22 Oketopa

E Mafai Faapefea Ona Ou Tumau Malosi i La‘u Tautinoga ia Iesu Keriso?

1 ma le 2 Tesalonia

Fefautuaai Faatasi

Taitaiina e se uso o le au peresitene o le korama po o le vasega; pe a ma le 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitaia lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni a oe lava fesili (tagai i le Tusitaulima Aoao, 10.2, 11.2). Fuafua ni auala e faatino ai mea tou te talanoaina.

• Ola i le talalelei. O a ni aafiaga lata mai ua faamalosia ai a tatou molimau?

• Tausia o i latou e lē tagolima. O ai e manaomia la tatou fesoasoani ma tatalo? O le a se mea ua musuia i tatou e fai e fesoasoani atu ai?

• Valaaulia tagata uma ia talia le talalelei. E faapefea ona avea i tatou ma malamalama i tagata o aiga po o uo e le tutusa o tatou talitonuga?

• Tuufaatasia o aiga mo le faavavau. E faapefea ona faaalia le tele o le alofa ma le lagolago mo tatou aiga ma faia se eseesega lelei i totonu o o tatou aiga?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

O le toatele o i tatou e iloa se tasi sa i ai se taimi na foliga mai na tuuto atoatoa atu ia Iesu Keriso ae talu mai lena taimi ua pauu ese mai lo latou faatuatua. O se mea masani le mafaufau, “Mata e tupu lena mea ia te au?” Sa viia e Paulo le Au Paia i Tesalonia mo lo latou faamaoni ae sa lagona le musuia e lapataia i latou e uiga i aoaoga sese ma isi faatosinaga e mafai ona faavaivaia ai lo latou faatuatua. Po o le a lava le malosi o la tatou tautinoga i le Faaola i le taimi nei, e tele lava mea e mafai ona tatou faia e “faaatoatoa ai le mea ua leai i lo tatou faatuatua” (1 Tesalonia 3:10).

A o e tatalo e uiga i tagata o lau vasega po o le korama, faalogo mo uunaiga e auina mai e le Alii ia te oe. O le a se mea e te lagona o le a fesoasoani ia i latou e tumau faamaoni ai i le Faaola tusa lava po o a mea faafeagai o le a latou feagai? O a ni mea sa mafai ona fesoasoani ia te oe? A o e sauni e aoao atu, e mafai ona e toe faamanatuina le savali a Elder Dale G. Renlund “Tautinoga Le Maluelue ia Iesu Keriso” (Liahona, Nov. 2019, 22–25) e faaopoopo i le 1 ma le 2 Tesalonia.

Aoao Faatasi

Ina ia fesoasoani i le autalavou e iloilo mea sa latou faitauina i le 1 ma le 2 Tesalonia ma faalauiloa atu le autu o le tumau malosi i la tatou tautinoga i le Faaola, e mafai ona outou faitau faatasi le 2 Tesalonia 2:1–3. Talanoa po o le a le uiga o le faaupuga “tetea ese”. Aemaise lava, o le a le uiga o le pau ese o se tagata mai ia Iesu Keriso? E mafai ona e faatusatusaina lenei faaupuga i isi fasifuaitau na faaaoga e Paulo, e pei o le “tutumau mausali i le Alii” (1 Tesalonia 3:8) ma “aua le vaivai i le faia o mea lelei” (2 Tesalonia 3:13). Ona e toe faamanatuina ai lea o le 1 Tesalonia 5:15–23. E mafai faapefea e le mulimuli i le fautuaga a Paulo i nei fuaiupu ona fesoasoani e taofia i tatou mai le pauu ese mai lo tatou faatuatua ia Iesu Keriso—e tusa lava pe tatou te feagai ma mea faafeagai? Faaaoga gaoioiga e pei o nei e fesoasoani ai i tagata o le vasega po o le korama ia tumau le malolosi ia latou tautinoga i le Faaola.

• E mafai ona musuia le aoao mai i faataitaiga a isi o e sa le maluelue i la latou tautinoga ia Keriso. Mo se faataitaiga, e mafai ona outou suesue faatasi i le faataitaiga a Aneti-Nifae-Liae, o e sa avea “o se nuu aivao ma maaa ma feai” ae “sa lei pauu ese lava” ina ua “faaliliuina i latou i le Alii” (Alema 17:14; 23:6–8). O le a se mea o fautua mai e le Alema 24:8–18 e uiga i le mafuaaga na latou tutumau faamaoni ai? O a filifiliga taua na latou faia? Na faapefea ona fesoasoani le Faaola ia i latou? O faataitaiga faaopoopo e mafai ona maua i le savali a Elder Dale G. Renlund “Tautinoga Le Maluelue ia Iesu Keriso.” Atonu e mafai e ni nai talavou ona faitau nisi o nei faataitaiga ma faasoa mai mea ua latou aoaoina e uiga i le tumau faamaoni ia Keriso. Na faapefea ona tatou tumau i le tuuto atu i le Alii e ui lava i o tatou faaletonu?

• I a tatou taumafaiga e faamalosia lo tatou faatuatua, e aoga le nofouta i uunaiga o loo saili e faavaivaia [o tatou faatuatua]. O le faaaliga a Liae i le laau o le ola o loo faamatala mai ai nisi o nei uunaiga. Atonu e mafai ona e faaali atu se ata o le faaaliga vaaia (tagai Tusi Ata o le Talalelei [2009], nu.69) ma toe faamanatu faatasi ia faamatalaga, o loo maua i le 1 Nifae 8:10–34. I le faaaliga, o le a le mea na taofia tagata mai le olioli i le fua o le laau? O le a se mea na fesoasoani i tagata e taunuu ai i le laau ma nonofo ai iina? O a ni mea oloo faatusatusa i ai nei mea i o tatou olaga?

• I lana savali “Mana e Faatoilalo ai le Fili” (Liahona, Nov. 2019, 110–12), na lisiina ai e Elder Peter M. Johnson ni auala se tolu ua taumafai Satani e faavaivaia ai i tatou. E mafai ona e tofia talavou taitasi e faitau e uiga i se tasi o nei mea ma faasoa atu i le vasega po o le korama ni faataitaiga o le auala o loo faaaoga ai e Satani lenei meafaigaluega e faasaga i le autalavou i aso nei. Ona mafai lea ona latou faitauina se tasi o fautuaga e fa a Elder Johnson mo le faatoilaloina o auala a le fili ma faasoa mai mea na latou aoaoina.

Aua Tou te Matata‘u, saunia e Michael Malm

Faatino i le Faatuatua

Ia uunai tagata o le vasega po o le korama e mafaufau loloto ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe o le a faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• 1 Nifae 2:9–10; Alema 17:1–3; Helamana 5:12

• Jeffrey R. Holland, “Le Alii e, Ua Ou Faatuatua,” Liahona, Me 2013, 93–94.

• Neil L. Andersen, “Aua Lava Nei Tuua o Ia,” Liahona, Nov. 2010, 41.

• Becky Craven, “Faaeteete faasaga i le Faasamasamanoa,” Liahona, Me 2019, 9–11

Aoao Atu i le Ala a le Faaola

I le tele o vaega, atonu e talafeagai le valaaulia o tagata aoao e fesoasoani i le tasi ma le isi e saili tali i a latou fesili. Pe a musuia e le Agaga, e mafai ona e filifili e faia lenei mea e tusa pe e te lagona e te iloaina le tali.