10 Tesema

E Faapefea ona Faia e Iesu Keriso ia Taunuu le Fuafuaga a le Tama Faalelagi?

Faaaliga 1–5

Fefautuaai Faatasi

Taitaiina e se uso o le au peresitene o le korama po o le vasega; pe a ma le 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitaia lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni a oe lava fesili (tagai i le Tusitaulima Aoao, 10.2, 11.2). Fuafua ni auala e faatino ai mea tou te talanoaina.

• Ola i le talalelei. O faapefea ona tatou vaaia le aao o le Alii i o tatou olaga?

• Tausia o i latou e lē tagolima. E mafai faapefea ona tatou lagolagoina le tasi ma le isi i mea o loo tatou feagai ai?

• Valaaulia tagata uma ia talia le talalelei. E mafai faapefea ona sili atu lo tatou faaaogaina o tekinolosi o se meafaigaluega e faasoa atu ai le talalelei?

• Tuufaatasia o aiga mo le faavavau. O a tatou mea o loo fai e fesoasoani ai i o tatou aiga ia o mai ia Keriso?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

I se faaaliga, na vaai ai Ioane le Talifaaaliga i se tusi e faapea “e leai se tagata i le lagi, po o i le lalolagi, po o i lalo o le lalolagi” sa agavaa e tatala, ma o lenei mea na tagi ai o ia (tagai i le Faaaliga 5:3–4). O le tusi ua faatusa i “galuega a le Atua,” e aofia ai Lana fuafuaga mo lo tatou tino ola pea ma le ola e faavavau (tagai i le Mataupu Faavae ma Feagaiga 77:6; Mose 1:39). Ae i le faaaliga a Ioane, sa maua ai se Tamai Mamoe “ua agavaa e ave le tusi, ma tatala faamaufaailoga” (Faaaliga 5:9). O lenei tala fiafia na mafua ai le “ua mano ni mano, ma afe ni afe” o agelu e pepese ma alalaga i le olioli (Faaaliga 5:11). O Iesu Keriso, le Tamai Mamoe a le Atua, “na togiolaina i tatou i le Atua i [Lona] toto” (Faaaliga 5:9) ma mafai ai ona maua faamanuiaga o le fuafuaga a lo tatou Tama Faalelagi.

Mafaufau loloto i mea na faia e Iesu Keriso mo oe. Pe na i ai se taimi na e lagona ai e pei o i latou i le faaaliga a Ioane o e na “faapau … ma ifo atu ia te [ia]”? (Faaaliga 5:14). Mafaufau pe mafai faapefea ona e fesoasoani i tagata o lau vasega po o le korama ia malamalama atili i le matafaioi autu a Iesu Keriso i le fuafuaga a le Tama Faalelagi. E faaopoopo atu i le Faaaliga 1–5, e mafai foi ona e faitauina le 2 Nifae 9; “O Le Keriso Soifua: O Le Molimau a le Au Aposetolo” (ChurchofJesusChrist.org); ma le savali a Elder Ulisses Soares “O Iesu Keriso: O Le Tausiga o o Tatou Agaga” (Liahona, Me 2021, 82–84).

Aoao Faatasi

Atonu e fiafia tagata o lau vasega po o le korama e faafoliga o ni tagata pue ata o e ua talosagaina e faia se ata tifaga o le faaaliga a Ioane i le Faaaliga 5. Tuu atu ia i latou ni nai minute e toe faamanatu ai le mataupu ma fuafua po o a vaaiga latou te mananao e pueina. O a ni mea latou te lagona o le a avea ma taimi sili ona mamana? E faapefea e lenei ata ona fesoasoani e atinae le faatuatua i le Faaola? Ina ia faaauau pea ona fesoasoani i lau vasega po o le korama ia aoao e uiga i le matafaioi a Iesu Keriso i le fuafuaga o le faaolataga a le Tama Faalelagi, o ni nai fautuaga nei:

• E mafai ona e tusia ulutala nei i luga o le laupapa: Muai Olaga, Olaga Faitino, ma le Olaga Pe a Mavae le Oti. Valaaulia le autalavou e toe faamanatu fuaitau o mau i lalo o “Punaoa Lagolago” e aoao ai pe faapefea e le misiona a le Faaola i le taimi o Lona muai olaga, i le taimi o Lona soifuaga faaletino, ma ina ua mavae Lona Toetu ona faataunuu ai le fuafuaga a le Tama. E mafai ona latou aotelea mea na latou aoaoina mai i lalo o le autu talafeagai i luga o le laupapa. Tuu atu i tagata o lau vasega po o le korama se avanoa e faasoa mai ai o latou lagona e uiga i mea na faia e le Faaola mo i latou.

• Ina ia fesoasoani i le autalavou o loo e aoaoina ia malamalama atili i le mea na faia e Iesu Keriso ina ia taunuu ai le fuafuaga a le Tama Faalelagi, tusi se ala i luga o le laupapa e faatusa i la tatou malaga toe foi atu i lo tatou Tama oi le Lagi. Tusi ni mea faalavefau i le ala ua faaigoaina o le oti faaletino ma le oti faaleagaga. (Afai e manaomia, e mafai e le autalavou ona faitau i faauigaga i lalo o le “Oti, Faaletino” ma le “Oti, Faaleagaga” i le Taiala i Tusitusiga Paia [scriptures.ChurchofJesusChrist.org]). Na faapefea ona faia e le Faaola ia mafai e i tatou ona faatoilalo nei faalavefau? (tagai i le 2 Nifae 9:7–10). E mafai e le autalavou ona toe faamanatu le savali a Elder Ulisses Soares “Iesu Keriso: O Le Tausiga o o Tatou Agaga” ma tusi fuaiupu mai le savali i autafa o le ala lea e faaalia ai le ala e fesoasoani ai Iesu ia i tatou e toe foi atu i le Atua.

• Pe a fesili mai isi tagata ia i tatou ni fesili e uiga i o tatou talitonuga ma filifiliga tatou te faia, e mafai ona tatou faaaogaina le avanoa e faasoa mai ai pe aisea e taua ai Iesu Keriso ia i tatou. O se tasi o auala e saunia ai le autalavou mo na avanoa o le valaaulia lea o i latou e toe faamanatu le savali a Elder Dieter F. Uchtdorf “Faauta i le Tagata!” (Liahona, Me 2018, 107–10) ma vaavaai mo upumoni e faasoa atu e uiga ia Iesu Keriso. Atonu e te manao e lisi nisi o nei upumoni i luga o le laupapa. Ona mafai lea ona e tuuina atu i le autalavou se taimi e faataitai ai ona faamatala i le tasi ma le isi le mafuaaga tatou te manaomia ai Iesu Keriso ma pe na faapefea ona faamanuiaina o latou olaga ona ua latou iloa le Faaola.

O Le Faasatauroga o Keriso, saunia e Louise Parker

Faatino i le Faatuatua

Ia uunai tagata o le vasega po o le korama e mafaufau loloto ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe o le a faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• Ioane 1:1–3, 10; Eteru 3:14; Mose 4:1–2 (O le misiona a le Faaola i le muai olaga)

• Mosaea 3:5–11; Alema 7:11–13; Mataupu Faavae ma Feagaiga 19:16–19 (O le misiona a le Faaola i le taimi o Lona soifuaga faaletino)

• Ioane 14:2–3; 2 Nifae 9:15–17; Mataupu Faavae ma Feagaiga 45:3–5; 138:28–31 (O le misiona a le Faaola ina ua mavae Lona maliu ma le Toetu)

Aoao Atu i le Ala a le Faaola

O tagata taitoatasi o i lau vasega o se puna faaoaina o molimau, manatu ma aafiaga i le ola ai i le talalelei. Valaaulia i latou e faasoa atu ma siitia le tasi ma le isi.