻi ne ueʻi kitautolu ke tau fakahoko koeʻuhí ko e meʻa ne tau ako pe ongoʻí?

• Ko e hā ʻoku fie maʻu ke tau fakahoko ko ha kalasi pe kōlomu ke tau ngāueʻi ai e faleʻi ne tau fanongoa ʻi he konifelenisi lahí?

ʻI he fakaʻosinga ʻo e lēsoní, fakahoko e ngaahi meʻa ko ʻení, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kalasí pe kōlomú fekauʻaki mo e ngaahi palani mo e fakaafe naʻe fakahoko ʻi he lolotonga e fakatahá.

Akoʻi e Tokāteliné

Tataki ʻe ha taki kakai lalahi pe toʻu tupu; fakafuofua ki ha miniti ʻe 25–35

Teuteuʻi Fakalaumālie Koe

ʻOku ʻi ai ha kakai ʻi hoʻo kalasí pe kōlomú ʻoku nau maʻu ha ngaahi fāmili mālohi mo ʻofa ʻokú ne tanumaki ʻa e tuí mo e tuʻunga fakalaumālié. Mahalo ʻoku ʻi ai ha niʻihi kehe ʻoku nau toko taha pē ʻi heʻenau feinga ke moʻui ʻaki e ongoongoleleí, pea ʻoku fehangahangai ha niʻihi mo e fekeʻikeʻí mo e loto mamahí ʻi ʻapi. Ka ʻoku ʻikai ha taha ʻi hoʻo kalasí pe kōlomú ʻoku haohaoa hono fāmilí, ʻo hao mei he ngaahi faingataʻá. Pea ʻoku lava ke maʻu ʻe he tokotaha kotoa pē ʻa e mālohi ʻo Sīsū Kalaisí, ʻa ia te ne lava ʻo fakamoʻui mo fakamālohia hono ngaahi fāmilí.

ʻOku finangalo e Fakamoʻuí ke tāpuekina e ngaahi fāmilí. ʻOkú Ne fakahoko ʻeni ʻi he taimi ʻe niʻihi, ʻo fakafou ʻi he ʻofa mo e sīpinga ʻa ha taha kei talavou ʻoku fāifeinga ke muimui kiate Ia mo moʻui ʻaki ʻEne ongoongoleleí. ʻI hoʻo teuteu ke akoʻi e toʻu tupú fekauʻaki mo e mālohi ʻoku lava ke nau maʻu mo honau fāmilí ʻo fakafou ʻia Sīsū Kalaisí, fakalaulauloto ki he ngaahi tefitoʻi moʻoni ʻi he tohi ʻa ʻEfesoó ʻe lava ʻo tokoni ke tau fakamālohia ai e ngaahi vā fetuʻutaki fakafāmilí. Te ke lava foki ʻo ako ʻa e “Ko e Fāmilí: Ko ha Fanongonongo ki Māmani” (ChurchofJesusChrist.org).

Ako Fakataha

Hili hono ʻoange ha faingamālie ki he kau mēmipa ʻo e kalasí pe kōlomú ke vahevahe ʻa e meʻa naʻe akoʻi ange ʻe he Laumālié he uiké ni ʻi heʻenau ako e tohi ʻa ʻEfesoó, kumi ha ngaahi founga ke fakafeʻiloaki ʻaki e tefito ʻo e founga ʻe lava ke tokoniʻi ai kitautolu ʻe Sīsū Kalaisi ke fakamālohia hotau ngaahi fāmilí. Hangē ko ʻení, te ke lava ʻo fakaafeʻi e toʻu tupú ke nau kumi mo vahevahe ha ngaahi potufolofola ʻi he tohi ʻEfesoó ʻoku ʻi ai ha ngaahi tefitoʻi moʻoni te tau lava ʻo fakaʻaongaʻi ke fakamālohia e ngaahi vā fetuʻutaki fakafāmilí. ʻE ala kau ai ʻa e ʻEfesō 2:19–22; 3:14–19; 4:1–3, 25–26, 29–32; 5:1–2; 6:1–4. ʻE tāpuekina fēfē ʻe he faleʻi ʻi he ngaahi veesi ko ʻení ha fāmili? Kuo hoko fēfē ʻa e Fakamoʻuí mo ʻEne ongoongoleleí ko ha tāpuaki ʻi hotau ngaahi ʻapí? Ko ha toe ngaahi ʻekitivitī ʻeni ʻoku fekauʻaki mo e tefito ko ʻení.

• Kapau te ke fie aleaʻi mo kinautolu e fekau ke “fakaʻapaʻapa ki hoʻo tamaí mo hoʻo faʻeé” (ʻEfesō 6:2), ʻe lava ke ke kamata ʻaki haʻo fehuʻi ki he kau mēmipa ʻo e kalasí pe kōlomú pe ko e hā e ʻuhinga ʻo e foʻi lea . fakaʻapaʻapa kiate kinautolú. ʻE lava ke vahevahe ʻe ha taha ʻa e ʻuhingá mei ha tikisinale pe Fakahinohino ki he Ngaahi Folofolá (scriptures.ChurchofJesusChrist.org). Fakaafeʻi e toʻu tupú ke talanoa ki he founga te nau ala fakaʻaongaʻi ai e fekau ko ʻení ʻi heʻenau moʻuí. ʻE malava ke ueʻi fakalaumālie foki hono kumi e founga naʻe fakaʻapaʻapaʻi ai ʻe Sīsū Kalaisi ʻEne Tamai Hēvaní mo ʻEne faʻē ko Melé (hangē ko ʻení, vakai, Luke 2:41–52; Liliu ʻa Siosefa Sāmitá, Sione 2:4, futinoutia]; Sione 8:29; 19:25–27). Ko e hā te tau lava ʻo ako mei he sīpinga ʻa Sīsuú ʻa ia te ne lava ʻo fakamālohia hotau vā fetuʻutaki mo ʻetau mātuʻá?

• ʻE ala tokoni ke mou talanoa fekauʻaki mo e ngaahi naunau ʻoku fie maʻu ke langa ʻaki ha fale ʻoku mālohí. Ko e hā ha niʻihi ʻo e ngaahi meʻa ʻoku fie maʻu ke langa ʻaki ha fāmili mālohí? ʻE lava ke kau ʻi he fealēleaʻakí ni haʻamou vahevahe e lea ko ʻeni ʻa ʻEletā L. Uitinī Keleitoni “Ko e meʻa mahuʻingá ko e faʻunga ʻo e ngaahi laumālie ʻo e kakai ʻoku nofo aí, kae ʻikai ko e falé” (“Ko e Ngaahi ʻApi Lelei Tahá,” Liahona, Mē 2020, 107–9). Te mou lava foki ʻo aleaʻi e ngaahi fokotuʻu ʻe fā naʻe fai ʻe ʻEletā Keleitoni ʻi heʻene pōpoakí ki he founga ke langa ai ʻa e “ngaahi ʻapi lelei tahá.”

• ʻOku kau ʻi he “Ko e Fāmilí: Ko ha Fanongonongo ki Māmani” ʻa e palōmesí ni: “Ko e fiefia ko ia ʻi he moʻui fakafāmilí ʻoku meimei ke toki aʻusia pē ia ʻi he taimi kuo langa ai ʻa e fāmilí ʻi he ngaahi akonaki ʻa e ʻEiki ko Sīsū Kalaisí.” ʻOku fokotuʻu fēfē ʻe he ngaahi akonaki ʻa e Fakamoʻuí ʻa e fakavaʻe ki ha fāmili fiefiá? ʻOku ʻomi ʻe he fanongonongo ki he fāmilí mo e ngaahi potufolofola ʻi he “Ngaahi Maʻuʻanga Tokoni Poupoú” ha ngaahi sīpinga. ʻE fetokoniʻaki fēfē e kau mēmipa ʻo e fāmilí ke nau moʻui ʻaki e ngaahi akonaki ko ʻení?

Ko e ngaahi akonaki ʻa Sīsū Kalaisí ʻa e fakavaʻe ʻo e fiefia ʻi he moʻui fakafāmilí.

Ngāue ʻi he Tui

Poupouʻi e kau mēmipa ʻo e kalasí pe kōlomú ke nau fakalaulauloto mo lekooti ʻa e meʻa te nau fakahoko ke ngāueʻi ai e ngaahi ongo ne nau maʻu ʻi he ʻaho ní. ʻE lava ke nau vahevahe ʻenau ngaahi fakakaukaú, ʻo kapau te nau loto ki ai. Fakaafeʻi ke nau fakakaukau ki he founga ʻe fakamālohia ai ʻe heʻenau ngaahi ueʻi fakalaumālié ʻa honau vā fetuʻutaki mo e Tamai Hēvaní mo Sīsū Kalaisí.

Ngaahi Maʻuʻanga Tokoni Poupoú

• Mātiu 5:21–24, 38–42; 6:14; 7:1–5; 22:36–39; 3 Nīfai 18:21; Molonai 7:33; Tokāteline mo e Ngaahi Fuakava 18:10–13

• Henry B. Eyring, “Ko ha ʻApi ʻOku ʻAfio ai e Laumālie ʻo e ʻEikí,” Liahona, Mē 2019, 22–25

• “ʻOfa ʻi ʻapí,” “Hoko ʻa ʻApi ko e Hēvani,” Ngaahi Himi, fika 187, 188

Ko e Faiako ʻi he Founga ʻa e Fakamoʻuí

Kapau ʻe ongoʻi ʻe he toʻu tupú ʻokú ke falala ange kiate kinautolu, ʻe toe tupulaki ai ʻenau falala ki honau ivi fakalangí, pea te nau fakaʻohovaleʻi koe ʻi he meʻa te nau lavaʻí. Tokoni ke nau sioloto ki he meʻa ʻoku ʻafioʻi ʻe he Tamai Hēvaní te nau lava ʻo aʻusiá.