pepe o Iesu

Auina Atu, saunia e Jenedy Paige

24 Tesema

E Faapefea Ona Faaalia e Iesu Keriso Lona Alofa mo A’u?

Kerisimasi

aikona o le fefautuaai faatasi

Fefautuaai Faatasi

Taitaiina e se uso o le au peresitene o le korama po o le vasega; pe a ma le 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitaia lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni a oe lava fesili (tagai i le Tusitaulima Aoao, 10.2, 11.2). Fuafua ni auala e faatino ai mea tou te talanoaina.

• Ola i le talalelei. O faapefea ona tatou maua le olioli i le mulimuli ai ia Iesu Keriso?

• Tausia o i latou e lē tagolima. O ai o la tatou uarota po o le nuu o manaomia la tatou fesoasoani? E mafai faapefea ona tatou fesoasoani ia i latou?

• Valaaulia tagata uma ia talia le talalelei. E mafai faapefea ona tatou fesoasoani i le tasi ma le isi ia saunia mo le galuega faafaifeautalai?

• Tuufaatasia o aiga mo le faavavau. E faapefea ona tatou fesoasoani i taumafaiga a le tatou uarota e faia talafaasolopito o aiga ma galuega o le malumalu?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

aikona o le aoao atu le aoaoga faavae

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

A o lei soifua mai o Ia, sa iloa Iesu Keriso o le Ieova silisili. O Ia o le “Pele ma le Filifilia o le Tama mai le amataga” (Mose 4:2), e tumu i le mamalu, alofa tunoa, ma le upumoni (tagai i le Ioane 17:5; Mataupu Faavae ma Feagaiga 93:11). Ae peitai ina ua soifua mai o Ia, sa “tuuina o ia e Maria i le faatanoa vao; aua sa leai se avanoa mo i latou i le faletalimalo” (Luka 2:7). Aisea na naunau ai Iesu Keriso e talia Lana matafaioi o le Faaola tusa lava pe o le a oo mai i le lalolagi i tulaga aupito maualalo? O le tali faigofie e alofa o Ia ia i tatou. Ina ua vaai Nifae i le fanau mai le Faaola i se faaaliga, sa ia molimau ai “o le alofa lea o le Atua, ua faamaligi ifo lautele o ia lava i loto o le fanauga a tagata; o lea, o le mea lea ua silisili atu ona manaomia i mea uma” (1 Nifae 11:22).

O le Kerisimasi o se taimi faapitoa e mafaufau loloto ai pe faapefea e le soifua mai o le Faaola ma Lana taulaga togiola ona faaalia ai Lona alofa mo oe. A o e sauni e fesoasoani i le autalavou o loo e aoaoina ia lagonaina le alofa o le Faaola, mafaufau e toe faamanatu le Luka 4:16–21; Ioane 3:16–17; 3 Nifae 27:13–16; ma le savali a Elder Elder D. Todd Christofferson “O Le Alofa o le Atua” (Liahona, Nov. 2021, 16–19).

Aoao Faatasi

A o latalata atu lau vasega po o le korama i le faaiuga o lau suesuega o le Feagaiga Fou i lenei tausaga, e mafai ona e fai atu i le autalavou e faasoa mai ni tala e sili ona fiafia i ai o le Feagaiga Fou lea na faaalia ai e le Faaola Lona alofa mo i latou na siomia o Ia. E mafai foi ona outou faitauina faatasi nisi o nei tala. O a mea ua aoao mai e nei fuaiupu e uiga i le alofa o le Faaola mo i tatou? Ina ia fesoasoani ia te oe e talanoa atili i le alofa o le Faaola, faaaoga gaoioiga e pei o nei.

• Valaaulia tagata o lau vasega po o le korama e mafaufau i le alofa o le Tama Faalelagi ma Iesu Keriso mo i tatou o se teufugalaau matagofie o fugalaau (tagai i le Russell M. Nelson, “Divine Love,” Ensign, Fep. 2003, 24). Mafaufau e tuu atu i tagata taitoatasi se fugalaau e oti mai se pepa ma fai atu ia i latou taitoatasi e faitau se tasi o fuaitau o mau i le “Punaoa Lagolago.” Fai atu ia i latou e tusi i luga o a latou fugalaau mea ua latou aoaoina e uiga i le alofa o le Tama Faalelagi ma Iesu mo i tatou. A o latou faasoa mai mea na latou aoaoina, e mafai ona latou tuufaatasia a latou fugalaau e fatu ai se teufugalaau. E mafai faapefea ona tatou iloa lelei ia auala e faaalia ai e le Tama Faalelagi ma Iesu lo Laua alolofa mo i tatou?

• E tele viiga o loo faamatala ai ni auala e faaalia ai e le Faaola Lona alofa mo i tatou (tagai, mo se faataitaiga, “Ua Ou Iloa Lo‘u Faaola,” Viiga, nu. 77). E mafai e tagata o le vasega po o le korama ona filifili se viiga ma faasoa mai ni aafiaga i se taimi na latou lagonaina ai le alofa o le Faaola i auala e talitutusa ma mea o loo faamatalaina i le viiga. O a nisi o auala ua faaalia ai e le Faaola Lona alofa mo i tatou? I le avea ai ma soo o Keriso, e mafai faapefea ona tatou fesoasoani ia lagonaina e isi Lona alofa?

• E tele manatu sese i le lalolagi e uiga i le alofa o le Atua mo i tatou. Mo se faataitaiga, atonu e manatu nisi afai e mau‘oa pe manuia tagata, o lona uiga e sili atu le alofa o le Atua ia i latou nai lo isi. Atonu e lagona e nisi afai sa alofa moni le Atua ia i tatou, o le a Ia taliaina i tatou e pei ona tatou i ai ma e le faatonuina i tatou e sui. O a savali sese e uiga i le alofa o le Atua ua tatou faalogo i ai? Ina ia fesoasoani e faafetaiaia nei savali sese, e mafai ona e fai atu i le autalavou e toe faamanatu le savali a Elder D. Todd Christofferson “O Le Alofa o le Atua” po o le savali a Peresitene Dallin H. Oaks “Alofa ma le Tulafono” (Liahona, Nov. 2009, 26–29). O a upumoni tatou te maua i nei savali e fesoasoani tatou te malamalama ai i le alofa o le Atua mo i tatou?

fugalaau.

O le alofa o le Tama Faalelagi ma Iesu Keriso e mafai ona faatusa i se teu fugalaau matagofie.

Faatino i le Faatuatua

Ia uunai tagata o le vasega po o le korama e mafaufau loloto ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe o le a faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• Ioane 3:16–17; 15:9–13; Roma 8:35–39; Eperu 12:5–6, 9–11; 1 Nifae 11:21–23; Alema 7:11–12; 3 Nifae 11:13–17; Moronae 7:45–48

• Michael John U. Teh, “O Lo Tatou Faaola Patino,” Liahona, Me 2021, 99--101

• Taniela B. Wakolo, “E Alofa le Atua i Ana Fanau,” Liahona, Me 2021, 94–96

Aoao Atu i le Ala a le Faaola

O mea uma sa faia e le Faaola i Lana galuega i le fogaeleele sa uunaia e le alofa—o Lona alofa mo Lona Tama ma Lona alofa mo i tatou uma. Faatasi ai ma le alofa faaKeriso i o tatou loto, o le a tatou sailia ai auala tatau uma e fesoasoani ai i isi e aoao ia Keriso ma o mai ia te Ia. O le alofa o le a avea ma mafuaaga ma uunaiga mo lo tatou aoao atu.