o le tina ma [lana] fanau teine o loo kuka

8 Oketopa

E Mafai Faapefea e le Talalelei a Iesu Keriso ona Fesoasoani ia te A‘u e Faamalosia Lo’u Aiga?

Efeso

aikona o le fefautuaai faatasi

Fefautuaai Faatasi

Taitaiina e se uso o le au peresitene o le korama po o le vasega; pe a ma le 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona, i le faaopoopo atu i le fefautuaai faatasi e faatatau i pisinisi patino a le korama po o le vasega, atonu e te manao e talanoaina uunaiga ma autu mai le konafesi aoao. Atonu o le a fesoasoani fesili nei.

• O a autu po o savali na tulagaese ia i tatou? O a mea na faamalosia ai lo tatou faatuatua ia Iesu Keriso?

• O a mea na faamalosia ai a tatou molimau e uiga i perofeta soifua? O a ni mea na tatou lagona le musuia e fai ona o mea na tatou aoaoina pe lagonaina?

• O a ni mea e tatau ona tatou faia o se vasega po o se korama e manatua ma faatino ai fautuaga na tatou faalogo i ai i le konafesi aoao?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

aikona o le aoao atu le aoaoga faavae

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

O nisi tagata i lau vasega po o le korama atonu e i ai ni aiga malolosi, ma agaalofa e faafaileleina le faatuatua ma le faaleagaga. O isi atonu e tuua na o i latou i a latou taumafaiga e ola i le talalelei, ma o nisi atonu e feagai ma finauga ma le lototiga i le aiga. Ae e leai se tasi i lau vasega po o le korama o i ai se aiga atoatoa, e saoloto mai luitau. Ma e mafai ona maua e tagata uma le mana o Iesu Keriso, lea e mafai ona faamaloloina ma faamalolosia ai aiga.

E finagalo le Faaola e faamanuia aiga. O nisi taimi o le ala Na te faia ai lenei mea e ala lea i le alofa ma faataitaiga a se tagata talavou o loo taumafai e mulimuli ia te Ia ma ola i Lana talalelei. A o e sauni e aoao atu le autalavou e uiga i le mana o loo avanoa ia i latou ma o latou aiga e ala ia Iesu Keriso, mafaufau loloto i mataupu faavae i le Efeso lea e mafai ona fesoasoani ia i tatou e faamalolosia ai sootaga faaleaiga. E mafai foi ona e suesue i le “O Le Aiga: O se Folafolaga i le Lalolagi” (ChurchofJesusChrist.org).

Aoao Faatasi

A uma ona tuuina atu i tagata o le vasega po o le korama se avanoa e faasoa mai ai mea na aoao atu e le Agaga ia i latou i lenei vaiaso a o latou suesueina le Efeso, vaavaai mo ni auala e faailoa atu ai le autu o le ala e mafai ai e Iesu Keriso ona fesoasoani ia i tatou e faamalolosia o tatou aiga. Mo se faataitaiga, e mafai ona e valaaulia le autalavou e sue ma faasoa mai fuaitau i le Efeso o loo i ai mataupu faavae e mafai ona tatou faaaogaina e faamalolosia ai sootaga faaleaiga. O nisi faataitaiga e ono aofia ai le Efeso 2:19–22; 3:14–19; 4:1–3, 25–26, 29–32; 5:1–2; 6:1–4. E mafai faapefea e le fautuaga i nei fuaiupu ona faamanuiaina se aiga? Na faapefea ona avea le Faaola ma Lana talalelei o se faamanuiaga i o tatou aiga? O nisi nei o manatu mo gaoioiga faaopoopo e faatatau i lenei autu.

• Afai e te manao e talanoaina le poloaiga ia “ava i lou tama ma lou tina” (Efeso 6:2), e mafai ona e amata i le fesili atu i tagata o le vasega po o le korama pe o le a le uiga o le upu ava ia i latou. Atonu e mafai e se tasi ona faasoa mai le faauigaga mai se lomifefiloi po o le Taiala i Tusitusiga Paia ((scriptures.ChurchofJesusChrist.org). Valaaulia le autalavou e talanoa pe faapefea ona latou faaaogaina lenei poloaiga i o latou lava olaga. E mafai foi ona musuia le vailiili o le ala na faamamaluina ai e Iesu Keriso Lona Tama i le Lagi ma Lona tina, o Maria (tagai, mo se faataitaiga i le, Luka 2:41–52; Faaliliuga a Iosefa Samita, Ioane 2:4 [i le Ioane 2:4, vaefaamatalagaa]; Ioane 8:29; 19:25–27). O le a se mea e mafai ona tatou aoao mai le faataitaiga a Iesu e mafai ona faamalosia ai a tatou sootaga ma o tatou matua?

• Atonu e aoga le talanoa e uiga i anomea e manaomia e fausia ai se fale malosi. O a nisi o mea e manaomia e fausia ai se aiga malosi? I le avea ai ma se vaega o lenei talanoaga, e mafai ona e faasoa atu le saunoaga lenei a Elder L. Whitney Clayton: “O le mea e taua o le mamanu o totonu o agaga o e o nonofo ai, ae le o le fausaga lava ia” (“O Aiga e Sili Ona Matagofie,” Liahona, Me 2020, 107–9). E mafai foi ona outou talanoaina fautuaga e fa na tuuina mai e Elder Clayton i lana savali mo le auala e fausia ai “aiga e sili ona matagofie.”

• “O Le Aiga: O Se Folafolaga i le Lalolagi” e aofia ai le folafolaga lenei: “E maua le fiafia i le olaga faaleaiga pe a faavae i aoaoga a le Alii o Iesu Keriso.” E faapefea e aoaoga a le Faaola ona fatuina le faavae mo se aiga fiafia? O le folafolaga i le aiga ma mau i le “Punaoa Lagolago” ua tuuina mai ai ni faataitaiga. E mafai faapefea e tagata o le aiga ona fesoasoani le tasi i le isi ia ola i nei aoaoga?

• Atonu e mafai e tagata o le vasega ona matamata i le vitio “Through Small Things,” lea e talanoa ai ni tei se toatolu e uiga i le taliaina o le valaaulia a lo latou epikopo e mafaufau i ni auala e faia ai lo latou fale o se nofoaga e paia atu. Na faapefea ona faamanuiaina le aiga o loo i le vitio ona o faatinoga a nei talavou? O le a le mea e mafai ona faia ai se fale o se nofoaga paia? Mafaufau e valaaulia le autalavou e talia le valaaulia lava lea e tasi na tuuina atu e le epikopo. Ina ia fesoasoani ia i latou e mafaufau i mea latou te ono faia, e mafai ona tou talanoaina le fesili o loo fesiligia i le vitio: “O le a se mea ua e naunau e fai ia maua ai le Agaga i lou aiga?”

o se aiga o loo suesue faatasi

O aoaoga a Iesu Keriso o le faavae lea mo le fiafia i le olaga faaleaiga.

Faatino i le Faatuatua

Ia uunai tagata o le vasega po o le korama e mafaufau loloto ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe o le a faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• Mataio 5:21–24, 38–42; 6:14; 7:1–5; 22:36–39; 3 Nifae 18:21; Moronae 7:33; Mataupu Faavae ma Feagaiga 18:10–13

• Henry B. Eyring, “O Se Aiga e Afio Ai le Agaga o le Alii,” Liahona, Me 2019, 22-25

• “A i ai i le Aiga le Alofa,” “O Se Lagi se Aiga,” Viiga, nu. 181, 179.

Aoao Atu i le Ala a le Faaola

Afai e lagona e le autalavou e te faatuatuaina i latou, o le a tuputupu ae o latou talitonuga i lo latou gafatia paia, ma o le a latou faateia oe i mea e mafai ona latou faataunuuina. Fesoasoani ia i latou ia iloa se vaaiga mamao o mea e silafia e le Tama Faalelagi e mafai ona avea ai i latou.