faatanoa o le vai papatisoga

26 Novema

E Mafai Faapefea Ona Ou Fesoasoani i O‘u Tuaa ia Latalata Atili ia Iesu Keriso?

1 ma le 2 Peteru

aikona o le fefautuaai faatasi

Fefautuaai Faatasi

Taitaiina e se uso o le au peresitene o le korama po o le vasega; pe a ma le 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitaia lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni a oe lava fesili (tagai i le Tusitaulima Aoao, 10.2, 11.2). Fuafua ni auala e faatino ai mea tou te talanoaina.

• Ola i le talalelei. O a mataupu na talanoaina e le au epikopo i le tatou fonotaga a le aufono a le autalavou a le uarota? O a ni mea e mafai ona tatou faia o se vasega po o le korama e faavae i na talanoaga?

• Tausia o i latou e lē tagolima. E mafai faapefea ona tatou aapa atu i tagata i auala faaKeriso pe a tatou vaaia se manaoga ma ua tatou le iloa le tala e fai atu?

• Valaaulia tagata uma ia talia le talalelei. O a mea ua tatou maua i le talalelei a Iesu Keriso ua aumaia ia i tatou le olioli? E mafai faapefea ona tatou faasoa atu lena olioli i isi?

• Tuufaatasia o aiga mo le faavavau. O a mea o loo tatou faia e saili ai igoa o tatou tuaa o e o loo manaomia sauniga o le malumalu? O le a se mea e mafai ona tatou faia e fesoasoani ai i isi i le sailia o igoa o latou tuaa?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

aikona o le aoao atu le aoaoga faavae

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

O le a le mea e tupu i le faitau piliona o tagata o e maliliu e aunoa ma se avanoa moni e faalogo ai i le talalelei a Iesu Keriso po o le mauaina o sauniga faaola? E mafai ona tatou maua ni faaiteite o se tali i le 1 Peteru 3:18–20; 4:6, lea na tautala ai Peteru e uiga i le talaiina atu o le talalelei i e ua oti. Ona tatala mai lea e le Mataupu Faavae ma Feagaiga 138 le upumoni atoa—e mafai ona o mai atoatoa o tatou tuaa ia Keriso pe afai latou te faatuatua ia te Ia ma talia Lana talalelei ma tatou faia sauniga ia avanoa mo i latou i totonu o le malumalu. O lenei faamanuiaga e manaomia ai i tatou—o e tupuga mai ia i latou o loo i ai le talalelei—saili o latou igoa, o i le malumalu, ma maua sauniga faaola mo i latou.

O a ni aafiaga na e maua i le fesoasoani i ou tuaa ia latalata atili atu ia Keriso? E mafai faapefea ona e fesoasoani ia i latou o loo e aoaoina ia sili atu ona fiafia e uiga i talafaasolopito o aiga ma galuega faalemalumalu ma sili atu ona mautinoa i lo latou tomai e faia ai? A o e sauniuni, e mafai ona e faitau i le savali a Elder Dale G. Renlund “Galuega o Talafaasolopito o Aiga ma le Malumalu: Faamauga ma le Faamalologa” (Liahona, Me 2018, 46–49).

Aoao Faatasi

E faapefea ona tali atu tagata o lau vasega po o le korama i se tasi o loo taumanatunatu pe mafai faapefea ona faasaoina tagata lelei o e sa lei maua se avanoa e talia ai le talalelei? O a mea latou te maua i le 1 Peteru 3:18–20; 4:6 e fesoasoani e tali lenei fesili? I le vitio “Will I Do My Part?,” ua tuuina mai ai e Elder Enrique R. Falabella ni malamalamaaga faaopoopo. E mafai ona faaauau lau talanoaga ma se tasi pe sili atu foi o gaoioiga nei.

• O le aoaoga faavae o le faaolaina o e ua maliliu e tulaga ese e patino i le O Le Ekalesia a Iesu Keriso o le Au Paia o Aso e Gata Ai. Valaaulia tagata o le vasega po o le korama e suesue le Mataupu Faavae ma Feagaiga 138:25–39 o ni tagata taitoatasi po o ni vaega ma faasoa mai mea ua latou aoaoina (tagai i le “Punaoa Lagolago” mo mau faaopoopo i lenei autu). O a mea ua fautua mai e nei mau e uiga i lagona o le Tama Faalelagi i Ana fanau uma? E faapefea e le papatisoga mo e ua maliliu ona fesoasoani i o tatou tuaa ia latalata atili atu ia Keriso? E faapefea ona fesoasoani ia i tatou ia latalata atili atu ai ia Keriso ma faateleina ai lo tatou faatuatua ia te Ia?

• O le a se mea e ono musuia ai le autalavou ina ia auai atili i le galuega faalemalumalu ma talafaasolopito o aiga? Atonu e mafai ona latou matamata i se vitio se tasi po o vitio uma e lua o loo maua i le “Punaoa Lagolago” ma vaavaai mo auala e mafai ai e galuega o malumalu ma talafaasolopito o aiga ona faamanuiaina ai i latou. E mafai foi ona latou vaavaai mo faamanuiaga folafolaina i le lisi ua faailogaina i le savali a Elder Dale G. Renlund “Galuega o Talafaasolopito o Aiga ma le Malumalu: Faamauga ma le Faamalologa.” Valaaulia i latou e faasoa mai po o a faamanuiaga e taua ia i latou ma pe aisea. E mafai foi ona e talanoaina nisi o faafitauli e ono taofia ai i tatou mai le auai i galuega o le malumalu ma talafaasolopito o aiga. E mafai faapefea e le Faaola ona fesoasoani ia i tatou e faatoilalo nei faalavelave?

• Afai e maua e tagata o lau vasega po o le korama ni masini faatekinolosi, atonu e te faaaluina sina taimi e faaali atu ai ia i latou le ala na faafaigofie ai e le Alii nai lo se isi lava taimi le sailia o tuaa o e manaomia sauniga faaola (tagai i le “Punaoa Lagolago”). E mafai ona e valaaulia se faufautua o malumalu ma talafaasolopito o aiga a le uarota e fesoasoani i le autalavou ia malamalama i nei punaoa. E mafai foi ona e uunaia le autalavou e fai ni fuafuaga e suesue ai nei punaoa i le fale ma toe lipoti atu i se fonotaga i le lumanai.

tamaitai talavou o loo talanoa

A o tatou faatinoina sauniga paia i le malumalu, tatou te fesoasoani e faaavanoa faamanuiaga o le talalelei mo i latou ua maliliu.

Faatino i le Faatuatua

Ia uunai tagata o le vasega po o le korama e mafaufau loloto ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe o le a faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• Malaki 4:5–6; Mataio 16:18–19; Ioane 5:25; 1 Korinito 15:29; Mataupu Faavae ma Feagaiga 137:7–9 (O le aoaoga faavae o le togiolaina o e ua maliliu)

• “The Promised Blessings of Family History 1” and “The Promised Blessings of Family History 2” (vitio), ChurchofJesusChrist.org

• O le polokalama o Gafa o le Aiga (e manaomia ai le autalavou e saini e alu i totonu e faaaoga ai a latou faitotoa o le Ekalesia)

• RootsTech (E mafai e le autalavou ona sailiili i sauniga mai konafesi faatekinolosi.)

• FamilySearch.org (E mafai ona e asiasi i le FamilySearch.org/discovery ma suesue faatasi i nei gaoioiga.)

Aoao Atu i le Ala a le Faaola

A e valaaulia ia le autalavou e aoao atu, ia faaalu se taimi e fesoasoani ai e saunia ma le tatau. Faamalamalama atu mea e te faia e saunia ai e aoao atu. I lea auala o le a e fesoasoani ai i le autalavou e le gata mo na o se lesona se tasi ae mo le olaga atoa o le aoaoina o le talalelei i le auala a le Faaola.