o se alii talavou o loo tufaina le faamanatuga

12 Novema

E Mafai Faapefea Ona Ou Faalatalata Atili atu ia Iesu Keriso e ala i Sauniga ma Feagaiga Paia?

Eperu 7–13

aikona o le fefautuaai faatasi

Fefautuaai Faatasi

Taitaiina e se uso o le au peresitene o le korama po o le vasega; pe a ma le 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitaia lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni a oe lava fesili (tagai i le Tusitaulima Aoao, 10.2, 11.2). Fuafua ni auala e faatino ai mea tou te talanoaina.

• Ola i le talalelei. Na faapefea ona tatou faalatalata atili i le Faaola? O faapefea ona tatou taumafai ia avea atili e faapei o Ia?

• Tausia o i latou e lē tagolima. O ai na i ai i o tatou mafaufau talu ai nei? E mafai faapefea ona tatou fesoasoani i nei tagata taitoatasi?

• Valaaulia tagata uma ia talia le talalelei. E faapefea ona tatou tali atu i fesili a tatou uo e uiga i le Ekalesia i se auala e faamalosia ai lo latou faatuatua i le Faaola?

• Tuufaatasia o aiga mo le faavavau. O a nisi o auala e mafai ona tatou faaleleia atili ai a tatou sootaga ma tagata o le aiga lautele, e pei o matua o matua ma tausoga?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

aikona o le aoao atu le aoaoga faavae

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

Mo le tele o seneturi, o le fanauga a Isaraelu, o nisi taimi e ta‘ua o Eperu, sa auai ma le filiga i sauniga e fesootai ma le falefetafai ma le tulafono a Mose. Ae o le toatele o i latou sa lei iloaina o nei mea o ni “mamanu o mea i le lagi”—“o se ata o mea lelei o le a oo mai” (Eperu 9:23; 10:1). O sauniga sa faamoemoe uma e aoao ai i latou e uiga ia Iesu Keriso. O le mea lea na faamatala e Paulo i lana Tusi i Eperu. E taua foi lana savali ia i tatou i aso nei aua ua ia i tatou foi sauniga paia ma le faamoemoega lava e tasi. E taua la le fesili ifo ia i tatou lava i fesili nei: Pe o fesoasoani nei sauniga ia i tatou ia manatua Iesu Keriso? Pe o i ai nisi mea e mafai ona tatou faia e lagona ai le mana o Iesu Keriso e ala i sauniga o le talalelei? Pe o tatou, pei ea o Eperu anamua, o loo misi lo latou taua loloto?

Mafaufau loloto i nei fesili a o e faitauina le Eperu 7–13 ma a o e sauni e aoao atu e uiga i le ala e aumaia ai i tatou e sauniga ma feagaiga ia latalata atili atu ia Iesu Keriso. E mafai foi ona e suesue i nisi o savali o le konafesi aoao o loo taua i lenei otootoga.

Aoao Faatasi

Ina ia fesoasoani ia i latou o loo e aoaoina ia iloa pe mafai faapefea ona latou faalatalata atili atu ia Iesu Keriso e ala i sauniga ma feagaiga o Lana talalelei, e mafai ona e valaaulia i latou e lisi nisi o sauniga o le talalelei ma a latou feagaiga e faatatau i ai i luga o le laupapa (tagai i Autu o le Talalelei, “Sauniga,” “Feagaiga,” topics.ChurchofJesusChrist.org). O a mea ua aoao mai e nei sauniga ma feagaiga ia i tatou e uiga ia Keriso ma Lana Togiola? O le saunoaga a Elder David A. Bednar i le “Punaoa Lagolago” o loo aumaia ai se faauigaga o sauniga ma isi malamalamaaga taua. O gaoioiga e pei o nei e mafai foi ona fesoasoani.

• E mafai ona e valaaulia le autalavou e faitau le Mataupu Faavae ma Feagaiga 84:19–22 ma talanoaina fesili e pei o nei: O le a le uiga o le “mana o le faaleatua”? Na faapefea ona fesoasoani sauniga ma feagaiga ia i tatou ia maua lena mana? O a eseesega e faia e sauniga ma feagaiga i o tatou olaga? E faapefea ona latou fesoasoani ia i tatou ia i ai pea le fesootai atu i le Faaola? Ina ia fesoasoani e tali nei fesili, e mafai e le autalavou ona faitau parakalafa muamua e fa o le savali a Elder Kent F. Richards “O Le Mana o le Faaleatua” (Liahona, Me 2016, 118) po o le savali a Elder Bednar “Ia Fausia Lenei Fale mo Lo’u Igoa” (Liahona, Me 2020, 84–87), aemaise lava le vaega “Mai Totonu i Fafo.”

• Mafaufau e fesili atu ia i latou e te aoaoina pe faapefea ona latou faamatalaina le sauniga o le faamanatuga i se tasi e le iloa se mea e uiga i ai. O le vaega “Aafiaga ma le Molimau” i le savali a Elder Taniela B. Wakolo “O Sauniga Faaola o le a Aumaia ia i Tatou le Malamalama Ofoofogia” (Liahona, Me 2018, 39–41) o loo aumaia ai se faataitaiga. E mafai foi e le autalavou ona maua aoaoga taua i le vitio “Always Remember Him” (ChurchofJesusChrist.org). E faapefea e le faamanatuga ona tatou latalata atili atu ai ia Iesu Keriso? O a ni avanoa o loo tatou maua e aoao ai isi i lenei mea?

• O le toe faamanatuina o fautuaga e lima i le savali a Elder Peter F. Meurs “E Mafai Ona Fesoasoani le Faamanatuga ia i Tatou ia Paia” (Liahona, Nov. 2016, 85–87) e mafai ona fesoasoani i le autalavou ia malamalama i le auala e saunia lelei ai mo le faamanatuga. Pe, afai e i ai ni talavou o loo sauniuni mo le mauaina o o latou faaeega paia, toe faamanatu faatasi le vaega ua faaautuina “E Uiga i le Faaeega Paia o le Malumalu” i le temples.ChurchofJesusChrist.org. Talanoaina pe mafai faapefea e nei sauniga paia ma a latou feagaiga e faatatau i ai ona fesoasoani e faalatalata atili atu ai i tatou i le Faaola.

• Mafaufau e tusi upu Faamanatuga, Papatisoga, ma le Malumalu i luga o le laupapa. I lalo o ia upu taitasi, valaaulia le autalavou e lisi ai feagaiga tatou te osia. O mau faasino o loo maua i le “Punaoa Lagolago” e mafai ona fesoasoani. Talanoa faatasi pe faapefea ona fesoasoani nei feagaiga tatou te latalata atili atu ai ia Iesu Keriso.

• E mafai ona e vaevaeina lau vasega po o le korama i ni vaega ma tofi vaega taitasi e toe faamanatu se vaega o le savali a Elder Ronald A. Rasband “Tutu Atu i a Tatou Folafolaga ma Feagaiga” (Liahona, Nov. 2019, 53–56) po o le savali a Elder D. Todd Christofferson “Aisea e Ala ai i Feagaiga” (Liahona, Me 2021, 116–19). Fautuaina i latou e faasoa mai mea ua latou aoaoina e uiga i le ala e faamalosia ai e le tausia o a latou feagaiga a latou sootaga ma Iesu Keriso.

tamaitai talavou o loo savavali i fafo o le malumalu

O sauniga paia o le talalelei e aumaia “le mana o le faaleatua” i o tatou olaga (tagai i le Mataupu Faavae ma Feagaiga 84:19–22).

Faatino i le Faatuatua

Ia uunai tagata o le vasega po o le korama e mafaufau loloto ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe o le a faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• Mosaea 18:8–10 (Feagaiga o le papatisoga)

• Moronae 4–5 (Feagaiga o le faamanatuga)

• Na aoao mai Elder David A. Bednar: “O sauniga paia e totonugalemu i le talalelei a le Faaola ma i le faagasologa o le o mai ia te Ia ma le sailia o le toefanauina faaleagaga. O sauniga o faatinoga paia e i ai le faamoemoega faaleagaga, le taua e faavavau, ma e fesootai ma tulafono ma faatonuga a le Atua. …

  “O sauniga o le faaolataga ma le faaeaga o loo faatautaia i le Ekalesia toefuataiina a le Alii e matua sili atu lava i lo sauniga po o faatinoga faafaatusa. Ae, latou te faia ni auala faatagaina ia e mafai ai e faamanuiaga ma mana o le lagi ona tafe mai i o tatou olaga taitoatasi. …

  “O sauniga e taliaina ma faamamaluina ma le amiosa’o e taua mo le mauaina o le mana o le faaleatua ma ua avanoa faamanuiaga uma e ala i le Togiola a le Faaola” (“Faatumauina Pea le Faamagaloina o a Outou Agasala,” Liahona, Me 2016, 59--60).

Aoao Atu i le Ala a le Faaola

Ao e valaaulia i latou o e aoaoina e faatino ia aoaoga faavae moni, o loo e fesoasoani ia i latou e faasafua atu lo latou aafiaga faaleaoaoga i o latou aiga ma olaga o aso uma.